Exode 16

Movar man a shke te zhiklè

1Te deɓaʼa ta slambaɗa te Elim, a nhèyè ndohi Israel tèlèba ta shkè a hèshèkèɗ Sin, te ndev Elim a Sinai, te mʼmèn 15, a ki macecèwaʼa, te deb man ta jèkede kokwar Egypte. 2A nhèyè ndohi Israel tèlèba ta ga na ma a va Moise a Aaron tʼhèshèkèɗ. 3A ndohi Israel ta gada ta: Dara nga da mbazla nga te ri Ndo nzi pèc pècèk te kokwar Egypte, a sam man nga ngots zluèɗ a skwi nʼndai a vata. Kin helka nga auda a hèshèkèɗ, aman ndohi tèlèba ta tiɗè ta a mai. 4A Ndo nzi pèc pècèk a ngaɗa na Moise: Na haha i woy man a i va kinè movar man a shkèhai te zhiklè ara iyam, a ndohi ta dè auda a pèc pècèk, aman ta ɓicè skwi nʼndai man ta ndiaʼa a pats sa. I woya man i jkede ta a i rka, gar ta jèjèr ma ga, gar ta woya Bai. 5Te mʼmèn mamokwaʼa, ta da til skwi man ta ɓicaʼa te di mʼmèn cèw. 6A Moise a Aaron ta gada ta ndohi Israel tèlèba: A dakwaɗ kin da shinèʼa, nengaʼa man a nhelka kinè auda te kokwar Egypte, Ndo nzi pèc pècèk. 7A prèk kin da rka nʼnjèl Ndo nzi pèc pècèk, aman nengaʼa a ntsena ara man kin ga na ma a va. Kin gi ndav a géɗ nga èhèmè? 8A Moise a ngaɗa ta a vaʼa: Ndo nzi pèc pècèk a da va kinè zluèɗ a dakwaɗ, a movar a prèk, a kin ngézhè. Aman Ndo nzi pèc pècèk a ntsena ara man kin ga na ma a va. Aman nga, nga be wa? Ma ndav kinè man kin gi a haha, kin gu a nga ka ɓai, kin ga na Ndo nzi pèc pècèk.

9A Moise a ngaɗa na Aaron: Gada ta nhèyè ndohi Israel tèlèba: Va-zlatsa a sam Ndo nzi pèc pècèk, te man nengaʼa a ntsena ma man kin ga na va. 10Aman Aaron a ngaɗa ta nhèyè ndohi Israel tèlèba ar haha, ta ngwoda gèɗ ta a deɓa a ndev hèshèkèɗ, a ta rka nʼnjèl Ndo nzi pèc pècèk a ngudoko ta va a dai te va vanai. 11A Ndo nzi pèc pècèk a ngaɗa na Moise: 12I tsena ma ndav ndohi Israel. Gada ta aranta: A dakwaɗ kin da ndi zluèd, a prèk movar, a kin ngézhè, a kin da suna, iyè Ndo nzi pèc pècèk, Zhiklè kinè. 13A gu arsa: A dakwaɗ nkuɗhomhai ta shkè rèdèdèa, a ta nzahi a sam man ndohi Israel ta a pa. 14A prèk, aman minmèn a wush na ma, skwi ngiɗè a zhè tʼhèshèkèɗ, nkokuraʼa ara tser ntemas, ntsotsfa a géɗ herkeda. 15Aman ndohi Israel ta rkaʼa, ta goɗ a va ta: Naha mè? Aman ta sun skwia bai. A Moise a ngaɗa ta: Nasa movar man Zhiklè a va kinè a kin ndiaʼa. 16Ndo nzi pèc pècèk a gada kinè: Ndo staɗ staɗ da potso, tidè hwaɗ na. Ndo staɗ staɗ a ngècè agoda staɗ staɗ a géɗ ko wawa te gi na; 17a ndohi Israel ta gu arsa. Ndohi ngiɗè ta ɓica a vata, ndohi ngiɗè ta ɓica kètè genè. 18Aman ta lüvo a agoda: ndo man a mɓica a vata, a njèkaha bai, a ndo man a mɓica kètè genè, dèha na. Ndo staɗ staɗ a mɓüco, tidè hwaɗ na. 19A Moise a ngaɗa ta: Kin da jèkahahi a mangoslèm bai! 20Aman ta tsena ma Moise bai, a ndohi ngiɗè ta nghedahai a mangoslèm, a movar a ngedas na, a meturɗi ndheda va a pa, a zhkè. A Moise a ngu ndav a géɗ tengaʼa. 21Te deɓaʼa ta ɓica a prèk a prèk, tidè hwaɗ ta. A pats a wiyam na. 22A pats mamokwaʼa, ta ɓica a vaʼa te di mʼmèn cèw, ndo staɗ staɗ agoda cèw. A bababgihi ndohi Israel ta shkè a ta ngra na Moise. 23A Moise a ngaɗa ta: Ndo nzi pèc pècèk a gaɗkaɗa: Angoslèm pats ngolala, pats nshèk va, nkezlaʼa a sam Ndo nzi pèc pècèk. Skwi man kin woy a kin shülèʼa, vo-sula! Skwi man kin woy a kin tiaʼa, va-tau! Njèkèdiaʼa va-fedahai, a kin da ndia angoslèm. 24A ta fedahai te di mangoslèm, ara man Moise a gada ta. A zhkè azbai, a meturɗi ta da a pa ɓai. 25A Moise a ngaɗa ta: Va-ndau skwi haha a patsna. Aman a patsna, pats nshèk va nkezlaʼa a sam Ndo nzi pèc pècèk. A patsna kin da ngècè skwi te dak azɓai. 26Va-ɓüco mʼmèn 6, aman pats matsaraɗaʼa, nengaʼa pats nshèk va, skwi sa azbai.

27Te pats matsaraɗaʼa, matrhiaʼa to do auda, aman ta ɓicè skwai, aman ta ngatsa bai. 28A Ndo nzi pèc pècèk a ngaɗa na Moise: Nʼnzi tèkè kin woy a kin cinè ma ga, a skwi man i gada kinè, bai? 29Ndo nzi pèc pècèk a mva kinè pats nshèk va. Gar haha te pats mamokwaʼa a va kinè movar te di mʼmèn cèw. Gar haha va-nza a gai, ndo do do a vara bai, a pats matsaraɗaʼa. 30A ndohi ta slubordo pats matsaraɗaʼa. 31A ndohi Israel ta baha na manne, nslekaɗaʼa ara tser dau kuɗpa, a jén ara matawai man vongwom te dai.

32A Moise a ngaɗa: Ndo nzi pèc pècèk a goɗkoɗa: Agoda staɗ staɗ va-nghedahai, a ndohi verzi kinè ta da sun movar man kin ndau tʼhèshèkèɗ, a pats man i de kinè auda te kokwar Egypte! 33Moise a ngaɗa na Aaron: Co shidèf, peda manne agoda staɗ a pa, fedahi a sam di Ndo nzi pèc pècèk, da nza, a ndohi man ta shkè te verzi kinè, ta da ngotso. 34A Aaron a ngau, ara man Ndo nzi pèc pècèk a ngaɗka na Moise, a Aaron a nghedahi a tsagi kwa ma kita. 35Ndohi Israel ta ndau manne mvi 40, ha ta ndikè a kokwar man ndohi te pa. Ha ta ndikè a kuma kokwar Canaan, ta ndau manne. 36Skwi nlivèʼa man ta livè a vna, a gi agoda cèw.

Currently Selected:

Exode 16: MOF89

Highlight

Copy