پیدأیش ۹
۹
خودا عهد نوحٚ اَمرأ
1 خودا، نوح و اونی پٚسرأنَ برکت بٚدأ و اَشأنَ بٚفرمأسته: «زأی بأوٚرید و زیأدَ بید و زیمینَ پورَ کونید. 2 تومأمٚ حیوأنأن و زیمینٚ سٚر او حیوأنأن کی خوشأنَ فوسینده، آسمأنٚ پرنده‌یأن و دریأ مأئیأن شیمی جَا زأهله کونٚده، چونکی تومأمٚ اوشأنَ شیمی دٚسٚ جیر بنأم. 3 من اوشأنَ خوردنٚ وأسی شٚمٚره فأدأم، هوطؤ کی سبزٚ گیأیأنَ شٚمٚره بٚبخشِم. 4 ولی گوشتَ اونی خونٚ اَمرأ نوخورید کی اونَ حیأت بخشه 5 و من شیمی خونٚ تأوأنَ فأگیرم. هرتأ جأنورٚ جَا اونَ فأگیرم. اینسأنٚ جأنٚ تأوأنٚم اینسأنٚ دٚسٚ جَا فأگیرم. 6 هرکی ایتأ اینسأنٚ خونَ فوکونٚه، اونی خونم اینسأنٚ دٚسٚ اَمرأ فیوِه؛ چونکی خودا اینسأنَ خو مأنستَن خلق بوکوده. 7 ولی شومأن، دٚدأر زأی بأوٚرید و زیمینَ پورَ کونید.»
8 بأزون خودا نوح و اونی پٚسرأنَ بٚفرمأسته: 9 «من شیمی اَمرأ و شیمی نتأجأن کی دونبألتر اَیٚده اَمرأ عهد دٚوٚدٚم 10 و تومأمٚ او حیوأنأنٚ اَمرأیم کی کشتی میأن شیمی اَمرأ ایسأبود ینی تومأمٚ پرنده‌یأن، چأرپأیأن و جأنورأن. 11 هطؤیه، من شیمی اَمرأ عهد دٚوٚدٚم کی هیوخت دِه اَنٚ پٚسی او موجودأن کی زٚنده ایسده‌یَ طوفأنٚ اَمرأ جٚه بین نٚبرم و دِه زیمینم طوفأنٚ اَمرأ خرأبَ نوکونٚم. 12 اَن می اَبدی عهدٚ نیشأنه ایسٚه: 13 می رنگین کمأنَ اَبرأنٚ میأن نٚهٚم و اَن او عهدٚ نیشأنه به کی دونیأ اَمرأ دٚوٚستم. 14 او وخت کی اَبرأنَ وأشأنٚم زیمینٚ جؤر و رنگین کمأن بیدِه بٚبه، 15 او وخت او قول کی شٚمٚره و تومأمٚ اوشأن کی جأن دأرٚده‌یَ فأدأم خأطر اَوٚرم و هیوخت دِه تومأمٚ زٚنده موجودأنَ طوفأنٚ اَمرأ جٚه بین نٚبرم. 16 او وخت کی رنگین کمأنَ اَبرأنٚ میأن بیدینٚم، او اَبدی عهدَ خودا میأن و هرتأ زیمینٚ رو زٚنده جأنورَ خأطر اَوٚرم.» 17 بأزون خودا نوحَ بوگفته: «اَ رنگین کمأن او عهدٚ نیشأنه ایسٚه کی من تومأمٚ زیمینٚ رو زٚنده موجودأنٚ اَمرأ دٚوٚدٚم.»
18 نوحٚ سه‌تأ پٚسر کی کشتی جَا بوشؤده بیرون، سام، حام و یافث بود. حام کنعانٚ قومٚ پِئر ایسٚه. 19 نوحٚ سه‌تأ پٚسرٚ جَا تومأمٚ دونیأ آدمأن بوجود بأمؤده.
20 نوح کیشأورزی کأرَ موشغولَ بوسته و ایتأ رٚزٚ بأغ بکأشته. 21 ایتأ روج کی خٚیلی شرأب وأخورده بو، مستی میأن برأنده خو چأدرٚ میأن بوخوفته. 22 حام، کنعانٚ پِئر، بیدِه کی خو پِئر برأنده ایسٚه و بوشؤ بیرون خو دوتأ برأرأنَ خٚوٚر بٚدأ. 23 سام و یافث اَ خٚوٚرٚ ایشتأوٚستٚنٚ اَمرأ، اونٚ برأنده نیدئنٚ وأسی ایتأ ردأ وأرگأدٚد خوشأنٚ چأنٚ سٚر و پٚسأ پٚسأ بوشؤده خوشأنٚ پِئرٚ ور. بأزون او ردأ اَمرأ اونَ لأ بٚدأده. 24 او وخت کی نوحٚ حأل میزأنَ بوسته و بٚفأمسته کی حام چی بوکوده، 25 بوگفته:
«لعنت بأیٚه کنعانٚ رو.
خو برأرأنٚ بنده‌یأنٚ بنده بٚبه.»
26 و هطؤیم بوگفته:
«سامٚ خودا، یهوَه موتٚوأرک بٚبه!
کنعأن اونی بنده بٚبه.
27 خودا یافثٚ زیمینَ زیأدَ کونٚه
و اونَ سامٚ خوشبختی میأن شیریک چأکونه
و کنعأن اونی بنده بٚبه.»
28 طوفأنٚ بوبوسته پٚسی، نوح ۳۵۰ سأل دِه عُمر بوکوده 29 و ۹۵۰ سأل سن دأشتی کی بٚمٚرده.
Currently Selected:
پیدأیش ۹: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org