YOHANI 14
14
Yesu yo njila iyi yikulabila kwa Tata
1“Mungalalamukaga indumbula syinu; amumwitikege itolo Kyala, nanine munyitikege. 2Nnyumba ya Tata bwingi ubuyo; linga bukalimo angali mba bulile, buno nsumwike kukubatendekekesya ubuyo umwe. 3Lelo napa nikubuka kukubatendekekesya ubuyo, ngwisa kangi, nisakubambililaga kumyangu, ukuti kuno ndiko une ko nanumwe mukayege. 4Kangi kuno nikubuka muyimenye injila.”
5Popapo Tomasi alinkumbula alinkuti, “Gwe Ntwa, tukakumanya nakuno kubuka, lelo po tukuyimanyaga bulebule injila?” 6Umwene Yesu alinkumbula alinkuti, “Yo une ne njila, ne bwanaloli kangi ne bumi; nayumo atikwisako kwa Tata, pene papo linga ikwendela mmyangu. 7Linga mwalimenye une, po angali mummenye yope na yu Tata; ukwanda lilino mummenye kangi mumbwene.”
8Popapo Filipu alinkumbula alinkuti, “Utunangisyege uGuso, bo situfwene.” 9Umwene Yesu alinkumbula alinkuti, “Ngonile nanumwe akabalilo akatali, na ulu ukali ukamanya une gwe Filipu? Uyu linga ambwene une, bo ambwene na Tata; po fiki apa kuti utunangisyege uGuso? 10Syo utikwitika ugwe ukuti une ndi mwa Tata, yope Tata ali mmyangu? Amasyu aga nikubabula, ndikwagula nimwene; loli Tata uyu ali mmyangu, yo ikubomba imbombo syake. 11Amunyitikege ukuti une ndi mwa Tata, yope na Tata ali mmyangu; linga mutikunyitika panongwa iyi, po munyitikilege panongwa ya mbombo syene. 12Naloli nikubabula une nikuti, uyu linga ikunyitika une, imbombo isi nikusibomba une yope isakusibombaga; kangi isakubombaga ningulumba ukusikinda isi, papo nikubuka kwa Tata. 13Fyosa ifi linga mukusumila mungamu yangu, fyo nikubombaga, ukuti Tata akabilege ubukulumba mu mMwana. 14Fyosa ifi linga mukusumila mungamu yangu, fyo nisakubabombelaga.
Ulufingo lwa Mbepo Mwikemo
15“Linga munganile une, po mwisakusikongaga indagilo syangu. 16Une nisakunsumaga Tata, yo isakubapaga Unjili uyungi, ukuti ayege nanumwe bwila; 17yu Mbepo gwa bwanaloli, uyu ikisu kikamanya ukumwambilila namanga kitikumbona, kangi kitikummanya; loli umwe mummenye, buno ikwitugasya nanumwe, kangi isakuyaga mmyinu.
18“Ndisakubaleka bapina umwe, nikwisa kumyinu. 19Pasyele panandi po ikisu kitikumbonaga kangi, loli umwe mwe mukumbonaga, papo une ndi mumi, po nanumwe mukuyaga bumi. 20Pisiku lilyo, mwisakumanyaga ukuti une ndi mwa Tata, kangi umwe muli mmyangu, bo apa nanine ndi mmumyinu. 21Uyu linga ali nasyo indagilo syangu, kangi ikusikonga, yo uyu anganile une; lelo uyu anganile une, yo yope Tata isakunganaga, nanine nisakunganaga, kangi nisakwibonesyaga kumyake.” 22Popapo Yuda (yomma ugwa nkisu kya Karioti) alinkundalusya alinkuti, “Gwe Ntwa, sili bo bulebule apa kuti kwibonesyaga ku kumyitu, loli kukisu komma?” 23Popapo Yesu alinkumwamula alinkuti, “Linga umundu anganile une, yo ikulikongaga ilisyu lyangu, yope na Tata ikunganaga, yo tukwisaga kumyake, kangi tukupapelaga ukuya po pabuyo bwitu pamyake. 24Uyu linga akangana une, yo atikugakonga amasyu gangu; ilisyu ili mukulipilika likaya lyangu, loli lya Tata uyu alindumile une.
25“Sisisi syo mbabulile umwe bo ngali ndi nanumwe. 26Loli umwene Unjili, yu Mbepo Mwikemo, uyu Tata isakuntumaga mungamu yangu, yo isakubamanyisyaga syosa, nukubakumbusya syosa isi mbabulile. 27Nikubalekela ulutengano, nikubapa ulutengano lwangu; ndikubapa bo mumo ikisu kikubapela. Mungalalamukaga indumbula syinu, kangi munganyololokaga. 28Mupilike apa nababulaga ukuti, nikubukaga, kangi nikwisaga kumyinu. Linga mwalinganile, po angali musekile apa nikubuka kwa Tata, namanga Tata angindile ubukulumba une. 29Lilino mbabulile nganila bo sikali, ukuti bo sikuboneka mwise mwitikege. 30Ndisakongelapo ukuyoba nyingi nanumwe, buno ikwisa unkulumba gwa kisu. Umwene akaya namaka kumyangu; 31loli isi syo sikwisa, ko kuti ikisu kimanyege ukuti une nunganile Tata, nukuti nikubomba bo mumo andagilile Tata. Amusumukege, tusokepo apa.”
Currently Selected:
YOHANI 14: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
