Luqaasa 6

Sambaata Bonchanaw Bessii?

(Maato 12:1-8; Mar 2:23-28)

1Issi Sambaata gallas Yesuusi giste gade giddora aadhees. Yesuusa tamaareti tiya banga duuthidi banta kushen shirkidi moosona.#Zaare 23:25. 2Shin Farsaaweta giddofe issoti issoti, “Sambaata gallas oothanaw bessonnaba ayis oothetii?” yaagidosona.

3Yesuusi entako zaaridi, “Dawiti koshatida wode baara de7eysatara issife oothoysa nabbabibeketii?#1 Same 21:1-6. 4Xoossa Keethi gelidi Ayhude kahineta xalaalas bessiya daabbuwa mis; baara de7eysataska immis” yaagis.#Leewe 24:9. 5Qassi Yesuusi, “Asa Na7ay Sambaata Godaa” yaagis.

6Hara Sambaata gallas Yesuusi ayhude woosa keethi gelidi tamaarsees. He bessan ushacha kushey silida issi asi de7ees. 7Higge astamaaretinne Farsaaweti iya mootanaw gaaso koyidi Sambaata gallas pathiko be7ana gidi naagoosona. 8Shin Yesuusi enta qofaa eridi kushey silida uraako, “Dendada asaa giddon eqa” yaagis. Urayka dendi eqis.

9Yesuusi, “Ane ta hintena issiba oychayis; Sambaata gallas oothanaw bessey lo77obayeye iitabayee? Shempo ashoye woyko dhayso?” yaagis.

10Qassi Yesuusi iya yuushuwan de7iya asaa yuushshi xeellidi uraako, “Ne kushiya piddi ootha” yaagis. Urayka I gidaysada oothin kushey paxis. 11Shin higge astamaaretinne Farsaaweti daro yilotidosona. Yesuusa bolla ay oothino gidi banta giddon maqetidosona.

Tammanne Nam7u Hawaareta

(Maato 10:1-4; Mar 3:13-19)

12He wode gallasatape issuwan Yesuusi woossanaw zuma bolla keyis. Qamma kumethi woossishe aqis. 13Wontethe ba tamaareta xeegidi enta giddofe tammanne nam7ata dooridi, entana, “Hawaareta” gidi sunthis. 14Entika, Phexroosa gidi sunthida Simoona, iya ishaa Indiriyasa, Yayqooba, Yohaanisa, Filphoosa, Bartelemoosa, 15Maatosa, Toomasa, Ilfiyoosa na7aa Yayqooba, ba biittas mishetiya Simoona, 16Yayqooba na7aa Yihudanne Yesuusa aathidi immida Asqoroota Yihuda.

17Yesuusi entara issife zumaape wodhidi demba bessan eqis. Iya tamaaretape daroti he bessan de7oosona. Yihuda biitta ubbaafe Yerusalaamepe, Xiroosapenne Sidoona abba gaxape yida daro asay de7ees. 18Enti yiday, I tamaarsiyaba si7anawunne banta hargiyafe paxanaasa. Tuna ayyaanan waayetiya asatika paxidosona. 19Wolqi iyape keyidi asa ubbaa pathiya gisho asay iya bochanaw koyoosona.

20Ba tamaareta xeellidi haysada yaagis:

“Hinteno, manqoto, hinte anjetidaysata;

Xoossaa kawotethay hintesa.

21Hinte ha77i koshateysati anjetidaysata,

hinte kallana.

Hinte ha77i yeekeysati anjetidaysata

hinte miicana.

22Asay hintena Asa Na7aa gisho,

ixiya wode,

hintena hiliya wode,

hintena enti toochiya wodenne,

iita sunthu enti hintew immiya wode

hinte anjetidaysata.#Leemi 4:14.

23“Heko, hinte woytoy salon gita gidiya gisho he wode ufaysan gupite. Ayis giiko, beni enta aawati nabeta bolla hessada oothidosona.”#2 Taari 36:16; Hawa 7:52.

24“Shin dureto hintena ayye!

hinte ha77i lo77o duussaa ekideta.

25Ha77i kallidaysato hintena ayye!

hinte koshatana.

Ha77i miiceysato hintenosho

hinte kayotananne yeekana.

26Asi ubbay hinte lo77otetha xalaala odiya wode hintena ayye!

Enta aawati beni wordancho nabeta bolla hessada oothidosona.

Hinte Morketa Dosite

(Maato 5:38-48; 7:12)

27“Shin tana si7iya hintew ta odayis; hinte morketa dosite; hintena ixeysatas lo77oba oothite. 28Hintena baaddeyisata anjite, hintena naaqeysatas woossite. 29Issi bagga shakala baqeysas hanko bagga bessa. Ne laxana ekana geysas ne shamziya gujada imma. 30Nena woossiya ubbaas imma; neepe ekida oonaka zaaro gada oychofa. 31Asay hintew oothana mela hinte koyaba ubbaa hinteka asaas oothite.#Maato 7:17.

32“Hinte, hintena dosiya asata xalaala dosiko, ay galati hintew de7ii? Hari attoshin, nagaranchotika bantana doseyisata dosoosona. 33Hintew lo77oba ootheyisata xalaalas lo77oba oothiko hintew ay galati de7ii? Nagaranchotika hessada oothosona. 34Tal7e zaarana asa xalaalas hinte tal7iko ay dumma galatetetii? Nagaranchotika guye zaarana asi be7idi tal7oosona.”

Hara Asa Bolla Pirdofa

35“Shin hinte morketa dosite; entaw lo77oba oothite. Guye ekanaw qoponna tal7ite. Hessan hinte ekana woytoy gita gidana. Hinte Ubbaafe Bolla Xoossaa nayta gidana. I bana galatonaysatasinne iitatas keeha. 36Hinte aaway keeha gidoysada hinteka keeha gidite.

37“Asa bolla pirdofite; hinte bolla pirdetenna. Hinte boretonna mela oonaka boropite. Atto giite; Xoossay hintew atto gaana. 38Immite; hintew imetana. Hinte makidaban hintew zaari maketana, ubbaraka lo77o makiyaban baqidi, suuddi kunthidi, laaletana gakanaw hintew maketi imetana” yaagis.

39Qassika Yesuusi yaagidi entaw leemiso odis; “Qooqey qooqe kaalethanaw danda7ii? Kaalethiko nam7ayka woli ekidi aafon wullokonayee?#Maato 15:14. 40Tamaarey astamaarepe aadhenna. Shin loythi tamaarida uray ba astamaariyatho hanees.#Maato 10:24-25; Yoha 13:16; 15:20.

41“Ne ishaa ayfen de7iya buuriya ayis be7ay? Ne ayfen de7iya tuussu daaneysa ayis be7ikii? 42Ne ayfen de7iya tuussu daaneysa be7onna ne ishaako, ‘Ta ishaw, ne ayfen de7iya buuriya kesso’ gaanaw waana danda7ey? Neno cubbuwaw, koyrottada ne ayfen de7iya tuussu daaneysa kessa. Hessafe guye, ne isha ayfen de7iya buuriya kessanaw geeshshada xeellana.

Mithinne Iya Ayfe

43“Lo77o mithi iita ayfe ayfena; hessadaka iita mithi lo77o ayfe ayfena. 44Ayfe ayfiya mithi ubbay ba ayfen eretees. Agunthafe balase ayfey maxetenna qassi laadepe woyne ayfey maxetenna.#Maato 12:33. 45Lo77o asi ba wozanan kumida lo77obaape lo77oba kessees. Iita asi ba wozanan kumida iitabaape iitabaa kessees. Asi ba wozanan kumidi palahidabaape ba doonan odetees.#12:34.

Keethe Keexiya Nam7u Asata

(Maato 7:24-27)

46“Ta geysa ootheketa, shin yaatin ayis tana, ‘Godaw, Godaw, geetii?’ 47Taako yeynne ta qaala si7idi poliya ubbay oona daaniyako ta hintena bessaana. 48I keethe keexanaw ziqi oothi, olla bookidi, garsan de7iya zaalla bolla keethe essida cinca ura daanees. Di7oy di77idi he keetha sugis, shin minthidi keexida gisho, qaaxanaw danda7ibeenna. 49Shin ta qaala si7idi oothonay ba keetha shafe bolla keexida ura daanees. Di7oy di77idi he keethaa sugida wode ellesidi kundis. He keethay wolqaama kundethi kundis” yaagis.

Currently Selected:

Luqaasa 6: GFBLVF

Highlight

Copy