Luqaasa 7
7
Mato Halaqaa Ammano
(Maato 8:5-13; Yoha 4:43-54)
1Yesuusi hessa ubbaa asaa sinthan tamaarsidi ongidaape guye, Qifirnahooma katamaa bis. 2He bessan issi mato halaqay de7ees. I daro dosiya aylley hargetidi hayqos gakis. 3I Yesuusaba si7ida wode ba aylliya pathana mela iya woosso gidi issi issi Ayhude cimata Yesuusako kiittis. 4Kiitetidaysati, Yesuusako bidi, “Ne iyaw haysa oothanaw bessees. 5Ayis giiko, ha uray nu asaa dosees, ayhude woosa keethaaka keexis” gidi minthi woossidosona 6Yesuusika entara bis.
Mato halaqaa sooko matiya wode ba laggeta iyako kiittidi, “Godaw, ta kaarape garsan ne gelanaw ta bessonna gisho, daaburopa. 7Taka tana ne sinthe shiiqanaw bessiya asi gada qopike. Shin ne issi qaala oda; ta aylley paxana. 8Taw taape bollara halaqay de7ees, taape garsan ta kiittiya wotaadareti de7oosona. Issuwa, ‘Ba’ giiko bees, hankuwa, ‘Haaya’ giiko yees. Ta aylliyako, ‘Hanno ootha’ giiko oothees” yaagis.
9Yesuusi hessa si7ida wode malaaletis. Guye simmidi baara yaa asaako, “Taani hintew tuma odayis; hari attoshin Isra7eelenka haysa mela gita ammano demmabike” yaagis. 10Kiitetida asati soo simmiya wode aylley paxin demmidosona.
Am7e Na7a
11Guutha wodepe guye Yesuusi Nayne katamaa bis. Iya tamaaretaranne hara daro asati iyara bidosona. 12I katamaa gelana haniya wode aha tookida daro asati katamaape keyoosona. Hayqida na7ay ba aayes issuwa, iyaka am7o gidada de7awusu. Katama asaape daroti iira de7oosona. 13Goday iyo be7ida wode qadhetidi, “Yeekofa” yaagis.
14Shiiqidi hala bochin tookida asati eqidosona. Yesuusi, “La, yalagaw denda” yaagis. 15Hayqidaysi dendi uttidi oda oykis. Yesuusi na7aa ekidi aayes immis.
16Asa ubbay yashetidi, “Gita nabey nu giddon dendis; Xoossay ba asaa be7is” yaagidi Xoossaa galatidosona. 17Iya sunthay Yihudaninne he heeran de7iya biitta ubban si7etis.
Yesuusanne Xammaqiya Yohaanisa
18Xammaqiya Yohaanisa tamaareti hessa ubbaa Yohaanisas odidosona. I enta giddofe nam7ata xeegidi, 19“Yaana geetetiday neneyee? Woyko haraa naagino?” yaagidi oychite gidi Godaako kiittis.
20Asati “Yesuusako bidi, Xammaqiya Yohaanisi, ‘Yaana geetetiday neneyee? Woyko haraa naagino?’ giite gidi nuna neeko kiittis” yaagidosona.
21He saatenka Yesuusi daro asaa hargiyafe pathis. Tuna ayyaanata kessis, qooqida ayfiyaka xeelisis. 22Yohaanisa matape kiitetidi yidaysatako, “Bidi hinte be7idaysanne si7idaysa Yohaanisas odite. Ayfe qooqeti xeelloosona, gundati birshetidi hemetoosona, baro harganchoti geeyosona, tulleti si7oosona, hayqidaysati hayqope dendoosona, manqotas Wongelay sabbaketees.#Isa 35:5-6; 61:1. 23Tanan dhubetonna oonika anjetidaysa.”
24Yohaanisi kiittidaysati bidaape guye Yesuusi asaas Yohaanisaba yaagidi odis: “Hinte ay be7anaw mela biitta keydetii? Carkoy qaathiya maata be7anaseyee? 25Yaatin, ay be7anaw keydetii? Koyse ma7o ma7ida asaa be7anaseyee? Koyse ma7o ma7idaysatinne sa7i injetida asay kawo gadhon de7oosona. 26Yaatin, ay be7anaw keydetii? Nabiya be7anaseyee? Ee, ta yaagayis: hinte be7anaw keyday nabepe aadheysa.
27“ ‘Ne ogiya ne sinthan giigisiya
ta kiitanchuwa neepe sinthe ta kiittana’#Milki 3:1.
geetetidi xaafetiday iyassa. 28Ta hintew odayis; maccasape yeletidaysata giddofe Yohaanisape aadhey baawa. Xoossaa kawotethan ubbaafe guuxeysi, I ubbaafe gita gidana” yaagis.
29Hari attoshin, Yesuusa qaala si7ida qaraxa qanxiseysati ubbay Yohaanisa kushen xammaqetidi Xoossay xillo gideysa qoncisidosona.#Maato 21:32; Luqa 3:12. 30Shin Farsaawetinne higge astamaareti Yohaanisa kushen xammaqetonna ixidi Xoossaa zoriya leqsidosona.
31Yesuusi kaallidi haysada yaagis: “Hiza, ha wodiya yeletethaa aybira daaniso? Entika oona daanonna? 32Giya giddon uttidi woli xeegidi, ‘Nu hintew suusul7e punnin, hinte yexeketa. Nu sabbidi zeleelin, hinte yeekeketa’ giya nayta daanosona. 33Xammaqiya Yohaanisi moonnanne uyonna yin, ‘Iita ayyaanara de7ees gideta.’ 34Asa Na7ay mishenne uyishe yin, ‘Yarambanne ushshancho, qaraxa qanxiseysatanne nagaranchota dabbo’ gideta. 35Hiza, cincatethaa tumatethay iya nayta ubbaa matan eretis” yaagis.
Yesuusa Shitto Tiyida Issi Maccasiw
36Issi Farsaawey Yesuusa kathi muzanaw ba soo xeegis. I Farisaawiya soo bidi gayta bolla uttis. 37He kataman issi nagarancho maccasi, Yesuusi Farisaawiya son gibira bolla de7eysa si7ida wode daro al7o philqaaxe shitto ekada yasu.#Maato 26:7; Mar 14:3; Yoha 12:3. 38Yesuusape guye baggara, iya tohuwa matan eqada yeekashe iya tohuwa ba afuthaara laakothawusu. Ba binaanara iya tohuwa quchashenne yeerashe shitto tiyasu.
39Gibira giigisida Farsaawey hessa be7ida wode ba wozanan, “Haysi nabe gidiyako ha maccasiya, iya bochiyara ooneko qassi iya nagarancho gideysaka I eranashin” yaagis.
40Yesuusi, “Simoona, ta new odiyabay de7ees” yaagis.
I, “Astamaariyaw, taw oda” yaagis.
41Yesuusi iyako, “Nam7u asati issi uraape miishe tal7idosona. Issoy ichashu xeetu bira hankoy qassi ishatamu bira tal7idosona. 42Nam7ayka tal7iya cigganaw xoonetin, nam7ataska tal7iya maaris. Hiza, ha nam7atape he uraa daro dosanay new oona daani” yaagis.
43Simooni, “Daro acoy maaretida uray daro dosana daanees” yaagis. Yesuusi, “Ne tuma pirdadasa” yaagis. 44Hessafe guye, Yesuusi maccaseeko simmi xeellidi, Simoonako, “Hanno maccasiw be7ay? Taani ne soo gelin hari attishin, ne taw toho haathe immabaaka, shin iya ta tohuwa ba afuthan laakothada ba binaanan quchasu. 45Neeni tana yeera ekabaaka, shin iya ta ne soo gelosape doomada ta tohuwa yeero aggabuku. 46Neeni ta huuphiyan zayte tiyabaka, shin iya ta tohuwa shitto tiyawusu. 47Iya tana daro dosida gisho, I daro nagaray atto geetetis. Guutha nagari atto geetetida uray guuthara dosees.”
48Yesuusi maccaseeko, “Ne nagaray atto geetetis” yaagis.
49Iyara issife gaytan uttidi miya imathati, “Nagara atto yaagey, I haysi oonee?” yaagidi banta wozanan qopidosona.
50Yesuusi maccaseeko, “Ne ammanoy nena ashshis; saro ba” yaagis.
Currently Selected:
Luqaasa 7: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
