متا ۱۶
۱۶
موجیزه خأستٚن
1 ایتأ روج فریسیأن و صدوقیأن کی قومٚ مذهبی و سیأسی پیله کسأن بود، بأمؤده عیسا‌یَ ایمتٚحأن بوکونٚد. هنٚ وأسی اونٚ جَا بٚخأستٚد کی ایتأ آسمأنی نیشأنه اَشأنَ نیشأن بٚده کی خو ایقتدأرَ ثأبیت بوکونٚه.
2 اون جوأب بٚدأ: «شومأن خُب تأنیدی هوایَ پیشبینی بوکونید. اگه زوأله موقع، آسمأن سورخ بٚبه، گیدی فردأ هوا خُب بِه 3 و اگه صُب، آسمأن سورخ بٚبه، گیدی وأرٚش اَیِه. شومأن کی آسمأنٚ نیشأنٚه‌یأنَ تعبیر کونیدی، چوطؤ نتأنیدی زمأتأنٚ نیشأنٚه‌یأنَ تعبیر بوکونید! 4 اَ شرور و زٚنأکأرٚ نتأج، ایتأ نیشأنه خأیه! ولی جٚغرز یونسٚ نبی نیشأنه، هیتأ نیشأنه اَشأنَ فأدأ نیبِه.» اَنَ بوگفته و اَشأنٚ جَا سیوأ وأبوسته.
فریسیأن و صدوقیأنٚ خمیرمأیه
5 او وخت کی فأرٚسِده دریأ، اوسر، شأگردأن وأخٚوٚرَ بوستٚد کی اَشأنَ جٚه خأطرَ شؤ خوشأنٚ اَمرأ نأن اوسأنٚد. 6 عیسا اَشأنَ بٚفرمأست: «شیمی حواس بمأنه و شٚمٚره جٚه فریسیأن و صدوقیأنٚ خمیرمأیه دور بٚدأرید.»
7 بأزین شأگردأن کس‌کسٚ اَمرأ بوگو وأگو کودأندوبود کی چوطؤ اَشأنٚ جٚه خأطرَ شؤ نأن اوسأنٚد.
8 عیسا بٚفأمٚسته کی چی وأسی کس‌کسٚ اَمرأ گب زِئندٚرٚده. پس بوگفته: «ای کم ایمأنأن، چٚره اَنٚ وأسی کی نأن نأریدی، بحث کودأندٚریدی؟ 9 ینی هنویٚم نٚفأمیدی؟ شٚمٚره یأد نییٚه او پنج‌تأ نأن و پنج هیزأر نفر و چنتأ بالٚکأ کی اوسأدید؟ 10 یا شٚمٚره جٚه خأطرَ شؤ کی ایوأردِه هفت‌تأ نأن اَمرأ، چأرهیزأر نٚفٚرٚ سِئرَ کودم؟ چنتأ زیبیل، خورده‌یأنٚ جَا جمَ کودیدی؟ 11 پس چٚره نٚفأمیدی کی من نأنٚ جَا گب نٚزِئِندٚرٚم؟ بأزم گم: فریسیأن و صدوقیأنٚ خمیرمأیه جَا شٚمٚره دؤر بٚدأرید.»
12 بأزین شأگردأن بٚفأمٚستد کی عیسا منظور جٚه «خمیرمأیه»، هو آموجه‌یأن ایسه کی فریسیأن و صدوقیأنٚ دٚهٚده.
عیسا شخصیت جٚه پطرسٚ نظر
13 او وخت کی عیسا فأرٚسِه فیلیپی قیصریه، خو شأگردأنٚ جَا وأوٚرسِه: «مردوم گده اینسأنٚ پٚسر کیسه؟»
14 جوأب بٚدأده: «بعضیتأن گٚد، یوحنا ایسه کی تعمید دٚئی؛ بعضیتأنٚم گده ایلیا، یا اِرمیا و ایتأ دِه جٚه پیغمبرأن ایسه کی دووأره ظوهور بوکوده.»
15 بأزین وأوٚرسِه: «شومأن چی گیدی؟ شیمی نظر چیسه، من کی ایسٚم؟» 16 شمعونٚ پطرس جوأب بٚدأ: «تو مسیح ایسی، زٚنده خودا پٚسر!»
17 عیسا بٚفرمأسته: «اَی شمعون، یونا پٚسر، خوشأ بحألٚ تو! چونکی تو اَ حِئقتَ اینسأنٚ جَا نأموختی، بلکی می آسمأنی پئر اَنَ تٚرَه وأشکأفأنٚه. 18 و منم گم کی تو پطرس ایسی، ینی "صخره"، و من اَ صخره رو، می کیلیسایَ چأکونم، و جهندمٚ قودرتأن هیوخت نتأنِه اونَ نأبودَ کونه. 19 من خودا پأدیشأیی کیلیدأنَ تٚرَه فأدٚم. اونچی کی زیمین رو دٚوٚدی، آسمأنٚ دورون هم دٚوٚستٚه بِه، و اونچی زیمینٚ سٚر وأزَ کونی، آسمأنٚ دورونم وأزَ بِه.»
20 بأزون خو شأگردأنَ تأکیدٚ اَمرأ دستور بٚدأ هیکسٚ رِه نٚگد کی اون مسیح ایسه.
عیسا پیشگویی دروأره‌یٚ خو مٚردن
21 جٚه او وخت، عیسا خو شأگردأنٚ رِه وأشکأفأنٚه کی وأستی بشه اورشلیم و اَنکی اویَه پیله کسأن و پیله کأهینأن و دین عألیمأن اونَ اَذِت و آزأر دٚهٚده، کوشٚده، ولی سیومی روجٚ رِه زٚنده بِه.
22 پطرس اونَ فأکشه ایتأ گوشٚه، موخألفتٚ اَمرأ اونَ بوگفته: «آقأ جأن، خودا نوکونٚه کی اَطؤچی تٚرَه ایتفأق دکفه.»
23 عیسا وأگردسته و پطرسَ بٚفرمأسته: «می جَا دورَ بو اَی شیطان! چونکی تو می رأ رِه ایتأ مأنع ایسی! تو اینسأنی فیکرٚ اَمرأ اَ موضو‌یَ فأندٚری، نه خودایی فیکرٚ اَمرأ.»
24 بأزین عیسا خو شأگردأنَ بوگفته: «اگه اینفر جٚه شومأن بٚخأیٚه می دونبأل بأیِه، وأستی خؤرَه جخطرَ ده و خو صلیبَ به چأنَ گیره و می جَا پیروی بوکونه. 25 هر کی بٚخأیٚه خو جأنَ نیجأت بٚده، اونَ جٚه دٚس دِهه؛ ولی هرکی می وأسی خو جأنَ جٚه دٚس بٚده، اونَ نیجأت دِهه. 26 چی فأیده دأره کی اینسأن تومأمٚ دونیأیَ ببره، ولی خو جأنَ جٚه دٚس بٚده؟ مگه ایچی بیأفته بِه کی جٚه اونٚ جأنٚ ویشتر بی‌اَرزٚه؟ 27 چونکی اینسأنٚ پٚسر، خو فٚرٚشته‌یأنٚ اَمرأ، خو پئرٚ شوکو و جلالٚ میأن اَیِه و هرتأنَ اونٚ کأرأنٚ جَا دأوری کونه. 28 یقین بدأنید کی، اَیَه ایتأ عیده ایسأده کی تأ اینسأنٚ پٚسرَ نیدینٚد کی خو پأدیشأیی میأن اَیِه، نیمیرٚده.»
Currently Selected:
متا ۱۶: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org