لوقا ۱۴
۱۴
عیسا ایوأردِه شبّأت روجٚ میأن شفأ دِهه
1 ایتأ شبّأت روج، عیسا ایتأ جٚه فریسی پیله کسأنٚ خأنه میهمأن بو و اوشأن دیقتٚ اَمرأ اونَ فأندرستأندوبود. 2 اویَه ایتأ نأخوش احوأل هم ایسأ بو کی اونی جأن آب بأوٚرده و اونی دٚس و پأ بأد بوکوده بو.
3 عیسا دینٚ عألیمأن و فریسیأن جَا کی اویَه ایسأبود، وأوٚرسِه: «آیا تورأتٚ فرمأنأنٚ موطأبٚق، شبّأت روجٚ میأن شأ ایتأ نأخوشَ شفأ دئن یا نه؟»
4 اوشأن جوأب ندأده! بأزین، عیسا او مریضٚ رو دٚس بٚنأ و شفأ بٚدأ و اوسه کوده بشه بٚخأنه. 5 بأزین وأگردسته و اوشأنی جَا وأوٚرسِه: «کویتأ جٚه شومأن شبّأت روجٚ دورون کأر نوکونه؟ آیا اگه شیمی اولأغ #۱۴:۵ بعضی جٚه نیویشته‌یأنٚ میأن «پٚسر».یا گأب چأ دورونی دکفه، دفأتن نیشید کی اونَ بیرون بأوٚرید؟»
6 امّا اوشأن جوأبی نأشتٚد کی اونَ بٚدٚد.
فروتنی درس
7 عیسا چونکی بیدِه میهمأنأن همٚتأن حقٚ سعی زئندرد کی مجلٚسٚ سرجأکش بینیشینٚد اوشأنَ اَطؤ اَندرز بوکوده: 8 «او وخت کی ایتأ عروسی جشنٚ رِه دعوت بیدی، او مجلٚسٚ سرجأکش نینیشینید! چونکی ایمکأن دأره ایتأ میهمأن شیمی جَا پیله‌تر بأیٚه و 9 صأبخأنه شیمی جَا بٚخأیٚه کی شیمی جأیَ اونَ فأدید. بأزون، خجألتی اَمرأ وأستی ویریزید و مجلٚسٚ بیجیر بینیشینید! 10 پس اوّل، مجلٚسٚ بیجیر بینیشینید کی او وخت کی صأبخأنه شٚمٚره اویَه بیدینه، بأیٚه و شٚمٚره مجلٚسٚ جؤر ببره بینیشأنه. بأزون، میهمأنأن ورجأ سٚربولند بیدی. 11 چونکی اونی کی خؤرَه پیله‌دأنه نیشأن بٚده، کوچیکَ بِه، امّا او کسی کی خؤرَه فروتن بٚدأره، سربولٚندٚ بِه.»
12 بأزون، صأبخأنه ور وأگردسته و بوگفته: «هر وخت میهمأنی دیهی، تی ریفِقأن و برأرأن و فکٚ فأمیل و مأل و مینألدأرٚ همسأدأنَ دعوت نوأکودٚن، چونکی اوشأنٚم تٚرَه دعوت کونٚد. 13 بلکی او وخت کی میهمأنی دیهی، فِقِرأن، چولأقأن و شٚلأن و کورأنَ دعوت بوکون. 14 بأزون، خوداوند اوشأنی قیأمتٚ روجٚ میأن کی خورومٚ کردکأر کونٚده، تٚرَه خوروم چیأن فأدِه، چونکی اوشأنی‌یَ خیدمت بوکودی کی نٚتأنٚستٚد تی محبتَ تلأفی بوکونٚد.»
خودا پأدیشأیی میهمأنی
15 اینفر جٚه اوشأنی کی هو سٚفره سٚر نیشته بود چونکی اَ گبأنَ بشتأوسته، بوگفته: «خوشبحألٚ اونی کی خودا پأدیشأیی میهمأنی دورون شرکٚت کونه!»
16 عیسا اونی جوأب دئنٚ وأسی اَ قصّه‌یَ نقل بوکود: «اینفر ایتأ پیله میهمأنی بر پأ بوکوده و خٚیلیأنَ دعوت بوکوده. 17 او وخت کی همه چی آمأدَه بوسته، خو خیدمتکأرَ اوسه کوده کی میهمأنأنَ بٚگه، "تشریف بأوٚرید همه چی آمأده‌یٚ." 18 امّا هرتأ جٚه اوشأنی کی دعوت بوبوسته بود ایتأ بهأنه بأوٚردٚد. اینفر بوگفته کی ایتأ تیکه زیمین بیهِم وأستی بٚشٚم اونَ بیدینٚم. 19 اویتأ بوگفته پنج‌تأ جُفت گأب بیهِم و وأستی بٚشٚم اوشأنَ ایمتحأن بوکونم. 20 اینفرم دِه بوگفته کی تأزه عروسی بوکودم و هنٚ وأسی نتأنه بأیٚه.
21 «خیدمتکأر وأگردسته و اوشأنی کی دعوت بوبوسته بو جوأبَ خو آقأیَ بوگفته. اربأبَ غیظٚ گیفته و اونَ بوگفته: "دفأتن بوشو شهرٚ میدأنأن و کوچه‌یأنٚ میأن و فِقِرأن و چولأقأن و شٚلأن و کورأنَ دعوت بوکون!" 22 او وخت کی اَ فرمأن انجأم بوبوسته، وأزم هنو خألی جأ نٚهأ بو. 23 پس اربأب خو خیدمتکأرَ بوگفته: "هسأ بوشو جأده‌یأن و بیرأهه‌یأنٚ میأن هرکی‌یَ بید‌ِیی حقٚ سعی اَمرأ بأوٚر کی می خأنه پورَ بٚه. 24 چونکی اوشأنی‌یَ کی دعوت بوکودم، هیکس او خوردٚنیأنٚ مزه‌یَ کی چأکودم، نیچیشٚده!"»
مسیح ایطأعت کودن جَا تأوأن دئنٚ
25 ایوأر، کی ایتأ پیله جِمئیت عیسا دونبألسر شؤئؤندوبود، اون وأگردسته و اوشأنَ بوگفته: 26 «هرکی خأیه می جَا ایطأعت بوکونه، وأستی مٚرَه خو پئر و مأر، زن و زأک، برأر و خأخور جَا و حتّا جٚه خو جأن ویشتر دوس بٚدأره. 27 هرکی خو صلیبَ اونسأنه و می جَا ایطأعت نوکونه، نتأنه می شأگرد بٚبه.
28 «امّا پیشتر جٚه اَنکی می جَا ایطأعت کودنٚ وأسی تصمیم بیگیرید، همٚتأ چی‌یَ خُب فیکر بوکونید! کسی کی خأیه ایتأ سأختمأنٚ چأکونه، جٚه اوّل اونی خرج و بٚرجٚ فیکرَ کونه کی بیدینه آیا اونی عُهده جَا براَیِه یا نه. 29 نوکونه او وخت کی سأختمأنٚ پأکأرَ بٚنأ، اونی سرمأیه تومأنٚ بٚه و نتأنه کأرَ تومأنٚ کونه! بأزون همٚتأن اونَ رخشنٚ گیرٚد و گد: 30 "اَ آدم ایتأ سأختمأنٚ چأکودٚنَ سٚر بیگیفت، امّا نتأنسته اونَ تومأنٚ کونه!"
31 «فیکر بوکونید ایتأ پأدیشأ خأیه ایتأ دِه پأدیشأ اَمرأ جنگستن بوکونه، اون اوّل خو موشأویرأنَ اَمرأ شورأ نِهِه کی بیدینه آیا ایتأ ده هیزأر نٚفٚری نیرو اَمرأ تأنه ایتأ بیست هیزأر نٚفٚری لشکرَ شکست بٚده یا نه. 32 اگه بیدِه کی اَ کأرَ نتأنه بوکونه، هنو دوشمنٚ لشکر نیزدیکٚ نوبوسته، ای عیده نمأینده اوسه کونه کی آشتی کودنٚ وأسی گب گب بٚزٚنٚد. 33 هطویی‌یٚم، اونی کی خأیه می شأگرد بٚبه، اوّل وأستی بینیشینه و حیسأب کیتأب بوکونه کی آیا تأنه می وأسی خو چومَ جٚه خو مأل و مینأل دٚوٚده یا نه.
34 «نمک خُب ایسه، امّا اگه خو مزه و خأصیتَ جٚه دٚس بٚده، چوطؤ شأ اونی مزه و خأصیتَ اونٚ رِه وأگردأنِن؟ 35 بی مزه و بی خأصیت نمک حتّا زیمین کود فأدأنٚ رِه هم بٚدرد نوخورٚه. فقد وأستی اونَ فیشأدٚن. هرکی بشتأوسته گوش دأره بشتأوه!»
Currently Selected:
لوقا ۱۴: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran