پیدأیش ۸
۸
1 ولی خودا، نوح و کشتی میأن حیوأنأنَ جٚه خأطرَ ندأ بو. اون آبأن رو ایتأ بأد روأنه کوده و نرم نرمِی سیل فوروز بأمؤ. 2 زیمینٚ جیرٚ آبأن دِه نٚزِده بیرون و وأرٚش بِئیسأ. 3 یوأش یوأشِی آب جٚه زیمینٚ رو کمَ بوسته. صد و پنجأ روج بوستنٚ پٚسی، 4 جٚه هفتومی مأه دورون هیفدهومی روجٚ میأن، کشتی بمأنسته آراراتٚ کوهأنٚ سٚر. 5 دو مأه و نیم کی بوبوسته، هوطؤ کی آب خؤرِه شؤئؤندوبو بیجیر، کوهأنٚ لچه بٚزِه بیرون. 6 چهل روج کی دٚوأرٚسته، نوح کشتی رِه او چأکوده بو درجکَ وأکوده 7 و ایتأ کلأچَ سٚرأدأ. کلأچ اَ طرف و او طرف پروأز کودی تأ اویَه کی زیمین خوشکَ بوسته. 8 اونی پٚسی، ایتأ کوترَ سٚرأدأ کی بیدینه کوترٚ نیشتنٚ رِه تأنه ایتأ خوشکٚ زیمین بیأفه. 9 ولی کوتٚر هیتأ جأیَ نیأفته، چونکی آب هنو زیمینٚ سٚر نٚهأ بو. او وخت کی کوتٚر وأگردسته، نوح خو دٚسَ رأستَ کوده و کوترَ بیگیفته و بٚبرده کشتی دورون.
10 نوح هفت روج دِه بِئیسأ و ایوأردِه هو کوترَ سٚرأدأ. 11 اَیدٚفأ، غروبٚ دٚمٚ رِه، کوتٚر هوطؤ کی خو توکٚ میأن ایتأ تأزه زیتون ولگَ دأشتی، وأگردسته نوحٚ ورجأ. پٚس نوح بٚفأمسته کی آب ویشترٚ جأجیگأیأنٚ میأن، فوروز بأمؤ. 12 ایتأ هفته کی بوبوسته، نوح ایوأردِه هو کوترَ سٚرأدأ، ولی کوتٚر اَیدفأ وأنگردسته.
13 نوح شیشصد و ای سأل دأشتی کی اوّلی مأهٚ میأن اوّلی روجٚ دورون، زیمینٚ سٚر آب خوشکَ بوسته. بأزون نوح کشتی رویَ اوسأده و بیرونَ فأندرسته و بیدِه کی زیمینٚ رو خوشکَ بوسته. 14 دویُمی مأهٚ بیست و هفتومی روجٚ میأن، آخرپٚسی همٚتأ جیگأ خوشکَ بوسته. 15 اَ زمأتٚ میأن خودا نوحَ بٚفرمأسته: 16 «اَسه اونی زمأت فأرٚسِه دأره کی همٚتأن کشتی جَا بیشید بیرون. 17 تومأمٚ حیوأنأن، پرنده‌یأن و او حیوأنأن کی خوشأنَ زیمینٚ سٚر فوسینده‌یَ سٚرأدن کی زأی بأوٚرد و زیمینٚ رو زیأدَ بد.» 18 پٚس نوح خو زنأی، پٚسرأن و خو عروسأنٚ اَمرأ کشتی جَا بأمؤ بیرون 19 و تومأمٚ حیوأنأن، پرنده‌یأن و او حیوأنأن کی خوشأنَ زیمینٚ سٚر فوسینده‌یٚم دسته دسته کشتی جَا بوشؤده بیرون.
20 او وخت نوح ایتأ مذبح خوداوندٚ رِه چأکوده و هرتأ حلال گوشتٚ حیوأن و پرنده جَا اونی رو قوربأنی بوکوده. 21 اَ کأر نوحٚ شین، خوداوندَ خوش بأمؤ و خو اَمرأ بوگفته: «من ایوأردِه زیمینَ اینسأنٚ وأسی کی اونٚ دیل جٚه او وخت کی جأغله‌یٚ شِه گونأ ور لعنت نوکونٚم و اَطؤ تومأمٚ زٚنده موجودأنَ جٚه بین نٚبرم. 22 دونیأ تأ او زمأت کی نٚهأ، کیشأورزی، سرمأ و گرمأ، زمستأن و تأوستأن و روج و شب هطؤ مأنه.»
Currently Selected:
پیدأیش ۸: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org