لوقا ۱۳
۱۳
توبه یا هلأکٚ بوستن
1 هو زمأتٚ میأن عیسایَ وأخبدأرٚ کودٚد کی پیلاتُس، ایتأ عیده جٚه جلیلٚ آدمأنَ کی زیأرت و قوربأنی کودنٚ وأسی بوشؤ بود اورشلیم، معبدٚ دورون سلأخی بوکود.
2 عیسا اَ خٚوٚرٚ ایشتأوٚستٚنٚ اَمرأ بٚفرمأسته: «آیا فیکر کونید اَ عیده جٚه البأقی جلیل مردوم، گونأکأرتر بود کی اَجور عذأبٚ اَمرأ بوکوشته بوبوستٚد؟ 3 ایمکأن نأرِه! شومأنم اگه شیمی بد کردکأرأنٚ جَا وأنگردید و خودا ور نیشید، اوشأنی مأنستَن هلأکٚ بید! 4 یا او هیجده نفری کی "سلوامٚ" برج اوشأنی سٚر فوگوردٚسته و بٚمٚردٚد، آیا جٚه البأقی اورشلیم آدمأن، گونأکأرتر بود؟ 5 هیوخت! شومأنم اگه توبه نوکونید، همٚتأن هلأکٚ بید!»
اَنجیل دأرٚ جَا درس گیفتن
6 بأزین، اَ مأجیرأیَ اوشأنٚ رِه نقل بوکود: «اینفر خو بأغٚ میأن، ایتأ اَنجیل دأر بکأشته بو. امّا هر وأر کی اونَ سٚر زِئی، دٚئی کی مِیوه نأوٚرده. 7 آخرپٚسی دِه اونی صبر تومأنٚ بوسته و خو بأغبأنَ بوگفته: اَ دأرَ وأوین، چونکی سه سألٚ تومأم رأفأ بئیسأم هنو ایتأ دأنه اَنجیلٚم نٚده! اونی دأشتٚن چی فأیده کونه؟ هچین زیمینَ جأیٚم بیگیفته!
8 «بأغبأن جوأب بٚدأ: ایوأردِه اونَ فورصت بدید! وئألید ایتأ سأل دِه بئیسه کی اونی جَا خُب دأشتٚن بوکونم و خٚیلی کود اونَ فأدٚم. 9 اگه بعدی سألٚ میأن مِیوه فأدأ چی بِیتر؛ امّا اگه نٚده، بأزون اونَ وأوینم.»
ایتأ نأخوش احوألَ شفأ دئنٚ شبّأت روجٚ میأنی
10 ایتأ شبّأت روج، عیسا کنیسه میأن خودا کلامَ آمؤختأندوبو. 11 اویَه ایتأ زنأی ایسأ بو کی هیجده سأل، پٚلیدٚ روح اونَ علیلٚ کوده بو، جوری کی اونی پوشت فوچومٚسته بو و هیذره نتأنستی رأس بئیسه.
12 او وخت کی عیسا اونَ بیدِه، اونَ بٚفرمأسته: «اَی زن، تو اَ مرضٚ جَا شفأ بیأفتی!» 13 بأزین، اونی رو دٚس بٚنه و او زنأی دفأتن شفأ بیأفته و رأس بئیسأ، بینأ کودن خوداوندَ شوکر کودن! 14 امّا او کنیسه مٚسؤلٚ غیظَ گیفتٚه چونکی عیسا او زنأکَ شبّأت روجٚ میأن شفأ بٚدأ بو. پس غیظٚ اَمرأ او جِمئیتَ بوگفته: «هفته میأن شیش روج وأستی کأر کودن، اَ شیش روجٚ میأن بأیید شفأ بیأفید، امّا نه شبّأت روجٚ میأن.»
15 امّا عیسایٚ خوداوند اونی جوأب دئنٚ وأسی بٚفرمأسته: «ای دورو! مگه تو خودت شبّأت روجٚ میأن کأر نوکونی؟ مگه شبّأت روجٚ رِه، تی گأب یا تی اولأغَ، طیویله جَا آب دئنٚ وأسی بیرون نبری؟ 16 پس هَسأ چٚره می جَا ایرأد گیری کی شبّأت روجٚ میأن، اَ زنأکَ جٚه اَ مرض شفأ بٚدأم، ایتأ زنأی کی اَمی مأنستَن جٚه ایبرأهیمٚ نتأج ایسه و هیجده سأل شیطانٚ دٚس اسیر بو؟»
17 اونی دوشمنأن او وخت کی اَ گبأنَ بشتأوٚستٚد همٚتأن خجألت بکشئده، امّا مردوم اونی موجیزأتٚ وأسی خٚیلی خوشأل بوبوستٚد.
ایتأ مثأل خودا پأدیشأیی رِه
18 بأزون، عیسا خودا پأدیشأیی رِه ایتأ مثل بأوٚرده و بٚفرمأسته: «خودا پأدیشأیی چی‌یَ مأنه؟ اونَ چی مأنستَن شٚمٚره نیشأن بدم؟ 19 ایتأ کوجه خردٚلٚ دأنه مأنه کی ایتأ بأغٚ میأن بکأشته بِه و چن وختٚ پٚسی، ایتأ پیله‌دأنه بوته بِه کی پرنده‌یأن اونی شأخه‌یأنٚ میأن خوشأنی رِه فک نَهَد.»
تورشٚ خمیر مثأل زِئن
20 ایوأردِه بوگفته: «خودا پأدیشأیی چی مأنستَن ایسه؟ 21 ایتأ تورشٚ خمیرٚ مأنه کی ایتأ زنأی اونَ اوسأنه و سه تأ کیسه #۱۳:۲۱یونأنی میأن «سه ساتا» کی ایحتمأل دأره ۲۲ لیترٚ اَندر بو.آردٚ اَمرأ قأطی کونه کی تومأمٚ خمیر ور بأیٚه.»
تأ وخت نٚهأ وأستی خودا ورجأ وأگردٚستن
22 عیسا اورشلیم رأ میأن، جوروأجورٚ شهرأن و دیهأتأن شؤئی و خودا کلامَ مردومَ آمؤختی.
23 ایتأ روج، اینفر اونی جَا وأوٚرسِه: «خوداوندا، آیا فقد ایتأ عیده کم نیجأتَ یأفده؟»
عیسا بٚفرمأسته: 24 «خودا پأدیشأیی در، تنگٚ توشکه. پس حقٚ سعی بٚزنید کی بودورون بیشید، چونکی خٚیلیأن ایسأده کی حقٚ سعی زنٚده کی بودورون بٚشٚد امّا نٚتأنٚده.» 25 ایتأ زمأت فأرٚسِه کی صأبخأنه دٚرَ دٚوٚده. بأزون، شومأن بیرون ایسأبو، در زٚنید و ایلتیمأس کونید کی خوداوندا، خوداوندا، دٚرَ اَمِرِه وأزَ کون! امّا اون جوأب دِهه کی من شٚمٚره نشنأسٚم!
26 «بأزین شومأن گیدی اَمأن تی اَمرأ غذأ بوخوردیم! تو اَمی شهرٚ کوچه‌یأنٚ میأن اَمٚرَه بأمؤختی! چوطؤ اَمٚرَه نشنأسی؟
27 «امّا اون ایوأردِه گه کی من هیذره شٚمٚره نشنأسٚم! جٚه اَیَه دورَ بید اَی شومأنی کی بد کردکأرأن دأرید!
28 «هو وخت دینیدی کی ایبرأهیم، ایسحأق و یعقوب و همه‌یٚ او پِیغمبرأن، خودا پأدیشأیی دورونی ایسأده ولی شومأن جٚه اویَه بیرون ایسأیید، گریه کونید و شیمی گأزأنٚ سٚربٚسٚر سأبید. 29 تومأمٚ مردوم دونیأ جٚه هر ور، جٚه مشرق و مغرب، شومأل و جونوبٚ جَا، اَیٚده، خودا پأدیشأیی سٚفره سٚر نیشینٚده. 30 اَطویه، حتم بدأنید اوشأنی کی اَسه آخری نفر بٚحیسأب اَیٚده، اوّل بٚده و اوشأن کی اوّل ایسٚد، آخری بٚحیسأب اَیٚده.»
غورصه خوردن اورشلیمٚ وأسی
31 هو وخت چنتأ جٚه فریسیأن بأمؤده و اونَ بوگفتد: «اگه خأیی زٚنده بمأنی، هرچی زوتر جلیلٚ جَا بوشو، چونکی هیرودیسٚ پأدیشأ خأیه تٚرَه بوکوشٚه!»
32 عیسا جوأب بٚدأ: «بیشید او روباهَ بیگید کی من ایمرو فردأ، پٚلیدٚ روحأنَ مردومٚ جَا بیرونٚ کونم و مریضأنَ شفأ دٚهٚم و سیومی روجٚ رِه، می خیدمت تومأنٚ به. 33 دوروسته، ایمرو و فردأ و پس فردأ وأستی می رأیَ ایدأمه بدم، چونکی ایمکأن نأرِه خودا پیغمبر جغرز اورشلیم میأن، ایتأ جأ دِه بیمیره!
34 «اَی اورشلیم، اَی اورشلیم، اَی پیغمبرأنٚ قأتیل و اوشأنی کی خودا اوسه کوده‌یأنَ سنگسأر بوکودٚد! چن وأر خأستیم تی زأکأنَ جمَ کونم هطؤ کی کولوشکٚن خو کیشکأيأنَ خو بألٚ پٚرٚ جیر گیره، امّا تو نخأستی. 35 پس هسأ تی خأنه فوگوردٚسته مأنه و شٚمٚره گم کی دِه مٚرَه نیدینید تأ هو زمأتی کی بیگید "مووأرٚک ایسه اونی کی خودا ایسمٚ اَمرأ اَیِه."»
Currently Selected:
لوقا ۱۳: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran