لوقا ۱۵
۱۵
اَویرَ بوسته گوسوٚندٚ قصّه
1 خٚیلی جٚه بأج فأگیرأن و اوشأنی کی مردومٚ جَا پس بٚزِه بوبوسته بود، ویشترٚ وختأن عیسا دؤر جمَ بوستید کی اونی گبأنَ بشتأوٚد. 2 امّا دین عألیمأن و فریسیأن اونی جَا ایرأد بیگیفتٚد کی چٚره اون اَجور آدمأنٚ اَمرأ بینیش ورخأست دأره و ایتأ سٚفره سٚر نیشینه. 3 پس عیسا اوشأنی رِه اَ مثألَ بأوٚرده: 4 «اگه ایتأ جٚه شومأن صدتأ گوسوٚند بٚدأره و ایتأ جٚه اوشأن گلّه جَا دورٚ بٚه و اَویرَ بٚه چی کونه؟ آیا او نود و نه تأیَ صأرأ میأن نٚنِه و نیشه او اَویرَ بوسته گوسوٚندٚ دونبألسر بگرده کی اونَ بیأفه؟ 5 او وخت کی اونَ بیأفته خوشألی اَمرأ اونَ خو کؤل نِهِه 6 و وأگرده بٚخأنه و خو ریفِقأن و همسأدأنَ جمَ کونه و گه: "می اَمرأ خوشألی بوکونید، چونکی می اَویرَ بوسته گوسوٚندَ بیأفتم." 7 هطؤیه کی ایتأ گونأکأرٚ توبه کودنٚ وأسی و اونی وأگردٚستن خودا ورجأ آسمأنٚ دورون ویشتر خوشألی به تأ او نود و نه نفر وأسی کی سرگردأن و گومرأ نوبوستٚده.
اَویرَ بوسته سکه قصّه
8 «یا گومأن بوکونید ایتأ زنأی ده‌تأ سکه دأره و ایتأ اَویرَ بوسته بی، آیا ایتأ چرأغ روشنَ نوکونه و دیقت اَمرأ تومأمٚ خأنه گوشٚه کنأرأنَ وأنموجه و همٚتأ جأجیگأیأنَ نوروفه کی اونَ بیأفه؟ 9 و او وخت کی اونَ بیأفته، آیا تومأمٚ خو ریفِقأن و همسأدأنَ جمَ نوکونه کی اونی اَمرأ خوشألی بوکونٚد؟ 10 هطؤیٚم، خودا فٚرٚشته‌یأن خوشألی کونٚده جٚه اَ خأطر کی ایتأ گونأکأر توبه بوکونه و خودا ورجأ وأگرده.»
اَویرَ بوسته پٚسر قصّه
11 اونی وأسی کی اَ مأجیرأیأن ویشتر وأشکأفته بٚبه، عیسا اَیتأ نٚقلٚم اوشأنی رِه وأگویا بوکود: «ایتأ مردأی دوتأ پٚسر دأشتی. 12 ایتأ روج کوجه‌دأنه پٚسر خو پئرَ بوگفته: "پئر، خأیم او سأمی کی تی اموألٚ جَا وأستی تی مٚردنٚ پٚسی مٚرَه فأرٚسِه، هسأ مٚرَه فأدی." پس، اونی پئر قوبیل بوکوده و خو مأل و مینألَ خو دوتأ پٚسرأنٚ میأن سأم بوکوده.
13 «پور زمأت نوبوسته کی کوجه‌دأنه پٚسر، هرچی دأشتی جمَ کوده و بوشؤ ایتأ دورٚ شرأ جأجیگأیأنٚ میأن. اویَه تومأمٚ خو مأل و مینألَ خوشگوذرأنی و نأجورٚ کأرأنٚ وأسی جٚه دٚس بٚدأ. 14 او وخت کی تومأمٚ خو مألَ جٚه دٚس بٚدأ بو، ایتأ پیله قحطی او سرزیمین شرأ بیرون بأمؤ، جوری کی اونی رِه سخت تنگأم بوبوسته و نیزدیک بو ویشتأیی جَا بیمیره. 15 پس مجبور بوبوسته کی بشه ایتأ او شهرٚ آدمأنَ خیدمت بوکونه. اونم، اونَ اوسه کوده خو زیمینٚ سٚر کی اونی خوکأنَ بٚچٚرأنه. 16 جوری او پٚسرِیکٚ رِه بوبوسته بو کی آروزو کودی بتأنه خوکأنٚ خورأکٚ اَمرأ خو شکمٚ سِئرَ کونه، هیکسٚم اونَ یاور نوبوستی.
17 «آخرپٚسی ایتأ روج خؤرَه فأندرسته و فیکر بوکوده می پئر خأنه، خیدمٚتکأرأنٚم بأ قأیده خورٚده حتّا ایضأفه‌یٚم دأرٚده و من اَیَه ویشتأیی جَا مٚردأندرم! 18 پس ویریزم و شٚم می پئرٚ ورجأ و اونَ گم: "اَی پئر، من خودا حقٚ میأن و تی حقٚ میأن گونأ بوکودم، 19 و دِه اَ لیأقتَ نأرٚم کی مٚرَه تی پٚسر بدأنی. ایلتیمأس کونم کی مٚرَه تی خیدمتکأرٚ مأنستَن قوبیل بوکونی!"
20 «پس دفأتن ویریشته و خو پئر خأنه ور رأ دکفته. امّا هنو خو پئرٚ خأنه جَا خٚیلی دؤر بو کی اونی پئر، اونَ بیدِه و اونی دیل اونی رِه بوسوج بأمؤ و اونی پیشوأز بودووٚسته و اونَ کٚشأ گیفته و مأچی بٚدأ.
21 «پٚسری اونَ بوگفته: "پئر، من خودا حقٚ میأن و تی حقٚ میأن گونأ بوکودم، و دِه اَ لیأقتَ نأرٚم کی مٚرَه تی پٚسر بدأنی."
22 «امّا اونی پئر خو خیدمتکأرأنَ بوگفته: "دٚس بوجونبأنید! بِیترین لیوأسَ، خأنه جَا بأوٚرید و اونی بٚتٚن دوکونید! ایتأ انگوشتٚر، اونی دٚسٚ میأن و ایتأ پأاَفزار اونی پأ رِه دوکونید! 23 و ایتأ چٚلبٚ چأقٚ گوسأله بأوٚرید و سٚر وأوینید تأ ایتأ جشن بیگیریم و خوشألی بوکونیم! 24 چونکی اَ پٚسر می شین، بٚمٚرده بو و زٚنده بوسته؛ اَویرَ بوسته بو و بیأفته بوبوسته!"
«پس ایتأ پیله میهمأنی رأ تأوٚدأد.
25 «هو وختأن بو کی پیله پٚسر زیمینٚ میأن کأر کودأندوبو. او وخت کی وأگردسته بٚخأنه، سأز و آوأز و دٚسٚ رقصٚ صدایَ بشتأوسته. 26 پس ایتأ جٚه خیدمتکأرأنَ دؤخأده و اونی جَا وأوٚرسِه: "چی خٚوٚر ایسه؟"
27 «خیدمتکأر جوأب بٚدأ: "تی برأر وأگردسته و تی پئر چونکی اونَ سأق و سألیم بیأفته، ایتأ چٚلبٚ چأقٚ گوسأله‌یَ اونی وأسی سٚرٚ بِه و میهمأنی بیگیفته!"
28 «پیله برأرَ غیظٚ گیفته و قوبیل نوکوده خأنه دورونی بشه. تأ اَنکی اونی پئر بیرون بأمؤ و اونی جَا ایلتیمأس اَمرأ بٚخأسته کی بأیٚه بٚخأنه. 29 امّا اون خو پئرَ جوأب بٚدأ: "خٚیلی سأل ایسه کی من هچین ایتأ غولأمٚ مأنستَن تٚرَه خیدمت بوکودم و حتّا ایوأرٚم تی گبَ زیمین نٚزِم، امّا تومأمٚ اَ زمأتأن، مٚرَه چی فأدأیی؟ حتّا ایتأ کوجه‌دأنه بوزٚم فأندأیی کی سٚرٚ بینٚم و می ریفِقأنٚ اَمرأ خوشألی بوکونم! 30 امّا تی اَ پٚسر کی تومأمٚ تی مأل و مینألَ فأسیدٚ زنأکأنٚ اَمرأ بأطیلَ کوده، هَسأ کی وأگردسته، بِیترین چٚلبٚ چأقٚ گوسأله‌یَ کی دأشتیم، سٚر وأوِیی و اونی رِه میهمأنی بیگیفتی!"
31 «اونی پئر بوگفته: "می جأن دیلٚ پٚسر، تو همیشٚک می ورجأ ایسأبی و هرچی من دأرم، رأس‌رأسِی تی شینه و تی سأم ایسه! 32 امّا هسأ وأستی جشن گیفتن و خوشألی کودن، چونکی تی اَ برأر، بٚمٚرده بو زٚنده بوسته، اَویرَ بوسته‌بو و هسأ بیأفته بوسته!"»
Currently Selected:
لوقا ۱۵: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran