Marc 16

Nslambaɗkaɗa Yèsu auda te mʼmetsai

(Mt. 28,1-10; Luc 24,1-12; Jean 20,1-10)

1Te deɓ pats nshèk va, Marie Magdala, Marie mam Jacques, a Salomé ta sum mbar burdi, aman ta dè a ta fèdè a va Yèsu. 2Pats nshèlèkuraʼa te luma, to do a ma gi dzavai, a prèk vaɗ, mshkè pats auda tèshèʼa. 3A ta goɗ a va ta: Nda gudumbala nga ngezlambar kwa auda a ma gi dzavi wa? 4A ta pi di a ma, a ta rka, ngezlambar kwa ngudumbala ma. Ngezlambar kwa mbiaʼa. 5To do a gi dzavai, a ta rka gola, nʼnza te civèɗ ri mandai, maslaka nslekaɗaʼa a va, a ta gu zlau. 6A nengaʼa a ngaɗa ta: Kin gu zlau ɓai! Kin woya Yèsu te Nazareth, man ta gezlalaʼa. Nengaʼa a nslamaɗkaɗauda ma, na az a haha ɓai. Na haha sam man ta feda a pa. 7Aman vo-do, va-gaɗa ta golahi nengaʼa, a Pierre ba, a dè a ma kinè a Galilée. Te pa kin da rkaʼa, ara man a gada kinè. 8A ta shkè auda te gi dzavai, a ta hu ta. Ta gudzai, zlau a ndzakaɓama ta gèɗ, a ta ngreda na a ndo ngiɗè azɓai, te ri zlau.

Yèsu a ngudoko na va a di a Marie Magdala

(Jean 20,11-18)

9A Yèsu man a slambaɗkaɗauda, a prèk a pats nshèlèkuraʼa te luma, a ngudoko na va a dai a Marie Magdala nshèlèkuraʼa, te va nengaʼa man a ndzor madzagihi auda tsaraɗ. 10Nengaʼa a mdo a nʼngreda ta maʼa a ndohi man ta nza a Yèsu pèc pècèk. 11A ndav tengaʼa a mbeɗè, a ta kuɗai. Ko man ta tsena, Yèsu a zhè a nshèffè, Marie a nrkaʼa, ta ca a ndav ɓai.

Yèsu a ngudoko ta va a dai a golahi nengaʼa cèw

(Luc 24,13-35)

12Te deɓaʼa a ngudoko ta va a dai, a va nengaʼa nʼngwoda, a ndohi cèw te ndev tengaʼa, a civèɗ man a dè a kokwar ngiɗè. 13A to do a ta ngreda ta ndohi ngiɗè. Aman ta ca ma tengaʼa a ndav ɓi genè.

Yèsu a nzlinde ta ndohi 11

(Mt. 28,16-20; Luc 24,36-49; Jean 20,19-23)

14Te deɓa tèlè a ngudoko ta va a dai a tengahia 11, aman ta ndi skwai. A nʼnga ta ndzoan, a gèɗ man ta ca a ndav ɓai, a ndav tengaʼa ngwora, a ta ca ma ndohi man ta rkaʼa, a nslambaɗkaɗauda ma, a ndav ɓai.

15Te deɓaʼa a ngaɗa ta: Vo-do a gèɗ herkeda tèlèba, va-njè ta ma mbelaʼa a ndohi herkeda tèlèba! 16Ko wawa man a cè a ndav, a gi baptême, a mbél na. Aman ko wawa man a cè a ndav azɓai, a da ngècè kita a gèɗ. 17Na haha nrkedi man a gi a sam tengaʼa, man ta co a ndav ta: Ta da jèr madzagihi a nzlembaɗ ga, ta da gèɗè ma a nèʼèn mɓuaʼa, ta da pèr zhûzhokihai, ta da si dèrè, a da ga ta skwa azɓai. 18Ta da fa ta ri a gèɗ a ndohi matakwan, a ndohi matakwan ta mbel ta.

Ndè Yèsu a zhiklè

(Luc 24,50-53)

19Bai Yèsu, man a njè ta ma haha ma, a mdo a zhiklè, a nʼnzahai te ri mandi Zhiklè. 20A to do ta, a ta nju ma Zhiklè a sam tèlèba. Bi Zhiklè a ngu mizlinè a nda tengaʼa, a nʼnzala ma nengaʼa a nrkedihai.

Currently Selected:

Marc 16: MOF89

Highlight

Copy