MAKU 9

1YI akabatôyela ene, Nwatôyela sôsôlwo ene, Bwalo bwa banga badiko bamakwemana kunu, kabanakikisa lufu pô binakala bamamona bufumu bwa Ncembi bwamalwa yi ngulu.

2Yi kunyuma kwa matuku asambomo Yisu akangata yinanci Pita yi Yakobo yi Yoano, yi akabacwala Kulu kwa lupongo lulelule mikyeabo batupu. Yi akatulolebwa mumbidi ku meso abo ; 3bilamba bienci biakapiluka susu obo, bitasolubukwa muxingi mwoso a lupemba kubisusula nako. 4Yi Eliya akamoneka kudibo yi Mosese, yi bakadi mu kwambilañana yi Yisu. 5Yi Pita akapingasa Yisu ene, Labi, kudi kunengela coco kwakala kunu ; tukisi bitanda bisatu, kimo kiebe kimo kia Mosese, kimo lolo kia Eliya. 6Bwalo butalubukwayi mwa kutôya, bwalo bwakakwombwabo bowa bungi. 7Yi dibaxi diakalwa babukila, yi diyi diakalwa munda mwa dibaxi ene, You udi Mwanami munangibwi ; numwombweli yei. 8Yi pakadi bamakwela meso mangwoso, bakadi kabasomona muntu mwoso nyô, utena Yisu mutupu yinabo.

9Biakapwekabo ku lupongo, akabalanga kabambidi muntu mwoso bintu biakamonabo, kutena Mwana a Muntu uxeakala amakwombuluka kudi bafu. 10Yi bakabumba diyi dedi, badi mu kwapangusañana bwalo bwa kwombuluka kudi bafu. 11Yi bakamwapangusa ene, Kukai batôya kudi bafundi ba mikanda ene, Eliya uxelwa buxi ? 12Yi akabapingasa ene, Eliya ulolwa buxi sôsôlwo, unapingasa bintu bioso loko. Yi kwamafundibwa dia Mwana a Muntu beci ene, uxetata kungi, yi uxetamunibwa ? 13Kaninga nwatôyela ene, Eliya amalwa, yi bamamwencela mwoso mwakanangabo, bea biamafundibwa ku bwalo bwanci.

14Yi pakalwabo kudi beyi banga bakamona kimbukuma kinene kiamabadinga, yi bafundi ba mikanda badi mu kwelesa yinabo mbata. 15Yi bungi bwa kimbukuma pakamumonabo bakakama kama mangwoso, yi bakaya kudiyi mbilu yi bakamwela môyo. 16Yi akabapangusa ene, Nwelesa yinabo mbata a kai ? 17Yi muntu umoumwe a mu kimbukuma akapingasa ene, Mweyexi, napucwala mwanami kudi, udi yi kidimu kia kimeme ; 18yi kiamamuntuntula paxi kwoso kwamamukwatakio ; amancula lolo mpulolu yi amabambakanya meno anci, yi ondonda dionda ditupu. Yi nakakwambila yi beyi bebe bakitenyeki, yi bakadi kababiyi. 19Kaninga yei akabapingasa ene, Mwociya utena kwetabusa ; nakwakala yinenu pôi kikondo kai ? Nakwekyela yinenu kiekyelo pôi kikondo kai ? Numucwali kundi. 20Yi bakamucwala kudiyi. Yi pakamumonayi, kidimu kiakamunyenga mangwoso ; yi akapona paxi akadifunda funda, udi mu kuncula mpulolu ku musuku. 21Yi akakwapangusa tetenci ene, Kikondo kidi beci kiapwakala nako yinanci ? Yei ene, Pôi bwabuki bwanci ; 22yi kiamamwela mela mangi yi mu mudilu yi mu mai ndo kumuxipa ; kate Owe ndo ubili kwenca kintu kioso, utwombwelipo mwengo, utusadisi. 23Yi Yisu akamutôyela ene, Ndo ubili! Bintu bioso bibili kwencebwa kudi you aetabusa. 24Yi tete a mwana you akakwamena mangwoso ene, Namakwetabusa ; ungusadisi bwalo bwa mwoxituxitu ămene. 25Mo pakamona Yisu kimbukuma kitanasangila mbilu, akakama kidimu kia mbindu ene, Kidimu kia kimeme yi kia bicu, meme nkwatôyela ene, Batuka munda mwanci, kubwedi munda mwanci kabidi nyô. 26Yi pakadi kiamakwamena diyi yi kiamamunyenga kungi, kiakabatuka ; yi mwana akalwa bea luna muntu mufu, biakatôya bantu bangi ene, Afufwa. 27Mo Yisu akamukwata ku kianca, akamwombulula, yi akakwemana. 28Yi pakadi amabwela mu ncibo, beyi banci bakamwapangusa ku busoko ene, Kukai coco twakadi katubiyi kukitenyeka ? 29Yei akabatôyela ene, Kiekio, butonga bwakio, kakibiyi kubatuka kutena ku kulomba.

30Yi bakancuka koku yi bakakwenda mu Ngalili ; yi akadi kasonanga muntu mwoso uxelubukwa ; 31bwalo bwakakweyesayi beyi banci yi akabambila ene Mwana a Muntu unalongolebwa ku makaci a bantu, yi banamuxipa ; yi panakala amaxipibwa, kunyuma kwa matuku asatu kunabikayi kabidi. 32Mo bobo bakadi kabasolubukwa diyi dedi, yi bakacina kumwapangusa.

33Bakalwa lolo ku Kapenaumu, yi pakadiyi mu ncibo akabapangusa ene, Nwamakwelesa kinani mbata mu ncila ? 34Yi bakapudikila, bwalo bwakakwelesañanabo mbata mu ncila, dia ñani adika munene. 35Yi akaxikama, akabikila disangi yi babidi : akabatôyela ene, Ndo muntu ananga kwakala ku buxi, unakala kunyuma kwa bantu boso, yi musadi a bantu boso. 36Yi akangata mwana mubende, yi akamuteka pakacikaci pabo ; yi pakadi amamwombulula mu biboko bienci akabatôyela ene, 37Muntu mwoso unangata mwana umoumwe a noku ku dina diamene, ungwangata meme ; yi muntu mwoso ungwangata kasongwangata meme kate you akangutuma.

38Yi Yoano akamukulumuna ene, Mweyexi, twakamona muntu udi mu kutenyeka bidimu bibi ku dina diebe, yi twakamukanda bwalo butasotulandudilayi. 39Mo Yisu ene, Kanumukandi ; bwalo butasoakala muntu umoumwe unakwenca dikisa dia ngulu ku dina diameme, yi unalubukwa mangwoso kungutangola. 40You utasotanda yinecu udi muna bwalo bwecu. 41Muntu mwoso unanupa mpamba a mai a kunwa ku dina diamene, bwalo bunutani bena Kalistu, nwatôyela sôsôlwo ene, kanakodya kwangata sayi anci pô. 42Yi muntu mwoso unaponesa mwana umoumwe a babaki baba babende bamangwetabuxila, kwamadika loko ku bwalo bwanci ndo dibwe dinene dixesukibwa ku xingu anci yi uxekwelebwa mu mai. 43-44Ndo kianca kiebe kiamakuponesa, ukikali ; kudi loko owe kubwela mu môyo kikomo, kumoni kwakala yi bianca bibidi kuya ku dilundu, mu mudilu utasoncimina nyô. 45-46Yi ndo dikasa diebe diamakuponesa, udikali ; kudi loko owe kubwela mu môyo kitumbi, kumoni kwakala yi makasa ebe abidi, kwelebwa mu dilundu. 47Yi ndo diso diebe diamakuponesa, udipokoli ; kudi loko owe kubwela mu bufumu bwa Ncembi kipoko, kumoni kwakala yi meso abidi, kwelebwa mu dilundu dia mudilu. 48kutasofwa mwongenyi ăbo, kutasoncimibwa mudilu. 49Bwalo bunacudibwa muntu mwoso yi mudilu, yi dilongi dioso diosa dinacudibwa yi mukyeli. 50Mukyeli udi loko, mo ndo mukyeli ămasaluka nunaucula yi kai ? Nwakali yi mukyeli munda mwenu mikyenu, yi nwakali polo muntu yi muna kwanci.

Currently Selected:

MAKU 9: Luna_NT

Highlight

Copy