LUKA 1
1
Amasyu ga bwandilo
1Bo papa ba bingi bagelile ukusimba mongwa sya isi sibonike mmyitu muno, 2ukufwana na isi batulekile aba bali baketi, kangi bali babombi ba isyu ukufuma mu mbwandilo, 3nanine bo nsyanisye fiyo syosa ukufuma kubwandilo, nagile ukuti nunu ukukusimbila muno sikonganile, gwe mwimikigwa gwe nkundwe Teofili, 4ukuti ubumanye ubwanaloli bwa nongwa sila gwamanyisigwe.
Ukuyobela ngani isya kupapigwa kwa Yobani Umosi
5 #
1 Syambu 24.10
Pakabalilo aka Herodi ali malafyale gwa kisu kya Yudai, aliko umputi yumo uyu ali yo Zekaria ingamu, ugwa nkiyabo kya Abiya; unkasi gwake ali yo Elizabeti ingamu, ugwa nkikolo kya Aroni. 6Loli bosa bo babili bali bagolofu nkyeni mwa Kyala, balinkukonga mungomelesyo na mundagilo syosa isya Ntwa, abasitakuyobigwamo nalimo ilibibi. 7Loli bakali numwana, namanga Elizabeti ali ngumba; kangi bosa bo babili bafikilepo pabukangale.
8Lumo lela bo Zekaria ali pakubomba imbombo ya buputi Nnyumba ya Kyala, ndubatiko lwa kiyabo kyake nkyeni mwa Kyala, 9bo mumo lwayilile ulwiho lwa buputi, ubulagusi bulinkunkola Zekaria ukwingila Nnyumba ya Kyala nkufukisya, 10abandu ikilundilo kyosa bali panja biputaga pakabalilo ka kufukisya. 11Popapo ugwandumi gwa Ntwa alinkunsetukila, alyimile ku kiboko ikililo kya kigemo kya kufukisya. 12Umwene Zekaria bo ambwene alinkunyomoka, ulutende lulinkumwaga. 13Loli ugwandumi alinkumbula alinkuti, “Ungatetemaga Zekaria, buno ukusuma kwako kupilikigwe, unkasigo Elizabeti isakukupapilaga umwana undumyana, yo gwise umpege ingamu ya Yohani; 14nanugwe kwisakuyaga nulusekelo nubwikyele, nabandu ba bingi bisakukusekelelaga ukupapigwa kwake. 15#Kuba 6.3Namanga isakuyaga nkulumba nkyeni muNtwa, atisakunwaga ubwalwa bwa mafilu nifingi fyosa ifi fikumpelela ukugala umundu; umwene isakwisulaga Mbepo Mwikemo ukufuma mu munda munna. 16Abandu bingi mbanya Israeli aba isakubagomolelega kuNtwa Kyala gwabo. 17#Mala 4.5-6Yo isakwendaga nkyeni muNtwa, mumbepo na mmaka ga Eliya; indumbula sya bisabo isakusigomolelaga kubanabo, abamwilo isakubagomolelaga kumahala ga bugolofu, nukumbikila ngani uNtwa abandu aba batendekesigwe.” 18Popapo Zekaria alinkundalusya ugwandumi alinkuti, “Syo nikusimanyaga bulebule sisisi? Buno une ndi nkangale, yope nunkasi gwangu afikilepo pabukangale.” 19#Dan 8.16; 9.21Umwene ugwandumi alinkumwamula alinkuti, “Une ne Gabrieli ne nikwima nkyeni mwa Kyala, ndumigwe kukuyoba nanugwe, nukukutwalila mongwa inunu isi. 20Keta, kuyaga kinunu itolo kisitakuyoba, ukufika pisiku lilyo sisakubonekelaga sisisi, papo ukagitika amasyu gangu, aga gisakwisaga pakabalilo kake.”
21Abene abandu bangulilaga Zekaria, balinkuswiga fiyo bo bagile akabile Nnyumba ya Kyala. 22Lelo bo asokile, alinkutoligwa ukuyoba nabo, balinkusyagania ukuti akibwene ikisetuka Nnyumba ya Kyala; alinkubanangikisya ki kiboko, alinkuya kinunu itolo.
23Bo gamalike amasiku ga bubombeli bwake, popapo alinkubuka kumyake. 24Lelo bo pagonilepo, Elizabeti unkasi alinkwinoga; popapo alinkwibilila imyesi mihano 25alinkuyoba alinkuti, “Buno syo isi ambombile uNtwa, mmasiku gala angetelengemo, apa akusosyaga ukobeligwa kwangu nkyeni mbandu.”
Ukuyobela ngani isya kupapigwa Yesu
26Popapo lela mmwesi gwa buhano nagumo, ugwandumi Gabrieli alinkutumigwa na Kyala ukubuka nkaya kamo aka mu Galilai, aka batigi Nazareti ingamu, 27#Mat 1.18kundindwana uyu asingiligwe numundu yumo uyu ali yo Yosefu ingamu, uyu ali gwa kikolo kya Davidi, undindwana yula ingamu yake ali yo Maria. 28Umwene ugwandumi alinkwingila nnyumba, alinkuyoba naMaria alinkuti, “Nikukuponia gwe upegigwe ilipyana, uNtwa ali nanugwe.” 29Umwene Maria alinkunyomoka fiyo kumasyu aga, alinkwilusama alinkuti, “Lo luponio luki lululu?” 30Popapo ugwandumi alinkumbula alinkuti, “Ungatetemaga Maria, buno ulyagile ilipyana kwa Kyala. 31#Mat 1.21Keta, kwisakwinogaga umwana munda mmyako, kwisakupapaga umwana undumyana, yo gwise umpege ingamu ya Yesu. 32#2 Samu 7.12,13,16; Yes 9.7Yo isakuyaga nkulumba, kangi isakuyobigwaga ukuya yo Mwana gwa yu Nkinde, uNtwa Kyala isakumpa ga ikikota kya bunyafyale bwa gwise Davidi; 33isakuyaga ndagili panyumba ya Yakobu bwila na bwila, bope nubunyafyale bwake butisakuyaga na pabumalikilo napamo.” 34Loli Maria alinkundalusya ugwandumi yula alinkuti, “Syo sikuyaga bulebule sisisi, bo ngaya nunnyambala nayumo?” 35Umwene ugwandumi alinkwamula alinkuti, “Mbepo Mwikemo isakukwisilaga, gope namaka ga yu Nkinde gisakukukupikilaga; ko kuno Umwana Umwikemo uyu isaku papigwaga, isakuyobigwaga ukuya Mwana gwa Kyala. 36Keta, yope nunkamugo Elizabeti inogile umwana undumyana mbukangale bwake, ugu go mwesi gwake gwa buhano nagumo uyu batigi ngumba. 37#Bwa 18.14Namanga likayako limo ilisyu lya Kyala ilisitamaka.” 38Popapo Maria alinkuyoba alinkuti, “Keta une ndi mbombi gwa Ntwa, asinyisilege bo sisyo usiyobile.” Popapo ugwandumi alinkundeka, alinkubuka.
Maria ikubuka kwa Elizabeti
39Popapo mmasiku gago Maria alinkusumuka, alinkubuka mbibimbibi nkisu kya mfyamba, alinkwakufika nkaya kamo aka mwa Yuda; 40alinkwakwingila nnyumba ya Zekaria, alinkumpoma Elizabeti. 41Lelo bo Elizabeti apilike uluponio lwa Maria, popapo akana kalinkukina munda mmyake; umwene Elizabeti alinkwisula Mbepo Mwikemo, 42alinkukolela ilisyu ilikulumba alinkuti, “Uli nsayigwa ugwe mbakikulu bosa, sayigwa yope nimbeyu iyi yili munda mmyako. 43Syo sinyagile bulebule sisisi, ukuti unna gwa Ntwa gwangu anyisilege une? 44Keta, bo uluponio lwako lufikile mumbulukutu syangu, akana kalinkukina nulusekelo munda mmyangu. 45Nsayigwa uyu itike, namanga sikumwisilaga sisyo abuligwe nuNtwa.”
Ulwimbo lwa Maria ulwa lutufyo
46 #
1 Samu 2.1-10
Popapo Maria alinkuyoba alinkuti,
“Umoyo gwangu gukunjumbika uNtwa,
47imbepo syangu sili nubwikyele mwa Kyala uMpoki gwangu,
48 #
1 Samu 1.11
papo abuketile ubupimba bwa ne ntumwa gwake;
buno ukwanda lilino, ingulilo syosa sikunjobaga ubusayigwa;
49papo ugwa maka ambombile ingulumba,
yope ningamu yake nyikemo;
50ikisa kyake kikuyako kungulilo ningulilo, muli aba bikuntila.
51Abombile isya maka nikiboko kyake,
abapalagenie abamatingo munyinogono sya mundumbula syabo;
52 #
Jobu 5.11; 12.19 aba maka abisisye pafikota fyabo;
abafyusisye ba bapimba,
53abanjala abaswilile ifinunu,
abakabi abakagile kisitakubapa nafimo.
54Antulile Israeli umbombi gwake,
bo ikukikumbuka ikisa kyake;
55 #
Bwa 17.7
bo lilyo ayobile kwa batata,
kwa Abrahamu na kuluyungu lwake bwila na bwila.”
56Umwene Maria alinkutugala na Elizabeti imyesi mitatu, popapo alinkugomoka ukubuka kumyake.
Ukupapigwa kwa Yohani Umosi
57Popapo Elizabeti akabalilo kake ka kupapila umwana kalinkwisa, alinkupapa umwana undumyana. 58Abene abapalamani nabakamu bake balinkupilika ukuti uNtwa ambakisye ikisa, popapo balinkusekela nagwe. 59#Levi 12.3Lelo pisiku lya buhano nabutatu, balinkwakumbutako umwanike; balinkuti tumpege ingamu iya gwise Zekaria. 60Umwene unna alinkwamula alinkuti, “Mma, loli ayege yo Yohani.” 61Abene balinkumbula balinkuti, “Akayamo yumo nkikolo kyako ugwa ngamu yiyiyi.” 62Balinkundalukisya ugwise nkimanyilo, ukuti bamanye muno iganile ukumbilikilila umwanike. 63Umwene alinkusuma aka kusimbilapo, alinkusimba alinkuti, “Ingamu yake yo Yohani.” Bosa balinkuswiganika. 64Nakalinga imilomo gyake gilinkwiguka, nululimi lwake lulinkwabuka, alinkuyoba alinkuntufya Kyala. 65Popapo ulutende lulinkubaga bosa abapalamani babo; inongwa isi silinkufumuka mosa nkisu kya mfyamba fya muYudai. 66Bosa aba basipilikaga sisisi, balinkusibika mundumbula syabo balinkuti, “Umwanike uyu kali ikuyaga mfiki?” Namanga ikiboko kya Ntwa kyali pamyake.
67Popapo Zekaria ugwise alinkwisula Mbepo Mwikemo, alinkusolola alinkuti,
68“Atufigwege uNtwa, Kyala gwa Israeli;
papo abaketile abandu bake, nukubapelela ukutabuligwa,
69atwimikile umpoki gwa maka nnyumba ya Davidi umbombi gwake;
70bo mumo ayobelege nkanwa mbasololi bake abikemo aba mbukulu,
71ukuti isakutupokaga kubalugu bitu,
na kukiboko kya bosa aba batubengile;
72alinkuyoba ukuti isakunangisya ikisa kwa batata,
kangi nukukumbuka ulwitikano lwake ulwikemo;
73ulufingo ulu afingile na tata Abrahamu,
ukutwitikisya uswe
74ukuti, bo tupokigwe kukiboko kya balugu,
twise tumbombelege yuyo kisita lutende,
75mbwikemo na mbugolofu nkyeni mmyake, mmasiku gitu gosa.
76 #
Mala 3.1
Loli nanugwe mwanike, kwisakuyobigwaga ukuya nsololi gwa yu Nkinde;
namanga kwisakulongolelaga nkyeni muNtwa gwako ukutendekesya injila syake;
77ukubapelela abandu bake ukubumanya ubupoki,
mbuswe bwa nongwa syabo;
78panongwa ya kibabilisi kya ipyana lya Kyala gwitu,
mo mumo ubwelu bwisa kutubalilaga ukufuma kumwanya,
79 #
Yes 9.2
ukubamulika aba batugele mungisi na munsyungulu gwa bufwe,
ukugalongosya amalundi gitu munjila iya lutengano.”
80Umwene umwanike alinkukula alinkukaka mumbepo, alinkuya muma tengele ukwisakufika pisiku ili inangikisyaga kwa Israeli.
Currently Selected:
LUKA 1: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
