Genèse 33

Nzli gèɗ a Esau

1Aman Jacob a ncede gèɗ a zhiklè, a rka Esau a shkè a nda ndohi 400. A Jacob a nkezle ta wudahi man a Léa, man a Rachel, man a ɓèlèlihi na, 2ɓèlèlihi a wudahi ta a ma, Léa a wudahi na a verzi ta, Rachel a Joseph te deɓa. 3A nengaʼa a mdo a ma ta, a nkalahi a deɓ sak na, a gi sak 7, ha a ndikè a sam kramam na. 4Aman Esau a nhaka na ma, a ta humbètè va, a ta kelawda ri a daʼai, a ta gi mbalai, a ta kuɗai. 5Aman Esau a mpu dai, a nrka ngwozi a wudahi a ngaɗa: Ngwozi a wudahi a sam ngaya haha wa? A mʼmbeɗa na a ma: Wudahi man Bi Zhiklè a mva na ɓèl ngaya te pombi na. 6A ɓèlèlihi ta shkè a wudahi ta, a ta gurɓahai. 7Te deɓaʼa Léa a nshkè a wudahi na, a ta gurɓahai. Te deɓaʼa Joseph a Rachel ta shkè, a ta gurɓahai. 8A Esau a ngaɗa: Skwi mɓicaʼa tèlèba man nga zlüko gèɗ a vna, ka gia kè? Jacob a mʼmbeɗa na a ma: Nengaʼa, aman i da ngècè pombai a sam ngaya, bi ga. 9A Esau a ngaɗa: Skwi ga a zhè kumba, kramam ga. I woy skwi ngaya bai. 10A Jacob a mʼmbeɗa na a ma: Aʼai! Aman i ngots pombai a sam ngaya, co skwi man i va ka. Aman i rka di ngaya, ara man i rka di Zhiklè, a ka ciyè a gumai. 11Co skwi man i ga ka mbali a vna! Bi Zhiklè a mvayè te pombai, a skwi a zhè a vata. A ntetika na a gèɗ, ha a mco.

Esau a Jacob ta kezli gèɗ

12Esau a ngaɗa: Ngo-dokoya, i dè a ma ngaya! 13A nengaʼa a ngaɗa na: Bi ga, wudahi ga ta nkèsh-nkèshèa dai, a wud tambakihi a zlugumihi ta zhè, a i war ta. A nga lè ta a pats staɗ, ta bèzl ta. 14Bi ga do do a ma ɓèl na, a i dè a verzi ngaya te deɓa zhèhèɗ zhèhèɗ, ara man skwi ga a wuɗi ga ta slaha ta dè, ha i ndikè a kokwar Séir, a sam bi ga. 15A Esau a ngaɗa: Aman aranta, i jèkeda ndohi ga kètè a sam ngaya. Jacob a mʼmbeɗa na a ma: Ehèmè? I woy a i ngècè pombi genè a sam bi ga. 16A Esau a ndo a civèɗ Séir a pats nasa. 17Aman Jacob a ndo Succoth, a ngu gi te pa, a kuɗom skwi na. A mbaha na samaʼa Succoth#Ara ngèɗè, Gihai..

18Te deɓaʼa Jacob a ndikè amba amba a kokwar Sichem, kokwar Canaan, te deɓ mshkè nauda te Paddan-Aram ma, a nʼnza a dal kokwar. 19A nsumda dak man a geda gi na a pa, te ri ndohi Hamor, bab Sichem, te di Suli 100. 20A pa a nzlatseda kwa a nshinè a te pa, a nrom sam mvi skwi a Zhiklè, a mbaha na El-Elphé-Israel.

Currently Selected:

Genèse 33: MOF89

Highlight

Copy