Exode 15
15
Dimèsh ngul var
1A pats nasa Moise a ndohi Israel ta slu dimèsh a sam Ndo nzi pèc pècèk, aranta: I woy a i sli dimèsh a Ndo nzi pèc pècèk, aman nʼnjèl nengaʼa mbiaʼa. A nkalda plèsh a ndo man a deɓaʼa a va iyam mbiaʼa. 2Ndo nzi pèc pècèk, wuɗi ga, dimèsh nslébèrdè ga, a nde na a skwi mbelyè. Nengaʼa Zhiklè ga, i woy a i shida na géɗ, Zhiklè bab ga, i woy a i nzalaʼa. 3Ndo nzi pèc pècek, ngul var, nzlembaɗ nengaʼa Ndo nzi pèc pècèk. 4A mwushede ta kiki Pharaon a ndohi var nengaʼa a va iyam mbiaʼa, a nzede ngul ndohi var nengaʼa a hwaɗ iyam mbiaʼa. 5A nsa ta iyam a gèɗ, a ta wusha a hwaɗaʼa ara kwa. 6Ndo nzi pèc pècèk ga, ri mandi ngaya a zhè a wuɗi nʼnzalaʼa. Ndo nzi pèc pècèk ga, ri mandi ngaya a mbazl ta ndohi mayamhai. 7Te nʼnjèl ngaya mbiaʼa ka wushede ta ndohi mayamhai, ka ga ta ndav a gèɗ, a ka ndev ta ma ara düsh pandar. 8Ka vèɗè htsan, a iyam a ngrè, a nzlatsa, ara zlazlar, a iyam a nsassay na te woyam.
9Ndo mayam a gada: I hi a verzi ta, i woy a i gs ta, i ɓicè skwi ta, a ndav ga a mʼmènèhai. I geda ta tsakwal ga, ri ga a gedas ta. 10Ka saffeda nshèffè ngaya a pa, a iyam mbiaʼa a mpizl ta a pa. Ta wush ta a hwaɗ iyam, mbiaʼa ara züdo. 11Te va zhiklèhai, nlèmdè va a ka wa, Ndo nzi pèc pècèk? Nʼnjèl ngaya mbiaʼa, nkezlaʼa, ka wuɗitpa te skwi mbiaʼa man ka giaʼa, te nrkedi ngaya man ka ngreda. 12Ka tor ri mandi ngaya, a herkeda a nseɗeka ta a ma. 13Ka de ta ndohi man ka praka ta auda, te pombai, ka de ta a sam nʼnzi ngaya nkezlaʼa a wuɗai. 14Ndohi a géɗ herkeda ta tsenaʼa, a ta gudzau. A mpra ta zlau a va ndohi Philistie. 15A pats nasa, bihi Edom ta rzl ta, ndohi Moab mbibihiaʼa ta gudzau. A ndohi Canaan a nkalda ta gèɗ a ndav. 16Zlau a ndza ta, zlau a nkeda ta va a hai, a géɗ wuɗi ri ngaya, a ngwor ta wofaʼa. A ndohi ngaya ta beza a pa aranta, Ndo nzi pèc pècèk, ndohi man ka ngatska ta auda, ta beza a pa. 17Ka de ta a pa, a ka geda ta a géɗ za ngaya, a sam man ka, Ndo nzi pèc pècèk, ka gu a sam nʼnzi ngaya, a sam nkezlaʼa, Ndo nzi pèc pècèk, man ri ngaya a mpau. 18Ndo nzi pèc pècèk a gi bai a mèdèp.
19Aman plèshi Pharaon a kiki nengaʼa a ndohi a deɓ plèshi to do a pa a ndev iyam mbiaʼa, Ndo nzi pèc pècèk a ngu aman iyam a mpizlè ta ma a pa, aman ndohi Israel tengaʼa ta beza a wyak te ndev iyam ngworaʼa. 20A Miriam, ngwoz nhadka ma, demam Aaron, a nco ganga, a ngwozi tèlèba to do a verzi nengaʼa, a ta tsi ganga, atagècè. 21A Miriam a mfu dimèsh: Va-sla na dimèsh a Ndo nzi pèc pècèk, aman nʼnjèl nengaʼa mbiaʼa. A nkalda plèsh a ndo plèsh a va iyam mbiaʼa.
Mara
22A Moise a ngaɗa ta ndohi Israel, aman ta slèmbèɗè a ma iyam mbiaʼa nduzoa, a to do a hèshèkèɗ Shur. A ta dè tʼhèshè-kèɗ mʼmèn 3, a ta ngatsa iyam bai. 23A ta shke a sam Mara, a ta slaha ta si iyam bai, wurzkwurzkaʼa holholaʼa. A géɗ nengaʼa ta baha na samaʼa Mara#Ara ngèɗè, Iyam wurzkwurzkaʼa. . 24A ndohi Israel ta ga na ma a va Moise, a ta gada: Nga da si mè? 25A nengaʼa a kuɗi a sam Ndo nzi pèc pècèk, a Ndo nzi pèc pècèk a ngra na wof. A nkalda a va iyam, a njén haldemdemaʼa.
A pa Zhiklè a mva na ma nkwèr a ma kita nengaʼa, a pa a njkede ta ndohai. 26A ngaɗa: Aman ka jèjèr ma Ndo nzi pèc pècèk, Zhiklè ngaya, a nlèɓèslè, a ka gi skwi nzuraʼa a sam di nengaʼa, a ka jèjèr ma kita nengaʼa, i woy a i zlindaka ka matakwan man i zlinda a sam ndohi Egypte, azbai. Aman iyè, Ndo nzi pèc pècèk, i ndo madzaf ngaya.
27Te deɓaʼa ta ndikè a Elim. Nlèlè iyam 12 te pa, a wof gangar 70. A ta mana a pa a ma iyam.
Currently Selected:
Exode 15: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
