LUKA 22

Bikuyobana ukumbika Yesu mmaboko ga balugu

(Mat 26.1-5; Mar 14.1-2; Yoh 11.45-53)

1 # Kuso 12.1-27 Ikyene Ikyaka kya Kisyesye Ikisita Nkese, iki bikuti yo Pasa ingamu kyasegelile. 2Popapo abaputi abakulumba nabamanyandagilo balinkulonda injila ya kungogelamo Yesu; namanga babatilaga abandu.

Yuda ikwitika ukumbika Yesu mmaboko ga balugu

(Mat 26.14-16; Mar 14.10-11)

3Popapo Setano alinkwingila mwa Yuda uyu batigi gwa mu Karioti, uyu ali yo yumo muli bala kalongo na babili; 4yo alinkubuka alinkwakuyoba nabaputi abakulumba nabakulumba ba basikali, isya kumbika Yesu mmaboko gabo. 5Abene balinkusekela, balinkwitikana nagwe ukunhomba indalama. 6Yuda alinkwitika, popapo alinkulonda akabalilo akanunu akakumbikila mmaboko gabo kisita kusimanya abandu.

Yesu ikwitendekesya ukulya ifyakulya fya Kyaka kya Pasa

(Mat 26.17-25; Mar 14.12-21; Yoh 13.21-30)

7Popapo lilinkwisa ilisiku lya Kyaka kya Kisyesye Ikisita Nkese, ili babolelaga nutung'osi twa Pasa. 8Popapo Yesu alinkubatuma ba Peteri na Johani alinkubabula alinkuti, “Amubukege mukatutendekekesyege ifyakulya fya Kyaka kya Pasa, ukuti twisetulye.” 9Abene balinkundalusya balinkuti, “Gwatigi tukatendekekesye kugu?” 10Umwene alinkubabula alinkuti, “Bo mukwingila nkaya, mwisakwaganila numundu uyu apimbile indeko ya misi, yo mukankongege, mukingilege nagwe nnyumba mumo ikwakwingilaga. 11Mukayobege nagwe umwenenyumba mukatigi, ‘UMmanyisi ikuti, Yilikugu inyumba ya bahesya iya kulilamo une ifyakulya fya Kyaka kya Pasa pamopene nabafundigwa bangu?’ 12Umwene isakubanangisyaga inyumba inywamu iya kwiyulu, iyi batengile nukuyitendekesya; mo mukatutendekekesyege.” 13Popapo balinkubuka, balinkwakusyaga bo mumo Yesu ababulilaga, mo balinkutendekesya ifyakulya fya Kyaka kya Pasa.

Ifyakulya fya Ntwa Ifyamayolo

(Mat 26.26-30; Mar 14.22-26; Yoh 13.21-30; 1 Kor 11.23-25)

14Lelo bo kafikile akabalilo, Yesu alinkutugala pakulya pamopene nabatumigwa. 15Popapo alinkubabula alinkuti, “Nnyonyilwe fiyo ukulya ifya pa Kyaka kya Pasa uyu nanumwe, bo tasi ngali ukukubilwa; 16namanga nikubabula une nikuti, ndisakufyamo kangi, ukufika papo sisakumalikilaga syosa sisisi mbutwa bwa Kyala.” 17Popapo alinkwega ulupindi, alinkugwa ulupi alinkuti, “Ega, ulu, muyabanege yuyumwe; 18buno nikubabula une nikuti, ukufuma lilino, ndisakwandisyamo ukunwa ifya museke sya mafilu, ukufika papo bukwisilaga ubutwa bwa Kyala.” 19Popapo alinkwega ikisyesye, alinkugwa ulupi, alinkukimenyania alinkubapa alinkuti, “Iki go gu mbili gwangu ugu gupegigwe panongwa yinu; bo mubombege bunobuno ukungumbukilamo une. 20#Yere 31.31-34Bunobuno lope nulupindi, bo balile ifya mayolo, alinkuyoba alinkuti, “Ikinwelo iki lo lwitikano ulupya ulwa mwilopa lyangu, ili likubonekelaga umwe.

21 # Salimo 41.9 “Loli keta, uyu ikumbikaga mmaboko ga balugu ali nanine pamesa papapa. 22Namanga Nnyamundu yo ikubuka bo mumo sitendekesigwe, loli sya butolwe kumundu uyu ikumbikaga mmaboko ga balugu!” 23Popapo balinkwanda ukulalusania balinkuti, “Kali ayege ywani mmyitu uyu ikuya pakusibomba sisisi.”

Ukukanikana isya bukulumba

24 # Mat 18.1; Mar 9.34; Luk 9.46 Popapo lulinkutupuka ulukani mbafundigwa, ulwa kuti, Kali ywani uyu ikuyaga yo nkulumba kuli bosa. 25#Mat 20.25-27; Mar 10.42-44Umwene Yesu alinkubabula alinkuti, “Abanyafyale ba bapanja bikubalambikila ulwa bunyafyale abandu, naba bali namaka pamyabo, bikuyobigwa ukuya bamanyani ba bandu. 26#Mat 23.11; Mar 9.35Umwe loli bo singayaga kumyinu; unkulumba mmyinu yo ipelege ukuya bo yu nnandi, nundongosi ayege bo yu mbombi. 27#Yoh 13.12-15Kali ywani nkulumba, uyu atugele pakulya, pamo uyu ikumbombela? Akaya yo uyu atugele pakulya? Loli une mmyinu ndi bo yu mbombi.

28“Loli umwe, yo umwe mwali nanine mungelo syangu syosa, nikubalekela umwe ubulagili, bo apa Tata andekile nanine, 29ukuti mwisemulyege nukunwa pamesa yangu mbutwa bwangu; 30#Mat 19.28kangi mwisakutugalaga pafikota fya bunyafyale, ukufilonga ifikolo fya Israeli kalongo na fibili.

Yesu ikuyobela ngani isya kuleya kwa Peteri

(Mat 26.31-35; Mar 14.27-31; Yoh 13.36-38)

31“Gwe Simoni, Simoni, keta Setano abasumile ukuti abapetege bo ingano; 32loli une ngupyelekisye ukuti ulwitiko lwako lungagaga; kokuti nanugwe linga gwisilekugomoka, gwise ubakasyege abamyinu.” 33Popapo Peteri alinkwamula alinkuti, “Gwe Ntwa, nilinganikisye ngani ukubuka nanugwe munnyololo, nalinga mo mbufwe.” 34Umwene Yesu alinkumbula alinkuti, “Nikukubula ugwe Peteri nikuti, Umusyugu yitisakukolela ingongobe bo ukayoba katatu ukuti ukamanya une.”

Indalama, inyambi nulubo

35 # Mat 10.9-10; Mar 6.8-9; Luk 9.3; 10.4 Popapo Yesu alinkubalalusya abafundigwa bake alinkuti, “Pala mbatumege kisita nyambi ya ndalama, ninyambi ya munjila, nifilato, mwalyagilwe fimo?” Abene balinkwamula balinkuti, “Mma, nafimo.” 36Popapo alinkubabula alinkuti, “Loli lilino, uyu linga ali ninyambi ya ndalama yo egege, bububo yope ninyambi ya munjila; loli uyu linga akaya nalo ulubo, yo ulisyege unselekesye gwake ulege lumo. 37#Yes 53.12Buno nikubabula une nikuti, isi sisimbigwe syo fikuti simalikilege mmyangu isya kuti, ‘Abaliligwe lumo nabilangomelesyo.’ Namanga syosa isi sikunjoba une sili nubumalikilo.” 38Popapo abafundigwa bake balinkuti, “Gwe Ntwa, keta silipo apa inyubo ibili.” Umwene alinkumbula alinkuti, “Sifwene.”

Yesu ikwiputa pa Kyamba kya Misyunguti

(Mat 26.36-46; Mar 14.32-42)

39Popapo Yesu alinkusoka nkaya, alinkubuka ku Kyamba kya Misyunguti, bo mumo abombelaga bwila; bope nabafundigwa bake balinkunkonga. 40Lelo bo afikile papo, alinkubabula alinkuti, “Amwiputege ukuti mungingilaga ndugelo.” 41Umwene alinkwikwabapo kumyabo, ukufwana nuntambo gwa kulasila ilibwe, alinkufugama pasi alinkwiputa alinkuti, 42“Gwe Tata, linga gwiganile ulukisyege ulupindi lwabutolwe pamyangu; bomma ubwigane bwangu, loli ubwako bo bubombigwege.”#22.42 Amasimbo gamo gakaya na mavesi 43-44Popapo ugwandumi gwa Kyala alinkunsetukila ukufuma kumwanya alinkunkasya. Lelo bo ikukubilwa mmoyo, alinkwiyumika Ilya ukwiputa; amafuke gake galinkufwana matonyela ga ilopa bo gikugwa pasi. 45Lelo bo asumwike apa iputaga, alinkwisa apa balipo abafundigwa bake, alinkwaga bagonile utulo twa busulumanie. 46Alinkuyoba nabo alinkuti, “Fiki mugonile utulo? Amusumuke mwiputege, ukuti mungingilaga ndugelo.” 47Lelo bo Yesu akali ikuyoba, ikilundilo kya bandu kilinkwisa na uyu batigi Yuda ingamu, yumo muli bala kalongo na babili uyu abalongolile, yo alinkusegelela kwa Yesu ukuti ampomege nukumfipa. 48Umwene Yesu alinkumbula alinkuti, “Gwe Yuda, kumbika Nnyamundu mmaboko ga balugu nuluponio lwa lufipo?” 49Abene lelo aba bali nagwe, bo basibwene isi syayaga pakuboneka, balinkuyoba balinkuti, “Gwe Ntwa, tubasengege nulubo?” 50Popapo yumo umwinabo alinkunsenga untumwa gwa mputi unkulumba, alinkumwangula imbulukutu ya kukililo. 51Popapo Yesu alinkwamula alinkuti, “Sifwene;” popapo alinkuyipalamasya imbulukutu, alinkumbumbulusya. 52Umwene Yesu alinkuyoba nabo abaputi abakulumba, nabalongosi ba Nnyumba ya Kyala, nabakulumba aba balimwisile, alinkuti, “Muliti mwisile nkulikola inyambuta apa mutwele inyubo ningili? 53#Luk 19.47; 21.37Bwila nayaga nanumwe Nnyumba ya Kyala, mulinkusita nukungola; loli lilino aka ko kabalilo kinu, apa amaka ga ngisi gikulagila.”

Peteri ikunkana Yesu

(Mat 26.57-58,69-75; Mar 14.53-54,66-72; Yoh 18.12-18,25-27)

54Popapo balinkunkola Yesu balinkubuka nagwe, balinkwakwingila nnyumba ya Mputi Unkulumba; umwene Peteri yo alinkukonga pabutalipo. 55Lelo bo bakosisye umoto nkati ndupaso batugele pamopene, yope Peteri alinkutugasania nabo. 56Popapo yumo undindwana umbombi alinkumbona bo atugele mundangalila gwa moto, alinkundulalila alinkuyoba alinkuti, “Yope na yuyuyu ayaga pamopene nagwe.” 57Umwene Peteri alinkukana alinkuti, “Gwe nkikulu ugwe, une ngammanya.” 58Lelo bo pakindilepo panandi, uyungi alinkumbona alinkuyoba alinkuti, “Nanugwe uli mwinabo.” Loli Peteri alinkwamula alinkuti, “Gwe kanya, ngaya yo une.” 59Panyuma bo kakindile akabalilo kamo, uyungi alinkumilisya alinkuyoba alinkuti, “Sya naloli yope na yuyuyu ali nagwe, kabuno gwa mu Galilai.” 60Umwene Peteri alinkwamula alinkuti, “Gwe kanya, ngasimanya nisi kuyoba.” Nakalinga itolo bo akali ikuyoba, ingongobe yilinkukolela. 61Popapo uNtwa alinkusanuka, alinkunketa Peteri. Umwene Peteri alinkulikumbuka ilisyu lya Ntwa, mumo alimbulile ukuti, “Umusyugu bo ningongobe yikali ukukolela kwisakunganaga une katatu.” 62Popapo alinkusoka panja, alinkulila fiyo.

Yesu ikobeligwa nukukomigwa

(Mat 26.67-68; Mar 14.65)

63Abene abandu aba bandindililaga Yesu, balinkumwangalila nukunkoma. 64Balinkunkinga kumaso, balinkundalusya balinkuti, “Sololaga lelo, ywani uyu akukomile?” 65Balinkuyoba namasyu agangi ga mingi aga kunhelula.

Yesu ali nkyeni ndukomano lwa baYuda

(Mat 26.59-66; Mar 14.55-64; Yoh 18.19-24)

66Lelo bo bukile nulubunju, popapo balinkubungana abakulumba ba bandu, nabaputi abakulumba kangi nabamanyandagilo, balinkuntwala Yesu kulukomano lwabo, 67balinkuyoba balinkuti, “Linga gwe Kristi yuyugwe, ulitubulaga.” Umwene alinkubabula alinkuti, “Linga nikubabula mutisakwitika napanandi; 68nalinga nikubalalusya, mutisakwamula. 69Loli ukwanda lilino, Nnyamundu isakutugasyaga ku kiboko ikililo ikya Kyala Umwenemaka.” 70Bosa balinkundalusya balinkuti, “Ngimba lelo uli Mwana gwa Kyala?” Umwene alinkubamula alinkuti, “Bo lilyo mukuyoba.” 71Popapo balinkuyoba balinkuti, “Po twati tubulondege bwaki ubuketi ubungi? Buno tusipilike yuyuswe ukufuma nkanwa mmyake.”

Currently Selected:

LUKA 22: NNBII

Highlight

Copy