चेलौ के काम 5
5
हननियाह और सफीरा
1हननियाह नाम के एक आदमी नै अपनी बईयर सफीरा के संग मिलकै एक खेत बेचो, 2और जो पैसा मिलो हो बामै आपस मै सला करकै कुछ रख लओ और बाकी को हननियाह नै भेजे भए चेलौ के पाँऐऔं मै रक्खो।
3जा बात के ऊपर पतरस नै बासै कैई, “हे हननियाह, सैतान नै तेरे मन मै जौ बात काए डारी कै तू पबित्तर आत्मा सै झूँट बोलै, और खेत के पैसा मै सै कुछ बचाकै रख लै? 4का बेचनै सै पैले बौ खेत तेरो ना हो? और बिकनै के बाद बी का बा पैसा के ऊपर तेरो हक ना हो? तैनै जौ बात अपने मन मै काए सोची? तैनै आदमी सै ना पर परमेसर सै झूँट बोलो है।”
5जौ बात सुनकै हननियाह गिर पड़ो और मर गओ। और जौ बात जिन लोगौ नै सुनी ही बे भौतई डर गए हे। 6तबई कुछ जमानौ नै आकै और बाकी अरथी बनाकै बाहार ले जाकै दफना दओ।
7कम सै कम तीन घंटा के बाद बाकी बईयर बी आई और बाकै जा बात के बारे मै कुछ बी पतो ना हो। 8तबई पतरस नै बासै कैई, “तू मैंकै बता कै का जौ खेत इत्तेई पैसौ मै बिको हो?”
बानै कैई, “हाँ इत्तेई मै बिको हो।”
9तब पतरस नै बासै कैई, “तुम दौनौ नै परभु की आत्मा कै परखनै की सला कैसे बनाई? देख, तेरे लोग कै दफनानै बारे मौहड़े मैई खड़े हैं और बे तेकै बी ले जांगे।” 10तबई बौ पतरस के पाँऐऔं मै गिर पड़ी और मर गई। तब जमानौ नै भीतर आकै बौ मरी भई देखी और तबई बे बाकै बी ले गए और जहाँ बाको लोग दफनाओ हो बाकै बी बाईके धौंरे दफना देवै हैं। 11तबई सैरे बिसवासिऔ की मंडली के लोगौ मै और जितनौ नै जा बात के बारे मै सुनो हो सबई के ऊपर डर छा गओ।
भेजे भए चेलौ दुआरा लोगौ कै चंगाई
12भेजे भए चेलौ के हातौ सै लोगौ के बीच मै चिन्न और चमत्कार के काम दिखाए जा रए हे और सिगरे बिसवासी लोग एक मन होकै सुलेमान की दैहरी मै इखट्टे हे। 13लोग उनकी बड़ाई तौ जरूर करै हे पर उनके संग सामिल होनै की हिम्मत कोई ना करै हो। 14फिर बी परभु के ऊपर बिसवास कन्नै बारे आदमी और बईयरैं जादा सै जादा बढ़ते जा रए हे। 15बे अपने पक्के बिसवास की बजै सै बेमार लोगौ कै खटिया और सितरे समीत रस्ता के किनार रख देवै हे, कै जब पतरस बहाँ सै लिकरकै जाऐ तौ कम सै कम बाकी छाँई उनमै पड़ जाऐ। 16और ऐरूसलेम के धौंरे जित्ते बी सैहर हे उनमै सै बेमार लोग और जो दुसट आत्मा सै परेसान हे उनकै ले लेकै आल लगे, और बे सिगरे अच्छे होते जावै हे।
भेजे भए चेलौ के ऊपर मुसीबत
17तब बड़ो पुजारी और बाके संग के सदूकी लोग भेजे भए चेलौ सै जरल लगे इसताँई बे उनको बिरोद करल लगे। 18और उनौनै भेजे भए चेलौ कै पकड़कै जेल मै डार दओ। 19पर रात मै परभु के एक सुरगदूत नै जेल के फाटकौ कै खोल दओ, और उनकै बाहार ले जाकै कैई कै, 20“जाऔ और मन्दर के बाहार खड़े होकै, जा नई जिन्दगी के बारे मै लोगौ कै बताऔ।” 21जौ बात सुनकै बे सकारे पड़े मन्दर मै जाकै लोगौ कै उन बातौं कै सिकाल लगे।
बड़ो पुजारी और बाके सातिऔं नै आकै यहूदी और ईसराइल के लोगौ कै इखट्टो करो, और जेल मै भेजे भए चेलौ कै लैनै के ताँई आदमी भेजे। 22जब सिपाईऔं कै बे जेल मै ना मिले तौ तबई बापस लौहटकै आए और जौ खबर देई और कैई कै, 23“जब हम जेल मै गए और बहाँ देखो तौ सिगरे ताड़े बैसेई लगे पड़े हैं और चौकीदार फाटक मै खड़े हैं। पर जब हम फाटकौ कै खोलकै भीतर गए तौ बहाँ कोई बी ना हो।” 24जब मन्दर के सिपाईऔं को बड़ो अपसर और मुक्ख पुजारिऔं नै जे बात सुनी तबई बे उनकी बात सुनकै सोच मै पड़ गए कै, “अब का होगो?”
25तबई एक आदमी नै उनके धौंरे आकै जौ कैई कै, “देखौ, जिन लोगौ कै तुमनै जेल मै डारो हो बे मन्दर मै खड़े होकै लोगौ के सिक्छा दे रए हैं।” 26तब मन्दर के सिपाईऔं को बड़ो अपसर अपने सिपाईऔं के संग बहाँ गओ और भेजे भए चेलौ कै जबरदस्ती ना पर पियार सै लाओ कैसेकै बे लोगौ से डरै हे कै कहीं बे पत्थर ना मार दैं।
27बे भेजे भए चेलौ कै भीतर लिआए और यहूदी सभा के सामने खड़े कर दए और बड़े पुजारी नै उनसै कैई, 28#मत्ती 27:25“हमनै तुमकै जा नाम सै सिक्छा ना दैनै को साप-साप हुकम दओ हो, पर तुमनै सिगरे ऐरूसलेम मै जा बात को परचार कर दओ और जा आदमी की मौत के जिम्मेदार बी हमकै ठैरा चुके हौ।”
29तब पतरस और दूसरे भेजे भए चेलौ नै जबाब देते भए कैई कै, “हमकै आदमी सै जादा परमेसर की बातौं कै माननो जरूरी है। 30हमरे बापदादौं के परमेसर नै ईसु मसी कै जिन्दो करो, जिसकै तुमनै कुरूस मै लटका कै मार डारो। 31और बाई कै परमेसर नै परभु और मुक्ति दैनै बारो ठैराओ और अपने दाँय हात की ओर बिठाओ, जिस्सै कै बौ सिगरे ईसराइली लोगौ कै उनके गलत कामौ सै मन फिरबाऐ और उनकै माफ करै। 32जा बात के हम गभा हैं और बौ पबित्तर आत्मा बी है जिसकै परमेसर नै अपने हुकम माननै बारौ कै देर खाओ है।” 33जब उन्नै जौ बात सुनी तौ बे आग बबूला हो गए और भेजे भए चेलौ कै मारनै की सोची।
34तबई गमलीएल नाम को एक फरीसी आदमी खड़ो भओ जो सास्तर को गियानी हो और सिगरे लोग बाकी इज्जत करै हे बानै कैई कै, थोड़ी देर के ताँई इनकै बाहार ले जाऔ। 35तबई बानै कैई कै, “हे ईसराइली लोगौ, जो कुछ तुम इन आदमिऔ के संग कन्नै की सोचौ हौ बौ सोच समजकै करिओ। 36कैसेकै कुछ साल पैले थियूदास बी खुद कै बड़ो समजै हो और कम सै कम चार सौ लोग बाके संग हे। जब बाकै मार दओ तौ बाके संग के साती बी इतै-उतै भाज गए और बाको नामोनिसान तक मिट गओ हो। 37बाके बाद जब जनगड़ना हो रई ही तबई गलील को रैहनै बारो यहूदा बी अपने आपकै ऐंसोई समजै हो, और बाके पिच्छे बी कुछ लोग हो लए हे। जब बाकै मारो गओ तौ बाके संग के लोग बी इतै-उतै भाज गए। 38इसताँई मैं तुमसै जौ कैबौ हौं कै, इन आदमिऔ सै दूर रौह और उनसै कुछ बी मतलब ना रक्खौ, कैसेकै अगर जे काम आदमी की ओर सै हैं तब तौ जे खतम हो जांगे। 39पर जे परमेसर की ओर सै हैं तौ तुम उनकै खतम ना कर सकौ हौ, और कहीं ऐंसो ना होए कै तुम परमेसर के बिरोद मै लड़ाई करौ।”
40तब उन लोगौ नै बाकी बात मान लई और भेजे भए चेलौ कै भीतर बुलबाकै मार लगबाई और जौ हुकम देकै छोड़ दओ कै ईसु के नाम सै कोई बी बात ना बतकईओ। 41तब बे सभा के धौंरे सै चले गए और उनकै जा बात की खुसी ही कै, “हमकै ईसु मसी के नाम सै दुख उठानै के काबिल तौ समजो गओ।” 42फिर बे हर दिन मन्दर मै और घर घर जाकै अच्छी खबर के बारे मै सिकाल लगे कै ईसुई मसी है।
Currently Selected:
चेलौ के काम 5: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
