متا ۱۷
۱۷
شأگردأن مسیح شوکویَ دینٚده
1 شیش روج کی بوگوذشت، عیسا پطرس و یعقوب و اونی برأر یوحنایَ اوسأده ببرده ایتأ کوه جؤری، خلوتٚ جیگأ. 2 اویَه، عیسا شیکلٚ شٚمأئیل، اوشأنَ چومأنٚ ورجأ وأگٚردٚست، طوری کی اونی دیم آفتأبٚ مأنستَن شبق زِئی، و اونی لیوأس نور مأنستَن، سیفیدَ بو.
3 نأخٚوٚرکی موسا و ایلیا خوشأنٚ بٚنٚمأستٚد و شورو بوکودٚد عیسا اَمرأ گب زِئن. 4 پطرس قأقَ بوسته بوگفته: «آقأ جأن، چی خُبه کی اَمأن اَیَه ایسأییم. اگه بٚخأیی، سه‌تأ سایبأن چأکونم، ایتأ تِرِه، ایتأ موسا رِه، و ایتأ دِه ایلیا رِه.»
5 هنو پطرسٚ گب تومأنَ نوبوسته بو کی ایتأ اَبر کی سوسو زِئی اَشأنٚ سٚرٚ رو سأیه تأوٚدأ و ایتأ صدا اونی جَا بأمؤ کی: «اَن می جأن و دیلٚ پٚسره کی اونی جَا رأضی‌یٚم؛ اونی گبأنَ گوش بدید.»
6 اَ صدا ایشتأوٚستٚنٚ اَمرأ، شأگردأن زیمینٚ سٚر بکفتٚد، ترس جَا بٚپٚرکٚستٚد. 7 عیسا نیزدیکَ بو و خو دٚسَ اوشأنٚ رو بٚنأ و بٚفرمأست: «ویریزید، نوأترسِئنید!»
8 او وخت کی اوشأن خوشأنی چومأنٚ وأکودٚد، جغرز عیسا کسی‌یَ نیدِده.
9 او وخت کی کوه جَا بیجیر اَمؤندوبود، عیسا اَشأنَ بٚفرمأسته: «اونچی کی بیدِییدی هیکسٚ رِه هیچی نیگید تأ او زمأت کی اینسأنٚ پٚسرَ، مٚردنٚ پٚسی زٚنده به.»
10 شأگردأن اونی جَا وأوٚرسِئده: «چٚره یوهودٚ دینٚ عألیمأن ایصرأر دأرٚده کی مسیحٚ ظوهور کودن جَا پیشتر، وأستی ایلیایٚ نبی دووأره ظوهور بوکونه؟»
11 عیسا جوأب بٚدأ: «البت کی اوّل ایلیا اَیِه کی همه چی‌یَ آمأدَه کونه. 12 ولی من شٚمٚره گم کی ایلیا بأمؤ ولی کسی اونَ نشنأخته و اونی اَمرأ، خٚیلی بد رفتأر بوکودٚد. هطؤیٚم اینسأنٚ پٚسرم اوشأنٚ دٚسٚ جَا آزأر دینه.»
13 بأزین شأگردأن بٚفأمٚستد کی عیسا، یوحنا کی تعمید دٚئی جَا گب زِئندره.
دیو بٚزِه پٚسرِکٚ شفأ دٚئن
14 او وخت کی کوه جَا بیجیر بأمؤده، ایتأ پیله جِمئیتَ بیدٚ‌د. ایتأ مردأی جٚه او دورون بأمؤ، عیسا ورجأ زانو بٚزِه و بوگفته: 15 «آقأ جأن، می پٚسرَ رحم بوکون؛ اونَ آزأر گیره فٚلأگأنه، جوری کی خؤرَه تأوٚده آتش و آبٚ میأن. 16 من اونَ شیمی شأگردأنٚ ورجأ بأوٚردٚم، ولی اَشأن نٚتأنٚستٚد اونَ شفأ بٚدٚد.»
17 عیسا جوأب بٚدأ: «اَی بی‌ایمأن و نأفرمأن مردوم! تأ کی وأ شیمی کردکأرأنَ تحمول بوکونم؟ اونَ بأوٚرید می ورجأ.» 18 بأزین عیسا او پٚلیدٚ روحٚ رِه، کی او رِیکٚ دورون ایسأ بو، ایجگره بٚزِه و او روح، رِیکٚ جَا بیرون بأمؤ و هو زمأت، اون شفأ بیأفته.
19 بأزین شأگردأن خلوتی، عیسا جَا وأوٚرسِئده: «چٚره اَمأن نٚتأنٚستیم او پٚلیدٚ روحَ او رِیکٚ جَا بیرونَ کونیم؟»
20 عیسا بوگفته: «جٚه اَ خأطر کی شیمی ایمأن کمه. رأس‌رأسِی شٚمٚره گم اگه ایتأ کوجه خردٚلٚ دأنه اَندرم ایمأن بٚدأرید، تأنیدی اَ کوهَ بیگید "جٚه اَیِه بوشؤ اویَه!" و اونم شِه. اونی رِه کی ایمأن بٚدأره، هی کأری نوبوستٚنی نییٚه. 21 ولی اَجور پٚلیدٚ روح بدنٚ جَا بیرون نشه جغرز دوعأ و روزه اَمرأ.»
عیسا ایوأردِه خو مٚردنَ پیشگویی کونه
22 هو روجأنٚ دورون کی جلیلٚ دورون ایسأبود، عیسا اَشأنٚ بوگفته: «اینسأنٚ پٚسرَ، مردومٚ دٚس تسلیمَ کونٚده. 23 اوشأن اونٚ کوشٚده، ولی سیومی روجٚ رِه زٚنده به.» اَ گبأنٚ ایشتأوٚستٚنٚ اَمرأ شأگردأنٚ دیلَ غم دکفته.
معبدَ مألیأت فأدأن
24 او وخت کی فأرٚسِده کفرناحوم، معبدٚ مألیأت فأگیرٚ مأمورأن، بأمؤده پطرسٚ ورجأ، اونی جَا وأوٚرسِئده: «شیمی اوستأد معبدٚ مألیأتَ فأدَه؟» 25 پطرس جوأب بٚدأ: «بله کی فأدَه!»
بأزین بوشؤ خأنه دورون کی موضو‌یَ عیسا رِه بٚگه. ولی جٚه قبلٚ اَنکی گبی بٚزٚنه، عیسا اونَ وأوٚرسِه: «پطرس#۱۷:۲۵ یونأنی: شمعون.، چی گومأن کونی؟ جهانٚ پأدیشأیأن آیا خوشأنٚ مردومٚ جَا بأج و خراج فأگیرٚده، یا غریبه‌یأنٚ جَا کی اسیرَ بوستٚد؟»
26 پطرس جوأب بٚدأ: «غریبه‌یأنٚ جَا.»
عیسا بٚفرمأست: «پس اَیَه آدمأن، بأج نوأستی فأدٚد! 27 ولی عأیب نأرِه، جٚه اَ خأطر کی اَشأنٚ نأرأحتَ نوکونیم، بوشو سأحیل، دأم تأوٚد و اوّلین مائی کی بیگیفتی، اونی دٚهٚنَ وأکون؛ ایتأ سکه #۱۷:۲۷ یونأنی: «استاتر» (ایتأ یونأنی سکه کی چأر دِرهم به).اونی دورون یأفی کی اَمی دو نٚفٚرٚ مألیأت فأدأنٚ رِه وٚسته. اونَ فأدن اوشأنَ.»
Currently Selected:
متا ۱۷: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org