Genèse 35

Zhiklè a pshè na ma Jacob te Béthel

1A Bi Zhiklè a ngaɗa na Jacob: Slambaɗa, do a kokwar Béthel, a ka nza a pa, a ka rom sam mvi skwi a Zhiklè a pa, a Zhiklè man a ngudoko ka va a dai, aman ka hu ngaya auda a sam Esau, kramam ngaya. 2A Jacob a ngaɗa ta ndohi gi na tèlèba, a ndohi tèlèba man ta zhè a sam na: Va-wusheda vrihi kinè aussa! Va-tül va kinè, va-humbaɗa maslaka kinè! 3Te deɓaʼa ngo-slomboɗokoya, a ngo-dokoya a Béthel! Te pa i da rèm sam mvi skwi a Zhiklè, a Zhiklè man a takahayè a pats man skwi mwuɗitpa a gayè, a zhè a sam ga a civèɗ man i beza a pa. 4A ta tèlèba ta va na vri ta a Jacob, a skwi zlembaɗ ta, a ta rda a vèvèɗ a sam gètèl wof a ma Sichem.

5Te deɓaʼa ta slambaɗa. A zlau Zhiklè a ndza ta ndohi kokwar tèlèba, a ta dzar ta wudahi Israel ɓai. 6A Jacob a mshkè Luz, nasa Béthel, te kokwar Canaan, nengaʼa a ndohi man ta zhè a sam na, tèlèba. 7Te pa a nrom sam mvi skwi a Zhiklè, a mbaha na samaʼa El-Béthel#Ara ngèɗè, Zhiklè Béthel. , a géɗ man Zhiklè a ngudoko na va a dai, aman a nhu na a sam Esau, kramam na. 8A Debora, dèd Rebecca, a mʼmets na, a ta rda a verzi lakalak, a tsagi Béthel. A ta baha na ‘lakalak kuɗa’.

9A Bi Zhiklè a ngudoko na va a di a Jacob zaʼa, te deɓ man a mshkè auda te Paddan-Aram ma, a mpshè na ma. 10Zhiklè a ngaɗa na: Nzlembaɗ ngaya Jacob. Aman ani ta baha ka Jacob asa-kaɓai, ta da baha ka Israel; nʼngaʼa a bab Israel. 11A Bi Zhiklè a ngaɗa na: I Zhiklè Bi wuɗi tèlè, yau wuda, a ka mana a vata! Ndohi kumba, ndohi herkeda kumba, ta da shkè auda te ka. A bihi ba ta da shkè te verzi ngaya. 12A herkeda man i va na Abraham a Isaac, i woy a i va ka, a i woy a i va ta ndohi verzi ngaya. 13A Bi Zhiklè a ndo a géɗèʼa a sam man ta goɗ a vna. 14A Jacob a nzlatseda kwa ndzaraʼa, aman a nshinè samaʼa, a sam man ta goɗ a pa, a mbada iyam a hai a sam mvi skwi a Zhiklè, a mbada na mbar a gèɗ. 15A Jacob a mbaha na sam man Bi Zhiklè a ngaɗa na, Béthel.

Mʼmetsi Rachel

16Te deɓaʼa ta slambaɗa te Béthel. Ndul ndul a ma Ephrata, Rachel a ɗish va holholaʼa. 17Aman a yi kra a wuɗai, ngwoz nyi kra a ngaɗa na: Ka gu zlau ɓai, ka yi kra nguraʼa zaʼa. 18Ga ncè nshèffè na, a mbaha na Ben-Oni#Ara ngèɗè, kra matakwan ga. ; aman Rachel a mʼmets na. A bab nengaʼa a mbaha na Benjamin#Ara ngèɗè, kra manam. . 19Rachel a mʼmets na, a ta rda a vèvèɗ a civèɗ ndè Ephrata, te Béthlehem. 20A Jacob a nzlatseda kwa ndzaraʼa a géɗ gi dzavi nengaʼa a ta sun samaʼa kwa man ta sun gi dzavi Rachel te pa, ha patsna.

Wudahi Jacob 12

21Te deɓaʼa Israel a ndo a ma ma, a ngu gi na te wud kokwar Migdal-Eder. 22Te ndev nasa, man ta nza te kokwar Migdal-Eder, Ruben a mdo, a ta mana a Bilha, ngwoz bab na. Aman Israel a ntsenaʼa, a ngu ndav a vata. Wudahi Jacob 12.

23Wudahi Léa, ta a haha: Ruben, tsuvom Jacob; Siméon, Lévi, Juda, Issacar a Sébulon. 24Wudahi Rachel: Joseph a Benjamin. 25Wudahi Bilha, ɓèl Rachel: Dan a Naphthali. 26Wudahi Silpa, ɓèl Léa: Gad a Asser. Nasa wudahi Jacob man ta yu te kokwar Paddan-Aram.

Mʼmetsi Isaac

27Jacob a mshkè a sam Isaac, bab na, a kokwar Mamré, te Kirjath-Arba, nasa Hébron – a sam man Abraham a Isaac ta nza a pa ara mbrokihai. 28Mvi Isaac a ngu 180. 29Te deɓaʼa Isaac a mʼmets na a va gwoli na, nhala ma, nshèffè dèʼa na di ma. A Esau a Jacob, wudahi na, ta rda a vèvèɗ.

Currently Selected:

Genèse 35: MOF89

Highlight

Copy