متا ۱۸
۱۸
زأکأنٚ مأنستَن سأده دیل بیبید
1 هو وخت، شأگردأن بأمؤده عیسا ورجأ وأوٚرسِئده: «خودا پأدیشأیی میأن جٚه همه کس پیله‌تر کیسه.»
2 عیسا ایتأ کوجه‌دأنه زأکَ دؤخأده و اونَ بأوٚرده شأگردأنٚ میأن، 3 و بوگفته: «تأ شٚمٚره عوضَ نوکونید و زأکأنٚ مأنستَن نیبید، هیوخت نتأنید خودا پأدیشأیی دورون بیشید. 4 پس هرکی خؤرَه اَ زأکٚ مأنستَن محجوب چأکونه، خودا پأدیشأیی دورون پیله‌تره؛ 5 و هر کی می وأسی اَطؤچی زأکَ قوبیل بوکونٚه، در اصل مٚرَه قوبیل بوکوده. 6 ولی اگه اینفر بأعیث بٚبه ایتأ جٚه اَ زأکأن کی مٚرَه ایمأن دأرٚده، خو ایمأنَ جٚه دٚس بٚده، اونٚ رِه بِیتره کی ایتأ پیله سنگ اونی گردنٚ دؤر دٚوٚدٚد و تأوٚدأ بٚبه دریأ دورون.
7 «وای بحألٚ اَ دونیأ کی بأعیث به مردوم خوشأنٚ ایمأنَ جٚه دٚس بٚدٚد! گونأ کودنٚ وسوسه همیشٚک نٚهأ، ولی وای بحألٚ اونی کی مردومَ وسوسه بوکونٚه. 8 اگه تی دٚس یا تی پأ، تٚرَه لغزش تأوٚده، اونَ وأوین و فیشأن، چونکی بِیتره کی ای دٚس و ای پأ اَمرأ بیشی بیهِشت، تأ اَنکی دو دٚس و دو پأ اَمرأ تأوٚدأ بیبی او آتشٚ دورون کی هیوخت خأموشَ نیبه. 9 و اگه تی چوم تٚرَه لغزش تأوٚده، اونَ کأسه جَا بیرون بأوٚر و فیشأن، چونکی بِیتره ایتأ چومٚ اَمرأ بیشی بیهِشت، تأ اَنکی دوتأ چومٚ اَمرأ تأوٚدأ بیبی جهندمٚ آتشٚ دورون.
10 «هیوخت اَ کوجه زأکأنَ دٚس پٚرَ نیگیرید، چونکی اوشأن آسمأنٚ دورون فٚرٚشته‌یأنی دأرٚده کی همیشٚک می آسمأنی پئرٚ ورجأ حأضیرَ بٚده. 11 چونکی اینسأنٚ پٚسر بأمؤ تأ اَویرَ بوسته‌یَ نیجأت بٚده.
اَویرَ بوسته گوسوٚندٚ دأستأن
12 «اگه ایتأ مردأی صدتأ گوسوٚند بٚدأره و ایتأ جٚه اوشأن گلّه جَا دورَ بٚه و اَویرَ بٚه، او مردأی چی کونه؟ ینی او نود و نه‌تأ گوسوٚندَ کوه دورون سٚرَ نٚده کی او اَویرَ بوسته گوسوٚندٚ دونبأل بگرده؟ 13 هطؤیه، اون شِه و او وخت کی اونَ بیأفته، او ایتأ گوسوٚندٚ وأسی ویشتر خوشألَ به تأ او نود و نه‌تأ گوسوٚندٚ وأسی کی خطرٚ دورون نئیسأبود. 14 هطؤیٚم، شیمی آسمأنی پئر نٚخأیه کی حتّا ایتأ جٚه اَ زأکأن، جٚه دٚس بٚشٚد و هلأکَ بد.
حقٚ سعی بٚزٚن تی برأرٚ اَمرأ آشتی بوکونی
15 «اگه ایتأ برأر، تی حق بٚدی بوکونٚه، بوشو و خلوتی اونی اَمرأ گب بٚزٚن و اونَ خو ایشتیوأ جَا وأخٚوٚرَ کون. اگه تی گبَ بشتأوسته و بٚگٚردٚن بیگیفته، تی برأرَ دووأره بیأفتی. 16 ولی اگه قوبیل نوکوده، اَیدٚفأرِه دوتأ یا سه‌تأ شأهیدٚ اَمرأ اونی ورجأ بوشو کی اَ آدمأن تی گبأنٚ شأهید بٚبٚد. 17 ولی اگه ایوأردِه شیمی گبأنَ نشتأوٚسته، بأزون موضو‌یَ کیلیسا رِه بوگو و اگه کیلیسا تٚرَه حق فأده و او برأر بأزم قوبیل نوکوده، بأزون کیلیسا وأستی اونی اَمرأ ایتأ غریبه یا فأسیدٚ بأج‌فأگیرٚ مأنستَن رفتأر بوکونٚه. 18 ایطمینأن بٚدأرید اونچی کی زیمینٚ سٚر دٚوٚدید، آسمأنٚ دورونم دٚوٚستٚه بِه و اونچی زیمینٚ رو وأکونید، آسمأنٚ دورونم وأزَ به.
19 «اَنٚم شٚمٚره گم کی اگه دو نفر جٚه شومأن اَیَه زیمینٚ سٚر ایچی وأسی کی خودا جَا خأیید کس‌کسٚ اَمرأ همدیل بیبید، می آسمأنی پئر اونَ شٚمٚره فأدِه. 20 چونکی هرجأ کی دو یا سه نفر می نأمٚ وأسی جمَ بد، من اویَه اوشأن میأن ایسأم.»
چٚره لأزیم ایسه کی بٚبخشیم
21 هه وخت پطرس بأمؤ و وأوٚرسِه: «آقأ جأن، او برأر کی مٚرَه بدی کونِه، چن دٚفأ وأستی بٚبخشم؟ ینی هفت وأر؟»
22 عیسا جوأب بٚدأ: «نه هفت وأر، بلکی هفتأد دٚفأ هفت وأر.»
23 هطؤیٚم بوگفته: «آسمأنٚ پأدیشأیی ایتفأقأن او پأدیشأ ماجیرأیَ مأنه کی تصمیم بیگیفته خو حیسأبأنَ صأفَ کونه 24 هطؤ کی اَ کأرَ کودأندوبو، ایتأ جٚه قرضدأرأنَ بأوٚردٚد دربأرٚ دورون کی ایتأ پیله پول دراصل "ده هیزأر قنطأر"#۱۸:۲۴ دوروست «ده هیزأر قنطأر». ای قنطأر ۶٬۰۰۰ دینأرٚ مأنستَن اَرزِه کی ایتأ سأده کأرگرٚ ۲۰ سألٚ دسمزدٚ اَندر بو. پأدیشأیَ قرضدأر بو. 25 ولی چونکی پول نأشتی خو قرضٚ فأدٚه، پأدیشأ دستور بٚدأ اونی قرضٚ عوض، خودش و اونی زن و زأکأنَ، تومأمٚ مأل و مینألٚ اَمرأ بوفروشٚد. 26 ولی او مردأی پأدیشأ پأ جیر بٚکٚفت و ایلتیمأس بوکود و بوگفته: "اَی پأدیشأ خأهیش کونم مٚرَه فورصت بدید کی می قرضَ تأ آخر همّه فأدٚم." 27 پأدیشأ دیل اونٚ رِه بوسؤخته و اونَ آزأدَ کود و اونی قرضَ بٚبخشه. 28 ولی او وخت کی اَ قرضدأر، پأدیشأ دربأرٚ جَا بیرون بأمؤ، توندأ توند خو همکأرٚ دونبأل بوشؤ کی فقد صد دینأر، #۱۸:۲۸ دینأر ایتأ سکه بو کی، ایتأ سأده کأرگرٚ روزمزدٚ دسمزدٚ اَندر بو.اونی جَا طلب دأشتی. پس اونی گولی‌یَ فیچأل بٚدأ و بوگفته: "آها زود، تی قرضَ فأدٚن!" 29 قرضدأر اونی پأ جیر بٚکٚفته و ایلتیمأس بوکوده: "خأهیش کونم مٚرَه فورصت بٚدٚن کی تومأمٚ می بٚدٚهی‌یَ تٚرَه فأدٚم." 30 ولی طلبکأر رأضی نوبوسته و اونَ تأوٚدأ زندأن کی اونی پولَ تومأم و کمأل فأده. 31 او وخت کی البأقی خأدیمأن اَ مأجیرأیَ بشتأوستٚد، خٚیلی دیلخورَ بوستٚد و بوشؤده پأدیشأ ورجأ و تومأمٚ مأجیرأیَ اونی عرض فأرٚسأنِده. 32 پأدیشأ دفأتن او مردأکَ بٚخأسته و اونَ بٚفرمأسته: "اَی ظألیمٚ بدذأت! من تی خأهیشٚ وأسی او پیله قرضَ بٚبخشِم. 33 ینی تی همکأرٚ حق نوبو کی اونَ رحم بوکوده‌بی، هوطؤ کی من تٚرَه رحم بوکودم؟" 34 پأدیشأ خٚیلی توند برزخَ بوسته و دستور بٚدأ اونَ تأوٚدٚد زندأن و شکنجه بٚدٚد، و تأ آخرٚ دینأر خو قرضَ فأندأ، اونَ آزأدَ نوکونٚد.
35 «هطؤیه، می آسمأنی پئر اَطؤیی شیمی اَمرأ رفتأر کونه اگه شومأن شیمی برأرَ جأنٚ دیلٚ اَمرأ نٚبٚخشید.»
Currently Selected:
متا ۱۸: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org