चेलौ के काम 6
6
सात सेवकौ कै चुननो
1उस बखत जब चेलौ की संखिया भौत बढ़ल लगी, तब यूनानी भासा बोलनै बारे लोग जौ सिकात करल लगे कै इबरानी भासा बोलनै बारे “हमरी भासा की उन बईयरौं कै जो राँड़ हैं, रोटी दैनै मै कानोबाँटो करै हैं।” 2तब उन बारैह भेजे भए चेलौ नै सबई बिसवासी लोगौ कै अपने धौंरे बुलाकै कैई कै, “परमेसर के बचन को परचार छोड़कै लोगौ के खानै पीनै की सेवा कन्नी हमरे ताँई सई ना है। 3इसताँई भईयौ आपस मै सै समजदार और पबित्तर आत्मा सै भरे भए सात आदमिऔ कै चुन लो कै हम बौ काम उनके हातौ मै सौंप सकैं। 4और हम पिराथना और परमेसर के बचन के परचार मै लगे रैहंगे।”
5जौ बात सिगरे बिसवासी लोगौ कै अच्छी लगी और उनौनै सितेफनुस नाम के आदमी कै जो बिसवास और पबित्तर आत्मा सै भरो भओ हो, और फिलिप्पुस, परखुरूस, नीकानोर, तिमोन, परमिनास और अन्ताकिया के निकुलाऊस कै जिसनै यहूदी धरम अपनार खाओ हो, इन लोगौ कै चुनो। 6इनकै भेजे भए चेलौ नै अपने सामने खड़ो करो, और भेजे भए चेलौ नै अपनो हात उनके ऊपर रखकै पिराथना करी।
7तबई परमेसर को बचन फैलतो गओ और ऐरूसलेम मै चेलौ की संखिया भौत बढ़ती गई। भौस्से यहूदी पुजारिऔं नै बी ईसु मसी मै बिसवास करो।
सितेफनुस के खिलाप यहूदी नेताऔं को बिरोद
8सितेफनुस एक ऐंसो आदमी है जो परमेसर की किरपा और सकति सै भरो भओ हो और बौ लोगौ के बीच मै बड़े चिन्न और चमत्कार करै हो। 9तबई बा यहूदी पिराथना घर मै जिसकै आजाद दास करकै बोलै हे बामै सै कुछ कुरैनी, सिकन्दरिया, किलिकिया और एसिया मुलक के लोग सितेफनुस के संग बैहैस बाजी करल लगे। 10पर लोग सितेफनुस की समज और पबित्तर आत्मा सै भरी भई बातौं के सामने टिक ना सके हे।
11तबई उनौनै कुछ लोगौ कै पैसौ को लालच देकै उनसै जौ कैनै के ताँई कैई कै, “हमनै जाकै मूसा और परमेसर के बिरोद मै कैते भए सुनो है।” 12और इस तरै सै उनौनै लोगौ कै और यहूदी बुजरग नेताऔं कै और यहूदी सास्तरिऔं कै भड़का दओ। और तबई सितेफनुस कै पकड़कै यहूदी की बड़ी सभा के सामने ले गए।
13उनौनै झूँटे गभा खड़े करे और बे बोले कै, “जौ आदमी हमरे पबित्तर मन्दर और मूसा के नियम के खिलाप मै बोलनो बन्द ना करै है। 14कैसेकै जा आदमी कै हमनै जौ कैते भए सुनौ हो कै, ईसु नासरी जा मन्दर कै ढै देगो और उन रीति-रिबाजौ कै जो मूसा नै हमकै देर खाए हैं उनकै बदल देगो।” 15तबई बड़ी सभा मै बैठे भए सिगरे लोगौ नै बाकी ओर धियान सै देखो तौ बाको मौह सुरगदूत के हाँई दिखाई देरओ हो।
Currently Selected:
चेलौ के काम 6: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
