متا ۱۹
۱۹
عیسا دروأره‌یٚ طلأق چی گه؟
1 هطؤکی عیسا خو گبأنَ تومأنَ کوده، جلیلَ بٚنأ و بوشؤ ایتأ سأمأن جٚه یوهودیه کی اُردنٚ روخأنٚ اوطرف نٚهأ بو. 2 ایتأ پیله جِمِئیتم اونی دونبألسر رأ دکفتد و اویَه عیسا اَشأنٚ نأخوشأنَ شفأ بٚدأ.
3 بأزون بعضیتأ، جٚه فریسیأن بأمؤده کی بحث و بوگو بشتأوٚ اَمرأ، اونٚ ایدٚسی بٚزٚنٚد. پس عیسا‌یَ بوگفتٚده: «ینی مردأی ایجأزه دأره خو زنأکَ هرچی وأسی طلأقَ ده؟»
4 عیسا جوأب بٚدأ: «مگه موقدسٚ کیتأبأنٚ دورون نٚخأندیدی کی دونیأ سٚرَ گیفتنٚ موقع، دونیأ خألیق "اَشأنَ مردأک و زنأی بٚوجود بأوٚرده"#۱۹:۴ پیدأیش ۱:۲۷؛ ۵:۲. 5 و بٚفرمأسته: "هنٚ وأسیه کی مردأی خو پئر و مأرٚ جَا سیوأ وأبه و خو زنأکَ دوچوکه، و او دو نفر ایتأ بٚده"#۱۹:۵ پیدأیش ۲:۲۴.. 6 اَطؤیی، بأزون دِه دوتأ نییٚده بلکی ایتأیٚد. پس اونچی کی خودا دوچوکأنه، اینسأن سیوأ نوکونٚه.»
7 وأوٚرسِئده: «اگه اَطؤیه، چٚره موسا بٚفرمأست کی مردأی تأنِه خو زنأکَ طلأقنأمه فأدٚه، اونَ وِلَ کونٚه؟»
8 عیسا جوأب بٚدأ: «موسا شیمی سنگدیلی وأسی ایجأزه بٚدأ کی شیمی زنَ طلأقَ دید، ولی خودا جٚه خلقتٚ اوّل اَنَ نٚخأستی. 9 و من شٚمٚره گم، هرکی خو زنأکَ جغرز خیأنٚت هرچی وأسی طلأقَ ده، و ایتأ دِه زنأکٚ اَمرأ عروسی بوکونٚه، زٚنأکأر بٚحیسأب اَیِه.»
10 عیسا شأگردأن اونَ بوگفتٚده: «پس اَطؤیی، عروسی نوکودٚن بِیتره!»
11 عیسا بٚفرمأسته: «همه نٚتأنٚده اَ گبَ قوبیل بوکونٚد، مگه اوشأنی کی خودا، اَ قودرتَ اوشأنَ فأدأ بی. 12 بعضیتأن مأر بأوٚرده نقصٚ وأسی نٚتأنٚده عروسی بوکونٚد؛ بعضیتأنٚم مردوم، نأقیصَ کودٚد و نٚتأنٚد عروسی بوکونٚد؛ و بعضی‌یٚم خودا پأدیشأیی وأسی عروسی نوکونٚده. هرکی عروسی کوردنٚ اَ اصلَ انجأم دئنٚ رِه قودرتٚ دأره، وئألید اونَ قوبیل بوکونٚه.»
عیسا و زأکأن
13 مردوم خوشأنی زأکأنَ عیسا ورجأ بأوٚردٚد کی اون اوشأنٚ سٚر دٚس بٚنه و دوعأ بوکونٚه. ولی شأگردأن، اوشأنَ وأخأست بوکودٚد.
14 عیسا بٚفرمأسته: «وئألید زأکأن بأیٚد می ورجأ و اَشأنی جولویَ نیگیرید. چونکی خودا پأدیشأیی اوشأنٚ شین ایسه کی اَ زأکأنٚ مأنستَن ایسد.» 15 بأزین اوشأنی سٚر دٚس بٚنأ و اوشأنَ برکت بٚدأ و جٚه اویَه بوشؤ.
دینٚ حوکمأنَ انجأم دٚئن وٚست نییٚه
16 هو روجأنٚ دورون، اینفر بأمؤ عیسا ورجأ و وأوٚرسِه: «اوستأد، من چی خورومٚ کأر بوکونم کی بٚتأنم همیشٚکی زٚندیگی‌یَ بٚدأرم؟»
17 عیسا بوگفته: «چٚره می جَا کأرٚ نیکو وأسی وأوٚرسی؟ فقد اینفرایسأ کی نیکو ایسه. ولی تی جوأبٚ رِه وأستی بٚگم کی اگه خودا حوکمأنَ بٚدأری، همیشٚکی زٚندیگی‌یَ تأنی بٚدأری.»
18 وأوٚرسِه: «کویتأ جٚه حوکمأنَ؟»
عیسا جوأب بٚدأ: «قتل نوکون، زٚنأ نوکون، دوزدی نوکون، دورُغ شهأدت نٚوأدأن، 19 تی پئر و مأرَ ایحترأم بٚنه، و تی همسأده‌یَ تی جأنٚ مأنستَن دوس بٚدأر.»#۱۹:۱۹ خروج ۲۰:۱۲-۱۶؛ تثنیه ۵:۱۶-۲۰؛ لاویأن ۱۹:۱۸.
20 مردأی جوأب بٚدأ: «پیشتر همٚتأ اَ حوکمأنَ انجأم بٚدأم. اَسه دِه چی وأ بوکونم؟»
21 عیسا اونَ بوگفته: «اگه خأیی اَ رأیَ کأمیلَ کونی، بوشو و هرچی دأری بوفروش و اونی پولَ فأدٚن فِقِرأنَ کی تی گنج آسمأنٚ دورون بمأنه نه زیمینٚ سٚر! بأزون بیأ می جَا پیروی بوکون!» 22 ولی او وخت کی او جوأنٚ مردأی اَنَ بشتأوسته، دیلخور جٚه اویَه بوشؤ، چونکی خٚیلی مأل و مینأل دأشتی.
23 بأزون عیسا خو شأگردأنَ بوگفته: «اَنَ بدأنید کی مأل و مینألدأرأنٚ رِه آسمأنٚ پأدیشأیی‌یَ بودورون شؤئؤن خٚیلی سخت ایسه. 24 بأزم شٚمٚره گم، شوتورٚ دٚوأرٚستن سوزنٚ سولأخٚ دورون رأحتتره تأ ایتأ مأل و مینألدأرٚ آدم خودا پأدیشأیی دورون بشه!»
25 شأگردأن اَ گبٚ جَا دأل بأوٚردٚد، وأوٚرسِئده: «پس کی تأنه اَ دونیأ دورون نیجأت بیأفه؟» 26 عیسا اوشأنَ فأندرسته و بٚفرمأسته: «اینسأنٚ فیکرٚ جَا اَ کأر ایمکأن نأرِه، ولی خودا رِه همه چی ایمکأن دأره.»
27 پطرس بوگفته: «اَمأن کی همه چی جَا دٚس بٚکشِییم کی تی جَا پیروی بوکونیم، اَمٚرَه چی بیگیر اَیِه؟»
28 عیسا جوأب بٚدأ: «او وخت کی من او تأزه دونیأ دورون می سلطنتٚ تختٚ رو بینیشینم، شومأن می شأگردأنٚم دوأزده‌تأ تختٚ رو نیشینید، ایسرأییلٚ دوأزده‌تأ قبیله‌یَ دأوری کونیدی. 29 هرکی می وأسی خو برأر و خأخور، پئر و مأر و زأی، خأنٚه و زیمینٚ جَا خو چومَ دٚوٚده، صد چندأن ویشتر یأفه و همیشٚکی زٚندیگیم بٚدٚس اَوٚره. 30 ولی خٚیلیأن کی اَسه اوّل ایسأده، آخر بٚده و اوشأنی کی آخرٚده، اوّل.»
Currently Selected:
متا ۱۹: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org