LUKA 21

Akabupe ka nkikulu umfwilwe

(Mar 12.41-44)

1Popapo Yesu alinkuketa, alinkubabona abakabi bikusopa ifyabupe fyabo nkya kusopelamo. 2Alinkumbona nunkikulu yumo undondo umfwilwe bo ikusopamo abatambala babili. 3Popapo alinkuyoba alinkuti, “Naloli nikubabula une nikuti, unkikulu umfwilwe undondo uyu, yo asopilemo ukubakinda bosa. 4Namanga bosa bababa basopilemo mfyabupe ukufuma muli ifi fiyelile; loli Umwene mbulondo bwake, asopilemo fyosa ifi ali nafyo.”

Yesu ikuyobela ngani isya kubulutuka kwa Nyumba ya Kyala

(Mat 24.1-2; Mar 13.1-2)

5Lelo abandu bamo, bo bikuyoba isya Nyumba ya Kyala, muno yanokesigwe namabwe amanunu nifyabupi ifi abandu bapaga kwa Kyala, Yesu alinkubabula alinkuti, 6“Fyosa ifi mukufiketa, gikwisaga amasiku apa litisakulekigwapo ilibwe limo pibwe ilinine ifisita kubulutuligwamo.”

Ubutolwe nukufwi nugwa

(Mat 24.3-14; Mar 13.3-13)

7Popapo balinkundalusya Yesu balinkuti, “Mmanyisi, kali sisisi sisakuyangako ndili? Ikyene ikimanyilo kya kwisakumanyilamo ukuti syosa sisisi sikuya pakwisa kyo kiliku?” 8Yesu alinkubabula alinkuti, “Mwandege, nayumo angabasyobaga. Namanga bingi bisakwisilaga mungamu yangu bisakutigi, ‘Yo yuyune,’ kangi bisakutigi, ‘Akabalilo kasegelile!’ Mungisakubakongaga. 9Linga mukupilika isya bwite nukutapukana, mungisakunyomokaga; buno sisisi syo fikuti sitalege tasi, loli ubumalikisyo bo butikwisaga nakalinga.” 10Popapo alinkwendelela ukubabula alinkuti, “Ikikolo kya bandu kisakukisambukilaga ikikolo ikinine, bope nubunyafyale bwisakubusambukilaga ubunyafyale ubunine. 11Twisakuyangako utusenyenda utukulumba mbuyo bu bwingi, ninjala, nimbungo imbela filalilali; sisakuyangako imbela lutende, nifika ifikulumba ukufuma kumwanya. 12Loli bo sikali syosa sisisi, bisakubakolaga nukubafwima, bisakubatwalaga nnyumba syakwiputilamo ukwakulongigwa, nukubabika nnyumba sya bannyololo; bisakubatwalaga kubanyafyale na kubalindililakisu panongwa ya ngamu yangu. 13Syo sisakuyaga sya lusisimikisyo kumyinu. 14#Luk 12.11-12Syo musibikege lelo mundumbula syinu, mungisakwinogonelaga ngani isya kwilongela; 15buno une nisakubapaga amasyu nkanwa namahala, aga bosa aba bikubafifya bisakutoligwaga ukukanikana nago, pamo ukugapinga. 16Bope na ba bapapi binu nabamyinu, nabakamu binu, nabamanyani binu bisakubabikaga mmaboko ga balugu; bamo muli umwe mwisakugogigwaga; 17kangi mwisakubengigwaga nabandu bosa panongwa ya ngamu yangu. 18Loli nalumo ulunywili lwa pamitu gyinu ulu lwisakonangikaga. 19Mbufindang'oma bwinu mo mwisakukabilaga ubumi bwinu.

Yesu ikuyoba isya kubulutuka kwa kaya ka Yerusalemu

(Mat 24.15-21; Mar 13.14-19)

20“Linga mwisilekwaga akaya ka Yerusalemu kasyungutiligwe nifilundilo fya bwite, po mwisemumanyege ukuti ukupalaganika kwake kusegelile. 21Po aba bali mu Yudai bakabopelege mfyamba, naba bali nkaya basokengemo, kangi naba bali mmigunda bangaya kwingilangamo; 22#Hos 9.7buno gisakuyaga go masiku ga lubukisyo gagaga, ukuti syosa isi sisimbigwe mo simalikilege. 23Sya butolwe kuli aba bali nififuba, na kuli aba bikongesya mmasiku gala! Namanga bwisakuyako ubutolwe bu bwingi nkisu, ningalalisi kukikolo kya bandu aba. 24Bamo bisakufwaga kubwite, abangi kangi bisakukoligwaga nukutwaligwa mfikolo fyosa; abapanja bisakukanyangaga akaya ka Yerusalemu, ukwisakufika papo akabalilo kabo kisakumalikilaga.

Ukwisa kwa Nnyamundu

(Mat 24.29-31; Mar 13.24-27)

25 # Yes 13.10; Eze 32.7; Yoeli 2.31; Buset 6.12-13 “Po fisakubonekaga ifika pisuba na pamwesi na pandondwa. Pakisu ifikolo fya bandu fisakuyaga nubukamandanigwa bo bikutila ukobela kwa nyanja nukuyunganika kwa mayiga. 26Abandu bisakusilikaga panongwa ya lutende, bo bikusigulila isi sikuya pakukisila ikisu kyosa, namanga amaka ga kumwanya gisakuyunganikaga. 27#Dan 7.13; Buset 1.7Panyuma lelo po bisakumbonaga Nnyamundu bo ikwisa mmabingu, namaka amakulumba nubusisya. 28Loli linga sikwanda ukuboneka sisisi, po mwise mwimege nukuketa kumwanya, namanga kokuti ukutabuligwa kwinu kusegelile.”

Isya kumanyililamo munkuyu

(Mat 24.32-35; Mar 13.28-31)

29Popapo Yesu alinkubabula ikifwanikisyo alinkuti, “Amuketege unkuyu nimipiki gyosa; 30bo mugibwene gitulwile amani, po mukumanya yuyumwe ukuti umpingo guli kifuki. 31Bunobuno lelo nanumwe, linga mukusibona sisisi po mwisemumanyege ukuti ubutwa bwa Kyala busegelile.

32“Naloli nikubabula une nikuti, ingulilo ya lilino iyi yitisakuyongaga yosa, ukufika papo syosa sisisi sikubonekelaga. 33Ikya kumwanya nikya pasi fyo fikuyongaga, loli amasyu gangu gatisakuyongamo siku.

34“Mwandege mungisakuyaga bakwikolania nisya nkisu nubugale, nukwiyaya nilya bumi ubu, ko kuti ilisiku lila lingisakubisilaga 35nukubambulania bo gu ntego; namanga isiku lila lisakubisilaga bosa aba bayengile pamwanya pakisu. 36Amuyege maso mwiputege bwila, ukuti mwisemubwage ubuponelo muli syosa isi sikuya pakwipela, nukwima nkyeni mwa Nnyamundu.” 37#Luk 19.47 Bwila Yesu alinkumanyisya Nnyumba ya Kyala, namayolo alinkwakugona nkyamba iki batigi kya Misyunguti. 38Nulubunju abandu bosa balinkutemelela ukubuka ku Nyumba ya Kyala kukumpilikisya.

Currently Selected:

LUKA 21: NNBII

Highlight

Copy