Marc 14

Ndohi mbibihiaʼa ta vhe ma a géɗ a Yèsu

(Mt. 26,1-5; Luc 22,1-2; Jean 11,45-53)

1Njèkè mʼmèn cèw, ga ngolala Pâque a movar man skwi nshégè-rè a te di ɓai. A ndohi mvi skwi Zhiklè mbibihiaʼa, a malamhai ta woy maya, aman ta gshè Yèsu a maya ncèkèlma, aman ta keɗaʼa. 2Aman ta gada: Te ngolala ka ɓai, man ɓai ndohi ta da rubai.

Ngwoz a faɗa na mbar a gèɗ Yèsu te Béthanie

(Mt. 26,6-13; Jean 12,1-8)

3Yèsu a zhè te Béthanie, te gi Simon, ndo hutsoɗ. Aman a ndu skwai, ngwoz ngiɗè a mshkè a gai, a koloba ɓurdi te rai, a ɓurdi mbelaʼa, nshum nengaʼa a vata. A mpaslama na ma a koloba, a mbaɗa na burdi a gèɗ Yèsu. 4Tengahi ngiɗè ta gu ndav, ta ɓüco ma, a ta goɗ a va ta: Ɓurdi haha ngedas na, amba dè? 5Dara man ta preda ma a Suli 300.000, a ta va ta ndohi ntawassaʼa. A ta gu ndav a géɗ ngwozaʼa. 6Aman Yèsu a ngaɗa ta: Va-jèkeda ngwoz haha! Kin pra na zlau a va èhèmè? A ngu skwi man amba a sam ga. 7Ndohi ntawassaʼa ta zhè a sam kinè pèc pècèk. Aman kin woy a kin ga ta skwi man amba, kin slaha. Aman iyè, i nzi a sam kinè pèc pècèk azɓai. 8Nengaʼa a vau skwi man a slaha a viaʼa. A mfaɗay mbar a va, ga i metsi ga. 9A vava i gada kinè, tʼherkeda tèlèba man ta da njè ma mbelaʼa, ta da gèɗè skwi man ngwoz haha a gau, a ta da hérèʼa.

Judas a woya a ga na ri a gèɗ a Yèsu

(Mt. 26,14-16; Luc 22,3-6)

10Judas Iscariot, staɗ te va 12, a ndo a sam ndohi mvi skwi Zhiklè mbibihiaʼa, aman a ga na ri a gèɗ a Yèsu. 11Aman ta tsenaʼa, ndav ta langlangaʼa, a ta gaɗa na: Nga da va ka sulai. A Judas a woy maya, aman a ga na ri a gèɗ a Yèsu.

Yèsu a ndi skwi nʼndi Pâque a nda golahi nengaʼa

(Mt. 26,17-25; Luc 22,7-14, 21-23; Jean 13,21-30)

12Pats man ta ndi movar man skwi nshégèrè a te di ɓai, nshèlèkuraʼa, aman ta zli tambak Pâque, golahi Yèsu ta gada na: Ka woya aman nga tila ka skwi nʼndi Pâque a ka ndiaʼa tema? 13A nengaʼa a nzlündo cèw te va golahi nengaʼa, a ngaɗa ta: Vo-do a kokwar mbiaʼa, a kin da zli gèɗ a ndo ngiɗè, a duzlak a gèɗ. Va-dzodzora! 14A sam man a dè a pa, kin gada na babgiaʼa: Ndo njèngè ma a gada: Gi mbrok ga tema, aman nga ndi skwi nʼndi Pâque a nda golahi ga? 15A nengaʼa a da ngreda kinè gi mbiaʼa a géɗèʼa, kolongwi te pa, tèlèba ntila amba. A samaʼa i woya man kin tila nga skwi nʼndi Pâque. 16A golahi Yèsu to do, a ta ndikè a kokwar, a ta ngots skwi tèlèba, ara man Yèsu a gada ta. A ta tila skwi nʼndi Pâque.

17A dakwaɗ, Yèsu a mshkè a nda tengahia 12. 18Aman ta nzahai a ta ndi skwi nʼndai, Yèsu a ngaɗa: I gada kinè a vava, staɗ te ndev kinè, man nga ndi skwi a vna, a da gay ri a gèɗ. 19A ta hüno a ta kuɗi te ndav, a ta gada na staɗ staɗ: I dè? 20Yèsu a ngaɗa ta: Staɗ te ndev 12, nengaʼa man nga tèr ri a gandaf a vna. 21Krando a dè na, ara man ta Windo te ɗèlèwèr Zhiklè a géɗ nengaʼa. Aman wobau a géɗ ndo man a ga na ri a gèɗ kra-ndo. Daraʼa man ta yoko ɓai.

Nhinè ndi skwi nkezlaʼa

(Mt. 26,26-30; Luc 22,15-20; I Cor. 11,23-26)

22Aman ta ndi skwi nʼndai, Yèsu a nco movar, te deɓ man a mpshè na ma, a ntsakaʼa, a mva ta, a ngaɗa: 23Vo-co, na haha va ga. Te deɓaʼa a nco kokwai, te deɓ nshid gèɗ, a mva ta, a ta su tèlèba te pa. 24A ngaɗa ta: Na haha Pombaz ga, Pombaz nderzlè-ma, man mbadahai a géɗ ndohi kumba. 25A vava i gaɗa kine, anai i si barassa te deɓ anta asaɓai, ha pats man i da siaʼa mɓuaʼa a nda kinè te kokwar Bi Zhiklè.

26Te deɓaʼa man ta sla dimèsh Psaume ma, to do ta a za oliviers.

Pierre a da cèkèlma a géɗ Yèsu (Mt. 26,31-35; Luc 22,31-34; Jean 13,36-38)

27Yèsu a ngaɗa ta: A vaɗ haha kin da je-kyè a pa tèlèba. Aman ta Windo te ɗèlèwèr Zhiklè: I keɗa ndo mɓér skwai, a tambakihi a ta ngezl ta. 28Aman i slambaɗkaɗauda te mʼmetsi ma, i dè a ma kinè a kokwar Galilée. 29A Pierre a ngaɗa na: Aman ta jèke ka a pa tèlèba, iyè, i jèkè ka a pa azɓai. 30A Yèsu a ngaɗa na: I gaɗa ka a vava, a patsna, a vaɗ haha, ga ngarah a tsi daʼai cèw, ka da cèkèlma a géɗ ga sak makar. 31Aman Pierre a tsi gèjau genè. Ko man i metsi ga a va ka, i cèkèlma a géɗ ngaya azɓai. Tèlèba ta goɗa arsa.

Ntsi ri Yèsu te Gethsémané

(Mt. 26,36-46; Luc 22,39-46)

32Te deɓaʼa to do a sam man ta baha na Gethsémané, a Yèsu a ngaɗa ta golahi nengaʼa: Va-nzahai, i da tsi rai. 33A nco Pierre, Jacques a Jean, a hüno man a gudzai, a hér zlau te gèɗ, 34a ngaɗa ta: Nlèyè a keɗyè a hi a vèvèɗ. Va-nza haha, va-nza a dai! 35Te deɓaʼa a nco sak a ma kètè, a nkalda va na a hai, a ntsu rai. Aman a slaha, sam patsaʼa do do auda a sam na. 36A ngaɗa: Abba, Bab ga, ka slaha skwi tèlèba, co kokwi haha auda a sam ga; aman ara man i woya ka ɓai, aman ara man ka, ka woyaʼa. 37A Yèsu a mshkè a sam golahi nengaʼa, a nʼngats ta, ta nzhuna, a ngaɗa na Pierre: Simon, ka nzhuna! 38Ka slaha ka nzi a dai a nda iyè kèshkata azɓi dè! Va-nza a dai, va-tsu rai, skwa da pe kinè a wi ɓai! Mèzhèɓ a woya a ngi amba, aman wuɗi ndo azɓai. 39A mdo na zaʼa, a ntsu ri arsa genè. 40A mshkè a deɓa zaʼa, a nʼngats ta, ta nzhuna. Ta zhingètè, nzhunè a di tengaʼa. A ta sun ma man ta menda na ɓai. 41A Yèsu a mshkè a deɓa mamakaraʼa, a ngaɗa ta: Antanta va-nzhun ma! Va-sok va! Dèʼa! Tiɗè sama ma! Na haha, ta va na kra-ndo a ri a ndohi malihai. 42Va-slambaɗa, ngo-dokoya, na haha nengaʼa man a gay ri a gèɗ a herdeka nga va.

Ta gshè Yèsu

(Mt. 26,47-56; Luc 22,47-53; Jean 18,2-11)

43A nasa nasa, aman a gèɗè dai, Judas a mshkè, staɗ te va 12, a ndohi rèdèdèʼa a nda nengaʼa, a tsakwal, a gèɗ gada. Ndohi mvi skwi a Zhiklè mbibihiaʼa a malamhai a ndohi nhalaʼa a nzlindeka ta. 44Ndo nʼnga na ri a gèɗ Yèsu a nʼngreda ta ar haha: Ndo man i kelawa na ri a daʼai, nengaʼa! Va-gsa mbelembela, a kin daʼa! 45Mshkè na, a nherda na va a Yèsu, a ngaɗa: Rabbi, a nkelawa na ri a daʼai.

46Te deɓaʼa ta faha ri a Yèsu, a ta gso. 47Staɗ te ndev tengaʼa man ta zhè a samaʼa, a mpho kafahi gwèsh, a ntsahama na zlembaɗ a ɓèl bi ndohi mvi skwi a Zhiklè. 48A Yèsu a ngaɗa ta: Kin shkè a sam ga, ara man kin shkè a sam ndo metsar, a tsakwal, a géɗ gada te rai, aman a kin gsyè dè? 49Pèc pècèk i nza a sam kinè, a i senda kinè te gi Zhiklè, aman kin gsiyè ɓai. Aman skwi a gi ara man dèlèwèr Zhiklè a gaɗa.

50Te deɓaʼa tèlèba ta jèkeda, a ta hu ta.

Gola man a hu na

51Gola staɗ a ndzodzora, jampi a va genè. A ta gso. 52Aman nengaʼa a mpra ta maslaka na a rai, a mhu na adai.

Yèsu a sam kita

(Mt. 26,57-68; Luc 22,54-55, 63-71; Jean 18,12-14, 19-24)

53A ta da Yèsu a sam bi ndohi mvi skwi a Zhiklè, a sam man ndohi mvi skwi a Zhiklè mbibihiaʼa tèlèba ta ɓiceda va a pa, a ndohi nhalaʼa a malamhai. 54A Pierre a ndzodzor te deɓa dra, a nʼnzahai a nda ndohi mizlinè te gala bi ndohi mvi skwi a Zhiklè, aman a dzi vogwa.

55A ndohi mvi skwi a Zhiklè mbibihiaʼa, a ndohi kita tèlèba, ta hèsh malwuɗi a gèɗ Yèsu, aman ta slaha ta keɗaʼa. Aman ta ngatsa ɓai. 56Aman ndohi tsaɗ tsaɗ ta goɗ ma malwuɗi ncèkèlma a géɗ Yèsu, a malwuɗi tengaʼa nhumda ɓai. 57Tengahi ngiɗè ta slambaɗa, a ta tsokol ma a géɗ nengaʼa, a ta gaɗa: 58Nga tsena ara man a gaɗa: I woya man i mbeɗda gi Zhiklè haha aussa, man ri ndo a ngau, a i da rèm ngiɗè te mʼmèn makar, gi man ri ndo a ngu ka ɓai. 59Ko ar haha malwuɗi tengaʼa nhumda ɓai. 60Te deɓaʼa bi ndohi mvi skwi a Zhiklè a nslambaɗa te ndev nhèyè-ndo, a ndzhoɗo Yèsu: Ndohi haha ta gi ma a géɗ ngaya, ka mbedi a pa azɓi ɗè? 61Aman Yèsu a nza tètè, a mʼmbeɗa ta a ma ɓai. Bi ndohi mvi skwi a Zhiklè a ndzhoɗo zaʼa: Ka Kristi, kra Zhiklè man ta slébèrdèʼa ɗè? 62A Yèsu a ngaɗa na: I nengaʼa. A kin da rka kra-ndo, nʼnza te ri mandi Zhiklè, a di a shkè te zhiklè te va vanai. 63Te deɓaʼa bi ndohi mvi skwi a Zhiklè a nkuratseda maslaka nengaʼa aussa, a ngaɗa: Kos nga woy malwuɗi za ɗè? 64Kin tsenaʼa, a dérɗè Zhiklè. Kin hur kè? Tèlèba ta phomda a kita mʼmetsai. 65A tengahi ngiɗè ta njfa na slèslèɓ a dai, ta pizlèma na dai, a ta ɗutso, a ta gaɗa na: Ani haha, hodko ma! Nduts ka wa? A golahi ndohi mvi skwi a Zhiklè ta tsama na bazlazlam.

Pierre a cèkèlma a géɗ Yèsu

(Mt. 26,69-75; Luc 22,56-62; Jean 18,15-18, 25-27)

66Aman Pierre a zhè te gi nte godok te gala, dem mizlinè bi ndohi mvi skwi a Zhiklè staɗ a mshkè. 67Aman a rka Pierre, a dzi vogwa, a mpa na dai, a ngaɗa: Ka ba, kin nza a nda Yèsu te Nazareth! 68Pierre a ntsokol ma, a ngaɗa: I sun ɓai, i sun skwi man ka woya a ka gaɗayè a haha ɓai. Te deɓaʼa a mdo auda a dzaudzau. 69A dem massa, man a rkaʼa, a nhüno zaʼa, a ngaɗa ta ndohi a di vogwa tèlèba: Ndo haha staɗ te va golahi ndo sa! 70A Pierre a ntsokol ma zaʼa. Te deɓ kètè tengahi man ta zhè, ta gaɗa na Pierre zaʼa: Halau, ka te va ndohiaʼa; daʼai ngaya ara ndo Galilée. 71A Pierre a hüno a ngèɗè, a mʼmbaɗa: I sun ndo man kin gèɗè haha ɓai! 72A nasa nasa ngarah a ntsu daʼai macecèwaʼa. A ma Yèsu a nhaka na gèɗ a Pierre, man a ngaɗa na: Ga ngarah a tsi daʼai macecèwaʼa, ka cèkèlma a géɗ ga, sak makar a nhur a vata, a nkuɗau.

Currently Selected:

Marc 14: MOF89

Highlight

Copy