MAKU 10

1YI akancuka koku, akalwa ku mbata a Yudiya, yi ku dixia dia Yôdana. Yi bimbukuma biakakokama kabidi kudiyi, yi akabeyesa kabidi bea biakadi mwosambu ănci. 2Yi banga baFalixi bakalwa kudiyi bakamwapangusa ene, Kwalelekyela yi bwadi muntu kuncula mukasanci ? badi mu kumwelekyesa. 3Mo yei akabapingasa ene, Mosese akanulanga beci ? 4Bobo ene, Mosese akamufundisa mukanda ă dibakwa difu, yei kumuncula. 5Mo Yisu akabapingasa ene, Akanufundila mulangu ou bwalo bwa micima yenu kukola. 6Mo pôi bubangabanga bwa kupangibwa kwa bintu, Ncembi akabapanga mwamulumi yi mwamukaxi. 7Ku mucwe ou kunaxiya muntu tetenci yi mamanci, yi unanamata kudi mukasanci ; 8yi babidi baba banakala munyu umoumwe ; bitasoakalabo babidi nyô, kate munyu umoumwe. 9Mbwôso bintu biamasambika Ncembi, muntu kabinamuni. 10Yi mu ncibo kabidi mwakamwapangusa beyi banci ku bwalo bobu. 11Yi akabatôyeia ene, Muntu mwoso unancula mukasanci yi unangata munga dibakwa amamwonena bwalo bwa budibi. 12Yi ndo mwamukaxi unancula bayenci yi unaya kudi munga mwamalumi dibakwa, udi yi kwona kwa budibi.

13Yi bakacwala bana babende kudiyi, ababaki bianca bienci. Mo beyi bakabakama makamu bakabacwala. 14Mo pakamona Yisu, akanyungula ku mucima, yi akabatôyela ene, Nulekyeli bana babende, balwi kundi ; kanubakandi ; bwalo budi bufumu bwa diulu bwa bena noku. 15Nwatôyela sôsôlwo ene, Muntu utasoangata bufumu bwa Ncembi bea luna mwana mubende, kanabwek momu pô. 16Yi pakadi amabangata mu biboko bienci yi amabaka bianca bienci kulu kwabo, akabalwangwasana.

17Yi pakadi utanakwenda mu ncila muntu akalwa kudiyi lubilu, akakonya binu ku mpala anci yi akakwapangusa ene, Mweyexi unengela nkisi kai ndo kukita môyo ă kô kô ? 18Yisu lolo akamutôyela ene, Kuka ungwabikila ene, Kunengela ? Kakuna muntu udi kunengela utena umoumwe, Ncembi. 19Owe ubili milangu ene, Kuxipi. Kwendedi mukaxi abene. Kwebi. Kudimbididi muntu. Kudimbi. Nemeka tetebe yi mabebe. 20Yei akamupingasa ene, Mweyexi, namanama bintu bebi bioso pôi bwabuki bwamene. 21Yi Yisu akamutebela, yi akamunanga nyinga ; yi akamutôyela ene, Ukiasaka yi kintu kimokimwe ; yaka ya odisi bintu bioso bidi yinebe, paka lolo bakombi, yi unakala yi bodidi munda mwa diulu ; yi lwaka, lwa ngulandudili meme. 22Mo yei akapinda ku mpala anci bwalo bwa diyi dedi, akancuka yi buxitu, bwalo bwakadiyi muna bima bingi.

23Yisu lolo akakyabuka, yi akatôyela beyi banci ene, Kai kukola, bobo badi yi madidi kubwela mu bufumu bwa Ncembi. 24Yi beyi bakakamina meyi anci. Mo Yisu akabakulumuna kabidi ene, Bana, kai kukola, bobo bamakwetabuxila madidi kubwela mu bufumu bwa Ncembi. 25Xamo kubwela mu diso dia ndongo kudi kulebela, mo mwodidi kubwela mu bufumu bwa Ncembi kudi kukola. 26Yi bakakama kukama kungi, yi bakatôya ene, Ape ñani ubili kupandixibwa ? 27Mo Yisu akabatebela, yi akatôya ene, Ku bwalo bwa bantu, nako kwamapila, kate ku bwalo bwa Ncembi, kumoni ; bwalo bwamalubukibwa bintu bioso kwencebwa kudi Ncembi. 28Yi Pita akabanga kumwambila ene, Mona, coco twamaxiya bintu bioso yi twamakulandudila. 29Yisu akatôya ene, Nkwatôyela sôsôlwo ene, Ewalo bwa muntu mwoso amaxiya ncibo, ndo bakunyi, ndo bangasana, ndo tete, ndo mama, ndo bana, ndo mbata, ku mucwe ămene yi ku mucwe ă losangu lunengela ; 30muntu a noku kanakodya kwangata nkama nkama nkyekyu ku kikondo kieki ; ncibo, yi bakunyi, yi bangasana, yi bamama, yi bana, bi mbata, yi kukulomonebwa ndongo ; yi ku mwociya yiwa ulolwa, môyo ă kô kô. 31Mo bantu bangi badi ku buxi banakala ku sula ; yi badi ku sula banakala ku buxi.

32Yi bakadi mu ncila a kuya ku Yeusaleme ; yi Yisu akadi mu kuya ku buxi bwabo ; yi bakakama kama yi bakacina biakalandabo. Yi akangata disangi yi babidi kabidi, yi akabanga kubatôyela dia bipoma bixemuponena ; 33ene, Numoni, tutanaya ku Yelusaleme, yi Mwana a Muntu unalongolebwa kudi makanda manene yi kudi bafundi ba mikanda ; yi banamubela lopelo lwa kufwa, yi banamulongola kudi mabila ; 34banamukyeca lolo, banamukuma bintu, banamwela mati, yi banamuxipa ; yi kunyuma kwa matuku asatu kunabikayi kabidi.

35Yi Yakobo yi Yoano, bana ba Sebede, bakalwa kudiyi ene, Mweyexi, twakyeba uxetwencela kintu kioso kitunakulomba. 36Yei akabambila ene, Binwananga nukixili bidibeci ? 37Yi bakamwambila ene, Utupi noku, tuxikami, umoumwe ku kidyo kiebe yi umoumwe ku kimoso kiebe, ku dikai diebe. 38Mo Yisu akabatôyela ene, Kanusolubukwa binwalomba. Nonu nwamaponyañana yi kunwa mpamba unonwa meme ? Ndo kunumeyebwa yi kunumeyebwa kungwanumeyebwa ? 39Yi bakamwambila ene, Twamaponyañana. Yisu akabambila ene, Mpamba unonwa meme, nonu nunamunwa ; yi kunumeyebwa kungwanumeyebwa meme, nonu nunanumeyebwa yinaku ; 40mo kuxikama ku kidyo kiamene ndo ku kimoso kiamene kakuna bwalo bwamene kupa, kutena kudibo bamalungikidibwaku. 41Yi pakakwombwa beyi disangi, bakabanga kunyungula ku micima bwalo bwa Yakobo yi Yoano. 42Mo Yisu akababikila kudiyi, yi akabambila ene, Nwalubukwa bobo balelekyela yi kubumba mabila badi yi bufumu kulu kwabo ; yi bantu babo banene babadika bumanya. 43Mo kakusoakala nako kunudi. Kate muntu mwoso akyeba kwakala munene kunudi unakala musadi enu ; 44yi muntu mwoso akyeba kwakalaku buxi bwenu unakala mupika a bantu boso. 45Bwalo butatuli isanga Mwana a Muntu kulwa sadidibwa kate kusala, kupela bantu bangi môyo ănci, mpiku ya kubapikula.

46Yi bakalwa ku Yeliko ; yi pakadi utanabatuka ku Yeliko, yi beyi banci yi kimbukuma kinene, Batimayo, mwana a Timayo, mulombanani akadi mufofo, akadi mu kixikama ku mwanca ă ncila. 47Yi pakakwombwayi ene, Kudi Yisu a Nasalete, akabanga kwamena ene, Yisu, Mwana a Dafidi, ungwombwelipo mwengo. 48Yi bantu bangi bakamukama makamu, akali polo. Kaninga yei akadika kwamena kungi kungi, ene, Mwana a Dafidi, ungwombwelipo mwengo. 49Yi Yisu akakwemana yi akatôya ene, Numubikili. Yi bakabikila mufofo ene, Kolesa mucima, emana, ukwabikila. 50Yei akakwecikisa mucwala ănci, akabika mangwoso, yi akalwa kudi Yisu. 51Yi Yisu akamupingasa ene, Kiñani kiakyeba nkukixili ? Yi mufofo ene, Laboni, ngwangati meso amene. 52Yisu akamutôyela ene, Yaka, kwetabusa kwebe kwamakupandisa. Yi akangata meso anci mangwoso, yi akamulandudila mu ncila.

Currently Selected:

MAKU 10: Luna_NT

Highlight

Copy