चेलौ के काम 2
2
पबित्तर आत्मा को आनो
1जब पिन्तेकुस तौहार को दिन आओ तौ सबई बिसवासी लोग एक जघै मै इखट्टे भए। 2तबई अचानक आसमान मै सै बड़ी तेज आँधी के हाँई अबाज सुनाई दई और जिस घर मै बे बैठे हे, बामै भर गई। 3और उनकै आग के हाँई फटती भंई जीब दिखाई दंई और उनमै सै हर एक के ऊपर आ ठैरीं। 4और बे सबई पबित्तर आत्मा सै भर गए और जिस तरै पबित्तर आत्मा नै उनकै सकति दई बैसेई बे ऐंसी ऐंसी भासाऔ मै बोलल लगे, जिनकै बे जानै तक ना हे।
5जो यहूदी भक्त ऐरूसलेम मै रैह रए हे, बे अगल अगल देसौ सै आए हे। 6जब जौ अबाज सुनी तौ भीड़ लग गई और आदमी चौंक गए, कैसेकै हर एक कै जौई सुनाई देवै हो कै जे मेरी भासा मै बोल रए हैं।
7बे सबई चौंकते और अचम्बो करकै कैललगे, “देखौ, जे लोग जो बोल रए हैं, का जे सबई गलील के रैहनै बारे ना हैं? 8फिर हम्मै सै हर एक आदमी उनकै हमरी अपनी भासा मै बोलते भए कैसे सुन रए हैं? 9हम जो पारथी, मेदी, एलामी, मेसोपोटामिया के रैहनै बारौ, और यहूदिया, कपदुकिया, पुन्तुस, एसिया, 10और फिरगिया, पंफूलिया, मिसर, और लीबिया देस जो कुरैन के धौंरे है। इन सबई देसौ के रैहनै बारौ और रोमी सै आए यातरी, 11यानी यहूदी और यहूदी धरम कै अपनानै बारे और करेत और अरब के रैहनै बारे सबई लोग अपनी अपनी भासा मै उनसै परमेसर के बड़े-बड़े कामौ के बारे मै सुन रए हैं।” 12बे सबई सोच मै पड़ गए और घबराते भए एक दूसरे सै कैललगे कै, “जौ सब का हो रओ है?”
13पर कुछ लोग उनकी मजाक बनाकै कैललगे कै, “बे तौ नई दारू पीकै नसा मै हैं।”
पतरस को परचार
14फिर उन गियारै भेजे भए चेलौ के संग पतरस खड़ो भओ और जोर सै कैललगो, “हे यहूदिऔं और ऐरूसलेम के सबई लोगौ, इसको मतलब मैंकै बतानदो, मेरी बातौं कै धियान सै सुनौ। 15जे आदमी सराप पिए भए ना हैं, जैसो कै तुम समज रए हौ। कैसेकै अबी तौ सुबे के नौई बजे हैं। 16पर जौ बौ बात है, जो योएल नबी के दुआरा कैई गई ही,
17“‘परमेसर कैबै है कै, आखरी बखत मै ऐंसो होगो कै,
मैं सबई लोगौ मै अपनी पबित्तर आत्मा उतारंगो
और तुमरे लौंड़ा और लौंड़िया परमेसर की ओर सै बोलंगे,
और तुमरी नई पीड़ी दरसन पांगी
और तुमरे बुजरग सपनो देखंगे।
18हाँ, उन दिनौ मैं अपने दास और दासिऔं मै अपनी पबित्तर आत्मा उतारंगो,
और बे भबिसबानी करंगे।
19और मैं आसमान मै चमत्कार के काम,
और धरती मै ताजुब के चिन्न मतलब
खून, आग और धुआँ के बादर दिखांगो।
20परभु को महान और अच्छे और खास दिन के आनै सै पैले।
सूरज कारो और चाँद खून के हाँई लाल हो जागो।
21जो कोई परभु के नाम सै सायता माँगैगो, तौ बौ बाकै बचागो।’
22“हे ईसराइल के लोगौ इन बचनौ कै सुनौ, परमेसर नै ईसु नासरी के दुआरा तुम लोगौ के बीच मै ताजुब के काम करे और चिन्न, चमत्कार दिखाए जिस्सै कै जौ पतो लगै है कै ईसु कै परमेसर की ओर सै तुमरे धौंरे भेजो गओ है और तुम खुद बी जानौ हौ। 23#मत्ती 27:35; मरकु 15:24; लूका 23:33; यहून 19:18परमेसर के दुआरा ईसु के ताँई जौ योजना पैलेई सै बनार खाई ही और बाईके हिसाब सै पकड़बाओ गओ, और तुमनै अधरमिऔं के हात सै बाकै कुरूस मै चढ़ाकै मार डारो। 24#मत्ती 28:5,6; मरकु 16:6; लूका 24:5पर बाई कै परमेसर नै मौत के हातौ सै छुटाकै जिन्दो करो। कैसेकै जौ होई ना सकै है कै ईसु मौत के बस मै रैह। 25कैसेकै दाऊद राजा बी पैले बाके बारे मै ऐंसोई कैबै हो कै,
“‘मैंनै परभु कै हमेसा अपने सामने देखो कैसेकै बौ मेरे संग है,
जिस्सै कै मैं हड़बड़ा कै गिर ना सकौं।
26इसई बजै सै मेरी आत्मा मगन भई और मेरो दिल खुसी सै भर गओ,
और मेरो सरीर बी आस मै जिऐगो।
27कैसेकै तू ना तौ मेरी आत्मा कै अधलोक मै छोड़ैगो,
और ना अपने पबित्तर भक्त की लाहस कै सड़न देगो।
28तैनै मैंकै जिन्दगी की रस्ता दिखाई है,
तेरे धौंरे रैहनै सै मैंकै पूरी खुसी मिलै है।’
29“ओ मेरे भईयौ, मैं जौ बात पूरे बिसवास के संग कैबौ हौं कै, हमरो पूरबज दाऊद जो मर गओ और बाकै कबर मै दफनाओ गओ, और बाकी कबर आज बी हमरे हिंया है। 30पर राजा दाऊद तौ नबी हो, और बाके संग परमेसर नै जौ बादो करर खाओ हो कै, ‘तेरे खानदान मै सै एक कै राजा बनांगो और तेरे सिंगासन मै बिठारंगो।’ 31बानै बा बात कै जो पैले होनै बारी ही बाकै देक्कै मसी के फिर सै जिन्दे होनै के बारे मै बताँई कै, बौ ना तौ बाके पिरान अधलोक मै छोड़ैगो, और ना बाकी लाहस कै सड़न देगो।
32“जाई ईसु कै परमेसर नै फिर सै जिन्दो करो, जिसके हम सबई गभा हैं। 33ईसु नै परमेसर के खाने हात की ओर सबई सै ऊँची जघै पाई, और बाकै बौ पबित्तर आत्मा दई जिसको बादो परम पिता परमेसर नै करर खाओ हो। फिर बानै जा आत्मा कै हमरे ऊपर उतारो जिसकै अब तुम देखौ और सुनौ हौ। 34कैसेकै दाऊद तौ सुरग मै ना गओ, पर बौ खुद कैबै है कै,
“‘परभु परमेसर नै मेरे परभु सै कैई,
“मेरे खाने हात की ओर बैठ,
35जब तक कै मैं तेरे दुसमनौ कै
तेरे पाँऐऔं मै ना झुका दौं।”’
36“इसताँई अब ईसराइल को सिगरो टब्बर जौ जरूरई जान लै कै परमेसर नै बा ईसु कै ‘परभु’ और ‘मसी’ ठैराओ हो जिसकै तुमनै कुरूस मै चढ़ाऔ।”
37जब लोगौ नै जौ सुनी तौ उनको दिल बेचैन होल लगो और बे पतरस और दूसरे भेजे भए चेलौ सै कैललगे, “हे भईयौ, तौ हम का करैं?”
38तबई पतरस नै उनसै कैई, “गलत काम सै मन फिराऔ और अपने पापौं की माफी के ताँई ईसु मसी के नाम मै जल संस्कार लो, तौ तुम पबित्तर आत्मा को दान पा सकौगे। 39कैसेकै जौ बादो तुमरे और तुमरी औलादौं और उन सबई के ताँई है जो दूर-दूर हैं। मतलब बे सबई जिनकै परभु हमरो परमेसर अपने धौंरे बुलागो।”
40पतरस नै भौस्सी बातौं के दुआरा उनकै चितौनी दई और बिनती करकै उनसै कैई, “खुद कै जा खराब पीढ़ी सै बचाए रक्खौ।” 41और जिन आदमिऔ नै बाकी बातौं मै बिसवास करो, उन्नै जल संस्कार लओ, और उसई दिन उनके समू मै कम सै कम तीन हजार लोग उनके संग जुड़े।
नए बिसवासिऔ की जिन्दगी
42जो नए बिसवासी लोग हे बे भेजे भए चेलौ सै सिक्छा पानै और संगत कन्नै, एक संग मिलकै रोटी कै खानै और पूरे मन सै पिराथना करल लगे। 43और सबई लोगौ मै डर छा गओ, कैसेकै भेजे भए चेलौ नै बड़े-बड़े चमत्कार के काम और चिन्न दिखाए हे। 44#चेलौ 4:32–35और सबई बिसवास कन्नै बारे लोग इखट्टे रैहबै हे और उनके धौंरे जो कुछ हो, बाकै बे सबई आपस मै बाँट लेबै हे। 45और बे अपनी अपनी जमीन जायदात कै बेचकै जैसी जिसकी जरूरत होवै ही बाँट देवै हे। 46बे हर रोज एक मन होकै मन्दर मै इखट्टे होवै हे और आपस मै घर घर जाकै मिलजुलकै खुसी के संग रोटी खावै हे, 47और ऐंसे बे लोग परमेसर की बड़ाई करै हे, और सबई लोग उनसै खुस हे। और जिन नए लोगौ कै हर दिन मुक्ति मिलै ही उनकै परभु उनके संग मिला देवै हो।
Currently Selected:
चेलौ के काम 2: TKB
Highlight
Share
Copy
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
Free Reading Plans and Devotionals related to चेलौ के काम 2
The Last, the Least, and the Lost
Discipleship & Worldwide Witness
Deeper Into Scripture: Acts
