Marko 16

Ukusyuka kwa Yesu

(Mat 28.1-8; Luk 24.1-12; Yoh 20.1-10)

1Lelo bolikindile ilisiku lya Sabati, popapo Maria ugwa ku Magadala na Maria unna gwa Yakobu, na Salome balinkula imikota gya luma ukuti bakagupake umbili gwa Yesu. 2Nulubunju fiyo pisiku ilitasi ilya ndungu, balinkwisa kwipumba bo ilisuba lisokile. 3Balinkuyobesania balinkuti, “Ywani ikwakutusegulilaga ilibwe pakifigo kya ipumba?” 4Lelo bo bikuketa, balikwipumba, balinkwaga ilibwe liseguligwe, namanga lyali inywamu fiyo. 5Lelo bo bikwingila mwipumba, balinkumbona undumyana uyu afwele unselekesye umwelu atugesye ku kiboko ikililo, balinkunyomoka fiyo.

6Umwene alinkubabula alinkuti, “Komma ukunyomoka menye ukuti mukundonda Yesu ugwa mu Nazareti, uyu akomeligwe pakipingika, asyukile akayamo muno; keta apa balindambalike. 7#Mat 26.32; Mar 14.28Loli amubukege mukababulege abafundigwa bake na yu Peteri mukatigi, ‘Ikubalongolelangapo ukubuka nkisu kya Galilai, mo mwisakwakumbonaga bo mumo ababulile.’ ” 8Popapo balinkusoka nukubopa ukufuma kwipumba, papo batetemaga, kangi ikiswigu kyabagile, balinkusita nukumbula yumo umundu namanga batilaga.

Yesu ikunsetukila Maria Magadalena

(Mat 28.9-10; Yoh 20.11-18)

[9Umwene Yesu bo asyukile nulubunju pisiku ilitasi ilya ndungu, alinkutala ukunsetukila Maria Magadalena, uyu alinsosisyemo imbepo inyali ihano na ibili. 10Umwene yo alinkubuka nukwakubabula aba bayaga nagwe, aba basulumenie balilaga. 11Bo bapilike ukuti mumi, nukuti ansetukile, balinkusita nukwitika.

Yesu ikubasetukila abafundigwa babili

(Luk 24.13-35)

12Panyuma pali isi bo Yesu iyandusenie, alinkubasetukila abinabo babili aba bendaga ukubuka mmigunda. 13Balinkubuka balinkwakubabula abinabo; bope na bababa balinkusita nukubitika.

Yesu ikubasetukila abakalongo na yumo

(Mat 28.16-20; Luk 24.36-49; Yoh 20.19-23; Imbo 1.6-8)

14Ulwanyuma Yesu alinkubasetukila kalongo na yumo bala bo batugele pakulya; alinkubumanila panongwa ya kusitakwitika kwabo nubukafu bwa ndumbula syabo, namanga bakabitikaga aba balimbwene bo asyukile. 15#Imbo 1.8Alinkubabula alinkuti, “Amubukege nkisu kyosa, mukalumbililege Inongwa Inunu kufipeligwa fyosa. 16Uyu linga ikwitika nukosigwa yo isakupokigwaga, loli uyu linga atikwitika yo isakulongigwaga nukutobesigwa. 17Loli ifyakumanyilamo ifi fisakubakongaga aba bikwitika fyo ifi: Bisakusisokesyaga imbepo inyali mungamu yangu; bisakuyobelaga munjobelo ihesya; 18bisakusikolaga itolo injoka; linga bikunwa fimo ifi fikugoga, fitisakubabombelaga fimo, kangi bisakubabikangapo amaboko ababine, lelo po bende nukupona.”

Yesu ikufyuka kumwanya

(Luk 24.50-53; Imbo 1.9-11)

19 # Imbo 1.9-11 Umwene Untwa Yesu bo ayobile nabo, alinkwegigwa ukufyuka kumwanya, alinkwakwitugasya kukiboko ikililo kya Kyala. 20Popapo abene balinkubuka balinkwakulumbilila mosamosa, umwene uNtwa alinkubomba palikimo nabo, alinkulikasya ilisyu nifika ifi fyakonganaga nalyo.]#16.20 Amasyu mu 16.9-20 Gatigagwamo mmasimbo gamo amafumuke aga uyolo.

Currently Selected:

Marko 16: NNBII

Highlight

Copy