ଲୁକ 11
11
ଯୀଶୁ ଶିକାଇଲା ପାର୍ତେନା
(ମାଥି. ୬:୯-୧୩; ମାଥି. ୭:୭-୧୧)
1ଆର୍ ଗଟେଦିନ୍ ଯୀଶୁ କୁଇ ଗଟେକ୍ ଜାଗାଇ ପାର୍ତେନା କ୍ର୍ତିରିଲା। ସେ ପାର୍ତେନା ଶେସ୍ କ୍ଲାହ୍ଚେ ତାର୍ ଚେଲାମ୍ନ୍କାର୍ ବିତ୍ରେ ଗଟେକ୍ ଲକ୍ ଯୀଶୁକେ କଇଲା, “ହେ ମାପ୍ରୁ ଡୁବେନ୍ ଦେତା ଯୋହନ୍ ଜ୍ନ୍କ୍ରି ତାର୍ ଚେଲାମ୍ନ୍କେ ପାର୍ତେନା କ୍ରୁକେ ଶିକାଇଲା, ତୁଇ ହେଁ ସେନ୍କ୍ରି ଅମୁକ୍ ପାର୍ତେନା କ୍ରୁକେ ଶିକାଉ।” 2ଯୀଶୁ ସେମ୍ନ୍କେ କଇଲା, “ଜ୍ଡେବ୍ଳ୍ ତୁମିମ୍ନ୍ ପାର୍ତେନା କ୍ରାସ୍, ଅନ୍କ୍ରି କ୍ଇ ପାର୍ତେନା କ୍ରା, ଏ ଅମାର୍ ସ୍ର୍ଗାର୍ ଉବା, ତୁମାର୍ ନାଉଁ ପବିତର୍ ବ୍ଲି ମାନ୍ୟ ଅଉଅ। ତୁମାର୍ ରାଇଜ୍ ଆସ। 3ସ୍ବୁଦିନ୍ ଅମାର୍ ଦ୍ର୍କାର୍ ରିଲା କାଦି ଆମୁକେ ଦିଆ। 4ଅମାର୍ମ୍ନ୍କାର୍ ପାପ୍ସ୍ବୁ କେମା କ୍ରା, କାଇତାକ୍ ଅମି ହେଁ ଅମାର୍ ବିରୁଦେ ପାପ୍ କ୍ଲା ଲକ୍ମ୍ନ୍କେ କେମା କ୍ଲୁନି, ଶଇତାନାର୍ ପରିକ୍ୟାଇ ଆମୁକ୍ ଆଣାନାଇ।”
5ଆର୍ ଯୀଶୁ ତାର୍ ଚେଲାମ୍ନ୍କେ କଇଲା, “ଯଦି ତୁମାର୍ ବିତ୍ରେ ଗଟେକ୍ ଲକ୍ ମ୍ଜାରାତି ନିଜାର୍ ସ୍ଙ୍ଗ୍ ଗ୍ରେ ଜାଇକ୍ରି ତାକେ କଇଦ୍, ‘ସାଙ୍ଗ ମକେ ତିନିଗଟ୍ ରୁଟି ଉଦାର୍ ଦେ, 6କାଇତାକ୍ ମର୍ ଗଟେକ୍ ସାଙ୍ଗ କ୍ଇଅଲ୍ ଜାଇରିଲା, ଆର୍ ଅବେ ମର୍ ଗ୍ରେ ଆଇଲା ଆଚେ, ତାକେ କାମ୍କେ ଦେମ୍କେ ମର୍ଲ୍ଗେ କାଇରି ହେଁ ନାଇ’ 7ଆର୍ ଯଦି ସେ ସାଙ୍ଗ ଗ୍ର୍ ବିତ୍ରେହ୍ଣି, ‘ମକେ ରିସା କ୍ରନାଇ, କ୍ହାଟ୍ ବ୍ନ୍ଦ୍କ୍ରି ମର୍ ହିଲାଜିଲା ମ୍ନ୍କାର୍ ସ୍ଙ୍ଗ୍ ସଇଲେ ଆଚି, ମୁଇ ଉଟିକ୍ରି ତକେ ଦେମ୍ ନ୍ହାରି’ ବ୍ଲି କଇଦ୍? 8ଅଇଲେକ୍ ହେଁ ମୁଇ ତୁମୁକ୍ମ୍ନ୍ କ୍ମ୍ଲେ, ଯଦି ସେ ତାର୍ ସ୍ଙ୍ଗ୍କେ ହେଁ ଉଟିକ୍ରି ନ୍ଦେଇଦ୍, ତ୍ବେ ସେ ଲାଜ୍ ନଇକ୍ରି ତାକେ ମାଗି ଲାଗ୍ଲେକ୍, ସେ ଉଟି ତାର୍ ଜ୍ତେକ୍ ଦ୍ର୍କାର୍ ର୍ଇଦ୍ ସେତେକ୍ ତାକ୍ ଦ୍ଇଦ୍।
9ସେତାର୍ଗିନେ ମୁଇ ତୁମୁକେ କ୍ମ୍ଲେ, ମାଗା ତ୍ବେ ଇଶ୍ୱର୍ ତୁମୁକ୍ ଦ୍ଇଦ୍। କଜା ତ୍ବେ ଇଶ୍ୱର୍ ତୁମୁକେ ମିଳାଇ ଦ୍ଇଦ୍, କାହାଟେ ମାରା ତ୍ବେ ଇଶ୍ୱର୍ ତୁମାର୍ ଗିନେ କାହାଟ୍ ଉଗାଳି ଦ୍ଇଦ୍। 10କାଇତାକ୍ ଯେ ମାଗେଦ୍ ସେ ହାଇଦ୍, ଆର୍ ଯେ କଜେଦ୍, ସେ ସେରି ମିଳାଇଦ୍ ଆର୍ ଯେ କାହାଟେ ମାରେଦ୍ ତାର୍ ଗିନେ କାହାଟ୍ ଉଗାଳି ଅଇଦ୍।
11ଆରେକ୍ ତୁମାର୍ ବିତ୍ରେ ଅନ୍କ୍ରି କୁଇ ଉବାଦି ଆଚେ, ଯେ କି ତାର୍ ହଇସି ମାଚ୍ ମାଗ୍ଲେକ୍, ସେ ତାକେ ସାହ୍ ଦ୍ଇଦ୍? 12ଆର୍ ତାର୍ ହଇସି ଡିମ୍ ମାଗ୍ଲେକ୍, ତାକେ ସେ ମିଚ୍ କାକ୍ଡା ଦ୍ଇଦ୍? 13ତୁମିମ୍ନ୍ ଦୁଷ୍ଟ ଲକ୍ ଅଇରିଲେକ୍ ହେଁ ଯଦି ତୁମାର୍ ନିଜାର୍ ହିଲାମ୍ନ୍କେ ବ୍ଲ୍ ଜିନିଷ୍ ଦେମ୍କେ ଜାଣାସ୍, ତ୍ବେ ତୁମାର୍ ସ୍ର୍ଗାର୍ ଉବା ସେ ତାର୍ ତ୍ଇ ମାଗ୍ଲା ଲକ୍ମ୍ନ୍କେ କ୍ତେକ୍ ଅଦିକ୍ ପବିତର୍ ଆତ୍ମା ନ୍ଦେଇ!”
ଯୀଶୁ ଆର୍ ବାଲ୍ଜିବୂଲ୍
(ମାଥି. ୧୨:୨୨-୩୦; ମାର୍କ ୩:୨୦-୨୭)
14ଯୀଶୁ ଗଟେଦିନ୍ କ୍ତାବାର୍ତା ନ୍କେର୍ତି ରିଲା ବୁତ୍କେ ଚାଡାଉତି ରିଲା। ଜ୍ଡେବ୍ଳ୍ ତାର୍ ତ୍ଇହ୍ଣି ବୁତ୍ଆତ୍ମା ଚାଡ୍ଲି ସେ କ୍ତା କ୍ମ୍କେ ଆରାମ୍ କ୍ଲା, ଇରି ଦ୍କିକ୍ରି ଲକ୍ମ୍ନ୍ ବେସି କାବାଅଇଲାଇ। 15ମ୍ତର୍ ସେମ୍ନ୍କାର୍ ତ୍ଇହ୍ଣି କେ କେ କଇଲାଇ, “ବାଲ୍ଜିବୂଲ୍ ଶଇତାନ୍ ସାଇଜେ ଯୀଶୁ ବୁତ୍ଆତ୍ମା ଚାଡାମ୍ଲା।”
16ଆର୍ ବିନ୍ ଲକ୍ମ୍ନ୍ ଯୀଶୁକେ ପରିକ୍ୟା କ୍ରୁକେ ତାକେ ସ୍ର୍ଗେ ହ୍ଣି ଗଟେକ୍ ଚିନ୍ ମାଗ୍ଲାଇ। 17ଯୀଶୁ ସେମ୍ନ୍କାର୍ ମ୍ନାର୍ କ୍ତା ଜାନ୍ଲା ଆର୍ ସେମ୍ନ୍କେ କଇଲା, “ଯଦି ଜୁଇ ରାଇଜ୍ ବାଗ୍ ଅଇ ନିଜାର୍ ନିଜାର୍ ବିରୁଦେ ଉଟେଦ୍, ସେରି ନାସ୍ ଅଇଦ୍, ଆରେକ୍ ଗ୍ର୍ ଗ୍ର୍ ବିତ୍ରେ ଯୁଜ୍ ଅଇଦ୍।
18ଯଦି ଶଇତାନ୍ ନିଜାର୍ ବିରୁଦେ ଉଟି ନିଜାର୍ ସ୍ଙ୍ଗ୍ ଜଗ୍ଳା କ୍ରେଦ୍, ତ୍ବେ ତାର୍ ରାଇଜ୍ ତିର୍ଅଇ ରେମ୍ ନ୍ହାରେ। ତୁମିମ୍ନ୍ କ୍ମ୍ଲାସ୍ ଯେ ମୁଇ ବାଲ୍ଜିବୁଲାର୍ ଶ୍କ୍ତିର୍ ସ୍ଙ୍ଗ୍ ବୁତ୍ଆତ୍ମାମ୍ନ୍କେ ଚାଡାମ୍ଲେ ବ୍ଲି। 19ମ୍ତର୍ ମୁଇ ଯଦି ଶଇତାନାର୍ ଶ୍କ୍ତିର୍ ସ୍ଙ୍ଗ୍ ବୁତ୍ ମ୍ନ୍କେ ଚାଡାମ୍ଲେ, ତ୍ବେ ତୁମାର୍ ଲକ୍ମ୍ନ୍କାର୍ ଶ୍କ୍ତିର୍ ସ୍ଙ୍ଗ୍ ବୁତ୍ଆତ୍ମାମ୍ନ୍କେ ଚାଡାଉତି ରିଲାଇ? ତ୍ବେ ତୁମାର୍ ଲକ୍ମ୍ନ୍ ହ୍କା ତୁମି ବ୍ଲ୍ ନାଇବ୍ଲି ତୁମାର୍ମ୍ନ୍କାର୍ ବିଚାର୍ କ୍ର୍ତି। 20ମ୍ତର୍ ମୁଇ ଯଦି ଇଶ୍ଵରାର୍ ଶ୍କ୍ତିର୍ ଲାଗି ବୁତ୍ଆତ୍ମାକେ ଚାଡାମ୍ଲେ, ତ୍ବେ ଇଶ୍ଵରାର୍ ରାଇଜ୍ ତୁମାର୍ମ୍ନ୍କାର୍ ଲ୍ଗେ ଆଇଲିନି।
21ବ୍ଡ୍ ଶ୍କ୍ତିଶାଳି ଲକ୍ ଜ୍ଡେବ୍ଳ୍ ହ୍ତେକ୍ ଚୁରି କ୍ଣ୍ଡା ଦ୍ରି ଗ୍ରେ ଜାଗ୍ତି ର୍ଇଦ୍, ସେଡେବ୍ଳ୍ ହ୍ତେକ୍ ତାର୍ ଦ୍ନ୍ ସ୍ମ୍ପତି କ୍ନାଇ ନ୍କେରେ। 22ମ୍ତର୍ ଜ୍ଡେବ୍ଳ୍ ତାର୍ ତ୍ଇହ୍ଣି ଆରେକ୍ ଗଟେକ୍ ବ୍ଡ୍ ଶ୍କ୍ତିଶାଳି ଲକ୍ ତାକେ ଦ୍କିକ୍ରି ମାରେଦ୍ ଆର୍ ତାକେ ଆରାଇଦ୍। ସେଡେବ୍ଳ୍ ଜୁଇ ଚୁରି କ୍ଣ୍ଡା ଉହ୍ରେ ତାର୍ ଆଶା ରିଲି ସେରି ଚାଡାଇକ୍ରି ନ୍ଇଦ୍, ଆରେକ୍ ସ୍ବୁ ଚର୍ଲା ଦ୍ନ୍ ସ୍ଙ୍ଗ୍ ମ୍ନ୍କାର୍ ସ୍ଙ୍ଗ୍ ବାଟା କ୍ରେଦ୍। 23ଯେ ମର୍ ବାଟ୍ ନଇ, ସେ ମର୍ ବିରଦି, ଆରେକ୍, ଯେ ମର୍ସ୍ଙ୍ଗ୍ ରୁନ୍ଡାଇ ନ୍କେରେ, ସେ ଚାର୍କାର୍ କ୍ରି ହ୍କାଇଦ୍।”
ବୁତ୍ ଆରେକ୍ ଲେଉଟି ଆଇଲି
(ମାଥି. ୧୨:୪୩-୪୫)
24“ଜ୍ଡେବ୍ଳ୍ ଗଟେକ୍ ଲକାର୍ ତ୍ଇହ୍ଣି ବୁତ୍ଆତ୍ମା ବାରାଇ ଜାଇଦ୍, ସେ ତାର୍ ରେତାର୍ ଗିନେ ଗଟେକ୍ ହାଣି ନ୍ରିଲା ସୁକ୍ଲା ଟାଣ୍ କଜେଦ୍, ଆର୍ ଯଦି ସେ ସେନ୍କ୍ରି ଟାଣ୍ ନ୍ହାଇ, ତ୍ବେ ସେ ଆରେକ୍ ମ୍ନେ ହ୍କାଇ କ୍ରି କଇଦ୍, ‘ମୁଇ ଜୁଇ ଗ୍ରେହ୍ଣି ଆସିରିଲେ, ମର୍ ସେ ଗ୍ର୍କେ ଲେଉଟି ଜାଇନ୍ଦ୍।’ 25ତ୍ବେ ସେ ଲେଉଟି ଜାଇକ୍ରି ସେ ଆଗ୍ତୁର୍ ଗ୍ର୍କେ ସଫା ସୁତ୍ରା ଅଇ ସ୍ଜାଇ ଅଇରିଲାର୍ ଦ୍କେଦ୍। 26ସେଡେବ୍ଳ୍ ସେ ବୁତ୍ଆତ୍ମା ଜାଇ ନିଜାର୍ ଲ୍ଗେ ହ୍ଣି ବେସି କ୍ରାପ୍ ସାତ୍ଗଟ୍ ଆତ୍ମାକେ ସ୍ଙ୍ଗେ ଦ୍ରି ଆସେଦ୍, ଆରେକ୍, ସେମ୍ନ୍ ହୁରିକ୍ରି ସେତି ବାସା କ୍ର୍ତି, ଆର୍ ସେ ଲକାର୍ ହ୍ର୍ତୁ ଦ୍ଶା ଲ୍ଗେ ହ୍ଣି ସ୍ରାସ୍ରି ଦ୍ଶା ବେସି କ୍ରାପ୍ ଅଇଦ୍।”
ଯୀଶୁର୍ ବାକ୍ୟକେ ମାନ୍ତା ଲକ୍ ଦନ୍ୟ
27ଯୀଶୁ ଇ ସ୍ବୁ କ୍ଇ ସ୍ର୍ଲା ହ୍ଚେ, ଗଟେକ୍ ମାଇଜି ଟକି ଲକ୍ ମ୍ନ୍ଦାଇ ହ୍ଣି ବ୍ଡ୍ ଟଣ୍ତ୍ ଅଇ କ୍ମ୍କେ ଦ୍ର୍ଲି, “ଦନ୍ୟ ସେ ମାଇଜି ଟକି ଜୁଇରି ତକେ ଜ୍ର୍ନ୍ କ୍ଲିଆଚେ, ଆର୍ ଜୁଇ ମାଇଜି ଟକି ତକେ ଦୁଦ୍ କାଳାଇଲି ଆଚେ।” 28ମ୍ତର୍ ଯୀଶୁ କଇଲା, “ଇଶ୍ଵରାର୍ ବାକ୍ୟକେ ଜୁଇ ଲକ୍ମ୍ନ୍ ଶୁଣିକ୍ରି ମାନ୍ତି ସେମ୍ନ୍ ଦନ୍ୟ।”
ଯୁନସାର୍ ଚିନ୍
(ମାଥି. ୧୨:୩୮-୪୨)
29ଜ୍ଡେବ୍ଳ୍ ଲକ୍ମ୍ନ୍ ଯୀଶୁର୍ ଚାରିହାକ୍ ରୁଣ୍ତଲାଇ ସେଡେବ୍ଳ୍ ସେ କ୍ମ୍କେ ଦ୍ର୍ଲା, “ଅବାର୍ ଲକ୍ମ୍ନ୍ ବେସି କ୍ରାପ୍, ଏମ୍ନ୍ ଚିନା ଦ୍କୁକେ ମ୍ନ୍ କ୍ରୁଲାଇ, ମ୍ତର୍ ଯୁନସାର୍ ଗ୍ଟ୍ଲା ଚିନ୍ ଚାଡିକ୍ରି ଆର୍ ବିନ୍ ଚିନ୍ ସେମ୍ନ୍କେ ଦିଆ ନଇ। 30କାଇତାକ୍ ଯୂନସ୍ ଗଟେକ୍ ଚିନ୍ ହର୍ ବବିଶତ୍ କ୍ତା କ୍ଉତା ଲକ୍କେ ଜ୍ନ୍କ୍ରି ଇଶ୍ୱର୍ ହ୍ଟାଇରିଲା ବ୍ଲି ନିନୀବିର୍ ଲକ୍ମ୍ନ୍ ଜାନ୍ଲାଇ, ସେନ୍କ୍ରି ମୁଇ ମାନାଇ ହିଲାକେ ଇଶ୍ୱର୍ ହ୍ଟାଇ ଆଚେ ବ୍ଲି ଏବାର୍ ଲକ୍ମ୍ନ୍ ଜାଣ୍ତି, ଆର୍ ଇରି ଗଟେକ୍ ଚିନା ଅଇଦ୍।
31ଆର୍, କାତା ହାତ୍ ବାଟାର୍ ଦେଶାର୍ ରାଣୀ ବିଚାର୍ ଇରି ଅବାର୍ ଯୁଗାର୍ ଲକ୍ମ୍ନ୍କାର୍ ସ୍ଙ୍ଗ୍ ଉଟିକ୍ରି, ଏମ୍ନ୍କେ ଦସି କ୍ରେଦ୍, କାଇତାକ୍ ସେ ଶଲୋମନାର୍ ବୁଦିର୍ କ୍ତା ଶୁଣୁକେ ହୁର୍ତିବିର୍ କ୍ଣ୍ଡି ଲ୍ଗେ ହ୍ଣି ଆଇଲାଇ, ଆରେକ୍ ଦ୍କା, ଶଲୋମନ୍ ର୍ଜାର୍ ତ୍ଇହ୍ଣି ବ୍ଡ୍କ୍ତା ଇତି ଆଚେ, ମ୍ତର୍ ତୁମିମ୍ନ୍ ମ୍ନ୍ ବାଦ୍ଲାମ୍କେ ମ୍ନ୍ ନ୍କେରୁଲାସ୍। 32ଇଶ୍ୱର୍ ବିଚାର୍ କ୍ର୍ତାଦିନ୍ ନିନୀବିର୍ ଲକ୍ମ୍ନ୍ ଅବାର୍ ଲକ୍ମ୍ନ୍କାର୍ ସ୍ଙ୍ଗ୍ ଉଟି ସେମନ୍କେ ଦସି କ୍ର୍ତି, କାଇତାକ୍ ସେମ୍ନ୍ ଯୁନସାର୍ ପର୍ଚାର୍ ଶୁଣ୍ଲା ହ୍ଚେ ତାକାର୍ ତାକାର୍ ପାପେହ୍ଣି ମ୍ନ୍ ବାଦ୍ଲାଇ ରିଲାଇ, ମୁଇ ସ୍ତ୍କ୍ରି କ୍ମ୍ଲେ, ଦ୍କା ଯୁନସାର୍ ତ୍ଇହ୍ଣି ଗଟେକ୍ ଅଦିକ୍ ବ୍ଡ୍ ମାନାଇ ଇତି ଆଚେ।
ଆକି ଗ୍ଗାଳାର୍ ଉଜାଳ୍
(ମାଥି. ୫:୧୫; ୬:୨୨,୨୩)
33କେ ଗଟେକ୍ ଲକ୍ କୁପି ଲାଗାଇକ୍ରି ସେ ତାକେ ମାଣ୍ ତ୍ଳେ ଡାହିକ୍ରି ସ୍ଙ୍ଗାଇ ନ୍କେର୍ତି, ମ୍ତର୍ କୁପି ବ୍ତା ଉହ୍ରେ ସ୍ଙ୍ଗାଉତି କାଇତାକ୍ ଗ୍ର୍ ବିତ୍ରେ ଆସ୍ତିରିଲା ଲକ୍ମ୍ନ୍ ତାର୍ ଉଜାଳ୍ ଦ୍କୁ ହାର୍ତି। 34ତୁମାର୍ ଆକି ଗ୍ଗାଳାର୍ ଗିନେ କୁପି ହର୍, ଜ୍ଡେବ୍ଳ୍ ତୁମାର୍ ଆକି ଜ୍ବେ ନିର୍ମୁଳ୍ ର୍ଇଦ୍, ତ୍ବେ ତୁମାର୍ ସ୍ବୁ ଗ୍ଗାଳ୍ ଉଜାଳ୍ ଅଇଦ୍, ଯଦି ତୁମାର୍ ଆକି କ୍ରାପ୍ ଆଚେ ତ୍ବେ ତୁମାର୍ ସ୍ବୁ ଗ୍ଗାଳ୍ ଅନ୍ଦାର୍ ଅଇଦ୍। 35ତୁମାର୍ ତ୍ଇ ଜୁଇ ଉଜାଳ୍ ଆଚେ ସେରି ଜ୍ନ୍କ୍ରି ଅନ୍ଦାର୍ ନଇ, ସେତାର୍ଗିନେ ଜାଗରତ୍ ଅଇରିଆ। 36ଯଦି ତୁମାର୍ ସ୍ବୁ ଗ୍ଗାଳ୍ ଉଜାଳ୍ ର୍ଇଦ୍, ଆର୍ ଅଳ୍କ୍ ହେଁ ସେତି ଅନ୍ଦାର୍ ନ୍ରେଇ, ତ୍ବେ କୁପି ଜ୍ନ୍କ୍ରି ତାର୍ ଉଜାଳ୍ ତୁମୁକେ ଦ୍ଇଦ୍ ସେନ୍କ୍ରି ତୁମାର୍ ସ୍ବୁ ଗ୍ଗାଳ୍ ଉଜାଳ୍ ଦ୍ଇଦ୍।”
37ଜ୍ଡେବ୍ଳ୍ ଯୀଶୁ କ୍ତା କ୍ଉତିରିଲା, ସ୍ଡେବ୍ଳ୍ ଗଟେକ୍ ଫାରୂଶୀ ତାର୍ ଗ୍ରେ କାଦି କାତାର୍ ଗିନେ ତାକେ କୁଦ୍ଲା, ତ୍ବେ ସେ ତାର୍ ଗ୍ରେ ଗ୍ଲା ଆର୍ କାମ୍କେ ବ୍ସ୍ଲା।
ଯୀଶୁ ଦ୍ର୍ମ୍ ଶାସ୍ତର୍ ଜାନ୍ତା ଲକ୍ମ୍ନ୍କେ ଆର୍ ଫାରୂଶୀମ୍ନ୍କେ ଅବିଶାପ୍ ଦିଲା
(ମାଥି. ୨୩:୧-୩୬; ମାର୍କ ୧୨:୩୮-୪୦)
38ମ୍ତର୍ ଯୀଶୁ କାତା ଆଗ୍ତୁ ଯିହୁଦିମ୍ନ୍କାର୍ ନିୟମାର୍ ହର୍ ଆତ୍ ନ୍ଦଇ ରିଲାର୍ ଦ୍କି ସେ ଫାରୂଶୀ ଚ୍ମ୍କିଗ୍ଲା।
39ସେତାର୍ଗିନେ ମାପ୍ରୁ ସେମ୍ନ୍କେ କଇଲା, “ତୁମି ସ୍ବୁ ଫାରୂଶୀମ୍ନ୍ ଗିନା ଆର୍ ତାଳିର୍ ହ୍ଦାବାଟ୍ ଦ୍ଉତି ରିଆସ୍, ମ୍ତର୍ ତୁମାର୍ ହୁର୍ଦୟେ ଅକାର୍ ଆର୍ କ୍ରାପ୍ କାମ୍ ସ୍ବୁ ବ୍ର୍ତି ଅଇଆଚେ। 40ହେଁ ବୁଦି ନ୍ରିଲା ଲକ୍ମ୍ନ୍, ଇଶ୍ୱର୍ ଜୁଇ ହ୍ଦା ହାକ୍ ତିଆର୍ କ୍ଲାଆଚେ, ସେ କି ବିତ୍ରେ ହେଁ ତିଆର୍ କ୍ରି ନ୍କେରେ? 41ତୁମାର୍ ବିତ୍ରେ ଜୁଇ ଜୁଇରି ସ୍ବୁ ଆଚେ ସେରି ଗ୍ରିବ୍ ଲକ୍ମ୍ନ୍କେ ଦାନ୍ କ୍ରା ତ୍ବେ ତୁମାର୍ ଗିନେ ସ୍ବୁ ହ୍ର୍ଚାଳ୍ ଅଇଦ୍।
42ମ୍ତର୍ ହାଇ ଡ୍ଣ୍ଡ୍ ହାଉତାର୍ ଅକାରିଆ ପଣ୍ଡିତ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ପୋଦିନା, ଅରୁଦ୍ ଆର୍ ସ୍ବୁ ଆର୍ ସ୍ବୁ ପର୍କାର୍ ସାଗାର୍ ଦ୍ଶମାଂସ ଇଶ୍ଵର୍କେ ଦେତି ରିଆସ୍, ମ୍ତର୍ ନ୍ୟାୟ୍ ବାଟେ ଇଣ୍ତୁକେ ଆର୍ ଇଶ୍ଵର୍କେ ଲାଡ୍ କ୍ରୁକେ ଏଲା କ୍ର୍ତି ରିଆସ୍, ମ୍ତର୍ ଇରିସ୍ବୁ ମାନୁମା ଆର୍ ବିନ୍ସ୍ବୁ ହେଁ ମାନ୍ତାର୍ ଲଡାଆଚେ। 43ହାୟ୍ ଡ୍ଣ୍ଡ୍ ହାଉତା ଲକ୍ ଯେ ତୁମି ସ୍ବୁ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ପାର୍ତେନା ଗ୍ରାର୍ ମୁକିଆ ଜାଗାଇ, ଆର୍ ଆଟ୍ ବ୍ଜାରେ ଜୁଆର୍ ସନ୍ମାନ୍ ହାମ୍କେ, ଆର୍ ଲକାର୍ ଲ୍ଗେ ହ୍ଣି ଗୁରୁ ବ୍ଲି କ୍ଆଇ ଅମ୍କେ ବ୍ଲ୍ ହାଉତି। 44ହାୟ୍, ଡ୍ଣ୍ଡ୍ ହାଉତା ଅକାରିଆ ପଣ୍ଡିତ୍ ଆର୍ ଫାରୂଶୀମ୍ନ୍ ତୁମିମ୍ନ୍ ଜାଣା ନ୍ହେଳ୍ଲେକ୍ତା ମ୍ସୁଣ୍ ହ୍ର୍। ସେରି ମ୍ସୁଣ୍ ବ୍ଲି ଜାଣା ନ୍ହେଳେ ଲାଗି ଲକ୍ମ୍ନ୍ ସେବାଟ୍ ଯାଆ ଆସ୍ କ୍ରୁଲାଇ।”
45ଇକ୍ତା ଶୁଣି ନିଆଇ ଶିକାଉତା ଲକ୍ମ୍ନ୍କାର୍ ବିତ୍ରେହ୍ଣି ଗଟେକ୍ ଲକ୍ ଯୀଶୁକେ ଉତର୍ଦିଲା, “ଗୁରୁ, ତୁଇ ଇକ୍ତା କ୍ଇ ଆମୁକ୍ ଇନସ୍ତା କ୍ରୁଲିସ୍।” 46ଯୀଶୁ କଇଲା, “ହାୟ୍, ଡ୍ଣ୍ଡ୍ ହାଉତା ତୁମି ସ୍ବୁ ନିଆଇ ଶିକାଉତା ଲକ୍ମ୍ନ୍, କାଇତାକ୍ ତୁମିମ୍ନ୍ ଲକ୍ମ୍ନ୍କାର୍ ଉହ୍ରେ ବ୍ମ୍ ନ୍ହାର୍ଲା ହର୍, ବେଶିବଜ୍ ଲାଦି ଦ୍ଇ ନିଜେ ସେ ବଜ୍କେ ଅଳ୍କ୍ ନିଜାର୍ ଆଙ୍ଗ୍ଟି ଲ୍ଗେ ନ୍ଚୁମ୍ଲାସ୍। 47ହାୟ୍, ଡ୍ଣ୍ଡ୍ ହାଉତା ଅକାରିଆ ପଣ୍ଡିତ୍ ଆର୍ ଫାରୂଶୀମ୍ନ୍, କାଇତାକ୍ ତୁମିମ୍ନ୍ ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ମ୍ସୁଣ୍ ତିଆର୍ କ୍ରି ରିଆସ୍, ମ୍ତର୍ ସେ ବବିଶତ୍ କ୍ତା କ୍ଉତା ଲକ୍ମ୍ନ୍କେ ତୁମାର୍ ହୁର୍ବାର୍ କାଳାର୍ ଲକ୍ମ୍ନ୍ ମ୍ର୍ନେ ମାରିରିଲାଇ। 48ବ୍ଲେକ୍ ତୁମିମ୍ନ୍ ତୁମାର୍ ହୁର୍ବାର୍ କାଳାର୍ ଲକ୍ମ୍ନ୍ କ୍ରିରିଲା ବିଷୟେ ତୁମିମ୍ନ୍ ସାକି ଅଉଆସ୍। କାଇତାକ୍ ସେମ୍ନ୍ ବବିଶତ୍ କ୍ତା କ୍ଉତା ଲକ୍ମ୍ନ୍କେ ମାର୍ଲାଇ ଆର୍ ତୁମି ସେରି ମ୍ନେ ହ୍କାମ୍କେ ତାକାର୍ ମ୍ସୁଣ୍ ତିଆର୍ କ୍ରୁଲାସ୍। 49ସେତାର୍ଗିନେ ଇଶ୍ଵର୍ ତାର୍ ବୁଦି ସ୍ଙ୍ଗ୍ କଇରିଲା ‘ମୁଇ ତୁମାର୍ ଲ୍ଗେ ବବିଶତ୍ କ୍ତା କ୍ଉତା ଲକ୍ମ୍ନ୍କେ ଆର୍ ହ୍ଟାଇଲା ଚେଲାମ୍ନ୍କେ ହ୍ଟାଇନ୍, ମତର୍ ଏମନାର୍ ବିତ୍ରେ କ୍ତି ଲକ୍କେ ତୁମି ମ୍ର୍ନେ ମାରାସ୍ ଆର୍ କ୍ତି ଲକ୍କେ ଲିନ୍ଦା ତାଳ୍ନା କ୍ରାସ୍।’ 50ଜ୍ନ୍କ୍ରି ହେବଲ୍କେ ମ୍ର୍ନେ ମାର୍ଲା ତ୍ଇହ୍ଣି ଆରମ୍ କ୍ରି ବବିଶତ୍ କ୍ତା କ୍ଉତାଲକ୍ ଯିଖରୀୟକେ ବେଦି ଆର୍ ମନ୍ଦିରାର୍ ପବିତର୍ ଜାଗା ମ୍ଜି ଲ୍ଗେ ମାର୍ଲା ହ୍ତେକ୍, ହୁର୍ତିବିର୍ ଜ୍ତେକ୍ ଦ୍ର୍ମାର୍ ଲକ୍କେ ମ୍ର୍ନେ ମାରା ଅଇଆଚେ। 51ସେରି ସ୍ବୁ ଡ୍ଣ୍ତ୍ ଇ ଯୁଗାର୍ ଲକ୍ମ୍ନ୍ ହାଉତି, ମୁଇ ତୁମୁକ୍ ସ୍ତ୍ କ୍ମ୍ଲେ ଇ ଯୁଗାର୍ ଲକ୍ ମ୍ର୍ନ୍ଡ୍ଣ୍ଡ୍ ହାଉତି।
52ମ୍ତର୍ ହାୟ୍, ଡ୍ଣ୍ଡ୍ ହାଉତା ତୁମି ସ୍ବୁ ନିଆଇ ଶିକାଉତା ଲକ୍ମ୍ନ୍, ତୁମିମ୍ନ୍ ମାନାଇମ୍ନ୍କାର୍ ବୁଦିର୍ କ୍ହାଟେ କୁଚି କାକ୍ଳା ଚାଡାଇଲାସ୍ ଆର୍ ତୁମିମ୍ନ୍ ତ ନିଜେ ହୁରି ନ୍କେରୁଲାସ୍, କି ସେ ବିତ୍ରେ ମ୍ନ୍କ୍ରି ହୁରୁକେ ଇଚା କ୍ର୍ତା ଲକ୍ମ୍ନ୍କେ ବାଦା ଦେମ୍ଲାସ୍।”
53ଆର୍ ଯୀଶୁ ସେ ଜାଗାଚାଡି ହ୍ଳାଇଲା ଉତାରେ, ନିଆଇ ଶିକାଉତା ଲକ୍ମ୍ନ୍ ଆର୍ ଫାରୂଶୀମ୍ନ୍ ରିସାଅଇ ତାକେ ବ୍ଡ୍ ଉଲାଟା ହାଲାଟା କ୍ତାସ୍ବୁ ହ୍ଚାରି ଲାଜ୍ କ୍ରୁକେ ଦ୍ର୍ଲାଇ। 54ଆର୍ ତାର୍ ଟଣ୍ତାର୍ କ୍ତାଇ ଦସ୍ ଦ୍ରୁନ୍ ବ୍ଲି ସେମ୍ନ୍ ଚେଷ୍ଟାକ୍ରି ତାକେ ବେସି କ୍ତା ହ୍ଚାର୍ଲାଇ।
Currently Selected:
ଲୁକ 11: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
