YOHANI 13

Yesu ikubasugususya mmalundi abafundigwa bake

1Lelo bo Ikyaka kya Pasa kikali ukufika, popapo Yesu alinkumanya ukuti akabalilo kake aka kusokelamo nkisu ukubuka kuGwise kisile. Bo papo abaganile abandu bake nkisu, popapo alinkubagana ukufika kubumalikisyo.

2Yesu alinkutugala pakulya ifyakulya ifya mayolo nabafundigwa bake. Umwene umohesi asibikilemo nganila mundumbula ya Yuda gwa nkisu kya Karioti unnya Simoni, isya kumbika Yesu mmaboko ga balugu. 3Yesu asimenye ukuti uGwise ampele fyosa mmaboko gake, nukuti afumile kwa Kyala, kangi ikubukaga kwa Kyala. 4Popapo alinkusumuka apa balyaga, alinkubika unselekesye gwake pambali, alinkwinienga ikitambala munsana. 5Popapo alinkukusya amisi mwibeseni, alinkwanda ukubasugususya mmalundi abafundigwa bake, alinkugapyasila nikitambala iki aliniengile munsana. 6Popapo alinkufika pa Simoni Peteri. Umwene Peteri alinkundalusya Yesu alinkuti, “Gwe Ntwa, gwe gwati usugususyege amalundi gangu ugwe?” 7Popapo Yesu alinkumwamula alinkuti, “Isi nikubomba syo ukasimanya ugwe lilino, loli kwisakusyaganiaga panyuma.” 8Umwene Peteri alinkumbula Yesu alinkuti, “Utisakusugusyamo siku amalundi gangu.” Popapo Yesu alinkumwamula alinkuti, “Linga ndikukusugususya ugwe, bo tukaya pamopene.” 9Umwene Simoni Peteri alinkumbula alinkuti, “Gwe Ntwa, gomma ga malundi gene, loli usugususyege gope na ga maboko na gu ntu.” 10Umwene Yesu alinkumbula alinkuti, “Uyu ogile yo atikulonda ukoga kangi, loli mu mmalundi mwene, namanga bo mwelu gwesa itolo; nanumwe muli belu, loli mukaya belu mwesa.” 11(Papo alimmenye uyu ayaga pakumbika mmaboko ga balugu, po apa atigi, “Mukaya belu mwesa.”)

12 # Luk 22.27 Lelo bo agasuguswisye amalundi gabo, bo afwele kangi imyenda gyake atugele, popapo alinkubalalusya alinkuti, “Kali musyagenie isi mbabombile? 13Umwe mukunjoba iya Mmanyisi niya Ntwa, lelo syo mukutalusya, buno bo ndi naloli. 14Lelo linga une ne ndi Mmanyisi kangi ne ndi Ntwa nikubasugususya amalundi, po mubagile nanumwe ukusugususania amalundi. 15Buno mbapele aka kuketelamo, ukuti isi mbabombile, syo mubombege nanumwe. 16#Mat 10.24; Luk 6.40; Yoh 15.20Naloli nikubabula une nikuti, untumwa akankinda ubukulumba uyu antumile. 17Linga musimenye sisisi, po muli basayigwa linga mukusibomba.

18 # Salimo 41.9 “Ndikubayoba mwesa; une mbamenye aba mbasalile; loli ukuti isi sisimbigwe mo simalikilege isya kuti, ‘Uyu ikulya nanine ikisyesye, yo ansambukile une.’ 19Ukwanda lilino nikubabulila ngani bo sikali ukuboneka, ukuti bo sikuboneka, mwise mwitikege ukuti une yo yuyune. 20#Mat 10.40; Mar 9.37; Luk 9.48; 10.16Naloli nikubabula une nikuti, uyu linga ikumwambilila uyu nikuntuma une, yo ikunyambilila na yuyune, yope na uyu linga ikunyambilila une, yo ikumwambilila uyu alindumile une.”

Yesu ikunsosola uyu ikumbikaga mmaboko ga balugu

(Mat 26.20-25; Mar 14.17-21; Luk 22.21-23)

21Umwene Yesu bo ayobile sisisi, popapo alinkusenyendeka mumbepo syake, alinkusisimikisya alinkuti, “Naloliloli nikubabula une nikuti, yumo mmyinu isakumbikaga mmaboko ga balugu.”

22Popapo abafundigwa bake balinkuketana, balinkwalangana itolo nisya uyu ambalaga. 23Lelo alipo yumo mbafundigwa bake uyu Yesu alinganile, yo alyegamile kukipambaga kya Yesu bo ali pakulya; 24popapo Simoni Peteri alinkunkopesya alinkuti, “Ulalusye, kali ywani uyu ikumbala?” 25Umwene umfundigwa yula alinkwegamila kukipambaga kya Yesu, alinkundalusya alinkuti, “Gwe Ntwa, yo aliku?” 26Popapo Yesu alinkwamula alinkuti, “Yo uyu nikuya pakumpa akamenya bo njubike mumposi.” Lelo bo ayubike akamenya, alinkukega, alinkumpa Yuda ugwa nkisu kya Karioti, unnya Simoni. 27Lelo bo Yuda ambilile akamenya, popapo Setano alinkwingila mmyake. Umwene Yesu alinkumbula alinkuti, “Isi kubomba, bombaga mbibimbibi.” 28Muli aba balyaga, akalipo yumo uyu asyagenie, ukuti nongwa ya fiki ayobaga inongwa bo sisisi kumyake. 29Papo Yuda yo uyu akolelaga inyambi ya ndalama, bamo balinkwinogona ukuti Yesu ikumbula ikuti abuke kukula ifi fikulondigwa paKyaka, pamo ukuti akabapege fimo abalondo. 30Lelo bo Yuda ambilile akamenya kala, popapo mbibimbibi itolo alinkusoka panja. Loli pali po pakilo.

Ululagilo ulupya

31Lelo bo Yuda asokile panja, popapo Yesu alinkuyoba alinkuti, “Lilino po Nnyamundu akabile ubukulumba, bope nubukulumba bwa Kyala bubonekile. 32Linga ubukulumba bwa Kyala bubonekile mmyake, po yope na Kyala isakububonekesyaga ubukulumba bwa Nnyamundu nakalinga itolo mmyake yuyo. 33#Yoh 7.34Mwe banike umwe, kasyele akabalilo kapimba itolo ukuya nanumwe; mwisakundondaga, loli bo mumo nababulile abaYuda ukuti kuno nikubuka, ko mukabagila ukwisako, mo mumo nikubabulila nanumwe. 34#Yoh 15.12,17; Yoh 3.23; 2 Yoh 5Lilino nikubapa ululagilo ulupya ulwa kuti, Amugananege. Mugananege bo papo nanine mbaganile. 35Linga mukuganana po bisakubamanyaga bosa abandu ukuti muli bafundigwa bangu.”

Yesu ikuyobela ngani isya kwileya kwa Peteri

(Mat 26.31-35; Mar 14.27-31; Luk 22.31-34)

36Popapo Simoni Peteri alinkundalusya Yesu alinkuti, “Gwe Ntwa, kubukaga kugu?” Umwene Yesu alinkwamula alinkuti, “Kuno nikubuka ukabagila ukungonga lilino, loli kwisakungongaga panyuma.” 37Popapo Peteri alinkundalusya alinkuti, “Gwe Ntwa, fiki ngabagila ukukukonga lilino? Une nipele na ku kukufwila ugwe.” 38Umwene Yesu alinkwamula alinkuti, “Ngimba naloli gwipele ukumfwila une? Naloli nikukubula une nikuti, bo ingongobe yikali ukubilikila, kwisakwileya kumyangu katatu.

Currently Selected:

YOHANI 13: NNBII

Highlight

Copy