चेलौ के काम 8
8
बिसवासी लोगौ के ऊपर मुसीबत
1सितेफनुस की हत्तिया मै साऊल बी सैहमत हो। बाई दिन सै ऐरूसलेम के बिसवासिऔ की मंडली मै मुसीबत आनी सुरू हो गंई, और जो भेजे भए चेला हे उनकै छोड़कै दूसरे सिगरे बिसवासी लोग यहूदिया और सामरिया के देस सै इतै-उतै बिखर गए। 2कुछ परमेसर के लोगौ नै सितेफनुस कै दफनाओ और बाको दुख मनाओ। 3#चेलौ 22:4,5; 26:9–11साऊल बिसवासिऔ की मंडली के लोगौ कै मारल लगो और बौ घर घर जाकै आदमी और बईयरौं कै खचेड़ खचेड़ कै जेल मै डारल लगो।
सामरिया मै फिलिप्पुस को परचार
4पर जो बिसवासी लोग इतै-उतै बिखर गए हे बे अच्छी खबर को परचार करल लगे। 5फिलिप्पुस सामरिया के एक सैहर मै जाकै लोगौ मै मसी को परचार करल लगो। 6जब फिलिप्पुस की बात लोगौ नै सुनी और जो चमत्कार के काम दिखाबै हो उनकै देक्कै लोगौ नै एक मन होकै धियान दओ। 7और भौस्से लोगौ के भीतर सै दुसट आत्मा चिल्लाते भए लिकर गंई और भौस्से फालस बारे मरीज और लंगड़े अच्छे हो गए। 8तबई बा सिगरे सैहर के लोगौ नै खुसी मनाई।
जादू कन्नै बारो समौन
9बहाँ एक समौन नाम को आदमी हो, जो कई बखत सै सामरिया के लोगौ कै अपने जादू सै चौंका रओ हो और खुद कै एक बड़ो आदमी बताबै हो। 10छोटे सै लेकै बड़े आदमी तक सबई बाकी इज्जत करै हे, और बाके बारे मै जौ कैबै हे कै, “जा आदमी मै तौ सच्ची मैई परमेसर की सकति है।” 11बहाँ के लोग बाकै बड़ो मानै हे कैसेकै बानै भौत दिनौ सै उन लोगौ कै अपने जादू के कामौ सै चौंकार खाओ हो। 12पर जब उन्नै परमेसर के राज और ईसु मसी के बारे मै फिलिप्पुस सै अच्छी खबर सुनकै बाकी बातौं मैं बिसवास करो और का बईयरैं का आदमी सिगरे जनी जल संस्कार लेल लगे। 13तबई समौन नै खुद बाकी बातौं मै बिसवास करो और जल संस्कार लओ और जाके बाद बौ फिलिप्पुस के संग रैहल लगो और चिन्न और बड़े-बड़े चमत्कारौं के कामौ कै देक्कै बौ अचम्बे मै पड़ जावै हो।
पतरस और यहून्ना सामरिया मै
14जब ऐरूसलेम के भेजे भए चेलौ नै जौ सुनो कै सामरिया जिला के लोगौ नै बी परमेसर के बचन कै मान लओ है तौ पतरस और यहून्ना कै उनके धौंरे भेजो। 15जब पतरस और यहून्ना बहाँ पौंचे तौ तबई उन्नै उन नए बिसवासी लोगौ के ताँई पिराथना करी कै उनकै पबित्तर आत्मा मिलै। 16कैसेकै किसी के ऊपर अबी तक पबित्तर आत्मा ना उतरो हो, बस उनकै तौ परभु ईसु मसी के नाम से जल संस्कार देओ गओ हो। 17तबई पतरस और यहून्ना नै अपने हात लोगौ के ऊपर रक्खे और उन्नै पबित्तर आत्मा पाई।
18जब समौन नै जौ देखो कै भेजे भए चेलौ के हात रखनै सै पबित्तर आत्मा मिलै है, तौ तबई बौ उनके धौंरे पैसा लेकै गओ और कैई कै, 19“जा सकति कै मैंकै बी देईओ कै मैं जब्बी किसी के ऊपर हात रक्खौ तौ तबई बाकै बी पबित्तर आत्मा मिलै।”
20तबई पतरस नै कैई कै, “तेरो और तेरे पैसौ को सत्तियानास होए, कैसेकै तैनै जौ सोचो कै, ‘मैं परमेसर के बरदान कै मोल ले सकौ हौं।’ 21जा बात मै ना तौ तेरो कोई हक है और ना तेरो हिस्सा, कैसेकै परमेसर की नजरौ मै तेरो दिल सई ना है। 22इसताँई गलत काम सै अपनो मन फिरा और परभु सै पिराथना कर कै जो तेरे मन मै गलत बात है बाके ताँई तेकै माफी मिलै। 23कैसेकै मैं देख रओ हौं कै तेरो दिल लालच सै भरो है, और पाप के बंधन मै बंधो पड़ो है।”
24समौन नै जबाब देओ कै, “तुम मेरे ताँई परभु सै पिराथना करौ कै जो कुछ बी तुमनै कैई है, बामै सै कुछ बी बात मेरे ऊपर ना पड़ जाऐ।”
25तबई पतरस और यहून्ना नै अपनी गभाई दई और परभु को बचन सुनाते भए बहाँ सै सामरिया के भौस्से गामौ मै परमेसर की अच्छी खबर को परचार करते भए बापस ऐरूसलेम मै लौहट आए।
फिलिप्पुस और इथोपिया देस को अधकारी
26परभु के एक सुरगदूत नै फिलिप्पुस सै कैई कै, “उठ और दक्खन दिसा की बा रस्ता मै जा जो ऐरूसलेम सै गाजा की ओर जावै है।” जौ एक सुनसान रस्ता है। 27बौ तईयार होकै चल पड़ो और बाकै रस्ता मै एक खास अधकारी मिलो और जो इथोपिया की रानी कन्दाके को अधकारी और खजांची हो और बौ आराधना करकै ऐरूसलेम सै बापस आ रओ हो। 28बापस लौहटते बखत बौ अपने रथ मै बैठे भए यसाया नबी की किताब पढ़ रओ हो।
29तबई पबित्तर आत्मा नै फिलिप्पुस सै कैई कै, “रथ के धौंरे जा और बाके संग-संग चल।”
30जब फिलिप्पुस भाजे भाजे रथ के धौंरे गओ तबई बानै बा अधकारी कै यसाया नबी की किताब कै पढ़ते सुनो और तबई फिलिप्पुस नै पूँछी कै, “जिसकै तू पढ़ रओ है, का बाकै समजै है?”
31बा अधकारी नै कैई कै, “जब तक मैंकै कोई समजाऐ ना मैं जाकै कैसे समज सकौ हौं?” और तबई बानै फिलिप्पुस कै अपने संग रथ मै बैठनै के ताँई कैई।
32पबित्तर सास्तर की किताब को जो अध्याय बौ पढ़ रओ हो बौ ऐंसो हो,
“बाकै बलि होनै बारी भेड़ के हाँई लेजाओ जा रओ है,
और जैसे मैमना अपने ऊन कतरनै बारौ के सामने चुप रैहबै है,
बैसेई बानै अपने मौह सै एक अबाज बी ना लिकारी।
33बाकी बेजती करी और नाई बाकै नियाय मिलो,
और बाके खानदान के बारे मै कौन बता सकै है?
कैसेकै धरती सै बाकी जिन्दगी खतम कर दई।”
34बा अधकारी नै फिलिप्पुस सै कैई कै, “मैं तेसै बिनती करौ हौं तू मैंकै जौ बता कै नबी हिंया किसके बारे मै कैरओ है? अपने बारे मै या किसी और के बारे मै?” 35तबई फिलिप्पुस नै बोलनो सुरू करो और किताब के जाई अध्याय सै ईसु की अच्छी खबर कै सुनाओ।
36रस्ता मै चलते चलते बे एक पानी की जघै मै पौंचे, तबई बा अधकारी नै फिलिप्पुस सै कैई कै, “देख, हिंया पानी बी है। और अब मैंकै जल संस्कार लैनै मै का दिक्कत है?”
37फिलिप्पुस नै कैई कै, “अगर तू पूरे दिल सै बिसवास करै है तौई जल संस्कार ले सकै है।”
बा अधकारी नै जबाब दओ, “मैं जौ बिसवास करौ हौं कै ईसु मसी परमेसर को लौंड़ा है।”
38तबई अधकारी नै रथ रोकनै के ताँई हुकम दओ, और फिलिप्पुस और बौ अधकारी दौनौ पानी मै बर गए और फिलिप्पुस नै बाकै जल संस्कार दओ। 39जब बे पानी सै बाहार लिकरकै ऊपर आए, तबई परभु की आत्मा नै फिलिप्पुस कै उठा लओ और अधकारी नै फिलिप्पुस कै फिर ना देखो, और बौ खुसी मनातो भओ अपनी रस्ता मै चले गओ। 40पर फिलिप्पुस नै खुद कै असदोद नाम की जघै मै पाओ और जब तक केसरिया जघै मै ना पौंचो तब तक सिगरे सैहरौं मै अच्छी खबर को परचार करतो गओ।
Currently Selected:
चेलौ के काम 8: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
