चेलौ के काम 10
10
पतरस और कुरनेलियुस
1केसरिया सैहर मै कुरनेलियुस नाम को एक आदमी हो जो रोम देस मै इटालियन नाम की सैना के दल को बड़ो सूबेदार हो। 2बौ और बाके टब्बर के लोग परमेसर के भक्त हे, बौ यहूदी गरीब लोगौ कै दान देवै हो और हमेसा पिराथना करै हो। 3कुरनेलियुस नै दिन मै कम सै कम तीन बजे के बखत मै एक दरसन देखो कै परमेसर को एक सुरगदूत बाके धौंरे आओ और कैई कै, “हे कुरनेलियुस।”
4कुरनेलियुस नै बाकै धियान सै देखो और डर डरकै बोलो, “हे परभु का है?”
सुरगदूत नै कैई कै, “तेरी पिराथना और गरीब कै देए भए दान के दुआरा तेसै परमेसर खुस है। 5इसताँई अब अपने सेवक कै याफा सैहर मै भेजकै समौन नाम के आदमी जिसकै पतरस बी कैबै हैं, बुलबा ले। 6बौ चमड़ा को काम कन्नै बारे समौन नाम के आदमी के संग रैह रओ है जिसको घर समन्दर के किनार है।” 7जब बौ सुरगदूत जिस्सै बानै बात करी हीं चलो गओ तौ कुरनेलियुस नै दो नौकर और एक धरमी सिपाई कै बुलबाओ जो बाकी सेवा करै हे। 8और कुरनेलियुस नै उनकै सिगरी बात बता कै याफा सैहर मै भेज दओ।
पतरस को दरसन
9दूसरे दिन जब बे चलते चलते याफा सैहर के धौंरे पौंचे, तौ दूफैरिया के बखत पतरस पिराथना कन्नै के ताँई मकान के ऊपर चढ़ो। 10बाकै भूँक लगी और बानै कुछ खानो चाँहो, और जब लोग रोटी बनाई रए हे तबई बानै एक दरसन देखो, 11कै आसमान खुल गओ और बड़ी चद्दर के हाँई कोई चीज नीचे उतर रई हैं और बाके चारौ कौहनेऔ कै पकड़कै धरती मै नीचे उतारो जा रओ है। 12बा चद्दर मै अगल अगल तरीका के जनाबर हे, धरती के रिंगनै बारे जनाबर और आसमान के पंछी हे। 13तबई बाकै एक अबाज सुनाई दई कै, “हे पतरस, उठ और इनकै मारकै खा।”
14पतरस नै कैई कै, “परभु, मैंनै अपबित्तर और असुद्द चीज कबी ना खाँई।”
15दूसरी दफै फिर अबाज सुनाई दई कै, “जिन चीजौ कै परमेसर नै खुद सुद्द कर दओ है बाकै तू असुद्द काए समजै है।” 16तीन दफै ऐंसोई भओ तबई बौ चद्दर आसमान मै ऊपर उठा लई गई।
17जब पतरस बा दरसन के बारे मै सोच रओ हो कै जाको मतलब का हो सकै है। तबई बा बखत कुरनेलियुस के भेजे आदमी समौन के घर को पतो लेकै बाके मौहड़े मै पौंचे।
18उन्नै अबाज मारकै पूँछी, “का समौन जिसकै पतरस बी कैबै हैं जाई घर मै रुको है?”
19पतरस बा दरसन के बारे मै सोचई रओ हो तबई पबित्तर आत्मा नै बासै कैई कै, “सुन, तीन आदमी तेकै ढूंड़ रए हैं। 20इसताँई उठकै नीचे जा और बिना सोचे उनके संग चलो जा, कैसेकै उनकै मैंनैई भेजो है।” 21तबई पतरस नीचे उतरो और उनसै कैई कै, “जिसकै तुम ढूंड़ रए हौ, बौ मैंई हौं। और तुम काए आए हौ?”
22तब उन्नै कैई कै, “हमकै बड़े सूबेदार कुरनेलियुस नै भेजो है। बौ परमेसर के भक्त और धरमी आदमी है। सिगरे यहूदिऔं मै बाकी बेसानी इज्जत है। बाकै पबित्तर सुरगदूत नै ऐंसो कैई कै तेकै अपने घर बुलाकै तेसै बचन सुनै।” 23तबई पतरस उनकै भीतर ले गओ और उनकी सेवा करी।
कुरनेलियुस के घर मै पतरस
फिर दूसरे दिन बौ उनके संग चलो गओ और याफा के कुछ बिसवासी लोग बी बाके संग चल दए। 24एक दिन के बाद बे केसरिया मै पौंचे, और कुरनेलियुस अपने टब्बर और दोस्तौ के संग उनको पैंड़ो देख रओ हो। 25जब पतरस भीतर जाई रओ हो तबई बाकै कुरनेलियुस मिलो और बौ पतरस के पाँऐऔं मै गिरकै नमस्कार करल लगो। 26पर पतरस नै बाकै ऊपर उठाकै कैई कै, “खड़ो हो, और मेरे पाँऐऔं मै गिरकै काए नमस्कार कर रओ है, मैं बी तौ एक आदमी हौं।”
27तबई पतरस बाके संग बात करतो भओ भीतर गओ और भीतर भौस्से आदमिऔ कै इखट्टे देक्कै, बानै कैई कै, 28“तुम जौ बात जानौ हौ कै एक यहूदी आदमी कै दूसरे जाति के लोगौ के संग मिलजुलकै रैहनो या उनके धौंरे जानो नियम के खिलाप है, पर परमेसर नै मैंकै जौ दिखाओ है कै कोई बी आदमी अपबित्तर और अछूत ना है। 29इसताँई जब मैंकै बुलाओ गओ हो, तबई मैं बिना कुछ कैए सीदो चलो आओ, पर अब मैं तुमसै पूँछौ हौं कै तुमनै मैंकै किस काम ताँई बुलाओ हो?”
30कुरनेलियुस नै कैई कै, “चार दिन पैले तीन बजे के बखत, मैं अपने घर मै पिराथना कर रओ हो, तबई एकदम सै चमकीले लत्ता बारो एक आदमी मेरे सामने आकै खड़ो भओ। 31और बानै कैई कै, ‘हे कुरनेलियुस तेरी पिराथना परमेसर नै सुन लई है और तेरे बा दान कै जानै है जो तैनै गरीबौ कै दओ है। 32इसताँई समौन जिसकै पतरस बी कैबै हैं बाकै लैनै के ताँई अपने आदमी कै याफा भेज और बौ चमड़ा को काम कन्नै बारे समौन नाम के आदमी के संग रैह रओ है और बाको घर समन्दर के किनार है।’ 33तबई मैंनै तुरन्त तेकै लैनै के ताँई अपने आदमी भेजे और तैनै बी अच्छो करो कै तू आ गओ। अब हम सिगरे जनी परमेसर के सामने हैं, और जो कुछ तेकै परभु नै कैई बौ हमकै सुना।”
पतरस को परचार
34तबई पतरस नै कैई कै, “अब मैं सच्ची मैई समज गओ हौं कै परमेसर किसी के संग बी भेदभाब ना करै है। 35पर दुनिया के सब लोगौ मै जो कोई आदमी बाको डर मानै है और अच्छे काम करै है परमेसर बी बाकै अच्छो मानै है। 36जौ बौई बचन है जिसकै बानै ईसु मसी के दुआरा जो सबई को परभु है, सान्ति की अच्छी खबर देते भए ईसराइली लोगौ कै सुनाई ही। 37बा घटना के बारे मै तुमकै बी पतो है जो यहून्ना के जल संस्कार के परचार के बाद गलील मै भई ही और सिगरे यहूदिया मुलक मै फैल गई ही। 38परमेसर नै ईसु नासरी कै पबित्तर आत्मा और सकति सै भरो हो और बौ सबई लंग फिर कै भलाई के काम करतो और जो लोग सैतान के बस मै हे उनकै बौ अच्छो करै हो, कैसेकै परमेसर बाके संग हो।
39“हम उन सिगरे बातौं के गभा हैं जो बानै यहूदिया और ऐरूसलेम मै करी हीं। पर उन लोगौ नै बाकै कुरूस मै लटका कै मार दओ। 40पर परमेसर नै बाकै तीसरे दिन जिन्दो करो और बाकै परकट बी करो। 41सबई लोगौ के सामने ना पर उन गभाऔ के सामने जिनकै परमेसर नै पैलेई सै चुनर खाओ हो, और बे गभा हम हैं। जब बौ मर कै फिर सै जिन्दो भओ तबई हमनै बी बाके संग खाओ और पिओ हो।
42“बानै हमकै जौ हक दओ कै लोगौ के बीच मै परचार करौ और मेरी गभाई देओ कै जौ बौई है जिसकै परमेसर नै जिन्दो और मरे भएऔं को नियाय कन्नै बारो ठैरार खाओ है। 43परमेसर की ओर सै सिगरे नबिऔ नै बाके बारे मै जौ गभाई दई कै जो कोई बी बाके ऊपर बिसवास करैगो तौ ईसु के नाम सै बा आदमी के पाप माफ हो जांगे।”
गैर यहूदी लोगौ मै पबित्तर आत्मा को उतरनो
44पतरस जे बात कैई रओ हो कै, तबई बहाँ बैठे भए जित्ते लोग अच्छी खबर सुन रए उनमै पबित्तर आत्मा उतरो। 45पतरस के संग जो यहूदी बिसवासी आए हे बे अचम्बे मै पड़ गए, कै पबित्तर आत्मा को बरदान गैर यहूदी लोगौ कै बी मिलो है। 46कैसेकै उन्नै उनकै अगल अगल भासा बोलते और परमेसर की बड़ाई करते सुनो।
47तबई पतरस नै कैई कै, “का हम्मै सै कोई इनकै पानी मै सै जल संस्कार लैनै सै रोक सकै है? कैसेकै इनकै बी हमरे हाँई पबित्तर आत्मा मिलो है।” 48और बानै उनकै ईसु मसी के नाम से जल संस्कार लैनै को हुकम दओ। तबई उन्नै पतरस सै बिनती करी कै तू हमरे संग कुछ दिन और रैह।
Currently Selected:
चेलौ के काम 10: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
