متا ۲۰
۲۰
دیلسوجٚ اربأب
1 «آسمأنٚ پأدیشأیی‌یَ شأ ایتأ صأب بأغٚ مأجیرأ مأنستَن شٚبأهت دئن کی صُبٚ دٚمٚ رِه بوشؤ بیرون کی خو باغٚ رِه چنتأ کأرگر بیگیرٚه. 2 اون کأرٚگرأنٚ اَمرأ قرأر بٚنأ کی هرتأیَ، ایتأ کأمیلٚ روجٚ موزدَ فأدٚه؛ بأزین همٚتأنَ اوسه کوده خوشأنٚ کأرٚ سٚر.
3 «چن سأعت بعد، ایوأردِه بوشؤ بیرون و چنتأ کأرٚگرَ بیدِه کی میدأنی دورون بیکأر ایسأده. 4 پس، اوشأنم اوسه کوده خو بأغ و بوگفته غروب دٚمٚ رِه هرچی اوشأنٚ حق بٚبه فأدِه. 5 بأزین اوشأنم موشغولَ بوستٚد و کأر بوکودٚد. بأزم ظهرٚ دٚم، زوأله سأعت سه‌یم بوشؤ بیرون و هه کأرَ بوکوده.
6 «بعدٚ ظهر سأعت پنج، ایوأردِه بوشؤ چن نفر دِه بیأفت کی بیکأر ایسأبود و وأوٚرسِه:
«چٚره تومأمٚ روج اَیَه بیکأر بئیسأییدی؟
7 «جوأب بٚدأده: هیشکی اَمٚرَه کأر فأندأ.
«اَشأنَ بوگفته: بیشید می بأغ و کأر بوکونید.
8 «او روج غروب دٚم، صأب بأغ خو موبأشیرَ بوگفته کی کأرٚگرأنَ دؤخأنه و جٚه آخری تأ اوّلی نفر، اوشأنٚ موزدَ فأدَه. 9 اوشأنی کی سأعت پنج کأرٚ سٚر بوشؤ بود، ایتأ کأمیلٚ روجٚ موزدَ فأدأ. 10 آخرپٚسی، او کأرٚگرأنٚ نوبت بوبوسته کی جٚه همه کس اوّل کأرٚ رِه موشغولَ بوسته بود؛ اَشأن، رأفأ ایسأبود او البأقیأنٚ جَا ویشتر موزد فأگیرٚد. ولی اوشأنم هوندر فأدأ بوبوسته. 11 او وخت کی اوشأن خوشأنی موزدَ فأگیفتد صأب بأغَ شیکأیت بوکودٚد، بوگفتٚده: 12 "اَشأنَ کی فقد ای سأعت کأر بوکودٚد، اَمی اَندر فأدأئید کی تومأمٚ روجٚ رِه اَ آفتأبٚ زألٚ جیر جأن بٚدأییم؟"
13 «صأب بأغ وأگردسته ایتأ جٚه اوشأنَ، بوگفته: اَی ریفِق، من کی تٚرَه ظولمی نوکودم. مگه تو قوبیل نوکودی کی ایتأ روجٚ موزدٚ اَمرأ کأر بوکونی؟ 14 پس تی موزدَ فأگیر و بوشو. می دیل خأیه اَ آخری‌یَ هوندر موزد فأدٚم کی تٚرَه فأدأم. 15 ینی من حق نأرٚم هرجور کی می دیل خأیه می پولَ خرجَ کونم؟ ینی اَن دوروسته کی تو می دٚس و دیلوأزی جَا دیلخورَ بی؟
16 «پس اوشأنی کی اَسه آخرٚده، اوّل بٚده و اوشأنی کی اوّلٚده، آخر.»
عیسا آخری سٚفر اورشلیمَ
17 اورشلیمٚ رأ دورون، عیسا خو دوأزده‌تأ شأگردَ فأکشه ایتأ گوشٚه و اوشأنَ بوگفته: 18 «اَسه شوئؤندریم اورشلیم و اویَه اینسأنٚ پٚسرَ ایسپأرٚده پیله کأهینأن و دین عألیمأن دٚس. اوشأن اونَ محکوم کونٚده کی وأستی بیمیره. 19 و رومیأنٚ دٚس فأدٚد کی اونَ رخشنَ گیرٚد و شلأق بٚزٚنٚد و صلیب سٚر فأکٚشٚد. ولی سیومی روج اون زٚنده بِه.»
عیسا مردومَ خیدمت کودنٚ وأسی آموج دِهه
20 بأزون زبدی پٚسرأنٚ مأر، ینی یعقوب و یوحنا، خو دوتأ پٚسرَ عیسا ورجأ بأوٚرده، اونٚ ورجأ زانو بٚزِه و خأهیش بوکود کی اونی خأهیشَ ایجأبت بوکونٚه.
21 عیسا وأوٚرسِه: «چی خأیی؟»
او زنأی جوأب بٚدأ: «او وخت کی تی پأدیشأیی دورون، سلطنتٚ تختٚ رو بینیشتی، ایجأزه بٚدٚن ایتأ جٚه می پٚسرأن تی رأستٚ ور و اویتأ تی چپٚ ور بینیشینٚد.»
22 عیسا جوأب بٚدأ: «شومأن نأنیدی کی چی خأییدی! ینی تأنیدی او رنج و عذأبٚ زرخٚ پیأله جَا کی اَندر زمأت نیبه کی من وأستی وأخٚوٚرم، شومأنم وأخورید؟»
جوأب بٚدٚأده: «آهأن، تأنیم.»
23 عیسا اوشأنَ بٚفرمأسته: «البت جٚه می پیأله وأخوریدی، ولی من ایختیأردأر نییٚم کی شٚمٚره می رأس و چپٚ ور بینیشأنٚم. اَ جأجیگأ اوشأنی شین ایسه کی می پئر اوشأنٚ رِه جٚه پیشتر اینتخأب بوکوده.»
24 او وخت کی البأقی شأگردأن بٚفأمٚستد کی یعقوب و یوحنا چی بٚخأستده، او دوتأ رِه زرخٚ بوستٚد.
25 ولی عیسا، شأگردأنَ همٚتأیَ دؤخأده و بوگفته: «اَ دونیأ دورون، حأکیمأن مردومٚ رو ریأسٚت کونٚده و اربأبأن خوشأنٚ خأدیمأنٚ دستور دٚهٚده. 26 ولی شیمی میأن نوأستی اَطؤ بٚبه. بلکی وأگردأنسر، هر کی خأیه شیمی میأن پیله‌تر بٚبه، وأستی همٚتأنٚ خأدیم بٚبه، 27 و هرکی خأیه شیمی میأن اوّل بٚبه، وأستی شیمی غولأم بٚبه. 28 چونکی اینسأنٚ پٚسرم نأمؤ کی اینفر اونَ خیدمت بوکونٚه، بلکی بأمؤ کی البأقی آدمأنَ یاور بٚده و خو جأنَ البأقی آدمأنٚ آزأدی رأ دورون فٚدأ بوکونٚه.»
عیسا دوتأ کورَ شفأ دِهه
29 او وخت کی عیسا و اونٚ شأگردأن اَریحا شهرٚ جَا بیرون شؤییدی، خٚیلیأن اونٚ دونبألسر رأ دکفتد.
30 هو زمأتٚ دورون، دو تأ کور کی جأده کنأر نیشته بود، جٚه اَ خأطر کی بشتأوٚستٚد عیسا جٚه اویَه دٚوأرٚستندٚره، ایجگٚره فأکٚشِده، فریأد بٚزِده: «اَی آقأ جأن، اَی داوودٚ پٚسرَ، اَمٚرَه رحم بوکون!»
31 جِمئیت اوشأنٚ سٚر ایجگره بٚزِده: «دٚوٚدید شیمی صدایَ!» ولی اوشأن خوشأنی صدایَ بوجؤرتر ببردٚد کی: «اَی آقأ جأن، اَی داوودٚ پٚسرَ، اَمٚرَه رحم بوکون!»
32 آخرپٚسی او وخت کی عیسا اویَه فأرٚسِه، بئیسأ و اوشأنی جَا وأوٚرسِه: «چی خأیید شِمِره بوکونم؟»
33 جوأب بٚدأد: «آقأ جأن، خأییم اَمی چومأن وأزَ بٚه!»
34 عیسا دیل اوشأنٚ رِه بوسؤخته و اوشأنٚ چومأنٚ رو دٚس بٚنأ. دفأتن بتأنستد بیدینٚد و عیسا دونبأل رأ دکفتد.
Currently Selected:
متا ۲۰: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org