Marko 15

Yesu nkyeni mwa Pilati

(Mat 27.1-2,11-14; Luk 23.1-5; Yoh 18.28-38)

1Nakalinga itolo bo bukile nulubunju, popapo abaputi abakulumba balinkuyobana nabakulumba, nabamanyandagilo, nulukomano losa; balinkumpinya Yesu, balinkumwega nukumbika mmaboko ga Pilati. 2Popapo Pilati alinkundalusya Yesu alinkuti, “Bati, yo ugwe Malafyale gwa ba Yuda?” Umwene alinkwamula alinkuti, “Bo lilyo kuyoba.” 3Abaputi abakulumba balinkumohela sinyingi itolo. 4Popapo Pilati alinkundalusya kangi Yesu alinkuti, “Utikwamula nasimo? Keta nyingi isi bikukohela.” 5Umwene Yesu alinkusita nukwamula nalimo, bunobuno Pilati alinkuswiganika itolo.

Yesu alongigwe ukuti afwege

(Mat 27.15-26; Luk 23.13-25; Yoh 18.39—19.16)

6Bwila pakyaka kya Pasa Pilati ababulilaga yumo umpinyigwa, uyu linga bansumile. 7Lelo alipo yumo uyu ali yoBaraba ingamu, yo apinyigwe lumo nabafulunganiakisu, aba babombile isya bugogi nkutapukana kwabo. 8Popapo ikilundilo kilinkufyuka kwa Pilati, kilinkunsuma ukuti ababombelege bo apa isibile bwila. 9Umwene Pilati alinkubamula alinkuti, “Mukulonda ukuti mbabulilege uNtemi gwa ba Yuda?” 10Namanga asyagenie ukuti abaputi abakulumba balintwele kumyake panongwa ya kabini. 11Abene abaputi abakulumba bo bakisambulenie ikilundilo, ukuti kinsumege Pilati ukubabulila Baraba. 12Umwene Pilati alinkwamula kangi, alinkuyoba nabo alinkuti, “Lelo ndubulege nagwe uyu mukuti yo Malafyale gwa ba Yuda?” 13Panongwa yiyiyi balinkuywega balinkuti, “Nkomele pakipingika.”

14Umwene Pilati alinkubalalusya alinkuti, “Fiki, abombile mbibi siliku?” Abene balinkukindilila ukuywega balinkuti, “Nkomele pakipingika!”

15Loli papo Pilati alondaga ukukikyela ikilundilo, alinkubabulila Baraba. Umwene Yesu bo akomigwe nifikoti, Pilati alinkubapa ukuti bakankomelege pakipingika.

Abasikali bikumwangalila Yesu

(Mat 27.27-31; Yoh 19.2-3)

16Popapo abasikali balinkumwega Yesu balinkubuka nagwe ndupaso lwa nyumba sya bulindililakisu, balinkukibungania ikilundilo kyosa ikya basikali. 17Balinkumfwika unselekesye umfubifu-ubutitu, balinkuluka ikitili kya bunyafyale ikya mifwa, balinkumfwika pantu; 18balinkwanda ukumponia balinkuti, “Tukukuponia gwe Malafyale gwa ba Yuda!” 19Balinkunkoma nulutete pantu, balinkunswela namata, balinkufugama pasi nukumbungulukila. 20Lelo bo bamwangalile, popapo balinkumfula unselekesye umfubifu-ubutitu gula, balinkumfwika imyenda gyake. Balinkusoka nagwe ukuti bakankomelege pakipingika.

Yesu ikukomeligwa pakipingika

(Mat 27.32-44; Luk 23.26-43; Yoh 19.17-27)

21 # Rom 16.13 Balinkunkola umwendanjila yumo uyu isaga nkaya afumile kungunda, Simoni ugwa nkisu kya Kireni, ugwise gwa ba Aliksandara na Rufu, ukuti ampimbile ikipingika kyake. 22Balinkwakufika nagwe Yesu pabuyo ubu batigi Golgota, ko kuti po palupaya. 23Balinkunninga ubwalwa bwa mafilu ubu balungilemo mira; loli alinkukana ukunwa. 24#Salimo 22.18Popapo balinkunkomela pakipingika, balinkuyabana imyenda gyake, balinkukunga ubulagusi ukuti bamwage uyu ikwegaga ugu na ugu. 25Kali kabalilo ka butatu#15.25 Kabalilo ka butatu: ko kuti 9 koloko nulubunju. apa bankomelaga pakipingika.

26Bwalipo ubusimbe bwa nongwa yake pamwanya, ubu bwasimbigwe ukuti, UMALAFYALEGWA BAYUDA. 27#Yes 53.12Palikimo nagwe balinkugikomela iminyambuta mibili, limo ku kiboko ikililo ilingi ku kiboko ikimama.#15.27 Amasimbo gamo gikongelelako: 28 Bunobuno silinku fikapo isi amasimbo gayobile isya kuti, “Balimongenie nabilangomelesyo.” 29#Salimo 22.7; 109.25; Mar 14.58; Yoh 2.19Bope nabandu aba bakindaga papo balinkunhelula nukusukania imitu gyabo balinkuti, “Oho! Gwe kupangula Inyumba ya Kyala gwende nukuyiyenga kangi kumasiku matatu! 30Ipoka gwimwene lelo ika pakipingika!” 31Bunobuno bope nabaputi abakulumba pamopene nabamanyandagilo balinkomolelanila balinkuti, “Abangi abapokaga, loli umwene akabagila ukwipoka! 32Kristi uNtemi gwa Israeli, asulukege lelo ukufuma pakipingika, ukuti tukete nukwitika!” Bope naba bakomeligwe lumo nagwe balinkuntuka.

Ukufwa kwa Yesu

(Mat 27.45-56; Luk 23.44-49; Yoh 19.28-30)

33Lelo pakabalilo ka buhano na kamo#15.33 Buhano na kamo: ko kuti 12 koloko. yilinkugwa ingisi pakisu kyosa, ukufika nkabalilo ka buhano na buna.#15.33 Buhano na buna: ko kuti 3 koloko namayolo. 34#Salimo 22.1Nkabalilo ka buhano na buna, Yesu alinkukuta ilisyu ilikulumba, alinkuti, “Eloi, Eloi, Lama Sabakatani?” Ko kuti, “Gwe Kyala gwangu, gwe Kyala gwangu, undekile fiki?” 35Bamo aba balimile papo bo bapilike balinkuti, “Pilika ikumbilikila Eliya!” 36#Salimo 69.21Popapo yumo alinkubopa alinkuyubika akenda mwa asiki,#15.36 Asiki: ubwalwa bwa mafilu ubu busasile fiyo. alinkupayika kulutete alinkunnwesya, alinkuti, “Ndeke tukete linga Eliya ikwisa kukunsulusya!”

37Umwene Yesu alinkukuta ilisyu ilikulumba, alinkusililika. 38#Kuso 26.31-33Popapo umwenda gwa pibalika ugwa Nnyumba ya Kyala gulinkutafukana pakati, ukufuma kumwanya ukwakufika pasi. 39Umwene sarijenti, uyu alyimile nukuningana nagwe, bo ambwene muno asililikilaga, alinkuyoba alinkuti, “Naloli umundu uyu ali Mwana gwa Kyala.”

40 # Luk 8.2-3 Balipo papo bope nabakikulu bamo aba baketaga pabutalipo; nkilundilo, kyabo alimo Maria Magadalena, na Maria unnagwa Yakobu unnandi nunna gwa Yosefu, kangi na Salome, 41aba bankongaga Yesu nukumbombela bo ali nkisu kya Galilai; nabangi ba bingi itolo aba bafyukile nagwe nkaya ka Yerusalemu.

Ukusyiligwa kwa Yesu

(Mat 27.57-61; Luk 23.50-56; Yoh 19.38-42)

42Lelo bo bwilile namayolo, (namanga lyali isiku lya kwitendekesya, ko kuti ilya kulembukila pisiku lya Sabati), 43popapo alinkwisa Yosefu ugwa ku Arimatia, umundu gwa ndukomano umwimikigwa, uyu yope abugulilaga ubutwa bwa Kyala, alinkuya nkifu itolo alinkubuka nukwakwingila kwa Pilati, alinkugusuma umbili gwa Yesu. 44Umwene Pilati alinkuswiga bo apilike ukuti afwile litasi; bo ambilikile sarijenti, alinkundalusya linga naloli afwile litasi. 45Lelo bo asyagenie ukufuma kwa sarijenti, popapo alinkumpa Yosefu umfimba. 46Popapo Yosefu alinkwakula umwenda umwelu; lelo bo agusulwisye umfimba, alinkuguniembetelela mmwenda gula, alinkugubika mwipumba ili lyasongoligwe ndwalabwe, alinkubungulukisyapo ilibwe pakifigo kya ipumba. 47Abene ba Maria ugwa ku Magadala na Maria unna gwa Yosefu balinkupabona apa umbili gwa Yesu gwabikigwe.

Currently Selected:

Marko 15: NNBII

Highlight

Copy