ଲୁକ 10
10
ଯୀଶୁ ସତୁରି ଲକ୍କେ ହ୍ଟାଇଲା
1ତାର୍ ହ୍ଚେ ଯୀଶୁ ମାପ୍ରୁ ଆରେକ୍ ସ୍ତୁରିଗଟ୍ ଚେଲାମ୍ନ୍କେ ବାଚ୍ଲା ଆର୍ ସେ ଜୁଇ ଜୁଇ ଗାମ୍ ମ୍ନ୍କେ ଜାତାର୍ ରିଲି, ସେ ସେ ଗାମ୍ ମ୍ନ୍କେ ଦୁଇ ଦୁଇ ଲକ୍ କ୍ରି ତାର୍ ଆଗ୍ତୁ ସେମ୍ନ୍କେ ହ୍ଟାଇଲା। 2ଆରେକ୍, ଯୀଶୁ ଚେଲାମ୍ନ୍କେ କଇଲା, “ଦାନ୍ ମ୍ଣ୍ତିଆ ସିନା ବେସି ଅଇଲିଆଚେ, ମ୍ତର୍ କାଟିକ୍ରି ଆଣୁକେ ଉଣାଲକ୍ ଆତ୍ତି, ସେତାକ୍ ନିଜାର୍ ଚାଷ୍ କ୍ର୍ତା ହ୍ଦାଇ କାମ୍କ୍ର୍ତା ଲକ୍ମ୍ନ୍କେ ହ୍ଟାଇ ଦେତାର୍ ଗିନେ, ହାଚି ହ୍ଦାର୍ ମାଲିକାର୍ ଲ୍ଗେ ଗ୍ଉଆରି କ୍ରା। 3ତୁମିମ୍ନ୍ ଯାହା। ଦ୍କା, ମୁଇ ତୁମୁକ୍ମ୍ନ୍ ବାଗ୍ ମ୍ନ୍କାର୍ ଲ୍ଗେ ମେଣ୍ଢାହିଲା ହର୍ କ୍ରି ହ୍ଟାମ୍ଲେ। 4ମଣା, ଆର୍ ହାଣ୍ତାଇ ନିଆନାଇ, ଆର୍ ଜାତାବାଟେ ଟିଆଅଇ କାକେ ଜୁଆର୍ କ୍ରି ବେସି ସମୟ୍ ରିଆ ନାଇ।
5ଆର୍ ଜ୍ଡେବ୍ଳ୍ ତୁମି ଜୁଇ ଗ୍ରେ ଯାହାସ୍, ‘ଇ ଗ୍ରେକେ ଶାନ୍ତି ଆସ’ ବ୍ଲି ହ୍ର୍ତୁ କ୍ଉଆ। 6ଆର୍ ସେ ଗ୍ରେ ଯଦି ଶାନ୍ତିକେ ଲାଡ୍ କ୍ର୍ତା ଲକ୍ ରେଇଦ୍, ତ୍ବେ ସେ ଶାନ୍ତି ସେ ହାଇଦ୍, ଯଦି କେ ନ୍ରେଇଦ୍, ତ୍ବେ ସେ ଶାନ୍ତି ତୁମାର୍ ଲ୍ଗେ ଲେଉଟିକ୍ରି ଆସେଦ୍। 7ସେ ଗ୍ରାର୍ ଲକ୍ ଜୁଇ ଜୁଇରି ଦେତି, ସେରି କାଇ ହିଇ କ୍ରି ସେ ଗ୍ରେ ସେ ରିଆ। କାଇତାକ୍ କାମ୍କ୍ର୍ତା ଲକ୍ ସେ ତାର୍ କାମାର୍ ହାଜ୍ରି ହାଇଦ୍, ଗଟେକ୍ ଗ୍ରେହ୍ଣି ଆରେକ୍ ଗଟେକ୍ ଗ୍ରେ ଜାହାନାଇ।
8ଆରେକ୍ ତୁମି କୁଇଅଲ୍ ଗଟେକ୍ ଗାମେ ହୁରାସ୍ ଆର୍ ସେତିର୍ ଲକ୍ମ୍ନ୍ ତୁମୁକେ ମ୍ନ୍କ୍ରି ଜୁଇ ଜୁଇରି କାମ୍କେ ଦେତି ତୁମି ସେରି କାହା। 9ସେ ସ୍ହରାର୍ ରଗିମ୍ନ୍କେ ବ୍ଲ୍ କ୍ରା ଆର୍ ସେତିର୍ ଲକ୍ମ୍ନ୍କେ ‘ଇଶ୍ଵରାର୍ ରାଇଜ୍ ତୁମାର୍ ଲ୍ଗେ ଆଇଲି ବ୍ଲି କ୍ଉଆ।’
10ମ୍ତର୍ ଜୁଇ ଜାଗାର୍ ଲକ୍ ତୁମୁକେ ମ୍ନ୍ ନ୍କେଲେକ୍, ତ୍ବେ ସେ ସ୍ହରାର୍ ଡ୍ଣ୍ତେ ଟିଆ ଅଇକ୍ରି କ୍ଉଆ, 11‘ତୁମାର୍ ସ୍ହରାର୍ ଜୁଇ ଦୁଳି ଅମାର୍ ହାଦେ ଲାଗି ଆଚେ, ସେ ତାକେ ଅମି ତୁମାର୍ ବିରୁଦେ ହାହ୍ଳି ଦେମ୍ଲୁ, ଇ ଦୁଳି ତୁମାର୍ ବିଷୟେ ସାକି ଦେଇଦ୍, ମ୍ତର୍ ଦ୍କା ଇଶ୍ଵରାର୍ ରାଇଜ୍ ତୁମାର୍ ଲ୍ଗେ ଆଇଲିବେ, ଇରି ଜାଣିରିଆ।’ 12ମୁଇ ତୁମୁକେ ସ୍ତ୍ କ୍ମ୍ଲେ, ପରମେଶ୍ପ୍ର୍ ଜ୍ଡେବ୍ଳ୍ ଇ ହୁର୍ତିବିର୍ ଲକ୍ମ୍ନ୍କାର୍ ବିଚାର୍ କ୍ରୁକେ ଆସେଦ୍, ସେଦିନ୍ ସେ ସଦୋମ୍ ଗାମାର୍ ଲକ୍ମ୍ନ୍କାର୍ ଡ୍ଣ୍ତ୍ ଲ୍ଗେହ୍ଣି ଅଦିକ୍ ଡ୍ଣ୍ତ୍, ଇ ସ୍ହରାର୍ ଲକ୍ମ୍ନ୍କେ ଦେଇଦ୍।”
ଯୀଶୁକେ ବିଶ୍ବାସ୍ ନ୍କେଲା ଲକ୍ମ୍ନ୍
(ମାଥି. ୧୧:୨୦-୨୪)
13“ହାଇ, ଡ୍ଣ୍ଡ୍ ହାଉତା କ୍ରାଚିନ୍ ଆର୍ ହାଇ ଡ୍ଣ୍ତ୍ ହାଉତା ବେଥ୍ସାଇଦା, କାଇତାକ୍ ତୁମାର୍ ବିତ୍ରେ ଜୁଇସ୍ବୁ ଚମ୍ତ୍କାର୍ କାମ୍ମ୍ନ୍କ୍ରି ଆତ୍ତି, ସେସ୍ବୁ ଯଦି ସର୍ ଆର୍ ସୀଦନ୍ ସ୍ହରେ କ୍ଲାଇ ହ୍ଣି, ତ୍ବେ ସେମ୍ନ୍ ବେସିଦିନ୍ ଆଗ୍ତୁ ବାସ୍ତା ହିନ୍ଦିକ୍ରି ଚାର୍ ଲ୍ଗେ ବ୍ସିକ୍ରି ତାକାର୍ ମ୍ନ୍କେ ବାଦ୍ଲାଇଲାଇ ହ୍ଣି। 14ମାପ୍ରୁ ବିଚାର୍ ଦିନ୍ ସର୍ ଆର୍ ସୀଦନ୍ ସ୍ହରାର୍ ତ୍ଇହ୍ଣି ତୁମୁକେ ଅଦିକ୍ ଡ୍ଣ୍ଡ୍ ଦେଇଦ୍। 15ଆରେକ୍ ରେ କପର୍ନାହୁମ୍ ସ୍ହରାର୍ ଲକ୍ମ୍ନ୍, ତୁମିମ୍ନ୍ କାଇରି ସ୍ର୍ଗ୍ ହ୍ତେକ୍ ଜ୍ମ୍କେ ଚେଷ୍ଟା କ୍ରୁଲାସ୍ କି? ଦ୍କା ଇଶ୍ୱର୍ ତୁମୁକେ ନ୍ର୍କେ ହିଙ୍ଗେଦ୍।
16ଯେ ତୁମାର୍ମ୍ନାର୍ କ୍ତା ଶୁଣେଦ୍, ସେ ମ୍ର୍ କ୍ତା ଶୁଣେଦ୍, ଆର୍ ଯେ ତୁମୁକ୍ମ୍ନ୍ ନ୍କେରେ, ସେ ମକେ ମ୍ନ୍ ନ୍କେରେ, ଆର୍ ଯେ ମକେ ମ୍ନ୍ ନ୍କେରେ, ସେମ୍ନ୍ ମକେ ହ୍ଟାଇରିଲା ଇଶ୍ଵର୍କେ ମ୍ନ୍ ନ୍କେର୍ତି।”
ସତୁରି ଗଟ୍ ଚେଲା ଲେଉଟି ଆଇଲାଇ
17ସତୁରି ଗଟ୍ ଚେଲାମ୍ନ୍ ସ୍ର୍ଦା ଅଇ ଲେଉଟି ଆସି କଇଲାଇ, “ମାପ୍ରୁ ଅମି ତର୍ ନାଉଁ ଦ୍କିକ୍ରି ବୁତ୍ଆତ୍ମାମ୍ନ୍କେ ଆଦେଶ୍ ଦିଲେକ୍, ସେମ୍ନ୍ ଅମାର୍ କ୍ତା ମାନ୍ଲାଇ।” 18ଯୀଶୁ ସେମ୍ନ୍କେ କଇଲା, “ବିଜ୍ଲି ମାର୍ଲାହର୍ ସ୍ର୍ଗେ ହ୍ଣି ଶଇତାନ୍କେ ଅଦୁର୍ତାର୍ ମୁଇ ଦ୍କ୍ଲେ। 19ଦ୍କା, ମୁଇ ତୁମୁକ୍ମ୍ନ୍ ସାହ୍ ଆର୍ ମିଚ୍ କାକ୍ଡା ଉହ୍ରେ ଇଣ୍ଡୁକ୍ ଆର୍ ଶଇତାନାର୍ ସ୍ବୁଶ୍କ୍ତି ତ୍ଇହ୍ଣି ଜିଣ୍ତାର୍ ଗିନେ ଅଦିକାର୍ ଦେମ୍ଲେ, ଆର୍ କାଇରି ହେଁ ତୁମାର୍ ନାସ୍ ନ୍କେରେ। 20ବୁତ୍ଆତ୍ମାମ୍ନ୍ ତୁମାର୍ କ୍ତା ମାନୁଲାଇ ବ୍ଲି ସ୍ର୍ଦା ଅଉଆନାଇ, ମ୍ତର୍ ସ୍ର୍ଗେ ତୁମାର୍ ନାଉଁ ଲେକା ଅଇଆଚେ ବ୍ଲି ସ୍ର୍ଦା ଅଉଆ।”
ଯୀଶୁର୍ ସର୍ଦା
(ମାଥି. ୧୧:୨୫-୨୭; ୧୩:୧୬,୧୭)
21ଯୀଶୁ ପବିତର୍ ଆତ୍ମାଇ ସ୍ର୍ଦା ଅଇ କଇଲା, “ସ୍ର୍ଗ୍ ଆର୍ ହୁର୍ତିବିର୍ ମାପ୍ରୁ ମର୍ ଉବା, ମୁଇ ତକେ ଦନ୍ୟବାଦ୍ ଦେମ୍ଲେ, କାଇତାକ୍ ବ୍ଲେକ୍ ତୁଇ ବୁଦିଆ ଆର୍ ଜାନ୍ତା ଲକ୍ମ୍ନ୍କାର୍ ତ୍ଇହ୍ଣି ଇ ସ୍ବୁକ୍ତା ଲୁକାଇକ୍ରି ତର୍ ହିଲାମ୍ନ୍କାର୍ ଲ୍ଗେ ଜାଣାଇଲି ଆଚ୍ସି, ହେଁ ଉବା ଇରି ତର୍ ଆକିୟେ ସ୍ର୍ଦାର୍ ବିଷୟ୍ ଅଇଲି। 22ମର୍ ଉବାର୍ ସ୍ବୁ ଅଦିକାର୍ ମକେ ଦିଲାଆଚେ, ହଇସିକେ, ସେରି ଉବାସିର୍ ବିନା କେ ନ୍ଜାଣ୍ତି, ଆର୍ ଉବାସିକେ, ସେରି ହଇସିର୍ ବିନା ଆର୍ କେ ନ୍ଜାଣ୍ତି, ହଇସି ଯାର୍ ଲ୍ଗେ ଉବାସିର୍ ବିଷୟେ ଜାଣାମ୍କେ ମ୍ନ୍ କ୍ଲେକ୍ ସେ ହ୍କା ଜାଣେଦ୍।” 23ଯୀଶୁ ଚେଲାମ୍ନ୍କାର୍ ବାଟ୍ ଉଲ୍ଟି କ୍ରି ସେମ୍ନ୍କେ ଦିରେ କଇଲା, “ତୁମିମ୍ନ୍ ଜୁଇରି ଜୁଇରି ଦ୍କୁଲାସ୍ ସେରି ସ୍ବୁ ଜାର୍ ଆକି ଦ୍କେଦ୍ ସେମ୍ନ୍ ଦନ୍ୟ। 24କାଇତାକ୍ ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ତୁମିମ୍ନ୍ ଜୁଇରି ଜୁଇରି ଦ୍କୁଲାସ୍, ସେରି ଗାଦି ବବିଶତ୍ କ୍ତା କ୍ଉତା ଲକ୍ମ୍ନ୍ ଆର୍ ଗାଦି ର୍ଜାମ୍ନ୍ ଦ୍କୁକେ ମ୍ନ୍କ୍ଲାଇ, ମ୍ତର୍ ସେମ୍ନ୍ ଦ୍କୁ ନ୍ହାର୍ଲାଇ, ତୁମିମ୍ନ୍ ଜୁଇ ଜୁଇରି ଶୁଣିଆଚାସ୍, ସେସ୍ବୁ ସେମ୍ନ୍ ଶୁଣୁକେ ମ୍ନ୍ କ୍ରିରିଲାଇ ମ୍ତର୍ ଶୁଣୁ ନ୍ହାର୍ଲାଇ।”
ଗଟେକ୍ ବ୍ଲ୍ ଶମିରୋଣୀୟାର୍ ଲକାର୍ କ୍ତା
25ଆର୍ ଦ୍କା ଗଟେକ୍ ମୋଶାର୍ ନିଆଇ ଶିକାଉତା ଲକ୍ ଯୀଶୁର୍ ଦସ୍ ଦ୍ରିନ୍ଦ୍ ବ୍ଲି ତାକେ ହ୍ଚାର୍ଲା, “ଏ ସ୍ତ୍ ଗୁରୁ, ନ୍ସେର୍ତା ଜୀବନ୍ ହାଉତାର୍ ଗିନେ ମୁଇ କାଇ କାମ୍ କ୍ରିନ୍ଦ୍?” 26ଯୀଶୁ ତାକେ କଇଲା, “ମୋଶାର୍ ଶାସ୍ତର୍ ତ୍ଇ କାଇରି ନିୟମ୍ ଲେକା ଅଇଆଚେ? ଆର୍ କ୍ନ୍କାର୍ ତୁଇ ହଳୁଲିସ୍?” 27ସେ କଇଲା, “ତୁମି ନିଜାର୍ ସ୍ବୁ ହୁର୍ଦୟ୍, ସ୍ବୁ ହ୍ରାଣ୍, ସ୍ବୁଶ୍କ୍ତି ଆର୍ ସ୍ବୁ ମ୍ନ୍ଦ୍ଇ ତୁମାର୍ ମାପ୍ରୁ ଇଶ୍ଵର୍କେ ଲାଡ୍କ୍ରା। ଆର୍ ହ୍ର୍ସା ଲକ୍ମ୍ନ୍କେ ତୁମି ନିଜ୍କେ ଲାଡ୍କ୍ଲା ହର୍ ଲାଡ୍କ୍ରା।” 28ଯୀଶୁ ତାକେ କଇଲା, “ତୁଇ ଟିକ୍ କଇଲି ଆଚ୍ସି। ଅନ୍କ୍ରି କାମ୍ କ୍ର୍, ତ୍ବେ ତୁଇ ନ୍ସେର୍ତା ଜୀବନ୍ ହାଉସି।”
29ମ୍ତର୍ ସେ ନିଜ୍କେ ଦ୍ର୍ମି ବ୍ଲି ଦ୍କାମ୍କେ ମ୍ନ୍କ୍ରି ଯୀଶୁକେ ହ୍ଚାର୍ଲା, “ମର୍ ହ୍ଳ୍ସା ଲକ୍କେ?” 30ଯୀଶୁ କଇଲା, “ଗଟେତର୍ ଗଟେକ୍ ମାନାଇ ଯିରୁଶାଲମ୍ ସ୍ହରେ ହ୍ଣି ଯୀରିହୋ ସ୍ହ୍ର୍କେ ଜାତିରିଲା। ବାଟେ ଚର୍ମ୍ନ୍ ତାକେ ମାଡ୍ ମାର୍ଲାଇ ଆର୍ ତାର୍ ହ୍ଚିଆ ହାଟା ଚାଡାଇ ନିଲାଇ ଆର୍ ତାକେ ମ୍ର୍ତା ଉହ୍ରେ ଚାଡି ହ୍ଳାଇଲାଇ।
31ତାର୍ ହ୍ଚେ ସେବାଟ୍ ଅଇ ଗଟେକ୍ ଜାଜକ୍ ଜାତିରିଲା, ଜ୍ଡେବ୍ଳ୍ ସେ ସେ ମାନାଇକେ ଦ୍କ୍ଲା, ସେ ବିନ୍ ବାଟ୍ ଅଇକ୍ରି ହ୍ଳାଇ ଗ୍ଲା। 32ସେ ବାଟେ ଆର୍ ଗଟେକ୍ ଲେବୀୟ ଲକ୍ ଗ୍ଲା, ସେ ହେଁ ତାକ୍ ଦ୍କିକ୍ରି ଅଲ୍ଗା ବାଟ୍ ଅଇକ୍ରି ହ୍ଳାଇଲା। 33ମ୍ତର୍ ସେ ବାଟେ ଗଟେକ୍ ଶମିରୋଣୀୟ ସ୍ହରାର୍ ଲକ୍ ଆଇଲା, ସେ ସେ ମାନାଇକେ ଦ୍କିକ୍ରି ତାର୍ ଲ୍ଗେ ଗ୍ଲା, ଆର୍ ସେ ମାନାଇକେ ବେସି ଦ୍ର୍ମ୍ କ୍ଲା, 34ସେ ତାର୍ ଲ୍ଗେ ଜାଇକ୍ରି ତାର୍ ମାଡ୍ ଅଇରିଲା ଟାଣ୍ମ୍ନ୍କେ ଚିକାଣ୍ ଆର୍ ଅଙ୍ଗୁର୍ ର୍ସ୍କେ ଲାଗାଇକ୍ରି ବାନ୍ଦିଦିଲା। 35ତାର୍ ଆରେଗଟ୍ ଦିନ୍ ସେ ହୁଣ୍ତ୍ତା ଗ୍ରାର୍ ଜ୍ତୁନ୍ କ୍ର୍ତିରିଲା ଡାକ୍ଟ୍ର୍କେ ଜଳେକ୍ ରୁହାର୍ ଅଦ୍ଲି ଦିଲା, ଆର୍ ତାକେ କଇଲା ‘ଆକେ ଜ୍ତୁନ୍କ୍ର୍, ଯଦି ଇଲକାର୍ ଗିନେ ତର୍ ଅଦିକ୍ ଟ୍କା କ୍ର୍ଚ କ୍ରିରିଲେ, ମୁଇ ଲେଉଟି ଆସ୍ତାବ୍ଳ୍ ସେସ୍ବୁ ଡାବୁକେ ଦ୍ଇନ୍ଦ୍।’”
36ଯୀଶୁ ଇ ସ୍ବୁକ୍ତା କଇ ସ୍ର୍ଲା ହ୍ଚେ ସେ ମାନାଇକେ ହ୍ଚାର୍ଲା, “ତର୍ ଚିନ୍ତାହର୍ ଇ ତିନି ଲକାର୍ ବିତ୍ରେ କେ ସେ ମାଡ୍ ମାରି ହ୍କାଇ ଦ୍ଇରିଲା ଲକାର୍ ହ୍ଳ୍ସା ଲକ୍?” 37ଦ୍ର୍ମ୍ ଶାସ୍ତର୍ ଜାଣ୍ତା ଲକ୍ କଇଲା, “ଜୁଇମାନାଇ ତାକେ ଦ୍ର୍ମ୍ କ୍ଲା, ସେ।” ତ୍ବେ ଯୀଶୁ ତାକେ କଇଲା, “ଯାଆ ତୁଇ ହେଁ ସେନ୍କାର୍ କାମ୍ କ୍ର୍।”
ମରୀୟମ୍ ଆର୍ ମାର୍ଥାର୍ ଗ୍ରେ ଯୀଶୁ ଗ୍ଲା
38ଯୀଶୁ ଆର୍ ତାର୍ ଚେଲାମ୍ନ୍ ବୁଲି ବୁଲି ଗଟେକ୍ ଗାମେ ହ୍ଚ୍ଲାଇ, ସେତି ମାର୍ଥା ନାଉଁର୍ ଗଟେକ୍ ମାଇଜି ଟକି ରିଲି, ସେ ଯୀଶୁକେ ତାର୍ ଗ୍ରେ କୁଦିକ୍ରି ନିଲି। 39ସେ ଟକିର୍ ଗଟେକ୍ ବେଣ୍ସି ରିଲି ତାର୍ ନାଉଁ ମରୀୟମ୍, ଯେ ମାପ୍ରୁର୍ ଗଡ୍ତ୍ଳେ ବ୍ସିକ୍ରି ତାର୍ ବାକ୍ୟ ଶୁଣ୍ତି ରିଲି।
40ମାର୍ଥା ରାନ୍ଦ୍ତା କାମାର୍ ଗିନେ ଦ୍ନ୍ଦା ହ୍ନ୍ଦା ଅଉତିରିଲି। ସେତାର୍ଗିନେ ସେ ଯୀଶୁର୍ ଲ୍ଗେ ଆଇଲି ଆର୍ କଇଲି, “ମାପ୍ରୁ ମୁଇ ଏକ୍ଲା ହ୍କା ସ୍ବୁକାମ୍ କ୍ରୁଲେ, ମ୍ତର୍ ମ୍ର୍ ବେଣି ମକେ ଅଳ୍କ୍ ଅଲ୍ ସାଇଜ ନ୍କେରୁଲି, ଇ ବିଷୟେ ତୁଇ କାଇରି ଚିନ୍ତା କ୍ରୁଲିସ୍ କି ନାଇ? ମକେ ଆସି ସାଇଜ କ୍ରୁକେ ତାକେ କ୍ଉ।” 41ମାପ୍ରୁ ତାକେ କଇଲା, “ମାର୍ଥା, ମାର୍ଥା, ତୁଇ ବେସି ବିଷୟାର୍ ଲାଗି ଚିନ୍ତା କ୍ରୁଲିସ୍, ଆର୍ ହେଁ ଦ୍ନ୍ଦା ଅମ୍ଲିସ୍, 42ମ୍ତର୍ ଗଟେକ୍ ହ୍କା ବିଷୟ୍ ଦ୍ର୍କାର୍। ସେ ବ୍ଲ୍ ବିଷୟ୍କେ ମରୀୟମ୍ ବାଚ୍ଲି ଆଚେ, ଆର୍ ତାର୍ ତ୍ଇହ୍ଣି ସେରି କେ ଚାଡାଇ ନ୍ନେତି।”
Currently Selected:
ଲୁକ 10: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
