Luqaasa 5

Koyro Tamaareta Xeegethaa

(Maato 4:18-22; Mar 1:16-20)

1Issi gallas Yesuusi Gensareexe Abbaa matan eqidashin daro asay iya yuushuwa un7ethidi, I tamaarsiya Xoossaa qaala si7oosona.#Maato 13:1-2; Mar 3:9-10; 4:1. 2Yan haatha gaxan de7iya nam7u wogolota be7is. Molo oykiya asati wogolotape wodhidi banta gitiya meeccosona. 3He wogolotape Simoonaysan gelidi biittafe guuthi giddo shiishana mela oychis. Yaatidi, he wogoluwa bolla uttidi asaa tamaarsis.

4Ba timirtiya ongidaape guye Simoonako, “Gede ciimmuwako shiishada moluwa oykanaw hinte gitiya yeggite” yaagis.

5Simooni zaaridi, “Astamaariyaw, qamma kumethi daaburishe aqidi aykoka oykibooko, shin ne giiko gitiya yeggana” yaagis.#Yoha 21:3.

6Enti gitiya yeggida wode gitey daaketana gakanaw daro molo oykidosona.#Yoha 21:6. 7Hara wogolon de7iya banta laggeti yidi, bantana maaddana mela wuttidi xeegidosona. Enti yidi nam7u wogoloti, haathan mitettana gakanaw molon kunthidosona.

8Simoon Phexroosi hessa be7ida wode, Yesuusa sinthan kundidi, “Godaw, taani nagarancho asi gidiya gisho, taape shaaketa” yaagis. 9I hessa giday, inne iyara de7eysati oykida moluwa darotethan malaaletida gishosa. 10Qassi Simoona lagge gidida Zabdiyoosa nayti Yayqoobaranne Yohaanisara malaaletidosona. Yesuusi Simoonako, “Babofa! Hizape neeni ase oykiya asi gidana” yaagis. 11Enti wogolota gaxa shiishidaape guye ubbaa aggidi Yesuusa kaallidosona.

Baro Harganchoy Paxis

(Maato 8:1-4; Mar 1:40-45)

12Yesuusi katamatape issuwan de7ishin issi baro hargen#5:12 Baro harge: Baro hargey asa galba bolla keyiya harge. Isra7eele biittan baro harganchoti hara asaape dummatidi de7oosonape attishin, asaara gahetokona. oyketida asi he kataman de7ees. He uray Yesuusa be7idi iya sinthan gufannidi, “Godaw, ne shene gidiko tana geeshshanaw danda7aasa” gidi woossis.

13Yesuusi ba kushiya yeddi bochidi, “Ee, ta shene; geeyiya” yaagis. Iira baro hargey uraape kichis.

14Yesuusi, “Haysa oodeska odopa, shin bada nenatethaa Ayhude kahine bessa. Ne geeyidaysas marka gidana mela Musey kiitida yarsho yarsha” gidi kiittis.#Leewe 14:1-32.

15Gidoshin, iya sunthay kasepe aadhidi eretishe bis. Daro asay I odiyaba si7anawunne banta hargiyafe paxanaw yoosona. 16Shin Yesuusi daro wode geema bessi bidi woossees.

Gunda Ura

(Maato 9:1-8; Mar 2:1-12)

17Issi gallas Yesuusi tamaarsishin Galilapenne Yihuda heera ubbaafe qassi Yerusalaamepe yida Farsaawetinne higge astamaareti yan uttidosona. Asaa pathiya Godaa wolqayka iyara de7ees. 18He wode asay issi gunda asi halara tookidi ehidosona. Soo gelsidi iya sinthan wothanaw qopidosona. 19Shin asaa darotethaafe dendoysan soo gelsanaw xoonetidi keethaa bolla keyidi, kaara qawuxidi, harganchuwa halara asaa shaakidi Yesuusa sinthan yeggidosona.

20Yesuusi enta ammanuwa be7idi, “La addiyaw, ne nagaray atto geetetis” yaagis.

21Higge astamaaretinne Farsaaweti, “Haysi Xoossaa bolla yaagidi odetey oonee? Issi Xoossafe attishin, hari nagara atto gaanaw danda7ey oonee?” yaagidi qopidosona.

22Yesuusi enta qofaa erida gisho entako, “Hinte wozanan hessatho ayis qopeetii? 23‘Ne nagaray qushetis geysafenne dendada ba geysafe awusi kawuyii?’ 24Shin ta hessa giday Asa Na7i sa7a bolla nagara ato gaanaw maati de7eysa hinte erana melasa.” Hessafe kaallidi, gunda uraako, “Denda; ne algaa tookada ne soo ba” yaagis. 25I ellesi dendidi enta sinthan eqis; I tooketidi yida algaa tookidi Xoossaa galatishe ba soo bis. 26He wode ubbayka malaaletidosona. Xoossaa galatishe, “Hachi gita malaata be7ida” yaagidi yashetidosona.

Leewe Xeegetetha

(Maato 9:9-13; Mar 2:13-17)

27Hessafe guye, Yesuusi yaape keyidi bis. Leewe geetetiya issi qaraxa qanxiseysi qaraxa qanxisiya bessan uttidaysa be7idi, “Tana kaalla” yaagis. 28I ubbaba aggidi, dendidi iya kaallis.

29He Leewey ba son gita gibira giigisis. Daro qaraxa qanxiseysatinne hara asati katha bolla uttidosona. 30Farsaawetinne higge astamaareti, “Qaraxa qanxeysataranne nagaranchotara ayis meetinne uyeetii?” yaagidi Yesuusa tamaareta bolla zuuzumidosona.#Luqa 15:1-2.

31Yesuusi entako, “Harganchotasafe attishin, paxatas aakime koshshenna. 32Taani nagaranchota maarotako zaaranaasafe attishin, geeshshata xeeganaw yabiike” yaagidi zaaris.

33Enti Yesuusako, “Yohaanisa tamaareti daro wode xoomosona, woossosona; qassi Farsaaweta tamaaretika hessatho oothosona. Shin neysati ubba wode moosonanne uyoosona” yaagidosona.

34Yesuusi entako, “Machiw ekeysi entara de7ishin xeegetida asay xoomana mela oothanaw danda7eetii? 35Shin mushuray entafe shaaketana gallasay yaana, he wode enti xoomana.”

36Qassi yaagidi leemiso odis; “Ooratha ma7ope peedhidi gal7a ma7o bolla sikey oonika baawa. Hessatho oothiko ooratha ma7uwa peedhees, oorathay gal7aas giigenna. 37Mal7anto woyne gal7a ogoron qoliya oonika baawa. Hessa oothiko, ooratha woyney gal7a ogoruwa dhusees; woyney gukees ogoroyka maaddonnaba gidees. 38Hessa gisho, ooratha woyney ooratha ogoron qolettanaw bessees. 39Hiza, caalay lo77o giya gisho, caala woyne uyi simmidi mal7anto koyey oonika baawa” yaagis.

Currently Selected:

Luqaasa 5: GFBLVF

Highlight

Copy