चेलौ के काम 9
9
साऊल को मन बदलनो
(चेलौ के काम 22:6–16; 26:12–18)
1साऊल अब्बी परभु के चेलौ कै मारनै की धमकी देवै हो, और बौ बड़े पुजारी के धौंरे गओ। 2बानै दमिसक के यहूदी पिराथना घरौ के नाम की चिट्ठी माँगी कै जो लोग ईसु मसी के पिच्छे चलनै बारे मिलै उनमै सै चाँए बईयरैं हौं या आदमी हौं उन सबई कै बांधकै ऐरूसलेम मै ला सकौं।
3पर जब बौ दमिसक सैहर के धौंरे पौंचो, तबई एकदम आसमान सै बाके चारौ लंग एक जोती चमकी। 4और बौ धरती मै गिर गओ, और जौ अबाज सुनी, “हे साऊल, हे साऊल, तू मैंकै काए सता रओ है?”
5साऊल नै पूँछी, “हे परभु, तू कौन है?”
बानै कैई, “मैं ईसु हौं, जिसकै तू सताबै है। 6पर अब तू खड़ो हो और सैहर मै जा और तेकै कन्नो का है बौ तेकै बता दओ जागो।”
7साऊल के संग जानै बारे चुपचाप खड़े हे और बे अबाज तौ सुनै हे पर उनकै कोई दिखाई ना देवै हो। 8जब साऊल धरती मै सै उठो, और बानै जब आँख खोलीं तौ बाकै कुछ बी दिखाई ना देरओ हो इसताँई बे बाको हात पकड़कै दमिसक ले गए। 9बाकै तीन दिन सै कुछ बी दिखाई ना देरओ हो और बानै ना तौ कुछ खाओ ना पिओ।
साऊल को जल संस्कार
10दमिसक मै एक हननियाह नाम को चेला रैहबै हो। बाकै परभु नै दरसन देकै कैई कै, “हे हननियाह।”
बानै कैई, “हाँ, परभु।”
11तबई परभु नै बासै कैई कै, “उठ खड़ो हो और बा गली मै जा जिसको नाम ‘सीदी गली है।’ तू यहूदा के घर मै तरसुस सैहर के रैहनै बारे साऊल नाम के एक आदमी के बारे मै पूँछताँछ कर; कैसेकै बौ पिराथना कर रओ है। 12और बानै एक दरसन मै ऐंसो देखो कै हननियाह नाम को एक आदमी घर मै भीतर आकै बाके ऊपर हात रख रओ है जिस्सै कै बौ फिर सै देख सकै।”
13पर हननियाह नै जबाब दओ, “हे परभु, जा आदमी के बारे मै मैंनै भतेरे लोगौ सै जौ बात सुनी है कै जानै ऐरूसलेम मै तेरे पबित्तर लोगौ के संग बेसानी बुरो करो है। 14और जहाँ बी जौ मुक्ख पुजारिऔं की ओर सै अधकार लेकै आओ है कै तेरे नाम मै बिसवास रखनै बारौ कै पकड़कै ले जाऐ।”
15पर परभु नै बासै कैई कै, “तू जा, कैसेकै जौ आदमी गैर यहूदिऔं और उनके राजाऔं और ईसराइली लोगौ के सामने मेरे बारे मै बोलनै के ताँई चुनर खाओ है। 16मेरे ताँई जो बी बाकै मुसीबत उठानी पड़ंगी उनके बारे मै मैं खुदई बाकै बताँगो।”
17तबई हननियाह बा घर मै गओ और साऊल के ऊपर हात रक्कै कैई कै, “हे भईया साऊल, परभु ईसु तेकै बा रस्ता मै जिस्सै तू आ रओ हो दिखाई देओ हो, बानै मैंकै इसताँई भेजो है कै तू फिर सै देख सकै और पबित्तर आत्मा सै भर जाऐ।” 18और तुरन्तई बाकी आँख मै सै झिल्ली के छोटे टुकड़ौ के हाँई गिरे और बाकै दुबारा दिखाई देल लगो। तबई बौ खड़ो भओ और जल संस्कार लेओ। 19और रोटी खानै के बाद बाके सरीर मै तागत आई।
साऊल दुआरा ईसु मसी को परचार
बौ कई दिनौ तक उन चेलौ के संग रैहओ जो दमिसक मै हे। 20और तबई बौ तुरन्त यहूदी पिराथना घरौं मै जाकै ईसु को परचार करल लगो कै, “ईसुई परमेसर को लौंड़ा है।”
21सिगरे सुन्नै बारे लोग चौंक गए और कैललगे कै, “का जौ बौई आदमी ना है, जो ऐरूसलेम मै ईसु के नाम लैनै बारौ कै नास करै हो और हिंया बी जौ जाई ताँई आओ हो कै हमकै बांधकै मुक्ख पुजारिऔं के धौंरे ले जाऐ?”
22पर साऊल और बी मजबूती के संग परचार करल लगो और दमिसक मै रैहनै बारे यहूदी लोगौ कै जौ सबूत दे देकै उनको मौह बन्द करै हो कै ईसुई मसी है।
23 #
2 कुर 11:32,33 जब भौत दिन हो गए तौ यहूदी लोगौ नै बाकै मारनै की सला बनाई। 24पर उन्नै जो सला बनाई ही बाको पतो साऊल कै चल गओ। बे रात-दिन सैहर के गेटौ मै साऊल कै मारनै के ताँई पैहरो देल लगे। 25पर रात मै साऊल के चेलौ नै बाकै पल्ला मै बिठा कै सैहर की दिबाल के साहारे सै उतारो।
साऊल ऐरूसलेम मै
26बौ जब ऐरूसलेम मै पौंचौ तौ बानै चेलौ के संग मिलनै की कोसिस करी। पर सिगरे चेला बासै डरै हे कैसेकै उनकै बिसवास ना होवै हो कै जौ बी चेला बन गओ है। 27पर बरनबास बाकै अपने संग भेजे भए चेलौ के धौंरे ले गओ और उनकै कैई कै रस्ता मै साऊल नै परभु कै कैसे देखो और परभु नै बासै कैसे बात करीं और दमिसक मै बिना डरे ईसु के नाम को परचार करो। 28तबई साऊल उनके संग ऐरूसलेम मै रैहल लगो और उनके संग आल-जाल लगो और बौ बिना डरे परभु ईसु के नाम मै परचार करल लगो। 29और यूनानी भासा बोलनै बारे यहूदी लोगौ कै सिकाल लगो और उनसै बातचीत बी करै हो। पर बे बाकै मारनै की सोचै हे। 30पर जब बिसवासी लोगौ कै जा बात को पतो चलो तौ तबई बे बाकै केसरिया ले जाकै तरसुस जानै के ताँई भेज दओ।
31इस तरै सै सिगरे यहूदिया, गलील और सामरिया के बिसवासिऔ की मंडली के लोगौ कै चैन मिलो और बे परभु को डर मानते भए और पबित्तर आत्मा की सायता सै उनकी तरक्की, और संखिया बढ़ती गई।
अनियास को ठीक होनो
32पतरस हर जघै घूमतो फिरतो भओ उन परमेसर के लोगौ के धौंरे बी गओ, जो लुद्दा मै रैहबै हे। 33बहाँ बाकै अनियास नाम को एक लकबा को रोगी मिलो जो आठ साल सै खटिया मै पड़ो हो।
34पतरस नै बासै कैई कै, “हे अनियास, ईसु मसी तेकै सई कर देगो, तू खड़ो हो जा और अपनो सितरो सई कर।” तबई बौ तुरन्त खड़ो हो गओ। 35तबई लुद्दा और सारोन के सबई रैहनै बारे लोगौ नै बाकै सई देक्कै परभु मै बिसवास करो।
36याफा मै तबीता नाम की एक बिसवासी बईयर रैहबै ही। तबीता कै यूनानी मै दोरकास कैबै हैं जिसको मतलब “हिरन” है। बौ भले काम करै ही और गरीबौ कै दान देवै ही। 37उनई दिनौ मै बौ बेमार होकै मर गई, और उनौनै बाकी लाहस कै नभा धुबा कै ऊपर के कमरा मै रखर खाओ हो। 38लुद्दा याफा सैहर के धौंरेई है। जब चेलौ नै जौ सुनी कै पतरस लुद्दा मै है, तबई उन्नै दो आदमी कै जौ बिनती के संग पतरस के धौंरे भेजो कै, “तुरन्तई हमरे धौंरे आ जाऐ।”
39तबई पतरस उनके संग चल दओ और जब बौ पौंचो तौ बे बाकै ऊपर के कमरा मै ले गए, बहाँ सिगरी राँड़ बईयरैं रोते रोते पतरस के धौंरे आँई और जो कुरता और लत्ता दोरकास नै उनके संग रैहते भए बनाए हे, जब बौ जिन्दी ही; बे पतरस कै दिखाल लगीं।
40तबई पतरस नै सिगरे लोगौ कै बाहार लिकार दओ और घूंटेऔ के बल पिराथना करल लगो और लाहस की ओर देक्कै कैई कै, “हे तबीता, उठ खड़ी हो जा।” तबई बानै अपनी आँख खोलीं और पतरस कै देक्कै उठकै बैठ गई। 41तबई पतरस नै अपनो हात देकै बाकै खड़ो करो और बिसवासी लोगौ कै और राँड़ बईयरौं कै बुलाकै बाकै उनके सामने जिन्दो खड़ो कर दओ। 42जौ बात सिगरे याफा मै फैल गई और भौस्से लोग परभु मै बिसवास करल लगे। 43तबई पतरस याफा मै समौन नाम के चमड़ा को काम कन्नै बारे के संग कई दिनौ तक रैहओ।
Currently Selected:
चेलौ के काम 9: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
