LUKA 19

Yesu na Zakai

1Popapo Yesu alinkwingila nkaya ka Yeriko. Lelo bo ikukisania, 2keta, alipo umundu yumo uyu ali yo Zakai ingamu, yo ali nkulumba mbasongesyasonga, kangi ali nkabi. 3Alinkulonda ukunketa Yesu muno ayilile, loli alinkutoligwa panongwa ya kilundilo kya bandu, namanga ali mpimba. 4Popapo alinkubopela nkyeni, alinkwakukwela munkuyu ukuti mo akanketelege, namanga ayaga pakukinda papo. 5Umwene Yesu bo afikile pabuyo bula, alinkuketa mmwanya alinkumbula Zakai alinkuti, “Zakai, sulukaga mbibimbibi; namanga fikuti umusyugu ndugalemo nnyumba yako.” 6Popapo alinkusuluka mbibimbibi itolo, alinkumwambilila Yesu nulusekelo. 7Lelo bo abandu basibwene sisisi, balinkwibubusya bosa balinkuti, “Ingile nukutugasania numundu untulanongwa!” 8Umwene Zakai alinkwima, alinkumbula Untwa alinkuti, “Keta, gwe Ntwa, nikuyabaga ikyuma kyangu pakati ukubapa abalondo, linga kuli yumo mbokile fimo mbusyobi, yo nikungomokesyangapo kana.” 9Umwene Yesu alinkumbula alinkuti, “Umusyugu ubupoki bubonike nnyumba iyi, buno yope na yuyuyu nnya Abrahamu. 10Namanga Nnyamundu isile nkukalonda nukukapoka aka kasobile.”

Ikifwanikisyo kya kubasya ndalama sya golide

(Mat 25.14-30)

11 # Mat 25.14-30 Lelo bo abandu bikupilikisya, Yesu alinkongelapo ukubabula ikifwanikisyo, namanga asegelile nkaya ka Yerusalemu, kangi papo binogonaga ukuti ubutwa bwa Kyala bukubonekaga nakalinga. 12Popapo Yesu alinkubabula alinkuti, “Umundu yumo ugwa nkikolo ikifumuke, abukaga kukisu kya kubutali kukwambilila ubunyafyale nukwakugomoka kangi. 13Popapo alinkubabilikila ababombi bake kalongo, alinkubapa indalama kalongo, alinkubabula alinkuti, ‘Amubasyege indalama isi ukufika papo nisakwisilaga.’ 14Abene abandu ba nkaya aka alimo balimbengile, balinkutuma indumi munyuma mmyake, balinkuti, ‘Tutikundonda umundu uyu ukuti ayege malafyale gwitu.’ 15Umwene lelo bo ayile kukaba ubunyafyale, popapo alinkugomoka; alinkulagila ukuti ba babilikilege abatumwa aba abapele indalama, ukuti amanye muno basibakisye. 16Popapo untasi alinkusegelela kumyake alinkuti, ‘Malafyale ulutalama lwako lubesye indalama isingi kalongo.’ 17Umwene alinkumbula alinkuti, ‘Uyile gwe mbombi gwe nnunu; papo gwali nsubiligwa pakandu akanandi, popapo lelo kuyaga ndagili pamwanya patwaya kalongo.’ 18Ugwa bubili alinkwisa alinkuyoba alinkuti, ‘Malafyale, ulutalama lwako lukabile indalama isingi ihano.’ 19Yope yuyuyu alinkumbula alinkuti, ‘Nanugwe uyege pamwanya patwaya tuhano.’ 20Uyungi alinkwisa alinkuti, ‘Malafyale, keta, ulu lo lutalama lwako, ulu napinyile nkitambala; 21buno nakutilaga papo uli mundu mpalapala, kwega itolo nifi ukabikapo, kangi kutondola nifi ukasopilemo.’ 22Umwene umalafyale gwake alinkumbula alinkuti, ‘Nisakukulongelaga si sya nkanwa mmyako, gwe mbombi gwe mbibi ugwe. Gwalimenye ukuya ne mundu ne mpalapala, ngwega nifi ngabikilepo, kangi ngutondola nifi ngasopile, 23po gwalekile fiki ukubika ulutalama lwangu kuli aba bikubasya? Lelo une bo nisile, angali ngwegela lumo nisi lukabile.’ 24Popapo alinkubabula babo balyimile papo alinkuti, ‘Amwegege ulutalama ulu kumyake, mumpege uyu ali nasyo indalama kalongo.’ 25Abene balinkumbula balinkuti, ‘Malafyale, ali nasyo indalama kalongo!’ 26#Mat 13.12; Mar 4.25; Luk 8.18Alinkubamula alinkuti, ‘Nikubabula une nikuti, gwesa uyu linga ali nafyo fimo yo ikupegigwaga, loli uyu akaya nafyo fimo, yo bisakwegaga nifi ali nafyo. 27Abene loli abalugu bangu bala, aba bakandondaga une ukuya malafyale gwabo, bo mubatwale kuno, mubabolege nkyeni mmyangu.’ ”

Ukwingilila mbuponjoli nkaya ka Yerusalemu

(Mat 21.1-11; Mar 11.1-11; Yoh 12.12-19)

28Lelo bo Yesu ayobile sisisi, popapo alinkulongolela ukufyuka ku Yerusalemu. 29Lelo bo asegelile nkaya ka Betifage, na ka Betania, ku Kyamba iki bikuti kya Misyunguti, alinkubatuma abafundigwa bake babili, alinkubabula alinkuti, 30“Amubukege nkaya aka muningene nako; bo mukwingila mumo, mukwakuyaga imbunda imwana yikungigwe, iyi nayumo umundu akitogamo siku; yo mukayabule mukayitwale. 31Linga yumo ikubalalusya mukuyabula yaki po mukatigi, Untwa ikuyilonda.” 32Bo babukile aba batumigwe, balinkwakusyaga bo mumo ababulile. 33Lelo bo bikuyabula imwana ya mbunda, popapo abenenayo balinkubalalusya balinkuti, “Mukuyabula yaki imwana ya mbunda?” 34Abene balinkwamula balinkuti, “Umalafyale ikuyilonda.” 35Balinkuyitwala kwa Yesu. Popapo balinkwalisya imyenda gyabo pamwanya pa mwana gwa mbunda, balinkunkwesyapo Yesu. 36Lelo bo ikwenda, balinkwalisya imyenda gyabo munjila. 37Bo asegelile ukufika pabusulufu bwa Ikyamba kya Misyunguti, popapo ikilundilo kyosa kya bafundigwa kilinkusekela nukumpala Kyala nakogo akakulumba, kumbombo syosa isya maka, isi basibwene, 38#Salimo 118.26balinkukolela balinkuti,

“Nsayigwa Umalafyale uyu ikwisila mungamu ya Ntwa,

ulutengano kumwanya, nulwimiko kumwanya kubukinde.”

39Popapo abaFarisai bamo aba nkilundilo balinkumbula balinkuti, “Gwe Mmanyisi, bakemele abafundigwa bako.” 40Umwene alinkubamula alinkuti, “Nikubabula une nikuti, linga babateme bababa, po amabwe gisakukolelaga.”

Yesu ikukalilila akaya ka Yerusalemu

41Lelo bo Yesu asegelile ikukabona akaya, alinkukalilila, 42alinkuyoba alinkuti, “Linga gwasimanyaga nugwe umusyugu isya kukupelela ulutengano! Loli lilino sifisigwe kumaso kumyako. 43Buno gikwisaga amasiku, aga abalugu bako bisakuyengaga ililinga lya kukusyungutila, bisakukusiganilaga kosakosa, 44bisakukubulutulaga ugwe nabanako aba bali nkati mmyabo, batisakulilekapo limo ilibwe pibwe ilinine mmyako, papo ukakamenye akabalilo aka kakwisile.”

Yesu ikwingila Nnyumba ya Kyala

(Mat 21.12-17; Mar 11.15-19; Yoh 2.13-22)

45Popapo Yesu alinkwakwingila Nnyumba ya Kyala, alinkwanda ukubakagamo aba bulisyaga; 46#Yes 56.7; Yere 7.11alinkubabula alinkuti, “Lisimbigwe ilya kuti, ‘Nnyumba yangu yikuyaga nyumba ya lwiputo,’ loli umwe muyipelile mbako ya minyambuta.”

47 # Luk 21.37 Yesu alinkumanyisya bwila Nnyumba ya Kyala. Abene abaputi abakulumba, nabamanyandagilo, nabakulumba ba bandu balinkulonda ukungoga. 48Loli balinkusita nukusyaga simo isya kumbombela; namanga abandu bosa bamumililaga nukumpilikisya.

Currently Selected:

LUKA 19: NNBII

Highlight

Copy