ଲୁକ 12
12
ଯୀଶୁ ଅକାର୍ ବିଷୟେ ଜାଗ୍ରତ୍ କ୍ରାଇଲା
(ମାଥି. ୧୦:୨୬,୨୭)
1ହ୍ଜାର୍ ହ୍ଜାର୍ ଲକ୍ମ୍ନ୍ ଗଟେତ୍ଇ ରୁଣ୍ଡିକ୍ରି ନିଜାର୍ ନିଜାର୍ ଉହ୍ରେ ହେଲା ହେଲି ଅଉତି ରିଲାଇ, ସେଡେବ୍ଳ୍ ଯୀଶୁ ଆଗେ ନିଜାର୍ ଚେଲାମ୍ନ୍କେ କଇଲା, “ଫାରୂଶୀମ୍ନ୍କାର୍ ଅକାରେ ହ୍ଣି ସାବ୍ଦାନ୍ ଅଇରିଆ, କାଇତାକ୍ ସେମ୍ନ୍ ନିଜ୍କେ ଗଟେକ୍ ବ୍ଲ୍ ଲକ୍ବ୍ଲି ଦ୍କାଇଅଉତି।
2ମ୍ତର୍ ଜୁଇରି ସ୍ବୁ ବିଷୟ୍ ଡାହି ଅଇଲିଆଚେ, ସେ ସ୍ବୁ ଉଗାଳି ଅଇଦ୍ ଆର୍ ଉଜାଳେ ଜାଣା ହ୍ଳେଦ୍। 3ସେତାର୍ଗିନେ ମୁଇ ଜୁଇରି ତୁମୁକ୍ ଅନ୍ଦାରେ କଇଆଚି, ସେରି ହ୍ଦାଇ ଜାଣା ହ୍ଳେଦ୍, ଆର୍ ଜୁଇରି କେ ନ୍ଜାଣ୍ଲା ହର୍ ଗ୍ର୍ ବିତ୍ରେ କ୍ରିଆଚାସ୍, ସେରି ସ୍ବୁ ଲକ୍ମ୍ନ୍କେ କ୍ଉଆ ଅଇଦ୍।
ଡିରାନାଇ
(ମାର୍କ ୧୦:୨୮-୩୧)
4ମ୍ତର୍ ମର୍ ସ୍ଙ୍ଗ୍ମ୍ନ୍ ବ୍ଲି ମୁଇ ତୁମୁକ୍ କ୍ମ୍ଲେ, ଜୁଇ ଲକ୍ମ୍ନ୍ ଗ୍ଗାଳ୍କେ ନ୍ଷ୍ଟକ୍ର୍ତି, ଆର୍ ତାର୍ ଆତ୍ମାକେ କାଇକ୍ରୁ ନାହାର୍ତି, ସେମ୍ନ୍କେ ଡିରାନାଇ। 5ମ୍ତର୍ କାକେ ଡିରାସ୍ ସେରି ମୁଇ ତୁମୁକେ ଜାଣାଇନ୍ଦ୍। ହୁଜ୍ଲା ହ୍ଚେ ନ୍ର୍କ୍ କୁଣ୍ତେ ହ୍କାଉତାର୍ ଯାର୍ ଲ୍ଗେ ଅଦିକାର୍ ଆଚେ, ତାକେ ସେ ଡିରା, ହାଁ, ମୁଇ ତୁମୁକେ ସ୍ତ୍ କ୍ମ୍ଲେ, ତୁମି ତାକ୍ ଡିରା।
6ହାଁଚ୍ଗଟ୍ ଜ୍ଟିଆ ଚେଡେ କାଇରି ଦୁଇ ପଇଶାଇ ନ୍ବିକ୍ତି? ଆର୍ ସେମ୍ନ୍କାର୍ ବିତ୍ରେ ଗଟେକ୍ ହେଁ ଇଶ୍ୱର୍ ହାସ୍ରି ନ୍କେରେ। 7ମ୍ତର୍ ଇଶ୍ୱର୍ ତୁମାର୍ ମୁଣ୍ତାର୍ ସ୍ବୁ ବାଳ୍କେ ହେ ଗ୍ଣିଆଚେ, ତ୍ବାର୍ ଗିନେ ଡିରାନାଇ। ତୁମିମ୍ନ୍ ଇଶ୍ଵରାର୍ ମୁଏ ଜ୍ଟିଆ ଚେଳେ ମ୍ନ୍କାର୍ ତ୍ଇହ୍ଣି ଅଦିକ୍ ବ୍ଡ୍।
ଲକାର୍ ଆଗେ ଯୀଶୁକେ ମାନ୍ତା ଲକ୍
(ମାଥି. ୧୦:୩୨,୩୩; ୧୨:୩୨; ୧୦:୧୯-୨୦)
8ମୁଇ ତୁମୁକ୍ କ୍ମ୍ଲେ, ଯେ କେ ଲକ୍ମ୍ନ୍କାର୍ ମୁଁଏ ମୁଇ ମାନାଇ ହିଲାକେ ମ୍ନ୍କ୍ରେଦ୍, ମୁଇ ହେଁ ଇଶ୍ଵରାର୍ ଦୂତ୍ମ୍ନ୍କାର୍ ମୁଁଏ ତାକେ ମ୍ନ୍ କ୍ରିନ୍। 9ଆର୍ ଜୁଇଲକ୍ ଲକ୍ମ୍ନ୍କାର୍ ମୁଁଏ, ମୁଇ ମାନାଇ ହିଲାକେ ନ୍ଜାଣିବ୍ଲି କଇଦ୍, ତ୍ବେ ମୁଇ ମାନାଇ ହିଲା ହେଁ ଇଶ୍ଵରାର୍ ଦୂତ୍ମ୍ନ୍କାର୍ ମୁଁଏ, ତାକେ ନ୍ଜାଣିବ୍ଲି କଇନ୍ଦ୍। 10ଆରେକ୍, ଯେ କେ ମାନାଇ ହିଲା ବିରୁଦେ କ୍ତା କଇଦ୍, ତାକେ କେମା ଦିଆଅଇଦ୍, ମ୍ତର୍ ଯେ ହେଁ ପବିତର୍ ଆତ୍ମାର୍ ବିରୁଦେ ଲିନ୍ଦାକ୍ତା କଇଦ୍, ତ୍ବେ ତାକେ କେମା ଦିଆ ନ୍ଅଇ।
11ଜ୍ଡେବ୍ଳ୍ ତୁମୁକ୍ ଲକ୍ମ୍ନ୍ ପାର୍ତେନା ଗ୍ରେ, ବିଚାର୍ କ୍ର୍ତା ଲକ୍ମ୍ନ୍କାର୍ ଲ୍ଗେ ଆର୍ କୁଟୁମ୍ ବ୍ସ୍ଲା ଲ୍ଗେ ନେତି, ସେଡେବ୍ଳ୍ ତୁମିମ୍ନ୍ କାଇରି କଇନ୍ଦ୍ ଆର୍ କ୍ନ୍କ୍ରି କଇନ୍ଦ୍, ଆର୍ କାଇ ଉତର୍ ଦେମ୍ନ୍ଦ୍ ବ୍ଲି ଚିନ୍ତା କ୍ରାନାଇ। 12କାଇତାକ୍ ତୁମିମ୍ନ୍ ନିଜେ କାଇରି କ୍ମ୍କେ ନ୍ହେଳେ, ମ୍ତର୍ ପବିତର୍ ଆତ୍ମା ସେରି କମ୍କେ ସାଇଜ କ୍ରେଦ୍।”
ମୁର୍କ ଦନୀର୍ କ୍ତା
13ହଚେ ଲକ୍ମ୍ନ୍କାର୍ ମ୍ନ୍ଦାଇ ହ୍ଣି ଗଟେକ୍ ଲକ୍ ଯୀଶୁକେ କଇଲା, “ଏଗୁରୁ, ଅମାର୍ ଉବାର୍ ଜୁଇସ୍ବୁ ଦ୍ନ୍ ସ୍ମ୍ପତି ଆଚେ ସେସ୍ବୁ ଦୁଇ ବାଟା କ୍ରୁକେ ମର୍ ବାଇକେ ଅଳକ୍ କ୍ଉ।” 14ଯୀଶୁ ତାକେ କଇଲା, “ତୁମି ଦୁଇଲକାର୍ ବିଚାର୍ କ୍ରୁକେ ଆର୍ ତୁମାର୍ ଦ୍ନ୍ ସ୍ମ୍ପତିକେ ବାଟା କ୍ରୁକେ, କେ ମକେ ବିଚାର୍ କ୍ର୍ତା କ୍ଲାଆଚେ?” 15ଆର୍ ଯୀଶୁ ସେସ୍ବୁ ଲକ୍ମ୍ନ୍କେ କଇଲା, “ସ୍ବୁ ପର୍କାର୍ ଦ୍ନାର୍ ଲବ୍ ତ୍ଇହ୍ଣି ଜାଗ୍ରତ୍ ଅଇରିଆ, କାଇତାକ୍ ଗଟ୍ଲକାର୍ ଜୀବନ୍ ତାର୍ ଦ୍ନ୍ ସ୍ମ୍ପତି ଉହ୍ରେ ଆଶା ନ୍କେରେ।”
16ତାର୍ ହ୍ଚେ ଯୀଶୁ ସେମ୍ନ୍କେ ଇ ଦ୍କାଇକ୍ରି କ୍ଉତା କ୍ତା କଇଲା, “ଗଟେକ୍ ମାଜନ୍ ଲକ୍ରିଲା ଆର୍ ତାର୍ ବେଡାଇ ବେସି ଦାନ୍ ମ୍ଣ୍ତିଆ ଅଇଲି। 17ସେ ମ୍ନେ ମ୍ନେ ବାବ୍ଲା ଆର୍ କଇଲା, ‘ମୁଇ କ୍ନ୍କ୍ରିନ୍ଦ୍? ଇ ସ୍ବୁ ଦାନ୍ ମ୍ଣ୍ତିଆ ସ୍ଙ୍ଗାମ୍କେ ତୋ ମର୍ଲ୍ଗେ ଜାଗାନାଇ।’ 18ଆର୍ ସେ ନିଜ୍କେ ନିଜେ କଇଲା, ‘ମୁଇ ମର୍ ହାଲା ସ୍ବୁ ବାଙ୍ଗିକ୍ରି ବ୍ଡ୍ ବ୍ଡ୍କ୍ରି ତିଆର୍ କ୍ରିନ୍ଦ୍ ଆର୍ ସେତି ଇ ସ୍ବୁ ଦାନ୍ ମ୍ଣ୍ତିଆ ମ୍ନ୍କେ ସ୍ଙ୍ଗାଇନ୍ଦ୍।’ 19ତାର୍ ହଚେ ସେ ତାର୍ ନିଜ୍କେ କଇଲା, ‘ଏ ମର୍ ଜୀବନ୍, ବେସିଦିନ୍ କାତାର୍ ଗିନେ ତର୍ ଲଗେ ଦାନ୍ ମ୍ଣ୍ତିଆ ଗାଦି ସ୍ଙ୍ଗା ଅଇଲିଆଚେ, ସେତାର୍ଗିନେ ସ୍ର୍ଦା ଅଇକ୍ରି ହୁଣ୍ଡ୍, କାଆ, ସ୍ର୍ଦା କ୍ର୍।’
20ମ୍ତର୍ ଇଶ୍ୱର୍ ତାକେ କଇଲା, ‘ହେ ବକୁଆ ମୁର୍କ ଦନୀ, ଆଜି ରାତି ତର୍ ତ୍ଇହ୍ଣି ତର୍ ଜୀବନ୍ ନିଆ ଅଇଦେ, ତ୍ବେ ଜ୍ତେକ୍ ସ୍ବୁ ଦ୍ନ୍ ସ୍ମ୍ପତି ମର୍ ବ୍ଲି ସ୍ର୍ଦା ଅମ୍ଲିସ୍, ସେ ସ୍ବୁ କେକାତି?’” 21ଯୀଶୁ ଆରେକ୍ କଇଲା, “ଲକ୍ମ୍ନ୍ ଯେ ନିଜାର୍ ନିଜାର୍ ଗିନେ ଗାଦି ଦ୍ନ୍ ସ୍ମ୍ପତି ସ୍ଙ୍ଗାମ୍ଲାଇ, ମ୍ତର୍ ସେମ୍ନ୍ ଇଶ୍ଵରାର୍ ବିଷୟେ ଦନୀ ନଇ, ତାକାର୍ ସ୍ଙ୍ଗ୍ ଇରି ଗ୍ଟେଦ୍।”
ଚିନ୍ତା ନ୍କେରା
(ମାଥି. ୬:୨୫-୩୪)
22ହଚେ ଯୀଶୁ ତାର୍ ଚେଲାମ୍ନ୍କେ କଇଲା, “ଇତାର୍ଗିନେ ମୁଇ ତୁମୁକ୍ମ୍ନ୍ କ୍ମ୍ଲେ, ବାଚ୍ତାର୍ ଗିନେ ଦ୍ର୍କାର୍ ରିଲାର୍ କାଦିର୍ ବିଷୟେ ଆର୍ ଗ୍ଗାଳାର୍ ଗିନେ ହ୍ଚିଆର୍ ବିଷୟେ ମ୍ନେ ଚିନ୍ତା କ୍ରାନାଇ। 23କାଇତାକ୍ କାଦି ଲ୍ଗେହ୍ଣି ଜୀବନ୍ ଆର୍ ହ୍ଚିଆର୍ ଲ୍ଗେହ୍ଣି ଗ୍ଗାଳ୍ ବ୍ଡ୍।
24ଚେଳେ ମ୍ନ୍କେ ଦ୍କା ସେମ୍ନ୍ ବିଆନ୍ ନ୍ବୁଣ୍ତି କି ନ୍କାଟ୍ତି, ସେମ୍ନ୍କାର୍ ହାଲା ନାଇ କି କଲ୍କି ହେଁ ନାଇ, ମ୍ତର୍ ଇଶ୍ୱର୍ ସେମ୍ନ୍କେ କାଦି ଜାଗାମ୍ଲା। ତୁମିମ୍ନ୍ ସେମ୍ନ୍କାର୍ ତ୍ଇହ୍ଣି କ୍ତେକ୍ ବେସିବ୍ଡ୍! 25ଆରେକ୍, ତୁମାର୍ମ୍ନ୍କାର୍ ବିତ୍ରେ କେ ଚିନ୍ତା କ୍ରି, ନିଜାର୍ ଗଟେକ୍ ଦିନ୍ ଆଇସି ବାଡାମ୍ ହାରାସ୍ କି? 26ତୁମି ଯଦି ଅନ୍କ୍ରି ସାନ୍ ବିଷୟେ କ୍ରୁ ନାହାରୁଲାସ୍, ତ୍ବେ ବିନ୍ସ୍ବୁ ବିଷୟାର୍ ଗିନେ କାଇକ୍ତା ଚିନ୍ତା କ୍ରୁଲାସ୍?
27ବଗିଚାର୍ ହୁଲ୍ ମ୍ନ୍କେ ଦ୍କା, ସେମ୍ନ୍ ସୂତା କାଟି ନ୍କେର୍ତି ଆର୍ ହ୍ଚିଆ ହେଁ ନ୍ବୁଣ୍ତି, ମୁଇ ତୁମୁକ୍ କ୍ମ୍ଲେ ଯେ, ର୍ଜା ଶଲୋମନାର୍ ଅତେକ୍ ଦ୍ନ୍ ସ୍ମ୍ପତି ର୍ଇକ୍ରି ହେଁ, ହୁଲାର୍ ସୁନ୍ଦୁର୍ ହ୍ର୍ ଗଟେକ୍ ହେଁ ବିଷୟ୍ ତାର୍ ଲ୍ଗେ ନ୍ରିଲି। 28ମ୍ତର୍ ହ୍ଦାର୍ ଜୁଇ ର୍ନ୍ ଆଜି ହ୍ଦାଇ ଆଚେ, ଆର୍ କାଲି ଚୁଲାଇ ହ୍କା ଅଇଦ୍, ତାକେ ଜ୍ବେ ଇଶ୍ୱର୍ ଜ୍ନ୍ କ୍ରେଦ୍ ସେନ୍କାର୍ ରୁପ୍ ଦ୍ଇଦ୍, ତ୍ବେ, ଏ ଅଳକ୍ ବିସ୍ବାସି ମ୍ନ୍, ସେ ତୁମୁକ୍ ହେଁ ସ୍ତ୍କ୍ରି କେତେକ୍ ଅଦିକ୍ ନ୍ଦେଇ!
29ସେତାର୍ଗିନେ ତୁମିମ୍ନ୍ ସ୍ବୁବ୍ଳ୍ କାଇରି କାମ୍ନ୍ଦ୍ ଆର୍ କାଇରି ହିନ୍ଦୁନ୍ ବ୍ଲି ଚିନ୍ତା କ୍ରାନାଇ, 30କାଇତାକ୍ ଜଗତାର୍ ଯିହୁଦି ଚାଡି ବିନ୍ଜାତିର୍ ଲକ୍ମନ୍ ଇ ସ୍ବୁ ବିଷୟ୍ କଜି ବୁଲ୍ତି। ମତର୍ ଇ ସ୍ବୁ ବିଷୟ୍ ଯେ ତୁମୁକେ ଦ୍ର୍କାର୍ ଆଚେ ବ୍ଲି, ତୁମାର୍ ସ୍ର୍ଗାର୍ ଉବା ଜାଣେଦ୍।
31ମତର୍ ଇ ସ୍ବୁ ବିଷଇ ଚାଡି ତୁମି ହ୍ର୍ତୁ ଇଶ୍ଵରାର୍ ରାଇଜାର୍ ଗଟେକ୍ ଦ୍ର୍ମ୍ ଜୀବନେ ଜିମ୍କେ ଚେଷ୍ଟାକ୍ରା, ଆର୍ ଇ ସ୍ବୁ ବିଷଇ ହେଁ ତୁମୁକ୍ମ୍ନ୍ ଦିଆଅଇଦ୍।”
ସ୍ର୍ଗାର୍ ଦ୍ନ୍
(ମାଥି. ୬:୧୯-୨୧)
32ଯୀଶୁ ଆରେକ୍ କଇଲା, “ହେ ସାନ୍ କୁଦା, ଡିରାନାଇ, କାଇତାକ୍ ତୁମାର୍ ଉବା ତୁମୁକେ ତାର୍ ରାଇଜ୍ ଦେମ୍କେ ମ୍ନ୍କ୍ରି ଆଚେ।
33ତୁମାର୍ ଲ୍ଗେରିଲା ସ୍ବୁ ଦ୍ନ୍ ସ୍ମ୍ପତି ବିକିକ୍ରି ଗ୍ରିବ୍ ଲକ୍ମ୍ନ୍କେ ଦାନ୍ କ୍ରା, ଜୁଇରି କି ଚର୍ମ୍ନ୍ କ୍ତି ବାଙ୍ଗି ଜ୍ମ୍ ନ୍ହାର୍ତି ଆର୍ କିଳା ନ୍ଷ୍ଟ କ୍ରୁନାହାର୍ତି, ଅନ୍କ୍ରି ସ୍ର୍ଗ୍ ରାଇଜେ ନିଜାର୍ ନିଜାର୍ ଗିନେ ନ୍ଷ୍ଟ ନ୍ଉତା ଦ୍ନ୍ ସ୍ମ୍ପତି ସ୍ଙ୍ଗାଉଆ, 34କାଇତାକ୍ ଜୁଇତି ତୁମାର୍ ଦ୍ନ୍ ର୍ଇଦ୍, ସେତି ହ୍କା ତୁମାର୍ ମ୍ନ୍ ର୍ଇଦ୍।
ଜାଗ୍ରତ୍ ସ୍ଙ୍ଗେ ରିଲା ଚାକର୍ମ୍ନ୍
35ତୁମାର୍ ଅଟାକେ ବାନ୍ଦି, କୁପି ଲାଗାଇକ୍ରି ସେବା କ୍ରୁକେ ସ୍ବୁବ୍ଳ୍ ତିଆର୍ ଅଇରିଆ। 36ଆର୍ କ୍ଡେବ୍ଳ୍ ସାଉକାର୍ ବିବା ବ୍ଜି ତ୍ଇହ୍ଣି ଲେଉଟି ଆସି, କାହାଟେ ମାରୁ ମାରୁ ଜୁଇ ଚାକର୍ କାହାଟ୍ ଉଗାଳି ଦେମ୍କେ ଜାଗି ର୍ଇଦ୍, ତୁମିମ୍ନ୍ ସେମ୍ନ୍କାର୍ ହର୍ ଅଇ ଜାଗିରିଆ।
37ସାଉକାର୍ ଆସିକ୍ରି ଜୁଇ ଚାକର୍ ମ୍ନ୍କେ ଜାଗ୍ରତ୍ ଆର୍ ତିଆର୍ ଅଇରିଲାର୍ ଦ୍କେଦ୍, ସେମ୍ନ୍ ଦନ୍ୟ, ମୁଇ ତୁମୁକ୍ ସ୍ତ୍ କ୍ମ୍ଲେ, ସାଉକାର୍ ସେମ୍ନ୍କାର୍ ହର୍ ଅଟାକେ ବାନ୍ଦିକ୍ରି ସେମ୍ନ୍କେ କାମ୍କେ ବ୍ସାଇଦ୍ ଆର୍ ଲ୍ଗେ ଜାଇକ୍ରି ସେମ୍ନ୍କେ କାମ୍କେ ଦ୍ଇଦ୍। 38ଆର୍ ଯଦି ମ୍ଜାରାତି କି ସ୍କାଳ୍ ସ୍କାଳ୍ ଆସି ସେ ଚାକର୍ମ୍ନ୍କେ ଜାଗ୍ରତ୍ ଆର୍ ତିଆର୍ ଅଇରିଲାର୍ ଦ୍କେଦ୍, ତ୍ବେ ସେ ଦନ୍ୟ।
39ମ୍ତର୍ ଇରି ଜାଣିରିଆ, କ୍ଡେବ୍ଳ୍ ଚର୍ ଆସେଦ୍, ଇରି ଗ୍ର୍ ମାଲିକ୍ ଜ୍ବେ ଜାଣ୍ତି, ସେରି ଅଇଲେକ୍ ସେ ଜାଗ୍ରତ୍ ଅଇର୍ଇଦ୍ ଆର୍ ନିଜାର୍ ଗ୍ରେ ହୁରୁକେ ଦ୍ଇ ନ୍କେର୍ତି। 40ତୁମିମ୍ନ୍ ସେତାର୍ଗିନେ ତିଆର୍ ଅଇରିଆ, ବ୍ଲେକ୍ ଜ୍ଡେବ୍ଳ୍ ତୁମି ତିଆର୍ ଅଇ ନ୍ରିଆସ୍, ସେଡେବ୍ଳ୍ ମୁଇ ମାନାଇ ହିଲା ଆସିନ୍ଦ୍।”
ବିଶ୍ବାସ୍ କ୍ଲା ଚାକର୍ ଆର୍ ବିଶ୍ବାସ୍ ନ୍କେଲା ଚାକର୍
(ମାଥି. ୨୪:୪୫-୫୧)
41ପିତର୍ ଯୀଶୁକେ କଇଲା, “ଏ ମାପ୍ରୁ ଇ ଦ୍କାଇକ୍ରି କ୍ଉତା କ୍ତା ଆମୁକ୍ ହ୍କା କ୍ମ୍ଲିସ୍ କି ସ୍ବୁ ଲକ୍ମ୍ନ୍କେ କ୍ମ୍ଲିସ୍?” 42ମାପ୍ରୁ କଇଲା, “ନିଜାର୍ ଗ୍ରାର୍ ଲକ୍ମ୍ନ୍କେ ଦେତାର୍ ଗିନେ, ଜୁଇ ଦାସ୍କେ ସାଉକାର୍ ତାର୍ ଗ୍ରାର୍ ଉହ୍ରେ ବ୍ଡ୍କ୍ରି ବାଚେଦ୍, ଅନ୍କ୍ରି ବିଶ୍ବାସ୍ ଆର୍ ବୁଦିମାନ୍ ଚାକର୍ କେ ଆଚେ? 43ସାଉକାର୍ ଲେଉଟି ଆସି ଜୁଇ ଚାକର୍କେ ଅନ୍କ୍ରି ବ୍ଲ୍କାମ୍ କ୍ର୍ତାର୍ ଦ୍କେଦ୍, ତ୍ବେ ସେ ଚାକର୍ ଦନ୍ୟ। 44ମୁଇ ତୁମୁକ୍ ସ୍ତ୍ କ୍ମ୍ଲେ, ସାଉକାର୍ ସେ ଚାକର୍କେ ତାର୍ ସ୍ବୁ ଦ୍ନ୍ ସ୍ମ୍ପତି ଉହ୍ରେ ଦ୍କ୍ତାର୍ ଗିନେ ସ୍ଙ୍ଗାଇଦ୍।
45ମତର୍ ଯଦି ସେ ଗ୍ର୍କେ ଚାଲାଉତା ଚାକର୍ ମାପ୍ରୁ ଆସ୍ତାର୍ ବେସିଦିନ୍ ଆଚେ ବ୍ଲି ମ୍ନେ ମ୍ନେ କ୍ଉତି, ଆର୍ ବିନ୍ ଦ୍ଙ୍ଗ୍ଳା ଦ୍ଙ୍ଗ୍ଳିମ୍ନ୍କେ ମାରାମାରି କ୍ରୁକେ ଦ୍ରେଦ୍ ଆର୍ କାଇ ହି କ୍ରି ମାତି ର୍ଇଦ୍, 46ତ୍ବେ ଜ୍ଡେବ୍ଳ୍ ତାର୍ ସାଉକାର୍ ଆସେଦ୍ ବ୍ଲି ସେ ବାବି ନ୍ରେଇ, କି ଜାଣି ନ୍ରେଇ ସେଡେବ୍ଳ୍ ତାର୍ ସାଉକାର୍ ଆସେଦ୍ ଆର୍ ସେ ଲକ୍କେ ବେସି ଡ୍ଣ୍ଡ୍ ଦ୍ଇଦ୍, ଆର୍ ତାକେ ସେ ବିଶ୍ବାସ୍ ନ୍କେଲା ଦ୍ଙ୍ଗ୍ଳା ମ୍ନ୍କାର୍ ସ୍ଙ୍ଗ୍ ଡ୍ଣ୍ଡ୍ ଦ୍ଇଦ୍।
47ଜୁଇ ଦ୍ଙ୍ଗ୍ଳା ତାର୍ ସାଉକାରାର୍ ଇଚାକେ ଜାଣିକ୍ରି ହେଁ ତିଆର୍ ଅଇ ନ୍ରେଇ, ଆର୍ ସାଉକାରାର୍ ଇଚାହର୍ କାମ୍କ୍ରି ନ୍ରେଇ, ତ୍ବେ ସାଉକାର୍ ତାକେ ବେସି ଡ୍ଣ୍ତ୍ ଦ୍ଇଦ୍, 48ମ୍ତର୍ ଜୁଇ ଦ୍ଙ୍ଗ୍ଳା ସାଉକାର୍ ଇଚାକେ ଜାଣୁ ନ୍ହାରି ବୁଲ୍କାମ୍ କ୍ରେଦ୍, ତ୍ବେ ସେ ଅଳକ୍ ଡ୍ଣ୍ତ୍ ହାଇଦ୍। ଜୁଇଲକ୍କେ ଅଦିକ୍ ଦିଲାଇ ଆତ୍ତି ତାର୍ ତ୍ଇହ୍ଣି ଅଦିକ୍ ନିଆ ଅଇଦ୍, ଆର୍ ଜୁଇଲକ୍କେ ଅଦିକ୍ ବେସି ଦିଲାଇ ଆତ୍ତି ତାର୍ ତ୍ଇହ୍ଣି ବେସି ଅଦିକ୍ ଦାବି କ୍ର୍ତି।
କୁଟୁମ୍ ବିତ୍ରେ ବାଗ୍ ବାଗ୍
(ମାଥି. ୧୦:୩୪-୩୬)
49ମୁଇ ଇ ହୁର୍ତିବିର୍ ଲକ୍ମ୍ନ୍କାର୍ ଉହ୍ରେ ଜୟ୍ ହ୍କାମ୍କେ ଆଇଲେଆଚି, ସେରି ଜୟ୍ ଲାଗୁକେ ଦ୍ରିଲିବେ, ତ୍ବେ ମର୍ ଆର୍ କାଇରି ଇଚା? 50ମକେ ଆରେକ୍ ଗଟେତର୍ ବେସି ଦୁକାର୍ ଡୁବେନ୍ ନେମ୍କେ ହ୍ଳେଦ୍, ଆର୍ ସେରି ନ୍ସେର୍ତା ହ୍ତେକ୍ ମୁଇ ବେସି ଦୁକାର୍ ବଜ୍ ବଇଲେ ଆଚି।
51ମୁଇ ଇ ହୁର୍ତିବି ତ୍ଇ ଶାନ୍ତି ଦେମ୍କେ ଆସିଆଚି ବ୍ଲି ତୁମିମ୍ନ୍ କାଇରି ବାବୁଲାସ୍ କି? ମୁଇ ଶାନ୍ତି ଦେମ୍କେ ଆସି ନ୍କେରି, ମ୍ତର୍ ବାଗ୍ ବାଗ୍ କ୍ରୁକେ ଆସିଆଚି। 52ଯଦି ଆଗ୍ତୁ ଗଟେକ୍ ଗ୍ରେ ହାଁଚ୍ ଲକ୍ ରିଲେକ୍ ଦୁଇଲକାର୍ ବିରୁଦେ ତିନିଲକ୍ ଆର୍ ତିନି ଲକାର୍ ବିରୁଦେ ଦୁଇ ଲକ୍ ବାଗ୍ ଅଉତି। 53ହଇସିର୍ ବିରୁଦେ ଉବାସି, ଉବାସିର୍ ବିରୁଦେ ହଇସି, ଆଇସିର୍ ବିରୁଦେ ଜିସି ଆର୍ ଜିସିର୍ ବିରୁଦେ ଆଇସି, ବୁଆର୍ସି ବିରୁଦେ ଶତୁର୍ସିର୍ ଆର୍ ଶତୁର୍ସିର୍ ବିରୁଦେ ବୁଆର୍ସିର୍ ବାଗ୍ ବାଗ୍ ଅଉତି।”
ଯୁଗ୍ ଶେସ୍ ଦିନାର୍ କ୍ତା
(ମାଥି. ୧୬:୨,୩)
54ଆରେକ୍ ଯୀଶୁ ଲକ୍ମ୍ନ୍କେ କଇଲା, “ଜ୍ଡେବ୍ଳ୍ ତୁମି ତ୍ଳ୍ ବାଟିଆ ମେଗ୍ ଆସ୍ତାର୍ ଦ୍କାସ୍, ସେ ଦାହ୍ରେ ତୁମିମ୍ନ୍ କ୍ଉଆସ୍ ଯେ ହାଣି ଆସେଦ୍ ବ୍ଲି, ଆର୍ ସେନ୍କ୍ରି ହାଣି ଆସୁଲି। 55ଆର୍ ଜ୍ଡେବ୍ଳ୍ ତୁମି ଦକିଣ ଦିଗେହ୍ଣି ହ୍ବନ୍ ଆସ୍ତାର୍ ଦ୍କାସ୍, ସେ ଦାହ୍ରେ କ୍ଇ ରିଆସ୍ ଯେ, କ୍ରା ଅଏଦ୍ ବ୍ଲି, ଆର୍ ସେନ୍କ୍ରି କ୍ରା ଅମ୍ଲି। 56ରେ ଅକାରିଆମ୍ନ୍, ତୁମିମ୍ନ୍ ହୁର୍ତିବିର୍ ଆର୍ ସ୍ର୍ଗାର୍ ଚିନା ସ୍ବୁ ଜାଣୁଲାସ୍, ମ୍ତର୍ କ୍ନ୍କ୍ରି ଇ କାଳାର୍ ଚିନାମ୍ନ୍ ନ୍ଜାଣୁଲାସ୍?
ତୁମାର୍ ବିରଦ୍ ଲକାର୍ ସ୍ଙ୍ଗ୍ ମିଳାମିଶା ଅଉଆ
(ମାଥି. ୫:୨୫,୨୬)
57ତୁମିମ୍ନ୍ ବ୍ଲ୍କାମ୍ କ୍ର୍ତାର୍ ଗିନେ କାଇତାକ୍ ନିଜେ ନିଜେ ବିଚାର୍ କ୍ରୁଲାସ୍? 58ତୁମିମ୍ନ୍ ବିରଦ୍ ଅଇରିଲା ଲକ୍ସ୍ଙ୍ଗ୍ ବିଚାର୍ ଅମ୍କେ ଜାତିରିଲାବ୍ଳ୍ ଜାତାବାଟେ ତାର୍ସ୍ଙ୍ଗ୍ କ୍ତାବାର୍ତା ଅଇ ମିଳାମିସା ଅଉଆ, ଯଦି ସେନ୍କ୍ରି ନ୍କେରାସ୍ ତ୍ବେ ସେ ତୁମୁକେ ବିଚାର୍ କ୍ର୍ତା ଲ୍ଗେ ନ୍ଇଦ୍, ଆର୍ ସେ ଶ୍ଇନ୍ ମ୍ନ୍କାର୍ ଆତେ ତୁମୁକେ ସ୍ହ୍ରି ଦ୍ଇଦ୍, ତ୍ବେ ସେ ଶ୍ଇନ୍ମ୍ନ୍ ତୁମୁକେ ଜ୍ଇଲେ ହ୍କାଇଦ୍। 59ମୁଇ ତୁମୁକ୍ ସ୍ତ୍ କ୍ମ୍ଲେ, ତୁମି ସ୍ବୁ ତାକାର୍ ଡାବୁ ନ୍ସୁଜ୍ତା ହ୍ତେକ୍, କେ ହେଁ ସେ ଜାଗାଇ ହ୍ଣି ବାରି ଆସୁ ନାହାରାସ୍।”
Currently Selected:
ଲୁକ 12: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
