LUKA 2

Ukupapigwa kwa Yesu

(Mat 1.18-25)

1Popapo mmasiku gala, Kaisari uyu ali yo Augusti ingamu, alinkulagila ululagilo ulwakuti, abandu nkisu kyake kyosa babaligwege. 2Ukubaligwa ukutasi uku, kwaliko apa Kireni ayege ndindililakisu kya Siria. 3Popapo abandu bosa balinkubuka kukusimbigwa, uyu kukaya kake, uyu kukaya kake. 4Popapo yope na yu Yosefu alinkufyuka ukufuma mu Galilai, nkaya ka Nazareti, alinkubuka mu Yudai nkaya ka Davidi aka batigi Betelehemu ingamu, namanga ali gwa nkikolo kya Davidi, ali gwa nduyungu lwake; 5alinkubuka kukusimbigwa pamopene na Maria unsingiligwa gwake bo ali nikifuba. 6Lelo bo bali papo, po lilinkwisa ilisiku lya kupapila umwana. 7Popapo Maria alinkupapa umwanake ugwa kipanda undumyana, alinkunniembetelela mmyenda, alinkundambalika nkipondo,#2.7 Nkipondo: mo mbulyelo ng'ombe. papo ubuyo bukalimo nnyumba ya bahesya.

Abatimi ba ng'osi nabandumi ba Kyala

8Lelo balimo bope nabatimi nkisu mumo, aba bayaga ndukubo, bo balindililaga pakilo imitimo gyabo. 9Popapo ugwandumi gwa Ntwa alinkwima nkyeni mmyabo, ubukulumba bwa Ntwa bulinkubamulika kosa na kosa, abene lulinkubaga ulutende ulukulumba. 10Popapo ugwandumi alinkubabula alinkuti, “Mungatetemaga! Kabuno mbatwalile inongwa inunu isya lusekelo ulukulumba, ulu lukubagaga abandu bosa; 11namanga apapigwe umusyugu nkaya ka Davidi uMpoki, uyu yo Kristi uNtwa. 12Iki kyo kimanyilo kumyinu, mwisakwakumwaga umwana aniembeteleligwe mmyenda, alambalele nkipondo.” 13Nakalinga itolo kilinkuboneka palikimo nugwandumi ikilundilo kya kumwanya, kilinkuntufya Kyala kilinkuti,

14“Ulwimiko luyeko kwa Kyala kumwanya,

nulutengano luyemo nkisu kubandu aba ikyelilemo.”

15Lelo bo abandumi ba Kyala basokilepo bafyukile kumwanya, popapo abatimi bala balinkuyobana balinkuti, “Nduko atubukege lilino nkaya ka Betelehemu, tukakete inongwa isi sibonike, isi atubulile uNtwa.” 16Popapo balinkukuya ukubuka, balinkwakubaga Maria na Yosefu, na yu mwanike bo alambalele nkipondo. 17Lelo bo bambwene umwanike, popapo balinkubapangila inongwa isi babuligwe isya mwanike yuyuyu. 18Popapo bosa aba bapilikaga, balinkuswiganika pali isi babuligwaga nabatimi. 19Loli umwene Maria alinkusibika inongwa sisisi, alinkusinogona mundumbula yake. 20Popapo abatimi balinkugomoka, balinkumwimika nukuntufya Kyala pali syosa isi basipilike nukusibona, bo mumo abandumi ba Kyala bababulile.

Bikumpa Yesu ingamu

21 # Levi 12.3; Luk 1.31 Lelo bo lifikile ilisiku lya buhano nabutatu ilya kumbutilako, balinkumpa ingamu ya Yesu, yiyo yayobigwe nugwandumi bo akali nukuyamo munda munna.

Yesu ikutwaligwa Nnyumba ya Kyala

22 # Levi 12.6-8 Lelo bo lifikile ilisiku lya kwelusigwa kwabo, bo mumo luyilile ululagilo lwa Mose, popapo balinkuntwala umwanike ku Yerusalemu, balinkwakumbonesya kuNtwa, 23#Kuso 13.2,12(bo lilyo lisimbigwe ndulagilo lwa Ntwa ili likuti, “Tosa utwana utunyambala utwigulanjila kubannabo, tukuyobigwaga ukuya twikemo kuNtwa.”) 24Balinkutwala ifya kwikemekesya, bo lilyo liyobigwe ndulagilo lwa Ntwa ili likuti, “Ingungubiya ibili, pamo utwana twa ngunde tubili.”

25Pakabalilo kala alimo umundu mu Yerusalemu uyu ali yo Simeoni ingamu, yo ali mundu ungolofu untila-Kyala, uyu alugulilaga ulusubisyo lwa Israeli, yope na Mbepo Mwikemo alinkuya pamyake. 26Mbepo Mwikemo alimwigulile ukuti atisakukubonaga ukufwa, bo akambona tasi Kristi gwa Ntwa. 27Simeoni alinkwisa Nnyumba ya Kyala bo Mbepo ansukenie; lelo bo abapapi bikwingila nagwe umwanike Yesu, ukuti bambombele ukufwana nulwiho lwa mundagilo, 28popapo Simeoni alinkumwambilila mmaboko, alinkuntufya Kyala alinkuti,

29“Lilino lelo gwe Ntwa po undekesyege umbombi gwako,

abukege ndutengano, bo mumo gwayobile;

30namanga amaso gangu gabubwene ubupoki bwako,

31ubu ubutendekekisye ngani nkyeni mbandu bosa;

32 # Yes 42.6; 49.6; 52.10 ulumuli lwa kubamulika abapanja,

nukubatwalila ulwimiko abandu bako abanya Israeli.”

33Umwene ugwise na yu nna, balinkuswiga pali isi syayobigwaga isya mwanike. 34Popapo Simeoni alinkubasaya, alinkumbula Maria unna alinkuti, “Keta umwanike uyu yo abikigwe naKyala panongwa yakubapyuta nukubapoka bo ubusulumanie ubu buliti bwingi mwa Israeli, nukuya kimanyilo kya kukanigwa. 35Nayuyugwe ulubo lwisakukulasaniaga mmoyo gwako — ukusikingula inyinogono isi sibilile mundumbula syabo.”

36Lelo alipo yumo unsololi unkikulu, uyu ali yo Ana ingamu, umwana gwa Fanueli, ugwa nkikolo kya Asheri, yo afikilepo pabukangale. Umwene agonile pandume ifyinja fihano na fibili ukufuma apa beganege, 37bunobuno ali mfwilwe ukufika apa ali nifyinja amalongo mahano na matatu na fina (84), alinkusita nukusokamo Nnyumba ya Kyala, alinkumbombela Kyala, alinkufipika ifyakulya nukwiputa pamusi na pakilo. 38Yo alinkwisa pakabalilo kako, alinkugwa ulupi kwa Kyala, alinkubabula isya mwanike, bosa aba babugulilaga ubutabuli bwa Yerusalemu.

Ukugomokela ku kaya ka Nazareti

39 # Mat 2.23 Umwene Yosefu na Maria bo bamalisisye syosa ukufwana nindagilo sya Ntwa, popapo balinkugomoka ukubuka kumyabo, nkaya ka Nazareti, mu Galilai. 40Umwene umwanike alinkukula, alinkukaka, alinkwisula amahala, lyope nipyana lya Kyala lilinkuya pamyake.

Undumyana Yesu ali Nnyumba ya Kyala

41 # Kuso 12.1-27; Kukumbu 16.1-8 Bwila pakyinja abapapi bake babukaga ku Yerusalemu kuKyaka kya Pasa. 42Umwene Yesu bo ali nifyinja kalongo na fibili, popapo balinkufyuka ukubuka kuKyaka kya Pasa bo mumo lwayilile ulwiho. 43Lelo bo Ikyaka kimalike balinkugomoka, umwene umwanike Yesu alinkusyala mu Yerusalemu; abapapi bake balinkusita nukumanya. 44Papo batigi ali nkilundilo kya bandu, balinkwenda injila ya isiku limo, balinkundonda mbakamu babo na mbinabo; 45lelo bo bakamwaga, popapo balinkugomoka ukubuka mu Yerusalemu nkundonda. 46Bo gakindilepo amasiku matatu, balinkwakumwaga Nnyumba ya Kyala itugesye pakati pabamanyisi, ikubapilikisya nukubalalusya, 47loli bosa aba bampilikisyaga, balinkuswiganika fiyo muno asyaganikisyaga inongwa na muno amulilaga. 48Lelo bo bambwene, popapo balinkuswiga, umwene unna alinkumbula umwanike alinkuti, “Gwe mwagwe, nongwa ya fiki utubombile bo sisisi? Keta uguso nanine tukulondile nubusulumanie.” 49Umwene alinkubamula alinkuti, “Mwandondelaga fiki? Ngimba mukamenye ukuti kumbagile une ukuya nnyumba ya Tata?” 50Loli balinkusita nukulyagania ilisyu ili ababulaga.

51Popapo Yesu alinkusuluka nabo ukubuka nkaya ka Nazareti; alinkwilamba kumyabo, loli unna alinkusibika syosa sisisi mundumbula yake. 52#1 Samu 2.26; Mbupi 3.4Umwene Yesu alinkongelapo ukukula mmahala na mbukusi, alinkukaba ilipyana kwa Kyala na kubandu.

Currently Selected:

LUKA 2: NNBII

Highlight

Copy