Marc 15

Yèsu a sam Pilate

(Mt. 27,1-2, 11-14; Luc 23,1-5; Jean 18,28-38)

1A prèk te gai, ta tsomma, a ndohi mvi skwi a Zhiklè mbibihiaʼa, a ndohi nhalaʼa, a malamhai, a ndohi kita tèlèba.

2Aman ta dzawa Yèsu ma, ta daʼa, a ta va na a ri a Pilate. Pilate a ndzhoɗo: Ka bi ndohi Juif dè? Yèsu a mʼmbeɗa na a ma: 3Ara ngèɗè ngaya. A ndohi mvi skwi a Zhiklè mbibihiaʼa ta püno a ma tsaɗ tsaɗ. 4A Pilate a ndzhoɗo zaʼa: Ka mbeɗa nga a ma azɓi ɗè? 5Tsena, man ta pin ka a ma tsaɗ tsaɗ. A Yèsu a mʼmbeɗa ta a ma asaɓi fèt, a Pilate a nrzl na.

Ta ngela na kita mʼmetsai a gèɗ Yèsu

(Mt. 27,15-26; Luc 23,13-25; Jean 18,39—19,16)

6A pats ngolala, a pats ngolala, Pilate a mpra ndo dangai staɗ, nengaʼa man ndohi ta woyaʼa. 7Te gi dangai ndo ngiɗè a zhè, nzlembaɗ na Barabbas. Ta a golahi nengaʼa ta keɗa ndo te va nrubai. 8Ndohi rèdèdèʼa ta shkè, aman ta jhèɗè skwai, ara man Pilate a va ta pèc pècèk. 9Pilate a mʼmbeɗa ta a ma: Kin woy a i pra kinè bi ndohi Juif ɗè? 10Aman nengaʼa a suna, ta gskoɗi Yèsu a srak genè. 11Aman ndohi mvi skwi a Zhiklè mbibihiaʼa ta poko ta gèɗ auda a ndohi rèdèdèʼa, dara Pilate a pra ta Barabbas. 12A Pilate mʼmena na a gèɗ, a mʼmbeɗa ta a ma zaʼa: I gi mè a nengaʼa man kin baha na bi ndohi Juif?

13A ta boho: Gezlalaʼa! 14A Pilate a ngaɗa ta: A ge mali mè? A ta boho hololaʼa: Gezlalaʼa! 15A Pilate a woya aman a ga ta skwi man ambaha ta ndohi, rèdèdèʼa, a mpra ta Barabbas. Te deɓaʼa amari ta ndoho a mènèwèɗ ma, a mva ta Yèsu a rai, a ta gezlalaʼa.

Sojèhi ta ngwossaha Yèsu

(Mt. 27,37-44; Jean 19,2-3)

16A sojèhi ta co Yèsu, a ta daʼa a gala ngomna, a ta baha ta sojèhi tèlèba. 17A ta va na maslaka vèvèzh a va, ta paɗa na gèɗ a vatak ntsaffaʼa. 18Te deɓaʼa ta hüno a ta ga na mbalai: Mbali bi ndohi Juif! 19A ta tsu géɗèʼa a gada, a ta njfa na slèslèɓ a va, a ta gurɓahai a sam na, a ta ngwossaha, a ta kalahai a deɓ sak nengaʼa. 20Te deɓ man ta ngwossaha ma, ta cèma na maslaka vèvèzh auda a va, a ta va na maslaka na a va, a ta daʼa, aman ta gezlalaʼa.

Ta gezlala Yèsu

(Mt. 27,32-44; Luc 23,26-43; Jean 19,17-27)

21A ta fa na a gèɗ a wuɗai a Simon te Cy-rène, Bab Alexandre a Rufus, man a shkè te gi dau na, aman a zhüɓ wof ngézlèl Yèsu. 22A ta da Yèsu a sam man ta baha na Golgotha, ara ngèɗè ‘Vatasl gèɗ’. 23A ta va na iyam man a zhkè mbertéktékaʼa, aman a nsiaʼa. Aman nengaʼa a nca ɓai.

24A ta gezlala, a ta kezla maslaka nengaʼa, a ta gu jimèr, ta woy a ta sun skwi man ndo staɗ staɗ a ngècèʼa. 25Man ta gezlala, gol pats.

26Mali man a metsa a géɗèʼa, ta windeda a deɓ wof: Bi ndohi Juif. 27A ta gezlala a nda ndohi metsarhi cèw, staɗ te ri mandai, ngiɗè te ri gula. 28(A gau, ara man ta Windo te ɗèlèwèr Zhiklè. Ta feda a ndev ndohi malihai).

29Ndohi man ta beza a pa, ta durdo, a ta gidè gèɗ kwotakwotaʼa, a ta gada: Ɗakwa, ka, ka gaɗa: i mbeɗda gi Zhiklè aussa, a i rèmèʼa te mʼmèn makar, 30mbela va ngaya a ri ngaya, sulomkaɗahai a wof ngézlèlè! 31A ndohi mvi skwi a Zhiklè mbibihiaʼa ba, a malamhai ta goɗ a va ta: A mʼmbel ta ndohi ngiɗè, va na a slaha a mʼmbela ɓi ɓè? 32Aman nengaʼa Kristi, bi Israel, da sulomkaɗahai a wof ngézlèl na haha antanta. A nga rkaʼa, nga da cè a ndav nga! Tengahi man ta gezlal ta a nda nengaʼa ba, ta durdo.

Mʼmetsi Yèsu

(Mt. 27,45-56; Luc 23,44-49; Jean 19,28-30)

33A gèɗ pats, ruva a ngau a géɗ herkeda tèlèba, ha pats tsafkata. A pats tsafkata Yèsu a mboho a wuɗai: 34Eloi, Eloi, lama sabachthani? ara ngèɗè: 35Zhiklè ga, Zhiklè ga, ka jèkyè èhèmè? Tengahi ngiɗè man ta nza a pa, ta tsenaʼa, a ta gada: Na haha, a baha na Elie. 36A ndo staɗ a nkalda maslaka a iyam mbertéktékaʼa, a mʼmanda a gada, a ntkwo na ma, a ngaɗa: Kazladai, nga rka, aman Elie a shkè, a nckoɗahai!

37Aman Yèsu a mboho a wuɗai a vata, a mʼmets na.

38Te gi Zhiklè, maslaka mbiaʼa a nkurats na te va, te géɗèʼa a nshkèhi a godok.

39Bi sojè, man a zlatsa zuraʼa a Yèsu, a rkaʼa, man a mets na ar haha, a ngaɗa: Ndo haha a vava kra Zhiklè.

40A ngwozi ba ta zhè, aman ta pi di dra. Te va tengaʼa Marie Magdala, Marie mam Jacques nkèshèa a Joses, a Salomé, 41man ta dzodzora, a ta takaha, te va man a zhè te Galilée dai, a tengahi ngiɗè tsaɗ tsaɗ man ta shkè a Jérusalem a verzi nengaʼa.

Ta ra Yèsu

(Mt. 27,57-61; Luc 23,50-56; Jean 19,38-42)

42A dakwaɗ man pats nkala ma, nciɗ samaʼa pats nshèk va, aman ta til patsaʼa ma, 43Joseph te Arimathée, ndo ncèmma mbiaʼa, a mshkè; nengaʼa ba a zhèr kokwar Bi Zhiklè. Nengaʼa a nʼnga zlau ɓai, aman a ndo a sam Pilate, a njhèdè va Yèsu. 44Pilate a nhuro a vata, aman Yèsu a mʼmets na tsam tsam aranta. A mbaha na bi sojè, a njunjoro, aman a mets na nʼnzi a zhè. 45Aman a ntsena zuraʼa a sam bi sojè, a mva na nckondo Yèsu a Joseph. 46A Joseph a nsum maslaka, a mproko Yèsu a hai a wof ngèzlèl na, a mpaɗda maslaka, a mfeda a gi dzavi te za, a ta gudumbala na ngezlambar kwa mbiaʼa a ma gi dzavai. 47A Marie Magdala, a Marie mam Joses ta rka sam man ta feda Yèsu a pa.

Currently Selected:

Marc 15: MOF89

Highlight

Copy