MAKU 11

1YI pakakokyelabo pepe yi Yelusaleme padi Betefange yi Betani, ku lupongo lwa Olife, akatuma beyi banci babidi 2yi akabatôyela ene, Nuyi mu kala kabende kadi ku mpala yenu, yi pa kubwela momu nunasañana mwana a mpundu mangwoso musuka, utawapema muntu mwoso kulu kwanci pôi nkyekyu ; numusuli, numucwali kunu. 3Yi ndo muntu mwoso unwatôyela ene, Nwencenca noku kukai ? nutôyi ene, Fumu umwabila ; yi unamutuma mangwoso. 4Yi bakancuka yi bakasañana mwana a mpundu musuka ku mbelo kunci ku diso dia ncila, yi bakamusula. 5Banga lolo bakakwemana koku bakabatôyela ene, Nwencenca kai ? nudi mu kusula mwana a mpundu. 6Yi bakabatôyela bea biakatôya Yisu ; yi bobo bakabalekyela. 7Yi bakafikisa mwana a mpundu kudi Yisu, yi bakapula bifunda biabo kulu kwanci, yi yei akakwapema kulu kwanci. 8Yi bantu bangi bakakwadisa bilamba biabo pa ncila ; banga lolo mabunca akakalabo mu bibidi. 9Yi bobo bakaya buxi yi bobo bakalwa kunyuma bakakwamena meyi ene, Osana ; you atumbixibwi ulolwa ku dina dia Fumu. 10Bufumu butumbixibwi bulolwa bwa tetecu Dafidi. Osana mu kidi kiadika kulu.

11Yi akabwela mu Yelusaleme munda mwa tempelo ; yi pakadi amaxexela bintu bioso, bwalo bwakadi kutani nkyekyu pa dyololo, akaya ku Betani yi disangi yi babidi.

12Mankyelo lolo, pakadi bamabatuka mu Betani, yei akadi yi ncala. 13Yi pakamonayi kikuyi kia maxika kulekule kiakadi yi malwa, akalwa ndo ambeci uxesañana dimoma koku. Yi pakafikayi kudikio, akasañana kumoni kintu mo malwa matupu, bwalo butakadi kikondo kia mamoma a kikuyi. 14Yi akakulumuna yi akautôyela ene, Muntu kadi mamoma kudi pôi nkyekyu kô kô. Beyi banci lolo bakakwombwa.

15Yi bakalwa ku Yelusaleme, yi yei akabwela mu tempelo, akabanga kubatenyeka bakakwodisa yi bakakwola mu tempelo, akatudeya mesa a basumbanyi ba mpalata, yi nkwasa ya bantu bakakwodisa bimbenga ; 16akadi kasokwetabuxila muntu mwoso dia kucwala kintani kioso mu tempelo. 17Yi akakweyesa ene, Ki kwamafundibwa ene, Ncibo amene unatambibwa ncibo a kulomba bwalo bwa mabila moso ? Mo nonu nwamamukulumuna kisokomenu kia befi. 18Yi makanda manene yi bafundi ba mikanda bakakwombwa, yi bakapalala muxemuxipabo ; bwalo bwakamucinabo, bwalo bwakakamina kimbukuma bungi bwakio kweyesa kwanci. 19Yi pakalwa bwelu, akabatuka kunci kwa bula. 20Yi pakadikabo ku butwatuku pexe bakamona kikuyi kiamakwoma pôi ku macina. 21Pita lolo akakwela lukanyi, akamwambila ene, Labi, mona, kikuyi kiakafinga Owe kiamakwoma. 22Yisu akabapingasa ene, Nwakali yi kwetabusa kudi Ncembi. 23Nwatôyela sôsôlwo ene, Muntu mwoso unatôyela lupongo lolu ene, Ncudibwa, elebwa mu mai, yi kanaxitaxita mu mucima ănci, kate unakwetabusa ene, diyi diatôyay dinafika, unakala yi kintu kiatôyayi 24Mbwôso nwatôyela ene, Bintu bioso binwalomba yi binwapangusa nwetabusi ene, nwamabiangata, yi nunakala yinabio. 25-26Yi binwemanayi kulomba, ndo nudi yi muntu mwoso bwalo, numulekyeli, bixenulekyela Tetenu kabidi udi mu diulu mona enu.

27Yi bakalwa kabidi ku Yelusaleme. Yi pakakwendakanayi mu tempelo, makanda manene akalwa kudiyi yi bafundi ba mikanda yi babakulu ; 28yi bakamutôyela ene, Ku bumanya bwa beci kwencenca Owe bintu bebi ? Yi ñani akakupa bumanya bobu bwa kwenca bintu bebi ? 29Yi Yisu akabapingasa ene, Nakunwapangusa nonu diyi dimodimwe, yi nungupingasi diyi ; yi nakunwambila dia bumanya bungwencenca bintu bebi yinabu. 30Kunumeya kwa Yoano kwakadi ndo kwa diulu ndo kwa bantu ? Nungupingasi diyi. 31Yi bakakwelañana nkanyi ene, Ndo tuxetôya ene, Kwa diulu, yei unatôya ene, Mbwôso kukai nwakadi kanusomwetabusa ? 32Kaninga ndo tuxetôya ene, Kwa bantu . . . . bakacina bantu ; bwalo bwakakisa bantu boso dia Yoano ene, udi mudimuxi sôsôlwo. 33Yi bakapingasa Yisu ene, Katusolubukwa. Yisu akabambila ene, Meme kabidi kisonwambila dia bumanya bungwencenca bintu bebi yinabu.

Currently Selected:

MAKU 11: Luna_NT

Highlight

Copy