YouVersion Logo
Search Icon

चेलौ के काम 3

3
लंगड़े भिकारी को ठीक होनो
1एक दिन दुफैर के बाद तीन बजे पिराथना के बखत मै पतरस और यहून्‍ना मन्‍दर मै जा रए हे। 2और बाई बखत मै लोग एक जलम के लंगड़ा कै ला रए हे। बे बाकै हर रोज मन्‍दर के बा मौहड़े मै बिठा देवै हे जिसको नाम “सुन्‍दर” हो, जिस्सै कै बौ मन्‍दर मै आनै जानै बारौ सै भीक माँग सकै। 3जब बानै पतरस और यहून्‍ना कै मन्‍दर मै भीतर जाते देखो, तौ उनसै भीक माँगी।
4पतरस और यहून्‍ना दौनौ नै बाकी ओर धियान सै देक्‍कै कैई, “हमरी ओर देख।” 5तौ बानै उनसै कुछ मिल जानै की आस मै उनकी ओर देखो।
6तब पतरस नै कैई, “मेरे धौंरे सौनो और चाँदी तौ ना है, पर जो मेरे धौंरे है बौ मैं तेकै देवौ हौं। ईसु मसी नासरी के नाम सै खड़ो हो जा और चल।” 7बानै बाको खानो हात पकड़कै बाकै उठाओ और तुरन्‍त बाके पाँऐ और घूंटेऔ मै जियान आ गई। 8और बौ कूद कै खड़ो हो गओ, और चलल फिरल लगो, और चलतो और कूदतो परमेसर की बड़ाई करतो भओ उनके संग मन्‍दर की दैहरी मै गओ। 9सबई लोगौ नै बाकै चलते फिरते परमेसर की बड़ाई करते देखो, 10और लोगौ नै बाकै पैचान लओ कै जौ बौई है, जो मन्‍दर के “सुन्‍दर” नाम के मौहड़े मै बैठकै भीक माँगै करै हो। बा घटना सै जो बाके संग घटी ही, बे देक्‍कै हैरान भए और चौंक गए।
पतरस को परचार
11जब बौ पतरस और यहून्‍ना के संग-संग हो, तौ सबई आदमी चौंक गए और भाजते भए बा दैहरी के धौंरे आए जो सुलेमान को कैलाबै है।
12जौ देक्‍कै पतरस नै लोगौ सै कैई, “हे ईसराइल के लोगौ, तुम जा आदमी कै देक्‍कै काए अचम्बो करौ हौ? और हमरी ओर काए ऐंसे देख रए हौ कै मानौ हमई नै अपनी सकति या भक्‍ति के दुआरा जा आदमी कै चलनै फिरनै के लायक बना दओ है? 13इब्राहिम, इसहाक, याकूब के परमेसर और हमरे बापदादौं के परमेसर नै अपने सेवक ईसु की महिमा करी। पर तुमनै बाकै पकड़बाओ, और जब पीलातुस नै बाकै छोड़ दैनै की सोची, तौ तुमनै बाके सामने बाको इनकार करो। 14#मत्‍ती 27:15–23; मरकु 15:6–14; लूका 23:13–23; यहून 19:12–15तुमनै उस पबित्‍तर और धरमी कै छोड़नै सै इनकार करो, और एक खूनी कै छोड़नै के ताँई बिनती करी। 15और लोगौ कै जिन्‍दगी की रस्ता दिखानै बारे कै तुमनै मार डारो, पर परमेसर नै मरे भएऔं मै सै बौ फिर सै जिन्‍दो करो है, और हम जा बात के गभा हैं।
16“कैसेकै हम ईसु के नाम मै बिसवास करै हैं, और बाई बिसवास के दुआरा जो ईसु के नाम मै है, इस आदमी मै जान फूँकी है जिसकै तुम देखौ हौ और जानौ हौ। हाँ, बाई बिसवास नै जो ईसु सै मिलै है, तुम सबई के सामने जा आदमी कै पूरी तरै ठीक करो है।
17“हे भईयौ, अब मैं जानौ हौं कै जौ काम तुमनै मूरखता सै करो है, बैसेई तुमरे नेताऔं नै बी करो। 18पर परमेसर नै नबिऔ के दुआरा जौ पैलेई सै किब्बा दओ हो, कै मसी दुख उठागो। उन बातौं कै परमेसर नै इस तरै पूरो करो हो। 19इसताँई तुम गलत कामौ सै अपनो मन फिराऔ और परमेसर की ओर लौहट आऔ जिस्सै कै तुमरे पाप माफ हो जाऐ। 20जब परभु के सामने तुमरे सुक और चैन के दिन आंगे। तबई बौ बा मसी ईसु कै भेजैगो जो तुमरे ताँई पैलेई सै चुन लओ गओ है।
21“मसी कै बा बखत तक सुरग मै रैहनो होगो जब तक कै सबई बात पैले जैसी ना हो जाऐ जिनके बारे मै भौत पैलेई सैई परमेसर नै अपने पबित्‍तर नबिऔ के दुआरा बता दओ हो। 22मूसा नै कैई ही, ‘परभु परमेसर तुमरे ताँई तुमरे अपने भईयौ मै सैई एक मेरे हाँई नबी खड़ो करैगो। बौ तुमसै जो कुछ कैए, तुम बैसोई करिओ। 23जो आदमी बाकी बातौं कै ना मानैगो उसकै परमेसर के लोगौ मै सै नास करो जागो।’
24“सामुएल और जो बी नबी बाके बाद आए, उन्‍नै इनई दिनौ के बारे मै कैई ही। 25तुम सबई उन नबिऔ और बा बादे की औलाद हौ, जो परमेसर नै तुमरे बापदादौं के संग करर खाए हे। जैसो बानै इब्राहिम सै कैई ही कै, ‘तेरे बंस के दुआरा धरती के सिगरे लोग आसीस पांगे।’ 26परमेसर नै जब अपने लौंड़ा ईसु कै मरे भएऔं मै सै जिन्‍दो करो तौ सब सै पैले तुमरे धौंरे भेजो जिस्सै कै तुमरे बुरे कामौ सै छुटाकै तुमकै आसीस दे।”

Highlight

Share

Copy

None

Want to have your highlights saved across all your devices? Sign up or sign in