Marc 13
13
Yèsu a hodko ma a géɗ ngédèshè gi Zhiklè
(Mt. 24,1-2; Luc 21,5-6)
1Mshkè Yèsu auda te gi Zhikiè, gol nengaʼa staɗ a ngaɗa na: Ndo njèngè ma, rka gihi haha, man ta gu a kwa mbibihiaʼa dai! 2A Yèsu a ngaɗa na: Ka rka gihi mbibihiaʼa haha cè? Ko kwa staɗ a da nzi a géɗ ngiɗè azɓai, ta da mbeɗ ta tèlèba.
Nhinè matakwan
(Mt. 24,3-14; Luc 21,7-19)
3A Yèsu a nʼnzahai a géɗ za oliviers, zura a gi Zhikiè. A Pierre, Jacques, Jean a André ta dzhoɗo, ta a géɗ ta: 4Gada nga, kos skwi haha a da gi a ngèmè? Nga da shinè te mè, aman a da gi ar haha tèlèba?
5Yèsu a ngaɗa ta: Va-gu maya, ndo da pètè kinè ɓai! 6Aman ta kumba ta da shkè a nzlembaɗ ga, a ta gaɗa: Iyè Kristi! A ta pètè ta ndohi kumba. 7Aman kin tsena ma var, nguzli var, kin gu zlau ɓai; skwi haha a da gi ndèzl. Aman skwi haha nʼndikèma di ka ɓai. 8Ndohi herkeda ngiɗè ta da slambaɗa ta va a ndohi herkeda ngiɗè; kokwar-bi ngiɗè a da slambaɗa na va a kokwar-bi ngiɗè. Herkeda a da gudzi a sam tsaɗ tsaɗ, a mai a di a shkè. Nasa nhinè matakwan di genè. 9Va-gu maya a géɗ va kinè. Ta da de kinè a sam ncèmma, ta da ndah kinè te gi njèngè ma Zhikiè, ta da de kinè a sam bihi mbibihiaʼa, a sam bihi nkèshèa, a géɗ ga, aman kin da gi a ndohi malwuɗihai a sam ten gaʼa. 10Séi ta njè ta ma mbelaʼa a ndohi herkeda tèlèba nshèlèkuraʼa. 11Aman ta de kinè a sam kita, kin hur gèɗ a géɗ man kin da gèɗè ɓai; aman kin da gada ta skwi man kin ngots te gèɗ kinè a samaʼa. Kinè ngèɗè ka ɓai, aman Mèzhèɓ Zhikiè nkezlaʼa a ngèɗè. 12Kramama a da da kramam na a mʼmetsai. Bab kra a da vi kra na. Wudahi ta da slambaɗa ta gèɗ a bab ta a mam ta, a ta bazl ta. 13Ndohi tèlèba ta da ga kinè shèwa a géɗ nzlembaɗ ga. Aman nengaʼa man a dè a ma ma a slagama, ha skwi a ndev na, a mbél na.
Matakwan mbiaʼa
(Mt. 24,15-28; Luc 21,20-24)
14Aman kin rka skwi ngedassaʼa man a ndèrè a ndo a zhè a sam man ta woya a pa ɓai (ndo man a jèngèʼa, da huro), ndohi te Judée sèi da hu ta a za. 15Ndo man a nza a géɗ gai, da shkèhi do do a gi ɓai, aman a hil skwi te gai. 16Ndo man a zhè te gi dau, da shkè a deɓa ɓai, a nda cè maslaka na. 17Woba ngwozi man ta a hwaɗ, a ngwozi man wuda a rai, a pats sa. 18Va-tsu rai, aman skwi arsa a da ga kinè a vi ɓai. 19Te ndev nasa matakwan mbiaʼa a zhè, te nhinkaɗ man Zhikiè a ngu herkeda, ha patsna, aranta azɓai. 20Aman Zhikiè a ntakossa patshi sa ɓai, ar ndo a mbélè azɓai. Aman a géɗ ndohi man Zhiklè a mpar ta, a ntakossa patshi sa. 21Te deɓaʼa man ndo ngiɗè a gada kinè: Na haha, Kristi! Kristi ahngata! Kin co ma nengaʼa ɓai! 22Aman Kristihi ncèkèlma, a ndohi nhadka ncèkèlma ta da slèmbèɗè, a ta da ngreda skwi malwuɗai a nrkedai, man ta pèkètèdè ndohi man Zhikiè a mpar ta, man ta slaha. 23Aman kinè, va-gu maya! Na haha, i gaɗa kinè skwi tèlèba a hi ma.
Mshkè kra-ndo a deɓa
(Mt. 24,29-31; Luc 21,25-28)
24Te ndev nasa, te deɓ matakwan, pats a dè na a zhikiè, a kia a hél sam asaɓai, 25a bantihai ta wush ta hai, a wuɗihi te zhikiè te géɗèʼa ta wurɗko va. 26Te deɓaʼa ta da rka kra-ndo man a shkè te va vanai, a wuɗi mbiaʼa, a nʼnjèl na. 27Te deɓaʼa a da zlinde ta golahi nengaʼa, a ta ɓic ta ndohi man a mpar ta te tsagi herkeda faɗ, te verzi zhikiè, a ndè a verzi zhikiè ngiɗè.
Va-ɗöl te wof tèngètè!
(Mt. 24,32-35; Luc 21,29-33)
28Va-ɗöl te wof tèngètè! Aman ri wof nengaʼa a gi kilɓakilɓaʼa, a vahaʼa a gi rutsutsaʼa a dai, via ndul ndul ma. 29Lèmèlèmè kinè ba, aman kin rka skwi haha a shkè, va-suna, kra-ndo a zhè ndul ndul a ntamagi. 30A vava i gada kinè, ndohi man ta a géɗ herkeda antanta ta da ndivè azɓai, sèi skwi haha a gi dai. 31Giɗfèk a herkeda ta da ndiv ta. Aman ma ga a da ndivè azɓai.
Ndo a sun patsaʼa ɓai
(Mt. 24,36-42; Luc 17,26-30, 34-36)
32Aman patsaʼa, ndo a sun ɓai, ko golahi Zhiklè te zhiklè, ko kra Zhiklè, sèi Bab Zhiklè stadgenè.
33Va-gu maya, va-nza a dai, va-tsu rai, te man kin sun pats man skwi haha a shkè ɓai. 34Ara ndo man a dè nshèwèlè, a njèkeda gi na, a mva ta mizlinè a ri a ɓèlèlihi na, a nʼngreda ta mizlinè tengaʼa staɗ staɗ tèlèba. A ngaɗa na ndo mɓer ntamagai, aman a ɓerèʼa. 35Va-nza a dai, te man kin sun pats man babgi a shkè a deɓa ɓai. Gar a pats dakwaɗ, gar a géɗ vaɗ, gar a prèk vaɗ, gar a prèk. 36A da shkè a nasa nasa, a nda ngats kinè, kin nzhuna. 37Skwi man i gada kinè, i gada kin tèlèba: Va-nza a dai!
Currently Selected:
Marc 13: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
