Marko 13

Yesu ikuyobela ngani isya kubulutuka kwa Nyumba ya Kyala

(Mat 24.1-2; Luk 21.5-6)

1Lelo bo Yesu ikusoka Nnyumba ya Kyala, yumo mbafundigwa bake alinkumbula alinkuti, “Mmanyisi, uswige amabwe aga ninyumba isi!”

2Umwene Yesu alinkwamula alinkuti, “Usibwene inyumba ingulumba sisisi? Nalimo ilibwe litisakulekigwa pamwanya pibwe ilinine ilisita kubulutuligwa.”

Ubutolwe ubu bukwisaga

(Mat 10.17-22; 24.3-28; Luk 21.7-24)

3Lelo bo Yesu atugesye paKyamba kya Misyunguti ukuningana niNyumba ya Kyala, ba Peteri, Yakobu, Yohani na Andrea, bo biyekile, balinkundalusya balinkuti, 4“Ulitubulaga, kali sisisi syo sisakuyako ndili, nikimanyilo kya kwisakumanyilamo ukuti syosa sisisi sisegelile ukumalika kyo kiliku.” 5Umwene Yesu alinkwanda ukubabula alinkuti, “Mwandege, nayumo angisakubasofyaga. 6Bingi bisakwisilaga mungamu yangu, bisakutigi, ‘Une ne yuyo,’ nukubasofya ba bingi. 7Linga mukupilika isya bwite nutupango twa bwite, mungisakunyomokaga; syo fikuti sisege sisisi, loli bukaya bo bumalikisyo. 8Namanga ikikolo kisakukisambukilaga ikikolo ikinene, bope nubunyafyale bwisakubusambukilaga ubunyafyale ubunine; twisakuyangako nutusenyenda utu na utu, ninjala yope yisakugwaga, bububu bo bwandilo bwa kukubilwa.

9 # Mat 10.17-20; Luk 12.11-12 “Loli mwandege mwiketege. Buno bisakubabikaga pabulongi, mwisakukomigwaga nnyumba syakwiputilamo, kangi mwisakutwaligwaga nkyeni mbalindililakisu na mbanyafyale panongwa yangu, ukuti luyege lo lusisimikisyo kumyabo. 10Loli fikuti Inongwa Inunu silumbiligwege tasi mfikolo fyosa. 11Linga bikubatwala nukubabika mbulongi, mungisakwiyalilaga ngani isi mwisakwakuyobaga, loli syosa isi mwisakupegigwa nkabalilo kalakala syo mukayobege; namanga mukaya yo umwe mwe mukwakuyobaga, loli yo Mbepo Mwikemo. 12Buno ugwamyabo gwa mundu isakumohelaga ugwamyabo ukuti afwege, ugwise isakumohelaga umwanake ukuti afwege, bope nabana bisakubasambukilaga abapapi nukubagoga. 13#Mat 10.22Mwisakubengigwaga nabandu bosa panongwa ya ngamu yangu; loli yuyo linga ikumilisya ukufika kubumalikisyo, yo isakupokigwaga.

Ubutolwe ubusisya imbelakinyanyasi

(Mat 24.15-28; Luk 21.20-24)

14 # Dan 9.27; 11.31; 12.11 “Loli linga mukusibona imbelakinyanyasi simile apa sikabagila ukwima, (uyu linga ikubala yo asyaganiege) po aba bali nkisu kya Yudai bakabopelege mfyamba; 15#Luk 17.31uyu linga ali pamwanya panyumba yo angisakusulukaga, kangi angisakwingilaga nkwega fimo nnyumba yake; 16na uyu ali mungunda angisakugomokelaga kunyumba kukwega umwenda gwake. 17Sya butolwe kubakikulu abafituba naba bikongesya abana pisiku lilalila! 18Loli amwiputege ukuti singisa kubonekaga mmapepo. 19#Dan 12.1; Buset 7.14Namanga mmasiku gago bwisakuyako ubutolwe bo ubu bukabonekamo siku, ukufuma mu mbwandilo bwa kupeligwa kwa kisu ukwisakufika kulilino kuno, kangi butisakuyangako siku. 20Linga uNtwa akagatumulaniaga amasiku gala, angali na yumo umundu ugwa kupona; loli panongwa ya basaligwa aba abasalile, agatumulenie amasiku gago. 21Pakabalilo kako linga yumo ikubabula ikuti, ‘Keta Kristi uyu kuno,’ pamo ‘yula kula,’ mungisakwitikaga. 22Buno bisakusumukaga bakristi ba butungulu, nabasololi ba butungulu, bisakupelaga ifika nifiswigu, ukuti linga sibagile babasofyege nabasaligwa. 23Loli umwe mwandege; mbabulile ngani syosa.

Ukwisa kwa Nnyamundu

(Mat 24.29-31; Luk 21.25-28)

24 # Yes 13.10; Eze 32.7; Yoeli 2.10,31; 3.15; Buset 6.12 “Loli mmasiku gago bo bukindile ubutolwe bula, ilisuba lisakwinaga, numwesi gutisakubala; 25#Yes 34.4; Yoeli 2.10; Buset 6.13syope nindondwa sisakugwaga ukufuma kumwanya, gope namaka aga galikumwanya gisakuyunganikaga. 26#Dan 7.13; Buset 1.7Panyuma lelo, po bisakumbonaga Nnyamundu bo ikwisa mmabingu namaka amingi nubukulumba. 27Umwene isakubatumaga abandumi, nukubabungania abasaligwa bake ukufuma kumbali syosa ina, ukufuma kubumalikisyo bwa kisu ukwakufika kubumalikisyo bwa kumwanya.

Isya kumanyililamo munkuyu

(Mat 24.32-35; Luk 21.29-33)

28“Amwegele amahala kunkuyu; apa linga ulusamba lwake lutulwile amani gasefwike, po mukumanya ukuti umpingo gusegelile. 29Bunobuno nanumwe apa linga mukusibona sisisi ukwisa, mwisemumanyege ukuti ali pipi, ali pakifigo. 30Naloli nikubabula une nikuti, ingulilo ya lilino iyi yitisakuyongaga yosa, bo tasi syosa sisisi sikaboneka. 31Ikya kumwanya nikya pasi fyo fisakuyongaga, loli amasyu gangu go gatisakuyongaga.

Nayumo akalimanya isiku pamo akabalilo

(Mat 24.36-44)

32 # Mat 24.36 “Loli isya isiku lilalila, nakabalilo kalakala, nayumo umundu akasimanya, bope nabandumi ba kumwanya, nalinga yo yu Mwana, loli mwene yu Gwise. 33Mwandege muye maso! Buno mukakamanya akabalilo ukuti kisakuyaga ndili. 34#Luk 12.36-38Sifwene itolo bo umundu uyu ikwenda injila; ikuyileka inyumba yake, ikubapa ababombi bake amaka, uyu akabombo kake uyu akabombo kake, nukundagila undindililakifigo ukuya maso. 35Muyege maso lelo; papo mukakamanya akabalilo aka umwenenyumba ikwisilaga, kali namayolo, pamo pakilo pakati, pamo bo ingongobe sikukolela, pamo nulubunju; 36ukuti angisakubambulania itolo bo ikwisa, nukubaga muli ntulo. 37Isi nikubabula umwe, syo nikubabula bosa; Amuyege maso.”

Currently Selected:

Marko 13: NNBII

Highlight

Copy