चेलौ के काम 4
4
पतरस और यहून्ना यहूदी नेताऔं के सामने
1जब पतरस और यहून्ना लोगौ सै बात कर रए हे तौ तबई पुजारी और मन्दर के सिपाईऔं को बड़ो मुखिया और कुछ सदूकी लोग उनके धौंरे आए। 2पतरस और यहून्ना के ऊपर बे घुस्सा हे, कैसेकै बे दौनौ लोगौ के बीच मै ईसु को उदाहरन देकै मरे भएऔं मैसै फिर सै जिन्दे होनै के बारे मै परचार करै हे, 3और उनौनै उनकै पकड़कै दूसरे दिन तक के ताँई जेल मै डार दओ हो कैसेकै दिन छिपनै को बखत हो चुको हो। 4पर जिन लोगौ नै उनकी बात सुनी उनमै सै भौस्सेऔ नै बिसवास करो और उन लोगौ की गिनती पाँच हजार तक पौंच चुकी ही।
5दूसरे दिन ऐंसो भओ कै जब ऐरूसलेम मै उनके यहूदी नेता, बड़े बुजरग और सास्तरी लोग इखट्टे भए। 6और बड़ो पुजारी हन्नास, और बाके टब्बर के लोग, कैफा, यहून्ना और सिकन्दर बहीं हे। 7उनौनै पतरस और यहून्ना कै सबई के बीच मै खड़ो करकै पूँछी, “तुमनै जौ काम किसके नाम सै और सकति सै करो है?”
8तब पबित्तर आत्मा सै भरकै पतरस नै उनकै जबाब दओ, “हे बड़े बुजरगौं और नेताऔं, 9तुम आज हम सै एक लंगड़ा आदमी के संग करी गई भलाई के बारे मै जौ पूँछताँछ कर रए हौ कै बौ अच्छो कैसे भओ, 10पर तुम सबई और सिगरे ईसराइल के लोग जा बात कै जान लैं कै जौ काम नासरत के ईसु मसी के नाम सै भओ है जिसकै तुमनै कुरूस मै चढ़ाओ, और परमेसर नै बाकै मरे भएऔं मै सै जिन्दो करो और जौ आदमी बाई की बजै सै अच्छो खासो तुमरे सामने खड़ो है। 11ईसु मसी बौई पत्थर है
“‘जिसकै तुम राजमिस्तरिऔ नै बेकार समजो हो,
पर बौ कौने को पत्थर बनो।’
12मुक्ति किसी दूसरे सै ना मिल सकै है, कैसेकै ईसु मसी के नाम के अलाबा जा दुनिया मै कोई दूसरो ना है जो मुक्ति दे सकै।”
13जब उनौनै पतरस और यहून्ना की हिम्मत देखी और जौ पतो लगो कै जे अनपड़ और सीदे सादे लोग हैं, तौ उनकी आँख फटी की फटी रैह गंई, फिर उनकै पतो चलो कै जे ईसु मसी के संग रैहबै हे। 14और जब पतरस और यहून्ना के संग बौ आदमी जो ठीक हो गओ हो बाकै खड़ो देखो तौ बे बाके खिलाप कुछ ना बोल सके।
15तबई उनौनै पतरस, यहून्ना और बा आदमी कै सभा सै बाहार जानै के ताँई कैई और आपस मै सोचकै जौ बातचीत करल लगे कै, 16“हम इन लोगौ के संग का करैं? कैसेकै ऐरूसलेम के सिगरे रैहनै बारौ कै जौ पतो लग गओ हो कै इन लोगौ नै चमत्कार को चिन्न दिखाओ है, और जा सच्चाई सै हम मौह ना फेर सकै हैं। 17पर हम इन लोगौ कै धमका दैं कै, जे इस नाम के बारे मै किसी सै ना बोलैं, और नाई जा बात कै दूसरे लोगौ मै फैलाऐ।”
18तबई उनौनै उनकै बुलाओ और धमकाकै जौ कैई कै, “ईसु के नाम सै ना तौ किसी कै कुछ सिकाऔ और ना बताऔ।”
19पर तबई पतरस और यहून्ना नै उनकै जबाब दओ, “तुमई फैसला करौ कै परमेसर की नजरौ मै का सई है। का हम परमेसर की बात मानै या तुमरी? 20कैसेकै जौ तौ होई ना सकै है, कै जो हमनै देखो और सुनो है बाकै किसी और कै ना बताऐ।”
21फिर उनौनै उनकै धमकाकै छोड़ दओ, और उनकै सजा दैनै के ताँई उनमै कोई बहानो ना मिलो। कैसेकै जो चमत्कार को काम भओ हो बाकै देक्कै लोग परमेसर की बड़ाई कर रए हे। 22जिस आदमी कै अच्छे कन्नै को चमत्कार करो गाओ हो, बाकी उमर चालीस साल सै बी जादा ही।
बिसवासी लोगौ की पिराथना
23जब पतरस और यहून्ना छुटनै के बाद अपने लोगौ के धौंरे आए और जो कुछ मुक्ख पुजारिऔं और यहूदी बुजरगौं नै जो जो कैई ही, बे सिगरी बात अपने लोगौ कै बता दंई। 24जब उन्नै जे बात सुनी तौ सिगरे जनी नै एक मन होकै परमेसर सै पिराथना करकै कैई, “हे मालिक, तैनैई आसमान, धरती, समन्दर और उनमै जो कुछ है बौ सिगरो तैनै बनाओ है। 25तैनै पबित्तर आत्मा के दुआरा अपने सेवक और हमरे पूरबज दाऊद दुआरा किब्बाई ही कै,
“‘जो लोग यहूदी ना हैं उनके बीच मै फूट काए पड़ै है?
और लोग बेकार की बात काए सोच रए हैं?
26परभु और बाके मसी के बिरोद मै धरती के राजा खड़े भए,
और अधकारी एक संग इखट्टे हो गए।’
27 #
लूका 23:7–11;
मत्ती 27:1,2; मरकु 15:1; लूका 23:1; यहून 18:28,29 कैसेकै हेरोदेस और पिन्तुस पीलातुस बी जाई सैहर के गैर यहूदी लोगौ और ईसराइल के लोगौ के संग मिलकै तेरे पबित्तर सेवक ईसु के बिरोद मै इखट्टे होवै हैं जिसकै तैनै मसी के रूप मै छाँटो हो। 28और जो कुछ तेरी मरजी और सकति सै पैलेई ठैराओ गओ हो, बैसोई होए। 29हे परभु, अब, तू उनकी धमकिऔं के ऊपर धियान दे और अपने सेवकौ कै बौ सकति दे जिस्सै बे तेरे बचन कै हिम्मत के संग सुना सकैं। 30बेमार लोगौ कै अच्छो कन्नै के ताँई तू अपनो हात उनके ऊपर रख, जो चिन्न और चमत्कार के काम तेरे पबित्तर सेवक ईसु मसी के नाम सै कर रए हैं।”
31जब बे जौ पिराथना कर चुके हे, तौ बौ जघै जहाँ बे इखट्टे हे हल गई, और पबित्तर आत्मा सै भरकै, परमेसर को बचन हिम्मत के संग सुनाते रैहए।
बिसवासिऔ की सायता बारी जिन्दगी
32 #
चेलौ 2:44,45 बिसवासी लोगौ को जौ समू एक मन और एकई सोच रक्खै हो और उनमै सै कोई बी अपनी चीजौ कै अपनी ना कैबै हो, पर सिगरी चीज साजे की हीं। 33बे भेजे भए चेला बड़ी हिम्मत सै परभु ईसु के फिर सै जी उठनै की गभाई देते रैहए और सबई के ऊपर परमेसर की किरपा बनी रैहबै ही। 34-35उनमै सै किसी कै बी कुछ की कमी ना ही कैसेकै जिस किसी के धौंरे खेत या घर होवै हे, तौ बे उनकै बेचकै जित्ती रकम मिलै ही बाकै भेजे भए चेलौ के पाँऐऔं मै रख देवै हे। और जिसकै जैसी जरूरत होवै ही बैसेई उनकै बाँट देवै हे।
36कुपरूस जघै मै एक आदमी हो जिसको नाम यूसप हो और बौ एक लेबी गोत को हो। और भेजे भए चेला बाकै बरनबास नाम सै बुलाबै हे, जिसको मतलब है, “हिम्मत बढ़ानै बारो लौंड़ा।” 37बाकी थोड़ी सी जमीन ही और बाकै बेचकै जो रकम मिली ही बानै बौ भेजे भए चेलौ के पाँऐऔं मै रख दई।
Currently Selected:
चेलौ के काम 4: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
