MATEYO 26

1YI pakadi Yisu amamana mambi moso aa, akakwambila beyi banci ene, 2Nwalubukwa ene, kunyuma kwa matuku abidi kunakala Kidikixilu, yi Mwana a Muntu unakwengebwa ndo kukopekyebwa ku nkulusu.

3Ku kikondo kieki kwakakokama makanda manene yi babakulu ba bantu ku lumbu lwa bokanda bunene bwakabikilabo ene, Kayafa, 4yi bakakwelañana nkanyi bixekwatabo Yisu yi bwanya ndo kumuxipa. 5Mo bakatôya ene, Kumoni ku kitula ximbi baxeteka muyengi kudi bantu.

6Kaninga pakadi Yisu utani ku Betani ku ncibo a Ximono muna sudi, 7pakalwa mwamukaxi kudiyi, udi yi mulondo ă alabasta, ă manyi a ncobo a diso dikola, yi akapangulula kulu kwa mucwe ănci pakaxikamayi ku mesa. 8Mo pakamona beyi, bakanyungula ene, Kukai kwecikisa kwa noku ? 9Bwalo buxekwodixibwao ku diso, ndo kupebwa bakombi. 10Mo Yisu akalubukwa akabambila ene, Kukai nwamanyingisa mwamukaxi, bwalo bwamangukixilayi dikisa dinengela. 11Bwalo bunwakala yi bakombi yinenu matuku moso, kaninga kanusoakala yinami mikyemi matuku moso. 12Papupangululayi manyi aa ku mumbidi ămene, amakwenca nako bwalo bwa kincikilu kiamene. 13Nwatôyela sôsôlwo ene, Kwoso kunakwambidibwa losangu lolu lunengela ku bungi bwa loboko, kunatôyebwa kabidi mwapwenca mwamukaxi you, kimonenu ku bwalo bwanci.

14Yi muntu lolo a disangi yi babidi, akabikidibwa ene, Yudaxi a Ixikalioto, akaya kudi makanda manene 15yi akatôya ene, Nonu nwamananga kumpa kai, yi meme nakunulongolayi ? Yi bakamwelekyexela mpalata masangi asatu. 16Yi pôi kikondo kieki pakapalalayi kipoma kinengela kia kumulongola.

17Ku dituku lolo dia buxi dia mampa atena kiolubixilu, kwakalwa beyi kudi Yisu ene, Kupai kwakyeba tukulungikili kwa kudya Kidikixilu ? 18Yi akatôya ene, Nuyi munda mwa bula kudi you noku, numwambili ene, Mweyexi ene, Kikondo kiamene kitani pepe ; ngwanama Kidikixilu ku kidi kiebe yi beyi bamene. 19Yi beyi bakakisa mwakabatôyela Yisu, yi bakalungika Kidikixilu. 20Yi pakakwela butuku, yei akaxikama ku mesa yi disangi yi babidi. 21Yi pakadyabo, yei akatôya ene, Nwatôyela sôsôlwo ene, muntu umoumwe udi yinenu unangwenga. 22Yi bakadi yi buxitu bungi, yi bakabanga kumwapangusa, muntu mikyenci muntu mikyenci, ene, Meme, Fumu ? 23Kaninga yei akapingasa ene, You asopa kianca kienci yinami mu dilonga, kayou unangwenga. 24Mwana a Muntu uyeya sôsôlwo byekyene biakamufundidibwa ; kaninga mpeya kudi muntu you unakwengebwa Mwana a Muntu kudiyi ; kunengela ndo muntu you kaxelelebwa pô. 25Yi Yudaxi, akamwenga, akakulumuna ene, Meme, Labi ? Akamwambila ene, Waputôya.

26Pakadi batanadya, Yisu akangata dimpa, akalombela, akadinyowa ; akapa beyi banci, yi akatôya ene, Nwangati, nudi ; dedi ndo mumbidi ămene. 27Yi akangata mpamba, akaxinga, yi akabapa ene, Nunwi bungi bwenu. 28Bwalo budiyi maxi amene a disambi dipyadipya, mancudibu ku micwe ya bantu bangi ku kulekyelebwa kwa mabi. 29Kaninga meme nwambila ene, kinanwa mamoma aa a finyo kabidi pô, pôi nkyekyu pôi dituku dedi dinanwa yinenu mapyamapya ku bufumu bwa Tetemi.

30Yi pakadi bamakwembikisa musambu bakabatuka kuya ku lupongo lwa Olife. 31Yisu lolo akabambila ene, Nonu nu-a-bwoso nunaponexebwa ku bwalo bwamene butuku bobu. Bwalo bwamafundibwa ene, Nakukuma kalama, yi mikwakwa ya kibumbu yinacakanixibwa ; 32mo panakala namabixibwa, nakunulwangwala kuya ku Ngalili. 33Yi Pita akamupingasa ene, Isa ndo bantu boso banaponexebwa ku bwalo bwebe, meme kinaponexebwa pô. 34Yisu akamwambila ene, Nkwatôyela sôsôlwo, ene, ku butuku bobu, buxi butakwela ntala diyi, kunangunyañana owe manyañana asatu. 35Pita akamwambila, ene, Isanga nxefwa yinebe kinakunyañana pô. Mo nako kwakatôya bungi bwa beyi kabidi.

36Yi Yisu akalwa yinabo ku kidi kiabikidibwa ene, Ngetesemane, yi akakwambila beyi ene, Nuxikami kunu binakuya lomba yikwa. 37Yi akacwala yinanci Pita yi bana ba Sebede babidi, yi akabanga kwombwa kusama ku mucima yi buxitu bungi. 38Yi akabambila lolo ene, Mucima ămene udi yi kusama kungi isanga kwa lufu ; nusali kunu, nutebelanani yinami. 39Yi akaya ku buxi kubende, yi akapona ku mpala anci, akalomba ene, Tetemi, aka ubili kukisa noku, ungudikixili mpamba you ; kaninga kumoni mwamene munapunanga, katemwebe mwapunanga. 40Yi akalwa kudi beyi, yi akabasañana mu tulu, yi akakwambila Pita ene, Nako, kanusoponyañana yi kutebela yinami ola umoumwe ? 41Nutebeli yi nulombi, binutaxebwela mu kielekyexelu ; kidimu kidi loko sôsôlwo, kaninga munyu udi kulebela. 42Yi akaya kabidi diamubidi, yi akalomba ene, Tetemi, aka you kasongudika kutena namamunwa, nyinga yebe yikixibwi. 43Yi akalwa basañana kabidi mu tulu, bwalo bwakadi meso abo maxitu. 44Yi akabaxiya, akaya lomba kabidi diamusatu, yi akatôya, kabidi meyi aku aa. 45Kunyuma akalwa kudi beyi yi akabambila ene, Nulali tulu nkyekyu, nwomowi kwomowa kwenu ; numoni ola amakokyela pepe, yi Mwana a Muntu amakwengebwa ku makaci a boni. 46Nwombuluki, cuyi ; mona you amangwenga amakokyela pepe.

47Yi pakadi ukiatôya, mona, Yudaxi a disangi yi babidi, akalwa yi kibumbu kinene yinanci yi miele yi mici, bamalwa kudi makanda mănene yi babakulu ba bantu. 48Yei lolo, akamwenga akabapa kilayixilu, ene, You unamunyita, kayou ; numukwati. 49Yi akalwa mangwoso kudi Yisu ene, Môyo, Labi ; yi akamunyita nyita. 50Kaninga Yisu akamwambila ene, Kimbila, ku bwalo kai owe wapulwa ? Yi bakalwa papo yi bakabaka Yisu makaci abo yi bakamubamba. 51Yi mona, muntu abo a bantu bakadi yi Yisu, akalonga kianca yi akasomona mwele ănci, akakuma musadi a bokanda bunene, akaxaka dicu dienci. 52Yisu akamwambila lolo ene, Pingasa mwele ěbe mu kidi kienci ; bwalo bunafwa ku mwele bantu boso bangata mwele. 53Owe wencenca ene, Kibiyi kwabila Tetemi nykekyu, unangutumina bangele bamadika nkone disangi yi ibidi ? 54Ape lolo mikanda ya Ncembi yixefikixibwa beci, yamatôya ene, kuxeakala noku ?

55Ku ola you kwakatôyela Yisu bibumbu bia bantu ene, Nonu nwa malwa bea kulwa tanda yi mwefi yi miele yi mici ndo kungukwata ? Nakaxikama mu tempelo ku dituku ku dituku ndi mu kweyesa eyesa, yi nwakadi kanusongukwata. 56Kaninga bintu bioso bebi biakalwa bixefikixibwa mikanda ya badimuxi. Yi beyi boso bakamukadeya papo yi bakacina.

57Bobo pako bakabamba Yisu bakamucwala kudi Kayafa bokanda bunene, kwakakokama bafundi ba mikanda yi babakulu. 58Yi Pita akamulabela kulekule, pôi ku ncibo a bokanda bunene, yi akabwela momu, akaxikama yi tupalai ndo kumona ku sula. 59Yi makanda manene yi babakulu yi kikokye bungi bwakio bakapalala ntôbô ya kudimbidila Yisu bixemuxipabo. 60Yi kabasañana noku, isanga badimbididi bangi bakalwa ku mpala. 61Kaninga kunyuma kwakalwa badimbididi babidi bakatôya ene, You ene, Meme mbili kuxipa tempelo a Ncembi, yi kumwabaka kabidi ku matuku asatu.

62Yi bokanda bunene bwakakwemana bwakamwambila ene, Kusopingasa diyi ? Kinani kieki kikwatôbôlelabo ? 63Mo Yisu akapudikila. Yi bokanda bunene bwakamukulumuna ene, Nkwapangukila ku dina dia Ncembi a môyo ene, utwambili ndo owe udi Kalistu, Mwana a Ncembi ? 64Yisu akamwambila ene, Waputôya. Kaninga nwatôyela ene, Kunyuma nunamona Mwana a Muntu amaxikama ku kidyo kia bumanya, ulolwa pa mabaxi a diulu. 65Bokanda bunene bwakasambula lolo bilamba bienci ene, Amatuka Ncembi, tupalali bamo batôbôdi kukai ? numoni, nkyekyu nwamakwombwa lupolo. 66Nonu nwencenca beci ? Yi bakapingasa ene, Udi yi lopelo lwa kufwa. 67Yi bakakwela mati ku mpala anci yi bakamukuma bimbondu, yi banga bakamukuma mapi 68ene, Utudimusi owe Kalistu, ñani you amakukuma ?

69Kaninga Pita akaxikama kunci mu lumbu, yi muxika akalwa kudiyi ene, Owe kabidi wakadi yi Yisu a Ngalili. 70Mo yei akanyañana ku mpala ya bantu boso ene, Kisolubukwa mwatôya. 71Yi pakayayi ku kibwelelu, munga akamumona yi akakwambila bantu koku ene, You muntu kabidi akadi yi Yisu a Nasalete. 72Yi akanyañana kabidi yi kiteyi, ene, Kisolubukwa muntu you. 73Yi kunyuma kwa kakondo kabende, bobo bakakwemana koku bakalwa tôyela Pita ene, Owe ndo muna kwabo sôsôlwo, bwalo bwamakwebesa lubendo lwebe noku. 74Yi akabanga kufinga yi kutenda ene, Kibiyi you muntu. Yi ntala akakwela diyi mangwoso. 75Yi Pita akakwela diyi lukanyi diakatôya Yisu ene, Buxi butakwela ntala diyi, owe unangunyañana manyañana asatu. Yi akabatuka kunci, yi akadila kungi.

Currently Selected:

MATEYO 26: Luna_NT

Highlight

Copy