Luc 1
1
Ma Luc a sam Théophile
1Théophile ga! Ndohi kumba ta windeda skwi man a gu a sam nga a hai; 2ara man tengaʼa, man ta rkaʼa a di ta te nhinkaɗ na, a ta nda a ndohi njè ma Zhiklè, a ta ngra nga. 3Ko i ha, i hur amba, aman i windè ka skwia staɗ staɗ tèlèba, ara man i junjor te nhinkaɗ na, 4a ka da suna, skwi man ta senda ka, a ngu arsa a vava.
Gol Zhiklè a hodko nyi Jean Baptiste
5Te va man Hérode bi kokwar Judée, ndo mvi skwi a Zhiklè ngiɗè a zhè, nzlembaɗ na Zacharie, te verzi Abia. Ngwoz nengaʼa nzlembaɗ na Elisabeth, nte va dalahi Aaron. 6Ta cèw ba, ta ndohi nzuraʼa a sam di Zhiklè, a ta dzodzor ma nkwèr Bi Zhiklè a ma kita nengaʼa, ta tawaɗaha ɓai, ko staɗ.
7Ta yi kra azɓai. Elisabeth delai. Ta cèw ba ta hala ma.
8A pats ngi mizlinè na, Zacharie a ngu mizlinè te gi Zhiklè. Ndohi mvi skwi a Zhiklè ta venu va a mizlinè tengaʼa pèc pècèk. 9A nengaʼa a mdo a gi Zhiklè, a mpeda ɓurdi a vogwa, man vodzok a düzhè, ara man ndohi Juif ta giaʼa pèc pècèk. 10A pats nasa ndohi tèlèba ta tʼuda, a ta tsu rai. 11A gol Bi Zhiklè staɗ a ngudoko na va a dai a Zacharie, a sam mvi skwi a Zhiklè, man vodzok a düzhè a pa, te civèɗ ri mandai. 12Aman Zacharie a rkaʼa, a gudzai, zlau a dza na. 13Gol Zhiklè a ngaɗa na: Ka gu zlau ɓai, Zacharie; aman Zhiklè a ntsena ntsi ri ngaya. Elisabeth, ngwoz ngaya, a da ya ka kra nguraʼa, a ka da va na nzlembaɗ na Jean. 14A gi a kra man ndav ngaya a wuffè langlangaʼa a géɗèʼa. A ndohi kumba ta da wuffè a géɗ nyi nengaʼa. 15Nengaʼa a gi a ndo mbiaʼa a sam di Bi Zhiklè, a da si zom a skwi man a dè gèɗ azɓai. Ko tʼhwaɗ mam na, Mèzhèɓ Zhiklè nkezlaʼa a nʼndha ndav na. 16A da ngwodko ndav wuda Israel kumba a sam Bi Zhiklè tengaʼa. 17A nengaʼa a dè a ma Bi Zhiklè te Mèzhèɓ a wuɗi Elie, a ngwodko ndav babgihai a sam wud ta, a gi aman ndohi mèdègèd a ta hér ma ndohi nzuraʼa, a da til ndohi a sam Bi Zhiklè. 18Zacharie a ngaɗa na gol Zhiklè: I da shinè skwi haha te mè? Aman iyè, i babgai, ngwoz ga ba, nhala ma. 19A gol Zhiklè a mʼmbeɗa na a ma: Iyè Gabriel, man i zlatsa a sam di Zhiklè. Nengaʼa a nzlindekayè man i gaɗa ka ma haha. A i ngreda ka ma mbela haha. 20Ani haha ka gi a ndaɓazlam. Ka slaha ka gèɗè azɓai, ha pats man skwi haha tèlèba a ndev na, a géɗ man ka ca ma ga a ndav ngaya ɓai. Aman a da gi ara ma ga a vava.
21A ndohi tʼuda ta zhèr Zacharie, a ta hur a vata, aman a ngu ndudoh te gi Zhiklè. 22Mshkè Zacharie auda ma, a slaha a ngèɗè ɓai. A ta suna, skwa a nrka na dai te gi Zhiklè. Nengaʼa a geda ri mènè, nʼnde na a ndaɓazlam ma.
23Aman mizlinè nengaʼa klèng ma, a ndo na ngwai. 24Te deɓaʼa Elisabeth, ngwoz na, a ngu a hwaɗ, a nʼngheda va na ki zlam, a ngaɗa: 25Bi Zhiklè a vay pombai arsa, te man a héryè te ndav na, a cay hori auda a dai.
Gol Zhiklè a hodko nyi Yèsu
26Te mamokwa kia, Bi Zhiklèa nzlündo Gabriel, gol nengaʼa, a kokwar Nazareth, te Galilee, 27a sam bidali ngiɗè, medemi Joseph, te verzi David. Nzlembaɗ demaʼa, Marie. 28A gol Zhiklè a mdo a gai a sam na, a ngaɗa na: Mwuffe a sam ngaya, ka man Zhiklè a mva ka pombai! Bi Zhiklè a zhè a nda ka! 29Aman demaʼa a ntsena ngèɗè haha, a gudzai, a nhuro: Mabali haha nkèkèkè? 30A gol Zhiklè a ngaɗa na: Ka gu zlau ɓai, Marie! Ka ngots pombai a sam Zhiklè! 31Na haha, ka da gi a hwaɗ, ka da yi kra nguraʼa, a ka da baha na Yèsu. 32Nengaʼa a da gi a mbiaʼa, a ta da baha na kra Zhiklè te géɗèʼa. Bi Zhiklè a da va na sam nʼnzi bi David, bab na. 33A nengaʼa a da gi bai a géɗ gi Jacob a mèdèp, a kokwar-bi nengaʼa a ndivè azbai. 34A Marie a ngaɗa na gol Zhiklè: Skwi haha a da gi a nkèkèkè? I sun baki ɓai. 35A gol Zhiklè a mʼmbeɗa na a ma: Mèzhèɓ Zhiklè nkezlaʼa a di a shkè a géɗ ngaya, a wuɗi Zhiklè te géɗèʼa a da nzi a géɗ ngaya. Gar haha kra man ka da yiaʼa, nkezlaʼa, ta da baha na kra Zhiklè. 36Na haha, ko Elisabeth, dem bab ngaya, man ta baha na delai, kra tʼhwaɗ ma, ko nhala ma. Ki nengaʼa mokwa antanta. 37Skwi man Zhiklè a slaha bi ba, azbai. 38A Marie a ngaɗa: Na haha, i ɓèl Bi Zhiklè. Da gu a sam ga, ara man Zhiklè a gaɗa. A gol Zhiklè a mdo na.
Marie a ngela na di a Elisabeth
39A pats nasa Marie a nslambaɗa, a mdo, tsam tsam va a za ngiɗè te kokwar Judée. 40A ndo a gi Zacharie, a nʼnga na mbalai a Elisabeth. 41Aman Elisabeth a ntsena mbali Marie, kra tʼhwaɗ a gidè va, a Mèzhèɓ nkezlaʼa a nʼndha ndav Elisabeth. 42A Elisabeth a mboho a wuɗai: Te ndev ngwozai, Zhiklè a mpshè ka ma, kinè a kra ntʼhwaɗ ngaya! 43I wa, a mam Bi ga a shkè a sam ga? 44Na haha, man i tsena mbali ngaya te zlembaɗ ga, ambaha kra ntʼhwaɗ ga, a wuffè, a gidè va. 45Mwuffe a sam ngaya, man ka co a ndav; a gi ara man Bi Zhiklè a gaɗa ka!
Marie a sli dimèsh nslébèrdè Zhiklè
46A Marie a ngaɗa: Ndav ga a slébèrdè Bi Zhiklè! 47Mèzhèɓ ga a wuffè te Bi Zhiklè, Bi mʼmbelyè! 48Nengaʼa a nrkayè, i ɓèl nengaʼa nkèshèʼa. Na haha, anai verzi ndohi tèlèba ta da gaɗayè: Mwuffe a sam ngaya! 49Aman Zhiklè wuɗi tèlèba a ngu skwi mbiaʼa a sam ga. Nzlembaɗ nengaʼa nkezla. 50A verzi, verzi ndohi man ta gi zlauaʼa, ta sia te va. 51Ri nengaʼa a ngu skwi mbiaʼa. A nksar ta ndohi nfi va aussa. 52A nhelka ta ndohi mbibihiaʼa auda a sam nʼnzi bi ta, a nslambaɗda ta gèɗ a ndohi man ta manda gèɗ ta a hai. 53Ndohi man mi a keɗ ta, a nʼngez ta a skwi man amba a vata; aman ndohi mèshèlè a menda ta a deɓa, skwa a te ri ɓai. 54Nengaʼa a ntakaha Israel, ɓèl na. 55Abraham a wud na ta sia te va a mèdèp, ara man a gaɗa ta bababhi nga.
56A Marie a nʼnza a sam nengaʼa, ki makar. Te deɓaʼa a ndo na a deɓa a ngwai.
Nyi Jean Baptiste
57A pats nyi kra Elisabeth, a myu kra nguraʼa. 58A nslamagihi na, a gwoli na ta tsena, a msau Bi Zhiklè te va, a ta wuffè a nda nengaʼa. 59Mʼmèn matsamakaɗaʼa a ta shkè, aman ta ngél ngwon kra, a ta woy a ta va na nzlembaɗ bab na, Zacharie. 60A mam nengaʼa a ngaɗa ta: Azɓai, sèi ta baha na Jean! 61A ta gaɗa na: Te va gwoli ngaya ndo man a ngots nzlembaɗ ar haha, ngiɗè a zhi ɗè? 62A ta kutèka na ri a bab na, a woy a ta baha na kra wa? 63A nengaʼa a ndzhoɗo wof, a mwindeda pa: Nzlembaɗ na Jean. Ta tèlèba ta rzl ta. 64A nasa nasa ma nengaʼa a mwin na, a nèʼèn nengaʼa a mpre na, a ngèɗè, a nslubordo Zhiklè. 65A zlau a ndza ta nslamagihi ta. Te za Judée tèlèba ta goɗ ma haha. 66A ndohi tèlèba man ta tsenaʼa, ta hérèʼa a ta gaɗa: Kra haha a da gi a kra mè? Aman Bi Zhiklè a zhè a nda nengaʼa.
Zacharie a hodko ma
67A Mèzhèɓ Zhiklè nkezlaʼa a nʼndha ndav Zacharie, bab kra. A Zacharie a nhodko ma, a ngaɗa: 68Va-slubordo Bai, Zhiklè Israel, aman nengaʼa a mshkè a sam ndohi na, a mpreka ta auda. 69A mva nga ndo mʼmbel ndo man wuɗi na zhè, te verzi David, ɓèl na, 70ara man a hodko ma te ma ndohi nhadka ma nkezlahiaʼa halaʼa, 71ara man a gaɗa, a mbel nga te ri ndohi mayamhi nga, te ri ndohi shèwa nga tèlèba. 72Bababhi nga ta sia te va, a hér nderzlè-ma nengaʼa nkezlaʼa, 73a mʼmbèdè man a mbaɗa na Abraham, bab nga. 74Aman te deɓaʼa, aman nga mbel nga te ri ndohi mayamhi nga ma, a gi aman nga gi mizline nengaʼa a zlau ka ɓai, 75zuraʼa, a ndav nkezlaʼa, a sam di nengaʼa, a pats nshèffè nga teleba. 76Ka ba, kra ga, ta da baha ka ndo nhadka ma Bi Zhiklè te géɗèʼa, a ka de a ma ma a sam di Bi Zhiklè, aman ka tila na civèɗ, 77a ka winè ta dai a ndohi na, aman ta rka skwi mʼmbel tengaʼa, a mali tengaʼa mpraʼa; 78a géɗ man nga si Zhiklè te va. Te nengaʼa skwi man a vangka te géɗèʼa a mshkè a sam nga, 79aman a hela ta sam a ndohai, man ta te ruva, man ta te mèzhèɓ mʼmetsai, a da pa nga sak a civèɗ gumai.
80A kra a grè a grè, a nʼngots wuɗai te Mèzhèɓ Zhiklè, a nʼnza te ndev hèshèkèɗ, ha pats man a ngreda ta va na auda a sam ndohi Israel.
Currently Selected:
Luc 1: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
