Genèse 34

Sichem a sossura Dina

1A pats ngiɗè, Dina, dem Jacob, man Léa a ya na, a ndo nshèwèlè a sam dalahi kokwaraʼa. 2A Sichem, kra Hamor, kra bi kokwar, a nrkaʼa, a ngsedama, a nkala na va a wuɗai, a mʼmana a vna. 3A Dina, dem Jacob, a nzlama na ndav, a woy demaʼa a vata, a ntsa na tsaval mbelembela. 4A Sichem a ngaɗa na Hamor, bab na: Tsay ma dem haha! 5A Jacob a ntsena, a nsossura dem nengaʼa. Aman wudahi nengaʼa ta ɓer skwi te dak, a nengaʼa a nza tètè, a zhèr man ta shkè ngwai. 6A Hamor, bab Sichem, a mdo auda a sam Jacob, a pi gèɗ. 7Aman wudahi Jacob ta shkè ngwi te dak, ta tsena maʼa, a ndza ta a ndav, a ta gu ndav a vata, a géɗ man a ngu skwi horai te Israel, aman a mʼmana a dem Jacob. Ambaɓai man a ngu ar haha! 8A Hamor a mbid ta, a ngaɗa: Dem kinè a nzlama na ndav a kra ga. Va-va na a ngwoz, kam kam! 9Ngo-gokoy mèshè a va! Kin va nga dalahi kinè, a nga va kinè dalahi nga, 10a kin nza a sam nga, a herkeda a zhè a ma kinè: va-nza, va-gu skwi man kin woya te pa, a kin gi a kokwar kinè.

11A Sichem a ngaɗa na bab dam a kramamhi na: Va-takahayè! Skwi man kin jhèɗèʼa, i va kinè. 12Ko skwi ngwoz mbiaʼa, ko skwi mbalai, i da va kinè, sèi kin vay dem haha a ngwoz ga! 13A wudahi Jacob ta mbeɗa na a ma Sichem a Hamor, bab na, ta gaɗa ta a ma nʼngwèdè ndo, a géɗ man a nsossura demam ta, 14a ta gaɗa ta: Nga slaha nga va na demam nga a ndo man ngwon nʼngel ɓai, azɓai. Nasa skwi hori a sam nga. 15Nga da via sèi man kin gi lémélémé ara nga, a kin ngela ta ngwon a ngurhi tèlè di kla. 16Te deɓaʼa nga woy a nga va kinè dalahi nga, a nga hil dalahi kinè, a nga nzi a sam kinè, a nga ndi a ndohi kokwar haha a nda kinè. 17Aman kin gi ara man nga dzhaɗ kinè azɓai, a kin ngél ngwon azɓai, nga cè demam nga a nga dè nga.

18A ma haha ambaha Hamor a Sichem, kra na. 19A gol matsa a ngu arsa tsam tsam, a géɗ man dem Jacob ambaha kumba. Nengaʼa ngul ndo te gi bab na.

20A Hamor a Sichem, kra na, ta shkè a ntamagi kokwar, a ta gaɗa ta ndohi kokwar: 21Ndohi haha ta woy a ta tsi gumi a nda nga. Sèi kin va ta civèɗ a ta nzi a herkeda nga, a ta gu skwi te pa. Sam herkeda a ndev ɓai. Nga hil dalahi tengaʼa a ngwoz, a nga va ta dalahi nga a ngwoz. 22Aman ndohi ta jhèɗèʼa, aman nga ngél ngwon ngurhi tèlèba dai, lèmèlèmè ara tengaʼa, ga ta gi a ndohi kokwar staɗ a nda nga. 23Te deɓaʼa skwi gi tengaʼa, a skwi man ta ngotso, skwi ndzham tèlèba, kala man skwi nga. Halau, ngokoy ara man ta woyaʼa, a ta nzi a sam nga! 24A ndohi tèlèba man ta beza a ntamagi kokwar, ta co ma Hamor a Sichem, kra na, a ta ngela ngwon ngurhi tèlèba, man ta nza te kokwar sa. 25A pats mamakaraʼa, aman ngwon a dzaha ta, wudahi Jacob, Siméon a Lévi, kramamhi Dina, ta cko kafahi gwèsh ta, aman ta dè a kokwar – wuɗi a te pa ɓai – a ta bazl ta ngurhi tèlèba. 26A Hamor ba, a Sichem, kra na ba, ta bazl ta a kafahi gwèsh, a ta co Dina, demam ta, te gi Sichem, a to do ta. 27A wudahi Jacob ta kala ta va a ndohi matakwan, a ta hul skwi kokwar a wuɗai, a géɗ man ta sossura demam ta. 28A tambakihai, a zlèhai, a kɗèhihai, a skwi te kokwar, a skwi te dak, ta heldama, 29skwi ta tèlèba, wudahi ta a ngwozi ta, ta hel ta a ma, a ta hul skwi tèlèba te gihai.

30A Jacob a ngaɗa ta nda Siméon a Lévi: Kin fay ma a gèɗ èhèmè; a kin gi, aman ndohi Canaan a ndohi Phérez ta gi shèwa a nga. Ndohi ga az kumba ɓai. Aman ta ɓicè va a ta gi var a nga, ta da bazl nga, a gi ga a gedas na. 31Aman ta mbeɗa na a ma: Aman ta rka demam nga ara fali dam, amba ɗè?

Currently Selected:

Genèse 34: MOF89

Highlight

Copy