LUKA 20

Bikundalusya Yesu isya maka gake

(Mat 21.23-27; Mar 11.27-33)

1Umusi gumo bo Yesu ali pakubamanyisya abandu Nnyumba ya Kyala, nukulumbilila Inongwa Inunu, popapo balinkusegelela kumyake abaputi abakulumba, nabamanyandagilo pamopene nabakulumba, 2balinkundalusya balinkuti, “Utubule, go maka maki aga kubombela sisisi? Kangi ywani uyu akupele amaka gagaga?” 3Umwene Yesu alinkubamula alinkuti, “Nanine nikubalalusyaga ilisyu limo, munyamule. 4Ulosyo lwa Yohani, kali lwafumile kumwanya pamo kubandu?” 5Balinkuyobesania balinkuti, “Linga tukuti lwafumile kumwanya, isakutigi, ‘Po fiki mukamwitikaga lelo?’ 6Linga tukuti lwafumile kubandu, po abandu bosa bisakututika namabwe; namanga sibakolile ukuti Yohani ali nsololi.” 7Abene balinkwamula balinkuti, “Tukamanya kuno lwafumile.” 8Popapo Yesu alinkubabula alinkuti, “Po nanine ndikubabula amaka aga nikubombela sisisi.”

Ikifwanikisyo kya balimi ba ngunda gwa mafilu

(Mat 21.33-46; Mar 12.1-12)

9 # Yes 5.1 Popapo Yesu alinkwanda ukubabula abandu ikifwanikisyo iki alinkuti, “Umundu yumo alimile ungunda gwa mafilu, alinkubasima abalimi aba kunhomba; popapo alinkubuka kukisu ikingi, ko alinkwakutugala akabalilo akatali. 10Lelo bo kafikile akabalilo ka mfunjo, alinkuntuma umbombi kubalimi ukuti bakampepo iseke simo sya mungunda gwa mafilu; loli abalimi bala balinkunkoma nukunkaga kisita kumpapo nafimo. 11Popapo alinkwandisya kangi, alinkuntuma umbombi uyungi; yope na yuyuyu balinkunkoma, balinkunjwelula nukunkaga kisita kumpako fimo. 12Alinkwandisya kangi, alinkuntuma ugwa butatu; yope na yuyuyu balinkumfulasya, balinkuntaga panja. 13Popapo umwenengunda gwa mafilu yula alinkuti, ‘Ndubulege lelo? Nikuntumaga yu mwanangu unkundwe, pamo yo bikwakuntilaga.’ 14Abene loli abalimi bala bo bambwene, balinkuyobesania balinkuti, ‘Uyu yo mwenekilingo, isaga tungoge, ukuti ikilingo kiyege kyitu.’ 15Popapo balinkuntaga panja pangunda gwa mafilu, balinkungoga. Kali isakutigi fiki nabo lelo umwenengunda gwa mafilu? 16Isakwisa nukubapyuta abalimi bala; ugwene ungunda gwa mafilu go isakubapaga abangi.” Abene bo basipilike sisisi, po balinkuti, “Mma, syo singisaga sisisi!” 17#Salimo 118.22Umwene Yesu alinkubaketa popapo alinkuyoba alinkuti, “Likusanusya fiki ilisyu ili lisimbigwe, ili likuti,

‘Ilibwe ili balisyokile abayengi,

lyo lipelile ukuya ibwe ikulumba lya panguto?’

18Gwesa uyu linga ikugwa pibwe lilyo, yo isakutayanikaga; kangi uyu linga likungwila, yo lisakuntakaniaga.”

Bikundalusya Yesu isya kusonga kwa Kaisari

(Mat 22.15-22; Mar 12.13-17)

19Popapo abamanyandagilo nabaputi abakulumba balinkulonda ukunkola Yesu pakabalilo kako, loli balinkubatila abandu; namanga basyagenie ukuti abayobaga babo nkifwamkisyo kikiki. 20Popapo balinkuntegelela, balinkubatuma abatendesi ukuti bakafwanege bagolofu, ko kuti bakankolelege mmasyu gake, nukuti bakambikege mmaka na mbulagili bwa ndindililakisu. 21Abene balinkundalusya Yesu balinkuti, “Mmanyisi, tumenye ukuti kuyoba nukumanyikisya mbugolofu, kangi utikubasalila abandu mbundu bwabo, loli kumanyikisya injila ya Kyala mbwanaloli. 22Bule, kutubagile ukusonga isongo kwa Kaisari, pamo mma?” 23Loli Umwene Yesu alinkubwagania ubukomu bwabo, alinkubabula alinkuti, 24“Amunangisye ulutalama lumo. Kali fyani ifi filipo, ikifwani nubusimbe?” Balinkuti, “Fya Kaisari.” 25Umwene Yesu alinkubabula alinkuti, “Po ngimba ifya Kaisari fyo mumpege Kaisari, ifya Kyala mumpege Kyala.” 26Abene balinkupondwa ukunkolela mmasyu gake nkyeni mbandu, balinkuswiga itolo ukwamula kwake, popapo balinkubatama.

Bikundalusya Yesu isya kusyuka mbafwe

(Mat 22.23-33; Mar 12.18-27)

27 # Imbo 23.8 Popapo balinkwisa kwa Yesu abaSadukai bamo, aba bikuti kukayako ukusyuka mbafwe; 28#Kukumbu 25.5balinkundalusya balinkuti, “Mmanyisi, Mose atusimbile atile, linga ugwamyabo gwa mundu ikufwa ikundeka unkasi kisita mwana, fikuti ugwamyabo amwingilengepo, ukuti ampapilege abana ugwamyabo. 29Balipo lelo abanyamundu bahano na babili; untasi alinkwega unkikulu, alinkufwa unsitamwana. 30Yope ugwa bubili, 31nugwa butatu balinkumwingilapo; bunobuno bosa bahano na babili balinkufwa kisita kuleka abana. 32Kunyuma yope unkikulu alinkufwa. 33Kali mbusyuka, unkikulu isakuyaga gwa aliku? Namanga bo bahano na babili balimwegilemo.” 34Umwene Yesu alinkubabula alinkuti, “Abana ba nkisu iki bikwega nukwegigwa; 35loli aba kubabagile ukukikaba ikisu kila, nukusyuka mbafwe, bo batikwegamo kangi batikwegigwamo. 36Namanga batikufwamo siku, papo bali bo ba bandumi ba Kyala, kangi bana ba yu Kyala; bipelile ukuya banya kusyuka. 37#Kuso 3.6Loli isya kuti abafwe bikusyuka, yope na yu Mose asinangisye pakisyanju pala, apa ikunjoba uNtwa ukuya yo Kyala gwa Abrahamu, Kyala gwa Isaka, kangi ukuya yo Kyala gwa Yakobu. 38Umwene akaya yo Kyala gwa bafwe, loli gwa bumi; buno bosa itolo bumi kumyake.” 39Popapo abamanyandagilo bamo balinkumwamula Yesu balinkuti, “Mmanyisi uyobile kanunu.” 40Papo akalipo yumo uyu ali nkifu ukundalusya simo.

Ilalusyo pa sya Kristi

(Mat 22.41-46; Mar 12.35-37)

41Popapo Yesu alinkubalalusya alinkuti, “Syo bikuyoba bulebule apa bikuti Kristi nnya Davidi? 42#Salimo 110.1Buno Davidi yuyo mmasimbo ga mu nyimbo sya Israeli ikuti,

‘Untwa ayobile kuNtwa gwangu atile,

Itugasya kukiboko kyangu ikililo,

43ukafikege papo nikubapelaga abalugu nako

ukuya kikota kya kubikapo amalundi gako.’

44“Linga Davidi ikunjoba ukuya yo Ntwa, po ati ayege mwanake bulebule?”

Isya kubasoka abamanyandagilo

(Mat 23.1-36; Mar 12.38-40)

45Popapo Yesu alinkubabula abafundigwa bake bo bikupilika bosa abandu alinkuti, 46“Mwandege nabamanyandagilo, aba biganile ukufwala imiselekesye imitali bo bikusyungutila, kangi biganile ukuti abandu babaponiege musokoni, biganile nukutugasya pafikota fya bukulumba nnyumba syakwiputilamo, nukutugasya pafikota ifya bwimikigwa pafyakulya fya palusekelo. 47Abandu bababa bikonanga inyumba sya bakikulu abafwilwe, bo kuno bikwilabasya ukwiputa inyiputo indali, bo bisakwambililaga ulufundo ulukulumbapo.”

Currently Selected:

LUKA 20: NNBII

Highlight

Copy