Marko 12

Ikifwanikisyo kya balimi ba mungunda gwa mafilu

(Mat 21.33-46; Luk 20.9-19)

1 # Yes 5.1-2 Popapo Yesu alinkwanda ukuyoba nabo mfifwanikisyo alinkubabula alinkuti, “Umundu yumo alimile ungunda gwa mafilu, alinkusyungusya ulupaso, alinkukumba ikina kya kukamilamo amafilu, alinkuyenga ingasya, alinkubasima abalimi aba kunhomba, alinkubuka kukisu ikingi.

2“Lelo bo akabalilo kafikile, alinkuntuma umbombi wake kubalimi bala, ukuti akamwegeleko iseke simo sya mungunda gwa mafilu. 3Balinkunkola, balinkunkoma nukunkaga kisita kumpapo nafimo. 4Kangi alinkwandisya ukubatumila umbombi uyungi, umwene yo balinkuntika untu nukumwangalila. 5Kangi alinkuntuma uyungi, yobalinkungoga; nabangi ba bingi, bamo balinkubakoma, abangi balinkubagoga. 6Asyele nagwe yumoywene itolo ugwa kuntuma, yo yu mwanake undumyana unkundwe kumyake; pabumalikisyo yo alinkubatumila alinkuti, ‘Umwanangu yo bisakumwimikaga.’ 7Abene loli abalimi bala balinkuyobana balinkuti, ‘Uyu yo mwenekilingo, isaga tungoge, po ikilingo kikuyaga kyitu.’ 8Popapo balinkunkola nukungoga, balinkunsosya mungunda gwa mafilu, balinkwakuntaga panja. 9Kali isakubombaga fiki umwenengunda yula? Isakwisaga nukubagoga abalimi bababa, ende nukubapa abangi ungunda gwa mafilu. 10#Salimo 118.22-23Mukabalamo siku mmasimbo apa pikuti,

‘Ilibwe ili balisyokile abayengi,

lyo lipelile ukuya ibwe ikulumba lya panguto;

11iyi yo mbombo ya Ntwa,

kangi ya kuswigisya kumaso gitu?’ ”

12Popapo abene balinkulonda ukunkola, loli balinkukitila ikilundilo kya bandu, papo basyagenie ukuti nkifwanikisyo kikiki abayobaga babo. Balinkundeka balinkubuka.

Isya kusonga isongo

(Mat 22.15-22; Luk 20.20-26)

13Popapo balinkuntumila bamo abaFarisai pamopene naba banjilaga Herodi, ukuti bankolele mwisyu lyake lya nkanwa. 14Bo bisile, balinkuyoba nagwe balinkuti, “Mmanyisi, tumenye ukuti uli gwa naloli, utikumpasya umundu, namanga utikubasalila abandu mbundu bwabo, loli kumanyikisya injila ya Kyala mbwanaloli. Bule, kali kubagile ukusonga isongo kwa Kaisari pamo mma? 15Tusongege pamo tungasongaga?” Lelo bo Yesu abubwene ubusyobi bwabo alinkubabula alinkuti, “Mukungela fiki? Amundwalile ulutalama lumo ngete.” 16Popapo balinkutwala ulutalama lumo. Umwene alinkubalalusya alinkuti, “Kyani ikifwani iki, nubusimbe ubu bwani?” Balinkuti, “Fya Kaisari.” 17Popapo Yesu alinkubabula alinkuti, “Ifya Kaisari fyo mumpege Kaisari, ifya Kyala mumpege Kyala.” Popapo balinkuswiganika itolo.

Isya kusyuka mbafwe

(Mat 22.23-33; Luk 20.27-40)

18 # Imbo 23.8 Popapo balinkwisa kumyake abaSadukai, aba bikuti kukayako ukusyuka mbafwe, balinkundalusya balinkuti, 19#Kukumbu 25.5“Mmanyisi, Mose atusimbile atile, linga ugwamyabo gwa mundu ikufwa, ikundeka unkasi kisita mwana, fikuti ugwamyabo amwingilengepo, ukuti ampapilege abana ugwamyabo. 20Baliko abanyamundu bahano na babili. Untasi alinkwega unkikulu, alinkulwa bo nsalabala itolo; 21alinkwenda nukumwingilapo ugwa bubili; yope alinkulwa unsalabala itolo; nugwa butatu bububo; 22bosa bahano na babili balinkufwa abasalabala itolo. 23Kunyuma kuli bosa yope nunkikulu alinkufwa. Bo bikusyuka, kali isakuyaga nkasi gwa aliku? Buno bosa bahano na babili aba balimwegile ukuya nkasi gwabo.” 24Umwene Yesu alinkubamula alinkuti, “Mukaya mo mumo mukusoba, apa mukamanya isi sisimbigwe mmasimbo, gope namaka ga Kyala mukagamanya? 25Buno bo bikusyuka mbafwe, batikwega kangi batikwegigwa, loli bikuya boabandumi ba kumwanya. 26#Kuso 3.6Loli isya kusyuka mbafwe, ngimba mukabalamo mmasimbo ga Mose, pakisyanju lula Kyala ayobege atigi, ‘Yo une ne Kyala gwa Abrahamu, ne Kyala gwa Isaka, kangi ne Kyala gwa Yakobu?’ 27Akaya yo Kyala gwa bafwe, loli gwa bumi. Mukusoba fiyo.”

Ululagilo ulukulumba

(Mat 22.34-40; Luk 10.25-28)

28 # Luk 10.25-28 Popapo ummanyandagilo yumo alinkwisa, uyu apilikisyaga bo bikukanikana. Bo amenye ukuti Yesu abamwile kanunu, alinkundalusya Yesu alinkuti, “Lo lukomelesyo luliku ulukinde kunine syosa?” 29#Kukumbu 6.4-5Umwene Yesu alinkwamula alinkuti, “Ulukinde kunine syosa lo ulu lukuti, ‘Pilika gwe Israeli, uNtwa Kyala gwitu yo Ntwa yuyo mwene, 30unganege uNtwa Kyala gwako nindumbula yako yosa, numoyo gwako gosa, namaka gako gosa.’ 31#Levi 19.18Ulwa bubili lo ulu lukuti, ‘Unganege unnino bo apa gwiganile gwimwene.’ Lukayako ulukomelesyo ulungi ulukulumba ukusikinda sisisi.” 32#Kukumbu 4.35Popapo ummanyandagilo yula alinkumbula Yesu alinkuti, “Utalwisye Mmanyisi, uyobile isya naloli ukuti ali yumoywene, akayako uyungi loli yuyo mwene; 33#Hos 6.6kangi ukungana yuyo nindumbula yosa, nukwinogona kwako kosa, namaka gako gosa, nukungana unnino bo apa gwiganile gwimwene, ko kugakindile namakemo gosa amokye, namakemo gosa itolo.” 34Umwene Yesu bo ambwene ukwamula isya mahala, alinkuyoba nagwe alinkuti, “Ukaya patali nubutwa bwa Kyala.” Akalipo yumo unkifu ugwa kundafusya kangi.

Ukulalusya isya Kristi

(Mat 22.41-46; Luk 20.41-44)

35Umwene Yesu bo ikumanyisya Nnyumba ya Kyala, alinkuyoba alinkuti, “Bikuyoba bulebule abamanyandagilo apa bikuti Kristi yo nnya Davidi? 36#Salimo 110.1Buno Davidi yuyo ayobile mwa Mbepo Mwikemo ukuti,

‘Untwa ayobile kuNtwa gwangu atile,

Itugasya kukiboko kyangu ikililo,

ukafikege apa nikubabikaga abalugu bako kusi kumalundi gako.’

37Umwene Davidi ikunjoba ukuya yo Ntwa, po ati ayege mwanake bulebule?”

Isya kusoka pa bamanyandagilo

(Mat 23.1-36; Luk 11.37-54; 20.45-47)

Ikilundilo kya bandu ikikulumba kilinkumpilika nulusekelo. 38Lelo bo ikubamanyisya alinkuyoba ilya kuti, “Mwandege nabamanyandagilo, aba biganile ukufwala imiselekesye imitali bo bikusyungutila, nukuti abandu babaponiege musokoni, 39nukutugasya pafikota fya bukulumba nnyumba syakwiputilamo, nukutugasya pabuyo ubwimikigwa pakulya ifyakulya fya palusekelo; 40aba bikwiputa inyiputo indali isya kulabasya, bo kuno bikonanga inyumba sya bakikulu abafwilwe; bababa bisakwambililaga ulufundo ulukulumbapo.”

Akabupe ka nkikulu umfwilwe

(Luk 21.1-4)

41Popapo Yesu alinkutugasya ukuningana itolo nikya kusopelamo indalama, alinkukiketa ikilundilo kya bandu bo kikusopamo indalama. Abakabi ba bingi balinkusopamo si nyingi. 42Yope nunkikulu yumo umfwilwe, undondo, alinkwisa alinkusopamo utwatambala tubili utu tuli pa tambala yumo. 43Popapo Yesu alinkubabilikila abafundigwa bake alinkubabula alinkuti, “Naloli nikubabula une nikuti, unkikulu umfwilwe, undondo uyu, yo asopilemo ukubakinda bosa aba basopilemo, 44buno bosa aba basopilemo, begile ukufuma muli ifi fiyelile, loli umwene uyu mbulondo bwake, asopilemo fyosa ifi ali nafyo mbumi bwake.”

Currently Selected:

Marko 12: NNBII

Highlight

Copy